Maji 18–24

Maciu 13; Luke 8; 13

“O Koya sa Vakadaligana me Rogoca ka Mani Rogoca Sara”

Na italanoa vakaibalebale sa ra italanoa rawarawa era rawa ni vakaitavitaki ira kina na gone. Na ituvatuva oqo kei na Lako Mai, Mo Muri Au—Baleta na Tamata Yadua kei na Matavuvale e rawa ni vukei iko ni vakayagataka na italanoa vakaibalebale ni iVakabula mo vakavulici vei ira na gone na veidina bibi eso.

Vola na Veika o Uqeti Kina

Sureta na Veiwasei

Kauta mai e vica na iyaya ena vukei ira na gone me ra nanuma eso na italanoa vakaibalebale ena Maciu 13, me vaka e dua na sorenitei, dua na mataniciva, se dua na kato ni iyautalei. Sureti ira na gone me ra wasea na veika era nanuma me baleta na italanoa vakaibalebale.

Vakavulica na iVunau

Gone Sobu

Maciu 13:1–23

Au gadreva meu vakavakarau ni vulica na ivakavuvuli nei Jisu.

Era na sega beka ni rawa ni kila kece na gone sobu na ivakatakarakara ena italanoa vakaibalebale ni dau kakaburaki, ia e rawa ni ra vulica na dina vakosipeli rawarawa e vakavuvulitaka. O na vukei ira vakacava me ra kila vakavinaka cake na ibalebale ni talanoa vakaibalebale oqo kivei ira?

iTaviqaravi e Rawa ni Caka

• Vakaraitaka na veimataqali qele duidui (se iyaloyalo ni qele) ni o vakalekalekataka na Maciu 13:3–8. Solia vei ira yadua na gone e dua na sorenitei me tei ena qele. Tarogi ira na gone na cava eda rawa ni cakava me vukea na tubu ni noda sorenitei. Vakamacalataka ni noda vakabauta na Tamada Vakalomalagi kei Jisu Karisito sa dua na sala eda vukea kina me tubu na noda ivakadinadina “sorenitei”.

• Vakayagataka na tabana ni itaviqaravi ni macawa oqo me vukea nodra kila na gone na veika e vakavuvulitaka na veimataqali qele e vakamacalataki ena Maciu 13 me baleta na yaloda. Tarogi ira na gone na mataqali yalo vakacava e vinakata o Jisu me tiko vei ira me rawa ni ra vulica kina na Nona ivakavuvuli.

• Wilika na Maciu 13:9, 15, ka sureti ira na gone me ra dusia na veitiki ni yagodra duidui ni ra rogoca ni cavuti mai. E rawa vakacava ni da vakayagataka na veitiki ni yago oqo me da vulica na ivakavuvuli nei Jisu?

Maciu 13:24–30, 36–43, 47–48

E vinakati au na Tamada Vakalomalagi meu digitaka na dodonu.

Eso na italanoa vakaibalebale nei Jisu e vakavulica ni ena iotioti ni gauna, na Kalou ena tawasei ira tani na tamata ca mai vei ira na yalododonu. O rawa ni vakayagataka vakacava na italanoa vakaibalebale mo vakauqeti ira kina na gone me ra digitaka na dodonu?

iTaviqaravi e Rawa ni Caka

• Me ra dramataka na gone na italanoa vakaibalebale ni sila vinaka kei na sila ca (raica na Maciu 13:24–30). Vakamacalataka ni sila vinaka e matataki ira na tamata era digitaka na ka dodonu, kei na sila ca (co ca) e matataki ira era sega. Ena dua na siga, ena soqoni ira na tamata yalododonu na Tamada Vakalomlagi me ra bula vata kei Koya.

• Tukuna eso na italanoa rawarawa ni nodra caka digidigi voli na gone. Kerei ira na gone me ra kaya “digi sila vinaka” ni ra digitaka na gone ena italanoa na dodonu kei na “digi sila ca” ni ra digidigi cala.

• Kauta mai na iyaloyalo ni vunisila vinaka, me ra qai droinitaka na gone ena iyaloyalo eso na sala e rawa ni ra buladodonu kina.

• Cakava e dua na qito me ra vakasotara vata na gone na veika matailalai mai na italanoa vakaibalebale ni daukakaburaki mai na ivakadewa ena Maciu 13:18–23.

Maciu 13:44–46

Sa dua na iyautalei na noqu lewena na Lotu i Jisu Karisito ni Yalododonu Edaidai.

O rawa vakacava ni vakayagataka na ivakatakarakara ni iyau kei na mataniciva talei eso mo vukei ira kina na gone me ra kila na yaga vakalevu ni nodra lewena na Lotu i Karisito?

iTaviqaravi e Rawa ni Caka

• Vunia na iyaloyalo ni dua na kato ni iyautalei kei na mataniciva ena rumu, ka me ra qai vakaraica na gone. Vakayagataka na iyaloyalo eso me vukea nomu vakavulica na italanoa vakaibalebale ena Maciu 13:44–46. Na cava beka era na solia na gone me nodra e dua na mataniciva totoka se iyautalei ena were? Vakamacalataka ni so na gauna eda solia yani eso na ka vinaka me baleta e dua na ka vinaka cake. Tukuna vei ira na gone na vuna e sa rui yaga kina vei iko na kosipeli.

• Biuta ena dua na kateni se kato e vica na iyaya se iyaloyalo ka matataka na “iyautalei” ena Lotu i Jisu Karisito ni Yalododonu Edaidai, me vaka na valetabu se na iVola i Momani. Kerei ira yadua na gone me ra digitaka e dua na iyaya se iyaloyalo ka veivosakitaka na vuna e iyautalei kina.

• Lagata vata “The Church of Jesus Christ,” Children’s Songbook, 77, ka kerei ira na gone me ra vakarogoca na veivakalougatataki e yaco mai ni da lewena na Lotu. Vakadinadinataka na veivakalougatataki o sa sotakaya baleta nomu lewena na Lotu.

Vakavulica na iVunau

Gone Qase Cake

Maciu 13:1–23

Au gadreva meu vakarautaka na yaloqu ni vulica na ivakavuvuli nei Jisu.

O na vukei ira vakacava na gone me ra vakila na bibi ni kena tiko na yalo kei na loma malumalumu me rawa ni vakavulici ira o Jisu?

iTaviqaravi e Rawa ni Caka

• Lesi ira yadua na gone me ra wilika e dua vei ira na va na mataqali qele ena Maciu 13:4–8. Sureti ira me ra vaqara ka wasea na ka e yaco ki na sorenitei ena mataqali qele era sa wilika. Ena rawa ni tautauvata vakacava kei na veimataqali qele duidui na yaloda? (raica na Maciu 13:19–23).

• Solia vei ira yadua na gone e rua na sorenitei, ka sureti ira me ra tea na nodra sorenitei ena qele malumu kei na dua na ibinibini vatu. Na sorenitei cava ena rawarawa ni bula? E rawa vakacava ni da vakadeitaka ni sa vaka na qele malumu na yaloda me rawa ni da ciqoma kina na ivakavuvuli ni iVakabula?

• Sureti ira na gone me ra wilika na Maciu 13:9–17. Droinitaka e dua na mata, daliga, kei na uto ena papa. Eda sa vakayagataka vakacava na veitiki ni yago oqo me da vulica kina na ivakavuvuli i Jisu?

Maciu 13:24–30, 36–43

Sa rawa niu digitaka na dodonu kevaka mada ga era sega ni vaka tu kina na wavoliti au tu.

Ni o wilika na veitikina oqo ni vakasamataki ira tu na gone, na vakanananu cava soti e votu mai vei iko?

iTaviqaravi e Rawa ni Caka

• Sureti ira na gone me ra droinitaka na iwase duidui eso ni talanoa vakaibalebale ni sila vinaka kei na sila ca, e kune ena Maciu 13:24–30, ka wasea na nodra droini ki na kalasi. Kerei ira me ra vakayacana nodra droini ena vakayagataki ni ivakadewa ni talanoa vakaibalebale ena Maciu 13:36–43. Vakamacalataka ni ra co rerevaki na sila ca.

• Kevaka e rawa, vakaraitaka e dua na iyaloyalo ni sila vinaka kei na sila ca. Vakamacalataka ni rau na tubu vata ga na sila vinaka kei na sila ca me yacova na ivakataotioti kei vuravura. Oqo e vakavulica vei keda ni da bula wavolita ruarua tu na vinaka kei na ca, ka sa dodonu me da qarauna ni digitaka na dodonu. Kerei ira na gone me ra wasea se rawa vakacava ni ra veidutaitaka na vinaka kei na ca.

Maciu 13:44–46

Sa dua na iyautalei na noqu lewena na Lotu i Jisu Karisito ni Yalododonu Edaidai.

Era raica beka na gone o vakavulica tiko ni sa dua na iyautalei na nodra lewena na Lotu? Rairai na italanoa vakaibalebale ena Maciu 13:44–46 e rawa ni vukei ira.

iTaviqaravi e Rawa ni Caka

• Sureti ira na gone me ra wilika vakaiira na Maciu 13:44–46 ka wasea na italanoa vakaibalebale ena nodra vosa ga kei na dua tale na lewe ni kalasi.

• Kotiva e vica na pepa momokiti me matataka na ilavosiliva, ka biuta ena dua na kato ni iyau. Sureti ira na gone me ra taura e dua na ilavosiliva ka droinitaka se vola kina e dua na ka era taleitaka ena nodra lewena na Lotu. Kerei ira na gone me ra wasea na ka era biuta ena nodra ilavosiliva.

• Sureta e dua na lewe ni tabanalevu me wasea na italanoa ni nona saumaki mai vei ira na gone ka tukuna na veika a biuta tani me lewena na Lotu i Jisu Karisito ni Yalododonu Edaidai.

Vakauqeta na Vuli e Vale

Sureti ira na gone me ra vakavulica nodra matavuvale ena dua vei ira na italanoa vakaibalebale era a vullica ena Lalai.

Vakatorocaketaki Noda Veivakavulici

Era taleitaka na gone me ra wasea na veika era sa vulica tiko. Ni ra se gone ga, sa rawa vei ira me ra vaqaqacotaka na lewe ni nodra matavuvale. Vakauqeti ira me ra wasea kei na nodra matavuvale na veika era vulica ena Lalai. (Raica na Veivakavulici ena iVakarau ni iVakabula 30.)