“Pebrero 18–24. Mateo 5; Lucas 6: ‘Bulahan Kamo’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Pebrero 18–24. Mateo 5; Lucas 6,” Dali, Sunod Kanako—Alang sa mga Indibidwal ug mga Pamilya: 2019
Ang Wali sa Ibabaw sa Bungtod, ni Jorge Cocco
Pebrero 18–24
Mateo 5; Lucas 6
“Bulahan Kamo”
Bantayi ang mga impresyon nga imong madawat samtang magbasa ka sa Mateo 5 ug Lucas 6, ug irekord kini sa study journal. Kini nga outline makatabang nimo sa pag-ila sa pipila sa labing importante ug mahinungdanong mga baruganan niini nga mga kapitulo.
Irekord ang Imong mga Impresyon
Niining puntuha sa Iyang pangalagad, klaro nga ang mga pagtulun-an ni Jesus lahi kay sa naandan nga madunggan sa mga tawo. Ang kabus modawat sa gingharian sa Dios? Ang maaghup magapanunod sa yuta? Bulahan ang mga ginalutos? Ang mga escriba ug mga Pariseo wala magtudlo sa maong mga butang. Ug gani kadtong nakasabut gayud sa balaod sa Dios, mibati nga kini nga mga doktrina eksakto. “Mata tungod sa mata” ug “dumti ang imong kaaway” mao ang ubos nga mga balaod (Mateo 5:38, 43), gihatag ngadto sa mga tawo kinsa dili andam nga mosunod sa mas taas nga balaod. Apan si Jesukristo miabut aron sa pagtuman sa ubos nga balaod ug itudlo ang mas taas nga balaod (tan-awa sa 3 Nephi 15:2–10) gihimo aron matabangan kita nga sa umaabut nga adlaw nga mahimo kitang “hingpit, ingon nga hingpit ang [atong] Amahan nga langitnon” (Mateo 5:48).
Mga Ideya alang sa Personal nga Pagtuon sa Kasulatan
Ang malungtarung kalipay magagikan sa pagpuyo sa paagi nga gitudlo ni Jesukristo.
Ang tanan gusto nga magmalipayon, apan dili ang tanan nangita sa kalipay sa samang mga dapit. Ang uban nangita niini sa kalibutanong gahum ug posisyon, ang uban sa bahandi o sa makatagbaw nga pisikal nga mga gana. Si Jesukristo miabut aron sa pagtudlo sa paagi sa malungtarong kalipay, sa pagtudlo unsay tinuod nga kahulugan aron mabulahan. Unsay imong nakat-unan bahin sa pag-angkon og malungtarong kalipay gikan sa Mateo 5:1–12 ug Lucas 6:20–26? Sa unsa nga paagi kini lahi gikan sa panan-aw sa kalibutan bahin sa kalipay?
Unsa nga mga pangutana o mga impresyon ang moabut sa imong hunahuna samtang magbasa ka sa matag bersikulo? Unsa ang gitudlo niini nga mga bersikulo mahitungod sa pagkahimong tinun-an ni Jesukristo? Unsa ang imong gibati nga nadasig nga buhaton sa pagpalambo sa mga hiyas nga gihulagway niini nga mga bersikulo?
Tan-awa usab sa Juan 13:17; 3 Nephi 12:3–12.
Ngano nga ang Manluluwas mitandi sa Iyang mga tinun-an ngadto sa asin?
Ang asin dugay nang gigamit sa pagpreserbar, pagpalami, ug pagpalimpyo. Ang asin usab adunay relihiyoso nga kahulugan alang sa mga Israelite. May kalabutan kini sa karaan nga praktis sa pagsakripisyo og hayop ubos sa balaod ni Moises (tan-awa sa Levitico 2:13; Numero 18:19). Kon ang asin mawagtangan sa iyang kalami, dili na kini epektibo, o “dili na gayud magpulos” (Mateo 5:13). Mahitabo kini kon masagulan kini o mahugawan sa laing mga elemento. Isip mga tinun-an ni Kristo, magpadayon ang atong “lami” pinaagi sa paglikay sa espirituhanong kahugaw gikan sa kalibutan. Makatugot kini nato sa pagtuman sa atong pagpreserbar ug pagpalimpyo nga buhat isip asin sa yuta—sama pananglit, pinaagi sa pagpakigbahin sa ebanghelyo ug mahimong impluwensya alang sa kaayohan sa kalibutan (tan-awa sa D&P 103:9–10).
“Kamo mao ang asin alang sa yuta” (Mateo 5:13).
Ang balaod ni Jesukristo mitapos sa balaod ni Moises.
Ang mga tinun-an tingali nasurprisa sa pagkadungog ni Jesus nga miingon nga ang ilang pagkamatarung kinahanglang molabaw sa pagkamatarung sa mga escriba ug mga Pariseo (tan-awa sa Mateo 5:20), kinsa mapasigarbuhon sa ilang kaugalingon kon giunsa nila sa pagsunod ang balaod ni Moises. Apan si Jesus nagtudlo sa mas taas nga balaod nga dili lang mopatigbabaw sa atong mga aksyon apan usab sa mga hunahuna ug mga pagbati nga nagdasig niini. Kining mas taas nga balaod nagkinahanglan og mas daghan pa: ang kasingkasing, kalag, ug hunahuna (tan-awa sa Mateo 22:37).
Samtang magbasa kamo sa Mateo 5:21–48 ug Lucas 6:27–35, ikonsiderar ang pagmarka sa duha ka kinaiya nga gikinahanglan sa balaod ni Moises (“Kamo nakadungog nga …”) ug unsay gitudlo ni Jesus sa pagpalambo niini.
Sama pananglit, unsay gitudlo ni Jesus sa Mateo 5:27–28 bahin sa atong responsibilidad sa atong mga hunahuna? Unsaon nimo nga imong makontrol ang imong mga hunahuna nga mosulod sa imong utok ug kasingkasing? (tan-awa sa D&P 121:45).
Naglaum ba ang Langitnong Amahan nga mahingpit ko?
Si Presidente Russell M. Nelson mitudlo:
“Ang pulong hingpit gihubad gikan sa Gresyanhon nga teleios, nga nagpasabut nga ‘hingpit.’ … Ang infinitive form sa verb mao ang teleiono, nga nagpasabut ‘sa pag-abut sa kinatumyan, sa pagpalambo sa hingpit, sa paghingpit, o sa pagtapos.’ Palihug timan-i nga ang pulong wala magpasabut og ‘kagawasan gikan sa sayop’; nagpasabut kini sa ‘pagkab-ot og tumong sa unahan.’ …
“… Ang Ginoo mitudlo, ‘Kamo dili makahimo sa pagharong sa atubangan sa Dios karon … ; busa padayon diha sa pagpailub hangtud kamo mahingpit.’ [DP 67:13].
“Dili kita angayang masagmuyo kon ang atong kinasingkasing nga mga paningkamot ngadto sa pagkahingpit karon mora og makapaluya ug walay katapusan. Ang pagkahingpit gilauman. Ang pagkahingpit mahitabo lamang human sa Pagkabanhaw ug pinaagi lamang sa Ginoo. Naghulat kini sa tanan nga naghigugma kaniya ug nagsunod sa iyang mga sugo” (“Perfection Pending,” Ensign, Nob. 1995, 86, 88).
Tan-awa usab sa Mga Taga-Filipos 3:13–15; 2 Pedro 1:3–11; Pinadayag 3:21–22; 3 Nephi 27:27; Moroni 10:32–33; Doktrina ug mga Pakigsaad 76:69.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Unsa nga mga baruganan ang gitudlo sa Mateo 5:1–9 ang makatabang sa imong panimalay nga mahimong mas malipayon nga dapit? Mahimo nimong tutukan ang usa o duha samtang magtuon ka sa Wali Ibabaw sa Bungtod sa mosunod nga pipila ka mga semana. Sama pananglit, unsa nga pagtulun-an ang nakit-an sa mga sakop sa imong pamilya nga makatabang nila nga mahimong tigpasiugda og kalinaw? (tan-awa sa Mateo 5:21–25, 38–44). Unsa nga mga tumong ang imong mahimo? Unsaon nimo sa pagsunod?
Aron matabangan ang imong pamilya nga makasabut unsay buot ipasabut nga mahimong “kahayag sa kalibutan,” mahimo kang mangita og tinubdan sa kahayag sa imong panimalay, sa imong kasilinganan, ug sa kalibutan. Tingali makatabang ang pagpakita unsay mahitabo kon imong itago ang kahayag. Unsa ang gipasabut ni Jesus sa dihang miingon Siya, “Kamo mao ang kahayag sa kalibutan”? (Mateo 5:14). Kinsa ang nahimong kahayag sa atong pamilya? Unsaon nga kita mahimong kahayag ngadto sa uban? (tan-awa sa DP 103:9–10).
Ngano nga ang Ginoo gusto nga kita mag-ampo alang niadtong dili mabination kanato? Unsaon nato pagsunod kini nga baruganan diha sa atong pamilya?
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Pagmapaniiron. Samtang hatagan nimo og pagtagad ang mga panghitabo sa mga kinabuhi sa imong mga anak, makakaplag ka og labing maayo nga mga oportunidad sa pagtudlo. Ang mga komentaryo ug mga pangutana sa imong mga anak sa tibuok adlaw makagiya usab sa posible nga mga kahigayunan sa pagtudlo. (Tan-awa sa Pagtudlo sumala sa Pamaagi sa Manluluwas, 16.)
“Kamo mao ang kahayag alang sa kalibutan” (Mateo 5:14).