Maji 11–17

Maciu 10–12; Marika 2; Luke 7; 11

“O Iratou na Tinikarua Oqo sa Tala Yani ko Jisu”

Ni o wilika na Maciu 10–12; Marika 2; kei na Luke 7; 11, o na ciqoma na veivakauqeti ni Yalo Tabu ka na vukea na nomu vakavakarau. Na veivakauqeti oqo, vata kei na Lako Mai, Mo Muri Au—Baleta na Tamata Yadua kei na Matavuvale kei na ituvatuva oqo, e rawa ni veivuke ena nomu vakavakarau.

Vola na Veika o Uqeti Kina

Sureta na Veiwasei

Vakayaloqaqataki ira na gone me ra wasea na ivakarau ni nodra dau rokova na Siga ni Vakacecegu ka vakatabuya.

Vakavulica na iVunau

Gone Sobu

Maciu 10:1–10

A kaciva o Jisu e Tinikarua na iApositolo ka solia vei ira na kaukauwa me ra cakava na Nona cakacaka.

Era kila tiko beka na gone o vakavulica ni tiko e Tinikarua na noda iApositolo nikua? O na vakayagataka vakacava na veitikina oqo mo vakavulici ira kina me baleta na bibi ni Apositolo ni gauna oqo kei na ka era sa kacivi me ra cakava?

iTaviqaravi e Rawa ni Caka

• Vakalekalekataka na Maciu 10:1–10 ena vosa rawarawa. (Raica na Christ Ordaining the Apostles, Gospel Art Book, naba 38.) Vakamacalataka ni kacivi ira na iApositolo o Jisu me ra vukei Koya ena tarai cake ni Nona Lotu.

• Me ra wilika na gone na iApositolo ena iyaloyalo Christ Ordaining the Apostles (Gospel Art Book, naba 38) kei na dua na iyaloyalo ni Kuoramu ni iApositolo Le Tinikarua ena gauna oqo (raica LDS.org se dua na ilavelave ni Ensign se Liaona) ni koniferedi raraba. Vakamacalataka ni tiko e tinikarua na noda iApositolo nikua, me vaka na gauna nei Jisu.

• Vunia wavoki ena rumu na kedra iyaloyalo na iApositolo ni gauna oqo (e rawa ni o raica na kedra iyaloyalo ena dua na ilavelave ni Ensign se Liaona) ni koniferedi raraba. Sureti ira na gone me ra vaqara na iyaloyalo, ka tukuna vei ira e dua na ka lailai me baleta na iApositolo yadua (raica na “Meet Today’s Prophets and Apostles” ena LDS.org).

• Sureta e dua na gone me taura cake na iyaloyalo ni Mataveiiutaki Taumada kei na iyaloyalo ni Kuoramu ni iApositolo Le Tinikarua. Kerea na gone me liutaki ira na vo ni gone wavokita na rumu ki na dua na iyaloyalo kei Jisu. Vakadinadinataka ni ra sa liutaki keda vei Jisu Karisito na parofita kei na iapositolo.

• Wasea na nomu ivakadinadina me baleti ira na iApositolo ni Turaga.

Era sa cakava na cakacaka ni Turaga nikua na iApositolo Le Tinikarua.

Maciu 11:28–30

Ena vukei au ko Jisu niu yani Vua.

Era rawa ni yalo vakacegu na golako ne ni kilai ni na vukei ira ko Jisu ena nodra icolacola ni ra lako ki Vua.

iTaviqaravi e Rawa ni Caka

• Wilika na Maciu 11:28–30 ka vakaraitaka na iyaloyalo ni bulumakau vakaivuataki ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale. Vakadreta ni rawa ni dreta na icolacola bibi cake na bulumakau vakaivuataki mai na nodra dre yadudua. Vakadinadinataka ni gauna eda rarawa, lomaleqa, se rere kina, sa rawa ni da vaqarai Jisu ka vukei mai Vua.

• Kerea e dua na gone me laveta e dua na ka bibi. Ni sa dredre vua, vukei koya. E vukei keda vakacava o Jisu me da cakava na veika dredre? Era sa bau vakila mada na gone na Nona veivuke?

Maciu 12: 1–13

Au rawa ni vakatabuya na Siga ni Vakacecegu.

Na cava eso na sala lasa o rawa ni vakavulica vei ira na gone me baleta na Siga ni Vakacecegu kei na vuna eda vakatabuya kina?

iTaviqaravi e Rawa ni Caka

• Wilika na Maciu 12:10–13 i cake. Sureti ira na gone me ra tucake ka dabe tale ena veigauna o cavuta kina na “Siga ni Vakacecegu,” ka tokaruataka vata kei ira na malanivosa “sa [donu] kina me caka na ka vinaka ena siga ni vakacecegu” (Maciu 12:12). Na cava era nanuma ni kena ibalebale?

• Vakaraitaka e dua na ivolanivula vei ira na gone ka vakatakilakilataka vei ira na Siga ni Vakacecegu. Na cava eda dau cakava ena vo ni siga ni macawa? Na cava eda rawa ni cakava ena Siga ni Vakacecegu me duatani kina mai na veisiga tale eso? (raica na Aisea 58:13–14).

• Kerei ira na gone me ra droinitaka na veika vinaka e rawa ni ra cakava ena Siga ni Vakacecegu (raica na tabana ni itaviqaravi ni macawa oqo).

• Sureti ira na gone me ra vakasamataka na ivukivuki eso me vukea nodra nanuma na sala eda vakarautaki keda kina ki na Siga ni Vakacecegu ni ra lagata na sere “Saturday,” Children’s Songbook, 196.

• Droinitaka na mata, daliga, na gusu, kei na liga ena papa ni volavola. Kerei ira na gone me ra tukuna vei iko na veika e rawa ni cakava na veitiki ni yagoda oqo me vakatabui kina na Siga ni Vakacecegu.

Vakavulica na iVunau

Gone Qase Cake

Maciu 10:1–10; Marika 3:13–19

E rawa ni vakavulici au me baleti Jisu o ira na iApositolo Le Tinikarua.

Ena veivuke vakacava na vulici ni iApositolo Le Tinikarua ena gauna i Jisu mera kila vakavinaka cake kina na gone na veika era cakava na iApositolo Le Tinikarua ena gauna oqo?

iTaviqaravi e Rawa ni Caka

• Vakaraitaka na kedra iyaloyalo na iApositolo ena gauna i Jisu kei na noda gauna (raica na Christ Ordaining the Apostles, Gospel Art Book, naba 38, kei na dua na mekesini ni Lotu ni koniferedi raraba walega oqo). Kerei ira na gone me ra wilika na Maciu 10:1–10 kei na Marika 3:14–15 me ra kila na ka era dau cakava na iApositolo.

• Sureta e vica na gone me ra vakarau mai me ra wasea e dua na italanoa ka tukuna e dua vei ira na iApositolo bula. Era sa vukei keda tiko vakacava na iApositolo bula me da vakataka cake na iVakabula?

• Vola na yacadra na iApositolo ni gauna oqo ena tiki ni pepa eso. Sureti ira na gone me ra vakasotara na yaca ni iApositolo yadua kei na kena itaba (LDS.org). E rawa ni tokaruataki vakavica na itaviqaravi oqo.

• Wasea vei ira na gone e vica na ivakaraitaki ni nodra vakadinadinataki Karisito na iApositolo ni gauna oqo (raica na itukutuku ni koniferedi raraba se na “Se Bula na Karisito: Nodra iVakadinadina na iApositolo,” Ensign se Liaona, Epe. 2000, 2).

• Vukei ira na gone me ra cavuqaqataka ka kila na Yavu ni Vakabauta 1:6.

Maciu 11:28–30

Ena vukei au ko Jisu niu yani Vua.

O na vukei ira vakacava na gone me ra kila ni na vakacegui ira na iVakabula mai na nodra bolebole eso ni ra lako yani Vua?

iTaviqaravi e Rawa ni Caka

• Sureti ira na gone me ra wasea e dua na gauna era a lomaleqa kina se nanamaki ena dua na ka. Sureti ira me ra vaqara ena Maciu 11:28–30 na ivakasala ena vukei ira ena veigauna vakaoya.

• Sureti ira na gone me ra droinitaka na iyaloyalo ni veika era sa cakava tiko me ra lako mai kina vei Jisu ka vuli Vua. Na ikava ni yavu ni vakabauta e rawa ni solia vei ira eso na vakasama.

Maciu 12:1–14

Na Siga ni Vakacecegu sa siga ni cakavinaka me vakavolekataki au vua na Kalou.

Era na vaqaqacotaki na gone o vakavulica ni o vakabibitaka na inaki kei na veivakalougatataki ni kena rokovi na Siga ni Vakacecegu.

iTaviqaravi e Rawa ni Caka

• Sureta e dua na gone me matanataka na tamata ka a vakabula na ligana na iVakabula (raica na Maciu 12:10–13). E dua tale na gone e rawa ni vakatarogi koya me baleta na veika a sotava.

• Wilika vata na Maciu 12:12. Na cava eso na ka vinaka eda rawa ni vakayacora ena Siga ni Vakacecegu? Me ra droinitaka na gone na nodra nanuma ena tabana ni itaviqaravi ena macawa oqo, kotiva na tikina eso, ka veivukevuke ena vakasotari vata ni veitikina yadua.

• Vunia e vica na iyaloyalo ni tamata era cakava voli eso na ka e vakaraitaka na nodra lomana na Tamada Vakalomalagi ena Siga ni Vakacecegu. Kerei ira na gone me ra raica na iyaloyalo ka wasea se dau vakaraitaka vakacava na noda lomana na Kalou na vakayacori ni veika ena iyaloyalo.

• Solia vei ira yadua na gone e dua na taga me ra vakatawana kina na vakasama eso ni veika vinaka me vakayacori ena Siga ni Vakacecegu. E rawa ni ra kunea eso na vakasama ena “Vakarokorokotaki na Siga ni Vakacecegu” ena Me iSakisaki ni iTabagone, 30–31.

Vakauqeta na Vuli e Vale

Sureti ira na gone me ra wasea ena nodra matavuvale na vakasama eso me vakatabui kina na Siga ni Vakacecegu.

Vakatorocaketaki Noda Veivakavulici

Vakauqeta na vakarokoroko Vukei ira na gone me ra kila ni dua na tiki bibi ni vakarokoroko na noda vakasamataki rau na Tamada Vakalomalagi kei Jisu Karisito. E rawa ni o vakananuma vei ira na gone na vakarokoroko ena nomu lagata malua se vagugutaka voli e dua na sere se vakaraitaka toka e dua na iyaloyalo kei Jisu.