“Pebrero 11–17. Juan 2–4: ‘Kinahanglan Matawo Kamo Pag-usab’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Pebrero 11–17. Juan 2–4,” Dali, Sunod Kanako—Alang sa mga Indibidwal ug mga Pamilya 2019
Pebrero 11–17
Juan 2–4
“Kinahanglan Matawo Kamo Pag-usab”
Samtang magbasa ka sa Juan 2–4, ang Espiritu motudlo kanimo sa mga butang bahin sa imong kaugalingong pagkakabig. Isulat ang Iyang mga pag-aghat. Mahimong makakita ka og dugang nga espirituhanong mga panabut gikan sa mga ideya sa pagtuon niini nga outline.
Irekord ang Imong mga Impresyon
Sa kasaulogan sa kasal sa Cana, gihimo ni Kristo ang tubig ngadto sa bino—usa ka kalihokan nga gitawag ni Juan “nahauna sa [iyang] mga milagro” (Juan 2:11). Tinuod kana nga adunay laing kahulugan: samtang mao kini ang unang milagro ni Jesus nga gihimo sa publiko, nagsimbolo usab kini og laing milagroso nga sinugdanan—ang proseso sa atong mga kasingkasing nga mausab kon mahimo kitang mas sama sa atong Manluluwas. Kini nga milagro sa tibuok kinabuhi nagsugod sa desisyon sa pagsunod ni Jesukristo, nga mag-usab ug magpuyo nga mas maayo nga kinabuhi pinaagi Kaniya. Sa katapusan kini nga kausaban mahimong kompleto kaayo nga ang pagkahimong “matawo pag-usab” mao ang usa sa labing maayong paagi sa paghulagway niini (Juan 3:7). Apan ang pagkatawo pag-usab mao lang ang sinugdanan sa dalan sa pagkatinun-an. Ang mga pulong ni Kristo ngadto sa babayeng taga-Samaria sa may atabay nagpahinumdom nato nga kon mopadayon kita niini nga dalan, sa katapusan ang ebanghelyo mahimong “atabay sa tubig” sa sulod kanato, “magatubod ngadto sa kinabuhing dayon” (Juan 4:14).
Mga Ideya alang sa Personal nga Pagtuon sa Kasulatan
Ang gahum ni Jesukristo makausab kanako.
Samtang magbasa ka bahin sa Manluluwas nga miusab sa tubig ngadto sa bino sa Juan 2:1–11, unsa nga mga panabut ang imong maangkon bahin sa gahum ni Kristo sa pag-usab kanimo?
Makaangkon ka og dugang nga mga panabut pinaagi sa pagkonsiderar sa mga panglataw sa lain-laing mga tawo kinsa didto, sama ni Maria, sa mga tinun-an, ug sa uban. Sa unsa nga paagi nakasinati kining mga tawhana sa milagro? Mahimo nimong itandi unsay imong nakat-unan bahin sa mga milagro niini nga mga bersikulo sa unsay gitudlo ni Jesukristo ni Nicodemo (tan-awa sa Juan 3:1–8) ug sa babaye diha sa atabay (tan-awa sa Juan 4:3–26).
Kinahanglan nga matawo ako pag-usab aron makasulod sa gingharian sa Dios.
Sa dihang si Nicodemo miadto ni Jesus sa pribado, mabinantayon siya nga tig-obserbar. Unya, hinoon, gipanalipdan niya si Jesus sa publiko (tan-awa sa Juan 7:45–52) ug miapil sa mga tumutuo sa lubong sa Manluluwas (tan-awa sa Juan 19:38–40). Unsa nga mga pagtulun-an ang imong nakita sa Juan 3:1–21 nga tingali nakapadasig ni Nicodemo sa pagsunod ni Jesus ug matawo pag-usab?
Si Propeta Joseph Smith mitudlo, “Ang pagpakatawo pag-usab, moabut pinaagi sa Espiritu sa Dios pinaagi sa mga ordinansa” (Mga Pagtulun-an sa mga Presidente sa Simbahan:Joseph Smith [2007], 113). Unsa ang tahas sa imong bunyag (ang “igaanak sa tubig” [Juan 3:5]) ug ang kumpirmasyon (ang “igaanak sa Espiritu” [Juan 3:5]) sa pagkatawo pag-usab? Unsay imong gibuhat sa pagpadayon niini nga proseso sa kausaban? (tan-awa sa Alma 5:11–14).
Tan-awa usab sa Mosiah 5:7; 27:25–26; ; David A. Bednar, “Kinahanglang Matawo Kamo Pag-usab,” Liahona, Mayo 2007, 19–22.
Gipakita sa Langitnong Amahan ang Iyang gugma pinaagi ni Jesukristo.
Si Elder Jeffrey R. Holland mitudlo, “Ang unang dakong kamatuoran sa tanang kahangturan mao nga ang Dios nahigugma kanato sa tibuok Niyang kasingkasing, gahum, hunahuna, ug kusog” (“Ugma ang Ginoo Mobuhat og Katingalahan diha Kaninyo,” Liahona, Mayo 2016, 129). Sa unsa nga paagi nimo nabati ang gugma sa Dios pinaagi sa gasa sa Iyang Anak?
Ang sakrament naghatag og panahon sa paghunahuna sa gugma sa Dios ug sa gasa sa Iyang Anak. Unsa nga mga himno ang nakatabang nimo nga mobati niini nga gugma? Ikonsiderar ang pagkanta pagdungan sa “Ako Nagpabilin nga Natingala”(LDS.org). Unsay imong mabuhat aron mahimong mas makahuluganon ang sakrament?
Ang Dios ba usa ka Espiritu?
Ang uban tingali maglibug sa pamahayag ni Jesus nga ang Dios usa ka espiritu. Ang Hubad ni Joseph Smith niini nga bersikulo naghatag og importante nga pagpatin-aw: “Kay ngadto sa mao ang Dios misaad sa iyang Espiritu”. Ang moderno nga pagpadayag nagtudlo usab nato nga ang Dios adunay unod ug mga bukog (tan-awa sa D&P 130:22–23; tan-awa usab sa Genesis 5:1–3; Mga Hebreohanon 1:1–3).
Gitanyag ni Jesus kanako ang Iyang buhi nga tubig.
Unsa kahay gipasabut ni Jesus sa dihang Iyang gisultihan ang babayeng taga-Samaria nga bisan kinsa ang moinom sa tubig nga Iyang gitanyag dili na gayud pagauhawon? Sa unsa nga paagi nga ang ebanghelyo sama sa buhing tubig?
Ang ebanghelyo ni Kristo mao ang buhing tubig nga nag-amuma sa kalag.
Usa sa mga mensahe sa Manluluwas ngadto sa babayeng taga-Samaria mao nga kon sa unsa nga paagi kita nagsimba mas importante kay sa asa kita mosimba (tan-awa sa Juan 4:21–24). Unsay imong gihimo sa “pagsimba sa Amahan diha sa espiritu ug sa kamatuoran”? (Juan 4:23).
Tan-awa usab sa Giya ngadto sa mga Kasulatan, “Pagsimba”; Dean M. Davies, “Ang mga Panalangin sa Pagsimba,” Liahona, Nov. 2016, 93–95.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Samtang ang imong pamilya magbasa niini nga mga kapitulo niining semanaha, hatagi og espesyal nga pagtagad sa unsa nga paagi gigamit sa Manluluwas ang matag adlaw nga mga butang—pag-anak, hangin, tubig, ug pagkaon—sa pagtudlo sa espirituhanong mga kamatuoran. Unsa nga mga butang sa imong balay ang imong magamit sa pagtudlo sa espirituhanong mga kamatuoran?
Samtang likayan nimo ang mga butang nga makapahugaw sa imong balay sa pisikal ug espirituhanon nga paagi, mahimo kining sagrado nga dapit—sama sa templo. Unsay gikinahanglan sa imong pamiya nga dili isulod sa inyong balay aron kini mahimong sagrado nga dapit? Unsay imong buhaton aron kadtong mga butang dili makasulod?
Hangyoa ang mga sakop sa pamilya sa paghunahuna bahin sa milagro sa pagmabdos ug pagpanganak—ang proseso sa paglalang og kinabuhi, buhi, intelehente nga binuhat. Si Kristo nagtudlo nga kinahanglan kita matawo pag-usab sa dili pa mosulod sa gingharian sa Dios. Ngano nga ang pagkatawo pag-usab usa ka maayong sambingay alang sa kausaban nga gikinahanglan gikan nato sa dili pa kita makasulod sa gingharian sa Dios? Sa unsa nga paagi nimo nasinati ang proseso sa espirituhanong pagkatawo pag-usab?
Dapita ang mga sakop sa pamilya sa pagsulti pag-usab niini nga bersikulo sa ilang kaugalingong mga pulong ingon og nagpasabut sila niini ngadto sa usa ka higala. Sa unsa nga paagi si Kristo mitabang nato nga mobati sa gugma sa Dios sa atong kinabuhi?
Unsay gitudlo sa Manluluwas kanato sa dihang Iyang gitandi ang Iyang ebanghelyo ngadto sa buhing tubig? Ikonsiderar ang paggunit og baso nga dunay tubig ug hangyoa ang imong pamilya sa paghulagway sa mga kalidad sa tubig. Nganong kinahanglang moinom kita og tubig kada adlaw? Ngano kaha nga gitandi ni Jesukristo ang Iyang ebanghelyo ngadto sa “usa ka tubod sa tubig nga magatubo ngadto sa pagka-kinabuhing dayon”? (Juan 4:14).
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Pangitaa ang mga simbolo. Ang mga kasulatan sa kasagaran mogamit og mga butang, mga panghitabo, mga aksyon, o mga pagtulun-an sa pagrepresentar sa espirituhanong mga kamatuoran. Kini nga mga simbolo makapalambo sa imong pagsabut sa doktrina nga gitudlo. Pananglit, ang Manluluwas mipahisama sa pagkakabig ngadto sa pagkatawo pag-usab.
Buhing Tubig, ni Simon Dewey