Pebrero 11–17

Juan 2–4

“Kinahanglan nga Igaanak Kamo Pag-usab”

Ang imong pagpangandam sa pagtudlo nagsugod samtang imong basahon ang Juan 2–4. Ang Dali, Sunod Kanako—Alang sa mga Indibidwal ug mga Pamilya makatabang kanimo sa pagsabut niini nga mga kapitulo, ug kini nga outline makahatag kanimo og mga ideya sa pagtudlo.

Irekord ang Imong mga Impresyon

Awhaga ang Pagpaambit

Awhaga ang mga bata sa pagpaambit sa unsay ilang nakat-unan ug nasinati pinaagi sa pagpangutana kanila kon unsay ilang bag-ong gibuhat aron mahimong “mga mangingisdag tawo” (Juan 4:19). Tingali kinahanglan nimong ribyuhon ang leksyon sa miaging semana uban kanila.

Itudlo ang Doktrina

Mas Gagmay nga mga Bata

Juan 3:1–10

Kinahanglan ko nga mabunyagan ug makumpirmahan aron makabalik sa pagpuyo uban sa Langitnong Amahan.

Ang mga bata nga imong gitudloan nangandam sa paghimo sa importanting mga lakang aron makapuyo pag-usab uban sa Langitnong Amahan pinaagi sa pagpabunyag (igaanak sa tubig) ug pagpakumpirma (igaanak sa Espiritu). Unsaon nimo sila pagtabang nga makasabut sa kaimportante niining duha ka mga ordinansa?

Posible nga mga Kalihokan

• I-summarize ang istorya ni Jesus nga nagtudlo kang Nicodemo. Saari ang mga bata nga kon sila mabunyagan, ang Langitnong Amahan mohatag kanila sa gasa sa Espiritu Santo.

• Gamita ang Juan 3:5 ug ang pahina sa kalihokan karong semanaha sa pagtudlo nga kinahanglan kitang mabunyagan ug makumpirmahan aron makapuyo pag-usab uban sa Langitnong Amahan.

• Hangyoa ang mga bata sa paghisgot sa unsay ilang buhaton kon manghugas sa ilang mga kamot. Ipakita ang hulagway nga Batang Babaye Nga Gibunyagan (Libro sa mga Hulagway sa Ebanghelyo, nu. 104), ug tabangi ang mga bata nga itandi ang pagpanghugas sa kamot ngadto sa pagkahimong limpyo sa espiritwal nga paagi pinaagi sa bunyag.

Juan 3:16

Ang Langitnong Amahan nahigugma kanako, mao nga gihatagan ko Niya og usa ka Manluluwas.

Unsaon nimo sa pagtabang ang mga bata nga makakat-on niining bililhon nga kamatuoran?

Posible nga mga Kalihokan

• Hangyoa ang mga bata sa pagkompleto sa mga sentence nga sama niini: “Tungod kay gihigugma ako sa akong mga ginikanan, sila. …” Basaha ang Juan 3:16. Dayon tabangi ang matag bata nga balikon sa pagbasa ang Juan 3:16, nga ilisan sa iyang kaugalingong ngalan ang mga pulong nga “ang kalibutan,” ug papaminawa ang mga bata kon unsa ang gibuhat sa Langitnong Amahan tungod kay gihigugma kita Niya. Dapita ang mga bata sa pagdrowing og mga hulagway sa mga butang nga makatabang kanila nga mobati sa gugma sa Langitnong Amahan alang kanila (sama sa pamilya, kinaiyahan, ang mga kasulatan, ug uban pa). Tuguti sila nga ipakita ang ilang mga drowing sa usag usa.

• Ipaisa sa mga bata ang litrato ni Jesus sa matag higayon nga mokanta sila og “Anak” sa “Mipadala sa Bugtong Anak,” Songbook sa mga Bata, 20–21.

Juan 4:5–15

Si Jesukristo mao ang akong “buhi nga tubig.”

Ang tanang mga bata sa imong klase nakasulay nga mobati og kauhaw. Unsaon nimo paggamit niana nga kasinatian aron sa pagtabang sa mga bata nga makasabut kon unsa gayud nato kakinahanglan ang buhi nga tubig nga gitanyag ni Jesukristo?

Posible nga mga Kalihokan

• Gamita ang litrato sa outline niini nga semana sa Dali, Sunod Kanako—Alang sa mga Indibidwal ug mga Pamilya aron sa pagsaysay sa istorya ni Jesus ug sa babaye didto sa atabay. Hangyoa ang mga bata sa pagsaysay og balik sa istorya.

• Ipakita ang usa ka baso nga tubig, ug pangutan-a ang mga bata unsa kaha ang mahitabo kon uhaw kita kaayo ug ang baso walay sulod. Daklit nga i-summarize ang Juan 4:5–15, ug pagpamatuod nga si Jesukristo ug ang Iyang ebanghelyo naghatag og kinabuhi sa atong mga espiritu, sama sa tubig nga naghatag og kinabuhi sa atong mga lawas.

Itudlo ang Doktrina

Mas Dagko nga mga Bata

Juan 2:1–11

Makatahud ko sa akong inahan sama sa gibuhat ni Jesus.

Sa kasal sa Cana, si Maria misulti kang Jesus nga nahurot na ang bino. Sumala sa Hubad ni Joseph Smith, si Jesus mitubag sa Iyang inahan pinaagi sa pagpangutana, “Babaye, unsa man ang imong gusto nga akong buhaton alang kanimo? kana akong buhaton.” Si Jesus usa ka ehemplo kon unsaon sa mga bata pagtratar ang ilang mga inahan.

Posible nga mga Kalihokan

• Dapita ang mga bata sa pagbasa sa Juan 2:1–11 ug magpuli-puli sa pagsaysay og usab sa mga parte niini sa ilang kaugalingong mga pulong.

• Hangyoa ang mga bata sa paglista og mga butang nga tingali nagkinahanglan ang ilang inahan og tabang. Dapita sila sa pagpraktis sa unsay ilang isulti kaniya pinaagi sa paggamit sa pipila sa mga pulong ni Jesus: “Unsa man ang imong gusto nga akong buhaton alang kanimo?”

• Dapita ang pipila ka mga inahan sa pagbisita sa imong klase ug sa pagpaambit kon unsa ang gibuhat sa ilang mga bata aron sa pagpakita og pagtahud kanila.

Si Jesus miingon sa iyang inahan, “Unsa man ang gusto nimo nga akong buhaton alang kanimo?” (Joseph Smith Translation, John 2:4).

Juan 3:1–8

Ang mabunyagan ug makumpirmahan susama ra nga gipakatawo pag-usab.

Sa dihang kita gibunyagan, nga gitawag ni Jesus og “igaanak sa tubig”, nakadawat kita og kapasayloan sa atong mga sala ug “makasulod sa gingharian sa Dios” (Juan 3:5). Unsaon nimo pagtabang ang mga bata nga imong gitudloan nga makasabut unsa ang kahulugan sa gipakatawo pag-usab?

Posible nga mga Kalihokan

• I-sagul-sagol ang mga pulong sa Manluluwas diha sa Juan 3:3 ug ipabutang kini sa mga bata sa sakto nga han-ay. Sa unsang paagi ang pagpabunyag ug pagpakumpirma sama sa pagpakatawo pag-usab?

• Ipakita ang hulagway sa usa ka bag-ong natawo nga bata ug sa usa ka tawo nga gibunyagan ug gikumpirmahan (tan-awa sa Libro sa mga Hulagway sa Ebanghelyo, nu. 104 ug 105). Sa unsang paagi kita sama sa bag-ong natawo nga bata human kita nabunyagan ug nakumpirmahan? (tan-awa sa Juan 3:3–5).

• Dapita ang mga bata sa pagpaambit og mga panumduman sa ilang bunyag. Basaha ang Mosiah 18:8–10 ug Doktrina ug mga Pakigsaad 20:37 aron sa pagribyu sa pakigsaad sa bunyag. Tudloi ang mga bata nga ang mahunahunaon nga pag-ambit sa sakrament matag semana maoy usa ka paagi sa pagpadayon sa proseso sa pagpakatawo pag-usab.

• Tabangi ang mga bata nga makasag-ulo sa Mga Artikulo sa Hugot nga Pagtuo 1:4.

Juan 3:16–17

Ang Langitnong Amahan nahigugma kanako, mao nga Iyang gipadala ang Iyang Anak.

Unsaon nimo pagtabang ang mga bata nga masayud nga si Jesukristo gipadala sa yuta isip usa ka pagpahayag sa gugma sa Langitnong Amahan?

Posible nga mga Kalihokan

• Hangyoa ang mga bata sa pagdrowing og hulagway sa ilang paborito nga gasa ug sa tawo nga mihatag kanila niana nga gasa. Dayon hangyoa ang usa ka bata sa pagbasa sa Juan 3:16. Unsa nga gasa ang gihatag sa Langitnong Amahan kanato? Sa unsang paagi kini nga gasa nagpakita sa Iyang gugma?

• Hangyoa ang mga bata sa pagpaminaw og mga tubag sa pangutana, “Nganong gipadala sa Langitnong Amahan si Jesukristo kanato?” samtang manganta o maminaw sila sa “Mipadala sa Bugtong Anak,” Songbook sa mga Bata, 20–21.

Juan 4:6–23

Si Jesukristo mitanyag kanako sa “buhi nga tubig.”

Sama nga gigamit ni Jesus ang tubig sa pagtudlo sa babaye nga Samarianhon, mahimo nimong gamiton ang tubig sa pagtudlo sa mga bata nganong nagkinahanglan kita sa ebanghelyo ni Jesukristo.

Posible nga mga Kalihokan

• Hatagi ang mga bata og mainom nga tubig, ug hangyoa sila sa pagpaambit og mga kasinatian sa dihang giuhaw sila. Hisguti kon unsa ang gibati sa dihang nakainom na og tubig sa katapusan.

• Pagsulat og summary nga mga sentence gikan sa istorya sa babaye didto sa atabay, ug hangyoa ang mga bata sa pagtan-aw sa Juan 4:6–23 aron mabutang ang mga sentence sa sakto nga han-ay. Unsay gustong itudlo ni Jesus sa babaye?

• Pagdrowing diha sa pisara og usa ka tasa nga tubig ug usa ka sapa o suba. Dapita ang mga bata sa pagngalan og mga butang nga, sama sa usa ka tasa nga tubig, nga makatagbaw kanato sa makadiyot. Unsa ang mga butang nga sama sa “buhi nga tubig” nga makatagbaw kanato sa kahangturan?

• Isulat diha sa pisara ang Sa unsang paagi ang ebanghelyo sama sa tubig? Hangyoa ang mga bata sa paghunahuna kon unsaon nila sa pagtubag niini nga pangutana samtang magbasa sila sa Juan 4:6–23.

Awhaga ang Pagkat-on diha sa Panimalay

Ikonsiderar ang paghangyo sa mga bata sa paghatag sa mga sakop sa ilang pamilya og mainom nga tubig kon mouli na sila. Samtang ila kining buhaton, mahimo silang mopaambit sa ilang nakat-unan mahitungod sa buhi nga tubig.

Pagpalambo sa Atong Pagtudlo

Gamita ang mga pahina sa kalihokan. Samtang kompletuhon sa mga bata ang mga pahina sa kalihokan, gamita ang panahon sa pagribyu sa mga baruganan gikan sa leksyon.