“Maji 18-24. Maciu 13; Luke 8; 13: “O Koya sa Vakadaligana me Rogoca, Me mani Rogoca Sara” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“Maji 18-24. Maciu 13; Luke 8; 13:” Lako Mai, Mo Muri Au—Me Baleti Ira na Tamata Yadua kei na Matavuvale: 2019
Maji 18–24
Maciu 13; Luke 8; 13
“O Koya sa Vakadaligana me Rogoca, Me mani Rogoca Sara”
Ni o wilika na Maciu 13 kei na Luke 8; 13, vakasamataka o na vakarautaki iko vakacava mo “rogoca” ka vakavinavinakataka na ivakavuvuli ni iVakabula ena vosa vakatautauvata. Na cava o na cakava mo vakayacora kina na ivakavuvuli oqo ena nomu bula?
Vola na Nomu Veivakasama
Eso na nona ivakavuvuli guiguilecavi dredre na iVakabula e vakavulici vakaitalanoa rawarawa ka vakatokai me italanoa vakaibalebale. Oqo e uasivita na italanoa veisiwati ni veika wale se ka yaco. E vakatawani ena dina titobu baleta na matanitu ni Kalou me baleti ira era sa vakarau tu vakayalo. E dua vei ira na vosavakaibalebale e tukuni ena Veiyalayalati Vou—na italanoa vakaibalebale ni daukakaburaki (raica na Maciu 13:3–23)—e sureti keda meda dikeva na noda vakavakarau meda ciqoma na vosa ni Kalou. “Kivua sa ciqoma,” e cauraka o Jisu, “ena qai soli vua, ka na qai vakalevutaki cake na ka e nona” (iVakadewa nei Josefa Simici, Maciu 13:10 [ena Maciu 13:12, vakamacala e ra a]). Ni da sa vakarau meda vulica na italanoa vakatautauvata ni iVakabula—e dua na vanua vinaka meda tekivu kina oya meda vakadikeva mada na lomada ka qai raica kevaka eda sa solia tiko kina vosa ni Kalou na “qele vinaka” me tubu kina, serau, vuavuai vinaka, ka qai vuataka mai na vua ena vakalougatataki keda kei na noda matavuvale vakalevu sara (Maciu 13:8).
Vakasama eso ni Vuli iVolanikalou Yadua
Na cava na “matanitu vakalomalagi” e kaya tiko na Karisito ena Maciu 13?
Ena wase oqo, “na matanitu vakalomalagi” e vakatokai tiko kina Lotu dina i Karisito, sai koya na matanitu vakalomalagi e vuravura. Me ikuri ni itukutuku, raica na Bible Dictionary, “Kingdom of heaven or kingdom of God.”
Me vakavakarau na lomaqu me ciqoma na vosa ni Kalou.
Na cava e ciqoma kina na dina eso na loma ni tamata ka so e vorata? Na kena wilika na vosavakatautauvata ni daukakaburaki ena rawa ni vakarautaka na madigi vinaka me vakasamataki na sala o ciqoma kina na dina mai vua na Turaga. Ena veivuke beka mo veiduitaitaka na tikina e 3–8 ena Maciu 13 ivakadewa e tiko ena tikina e 18–23. Na cava o rawa ni cakava mo cukiraka kina na “qele vinaka” e lomamu? Na cava e so na “wa vakavotona” ka rawa ni ivakatao ni nomu rogoca vakaidina ka muria na vosa ni Kalou?
Raica talega na Luke 13:34; Mosaia 2:9; 3:19; Alama 12:10 – 11; 32: 28 – 43; Dallin H. Oaks, “Na Vosa Vakatautauvata ni Daukakaburaki,” Ensign se Liaona, Me. 2015, 32–35.
Na vosavakatautauvata i Jisu e vukei au me’u kila vinaka na tubu kei nai cavacava ni Nona Lotu.
E vakatavulica na Parofita o Josefa Simici ni Maciu 13 e vakamacalataka na tubu kei nai cavacava ni Lotu ena iotioti ni gauna (raica na Vakavuvuli ni Peresitedi ni Lotu: Josefa Simici [2007], 293–303). Ni o wilika na italanoa vakatautauvata oqo, vola na veika o vulica me baleta na Lotu ni Turaga (ena rawa ni o raica na veika e vola na Parofita o Josefa ni a vakatavulica tiko na veika me baleta na italanoa vakaibalebale oqo):
-
Na sili ca kei na witi (13:24–30, 36–43): E rau na tubu vata tiko na yalododonu kei na ivalavala ca me yacova nai vakataotioti ni vuravura.
-
Na sore ni mosita (13:31–32):
-
Na leveni (13:33):
-
Nai yau sa vuni tu ena were kei na mataniciva talei sara (13:44–46):
-
Na lawa ni yavi (13:47–50):
-
Na tamata e taukena e dua na vale (13:52):
Ni o sa vakasamataki ira vakatitobu na vosavakaibalebale oqo, na cava o vakauqeti mo cakava mo vakaitavi vakalevu cake kina ena cakacaka ni Lotu i Karisito ena gauna oqo? Na taro cava so e yaco mai ena nomu vakasama ka na rawa ni vukei iko mo cakacakataka na vosavakaibalebale oqori? Me vakaoqo, “Na cava au sa loma soli kina meu soli bulataka ki na Lotu?”
Raica talega na Bible Dictionary, “Leaven,” “Parables.”
Na kosipeli i Jisu Karisito e “mataniciva talei” (Maciu 13:46).
Na yalododonu ena tubu ena kedra maliwa na valavala ca me yacova nai vakataotioti ni vuravura.
E dua na sala me vakadikevi kina na vosa vakatautauvata sai koya me droini taki e dua na kena iyaloyalo kei na kena vakadewataki ena Maciu 13:36–43 kei na Vunau kei na Veiyalayalati 86:1–7. Na silica ca “e dua na co ca e gaga, ka, yacova sara ni sa matua, e via tautauvata kei na witi na kena irairai” (Bible Dictionary, “Tares”. Na dina cava ena vosa vakatautauvata e vakauqeti iko mo yalodina tiko ga veitalia nai valavala ca ena vuravura oqo?
Ena sala cava so era qarava kina na iVakabula o ira na “yalewa yalodei”?
“E vuqa tale na tisaipeli yalewa era a lako vata kei Jisu kei iratou na Le Tinikarua, era vuli vakayalo mai vei [Jisu] ka qaravi Koya vakayago. … Me ikuri ki na ciqomi ni veiqaravi i Jisu—na vinaka ni Nona kosipeli kei na veivakalougatataki ni kaukauwa ni Nona veivakabulai—era qaravi Koya, ena nodra wasea na veika e tiko vei ira kei na yalodina” (Luvequ Yalewa ena Noqu Matanitu [2011], 4). O ira na marama era muria na iVakabula era vakadinadinataka ena kaukauwa me baleti Koya (raica na Linda K. Burton, “Ira na Yalewa Yalodei,” Ensign se Liaona, Me 2017, 12–15).
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o vulica tiko kei na nomu vuvale na bula ni iVakabula, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
Ni ra wilika na nomu vuvale na vosa vakatautauvata ni iVakabula, era na taleitaka beka me ra vakasamataka eso tale nodra vosa vakatautauvata e vakavulica na dina vata oqori me baleta ana matanitu vakalomalagi (na Lotu), ni vakayagataki tiko na iyaya kei na ituvaki e ra kila tiko.
Na cava eda rawa ni cakava vakamatavuvale me da cukiraka na “qele vinaka” ena lomada kei na noda vuvale? (Maciu 13:23). Kevaka era tiko na gonelalai ena nomu vuvale, ena rawa ni ka ni lasa me ra vakatasuasuataka na lewe ni vuvale na veisala eso e rawa ni vakarautaki ki na lomada meda rogoca na vosa ni Kalou ni ra vakilakila na vo ni lewe ni vuvale na veika era cakava tiko.
Ena rawa vakacava mo vukea na nomu lewe ni vuvale me ra kila vinaka na bibi ni kena ciqomi na vosa i Karisito? Me ivakaraitaki, e rawa ni o tabonaka na daligana e dua na lewe ni vuvale ni o wilika tiko vakamalua na Maciu 13:13–16. Na cava e vakila na lewe ni vuvale oya mai na veitikina oqori? Nai tavi cava era vakayacora na matamu, daligamu, kei na lomamu ena kena ciqoma na vosa ni Kalou? Na cava eso na sala eda sogota kina na matada, daligada, kei na lomada ki na vosa ni Kalou?
Na cava erau via tautauvata kina o rau na rua na turaga ena vosa vakatautauvata oqo? E tiko eso tale na ka e dodonu meda cakava tiko ena nodra bula yadua ka vakamatavuvale me rawa ni da vakaliuca na matanitu ni Kalou ena noda bula?
Ena rawa vakacava meu muria nai vakaraitaki ni noda iVakabula ka sereki ira na tamata mai na bula vesuki?
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakatorocaketaki ni Noda Veivakavulici
Vakalekalekataka e dua na ivolanikalou Digia e dua na ivolanikalou e vakaibalebale kina nomu vuvale, ka sureti ira na leweni vuvale me ra cavuqaqataka. E vakatavulica o Elder Richard G. Scott, “E dua na tikini volanikalou sa cavuqaqataki ena nomu itokani ka na sega ni vakamalumalumutaki ena gauna” (Na Kaukauwa ni Volanikalou,” Ensign se Liaona, Nove. 2011, 6).
Nai Talanoa Vakatautauvata ni Daukakaburaki, mai vei George Soper