“Pebrero 25–Marso 3. Mateo 6–7: ‘Nagpanudlo man Siya Ingon nga may Kagahum’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Pebrero 25–Marso 3. Mateo 6–7,” Dali, Sunod Kanako—Alang sa mga Indibidwal ug mga Pamilya: 2019
Nagtudlo si Jesus sa mga Tawo sa Daplin sa Baybayon, ni James Tissot
Pebrero 25–Marso 3
Mateo 6–7
“Nagpanudlo man Siya Ingon nga may Kagahum”
Kon mobasa kita sa mga kasulatan uban sa usa ka pangutana sa hunahuna ug uban sa sinsero nga tinguha sa pagsabut unsay gusto sa Langitnong Amahan nga atong mahibaloan, gidapit nato ang Espiritu Santo sa pagdasig nato. Samtang magbasa ka sa Mateo 6–7, bantayi kini nga mga impresyon.
Irekord ang Imong mga Impresyon
Ang Wali Ibabaw sa Bungtod mao ang usa sa labing nailhan nga diskurso sa Kristiyanismo. Ang Manluluwas mitudlo nga dunay buhong nga imahe, sama sa siyudad nga anaa sa bungtod, mga lirio sa kaumahan, ug mga lobo nga managsapot sa pagkakarnero. Apan ang Wali Ibabaw sa Bungtod labaw pa kay sa maanindot nga pakigpulong. Ang gahum sa mga pagtulun-an sa Manluluwas ngadto sa Iyang mga tinun-an makapausab sa atong mga kinabuhi, ilabi na kon mosunod kita niini. Dayon ang Iyang mga pulong mahimong labaw pa kay sa mga pulong; mahimo kining sigurado nga pundasyon sa kinabuhi nga, sama sa balay sa tawong buotan, makabarug sa mga hangin ug mga baha sa kalibutan (tan-awa sa Mateo 7:24–25).
Mga Ideya alang sa Personal nga Pagtuon sa Kasulatan
Kinahanglan nga akong ipahimutang ang akong kasingkasing diha sa langitnong mga butang.
Dili kanunay sayon ang pag-una sa mga butang sa Dios ibabaw sa mga butang sa kalibutan. Hain sa mga pagtulun-an sa Manluluwas sa Mateo 6–7 ang makatabang nimo sa pagtutok sa langitnong mga butang? Unsa ang imong mga hunahuna o mga impresyon samtang nagtuon ka sa Iyang mga pulong? Unsa ang nadasig nga imong buhaton? Ikonsiderar ang pagrekord sa imong mga impresyon. Sama pananglit:
|
Mas mabalaka ko bahin sa unsay gihunahuna sa Dios kanako kay sa unsay gihunahuna sa uban. | |
Mas makapaduol ko ngadto sa Dios pinaagi sa mapainubsanon, sinsero nga pag-ampo.
Ang Wali Ibabaw sa Bungtod adunay daghang mga tema, ug ang mga tema nga imong mamatikdan magdepende, sa matang, sa kahimtang sa imong kinabuhi karon ug unsay gusto sa Ginoo nga isulti kanimo.
Usa sa tema sa Mateo 6–7 mao ang pag-ampo. Paggahin og makadiyot sa pagtimbang-timbang sa imong mga pag-ampo. Unsay imong gibati sa imong paningkamot sa pagpaduol ngadto sa Dios pinaagi sa pag-ampo? Unsa nga mga pagtulun-an sa Mateo 6–7 ang nakapadasig nimo sa pagpalambo sa paagi sa imong pag-ampo? Irekord ang imong mga impresyon nga imong nadawat pinaagi sa Espiritu. Sama pananglit:
|
Kon mag-ampo ko, kinahanglang duna koy balaang pagtahud sa ngalan sa Langitnong Amahan. | |
|
Kon mag-ampo ko, kinahanglang nakong ipadayag ang akong tinguha nga ang kabubut-on sa Ginoo ang matuman. | |
Mahimo nimong basahon ang Wali Ibabaw sa Bungtod sa makausa pa, niining higayuna mangita sa laing nagbalik-balik nga tema o mensahe nga ilabi na alang kanimo. Irekord unsay imong nakit-an diha sa study journal, uban sa imong mga hunahuna ug mga impresyon.
Mas makapaduol kita ngadto sa Dios pinaagi sa pag-ampo.
Unsay buot ipasabut sa paggamit sa “pamulongpulong nga walay kapuslanan” sa pag-ampo?
Kasagaran ang mga tawo nagtuo nga ang “pamulongpulong nga walay kapuslanan” nagpasabut sa pagbalik-balik sa samang mga pulong pag-usab. Apan, ang pulong walay kapuslanan mahulagway nga usa ka butang nga walay bili. Ang paggamit sa “pamulongpulong nga walay kapuslanan” sa pag-ampo magpasabut nga dili sinsero, kinasingkasing nga pagbati (tan-awa sa Alma 31:12–23).
Nganong dili nato i-recite ang Pag-ampo sa Ginoo?
Si President Russell M. Nelson mitudlo: “Gisugdan sa Ginoo ang Iyang pag-ampo una pinaagi sa paghangyo sa Iyang mga sumusunod nga likayan ang ‘walay pulos nga pabalik-balik’ [Mateo 6:7] ug sa pag-ampo ‘sa ingon niining pamaagi’ [Mateo 6:9]. Sa ingon, ang Pag-ampo sa Ginoo nagsilbi nga sumbanan nga angay sundon ug dili usa ka pakigsulti nga memoryado ug binalikbalik nga pagkasulti. Ang Agalon gusto lamang nga kita mag-ampo alang sa tabang sa Dios samtang padayon kitang maningkamot sa pagbatok sa dautan ug magpuyo sa katarung” (“Mga Leksyon gikan sa Pag-ampo sa Ginoo,” Liahona, Mayo 2009, 47).
Kinahanglan kong mohukom sa matarung nga paagi.
Sa Mateo 7:1, ang Manluluwas ingon og nagsulti nga kinahanglang dili kita mohukom, apan sa ubang mga kasulatan (lakip sa ubang mga bersikulo niini nga kapitulo), gihatagan kita Niya og mga instruksyon unsaon sa paghukom. Kon kana mora og makalibug, ang Hubad ni Joseph Smith niini nga bersikulo tingali makatabang: “Ayaw paghukom sa dili matarung nga paagi, aron ikaw dili pagahukman; apan paghukom sa matarung nga paghukom . Unsay imong nakit-an sa Mateo 7:1–5, uban sa nahibilin sa kapitulo, nga makatabang nimo nga makahibalo unsaon sa “paghukom sa matarung nga paghukom”?
Tan-awa usab sa “Paghukom sa Uban,” Matinud-anon sa Tinuohan, 134–35; Lynn G. Robbins, “Ang Matarung nga Maghuhukom,” Liahona, Nob. 2016, 96–98.
Makaila ko ni Jesukristo pinaagi sa pagbuhat sa Iyang kabubut-on.
Ang mga pulong nga “Wala ko gayud kamo igkaila” sa Mateo 7:23 giusab sa Hubad ni Joseph Smith ngadto sa “Wala gayud kamo makaila kanako.” Sa unsa nga paagi kini nga kausaban makatabang ninyo nga mas makasabut unsay gitudlo sa Ginoo sa mga bersikulo 21–22 bahin sa pagbuhat sa Iyang kabubut-on? Unsa kamaayo imong gibati nga nakaila gayud ikaw sa Ginoo? Unsa ang imong mabuhat aron mas makaila Kaniya og maayo?
Tan-awa usab sa David A. Bednar, “Kon Nakaila Pa Kamo Kanako,” Liahona, Nob. 2016, 102–5.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Ang mga sakop sa pamilya makasunod diha sa ilang mga kasulatan. Kini nga kalihokan mahimong himoon sa pipila ka adlaw kon gikinahanglan.
Unsay atong makat-unan bahin sa pag-ampo gikan sa paagi sa pag-ampo sa Manluluwas? Unsaon nato sa paggamit sa Iyang pag-ampo isip sumbanan sa pagpalambo sa atong personal ug pamilya nga mga pag-ampo? (Tan-awa usab sa Lucas 11:1–13.) Kon duna moy gagmay nga mga anak, mahimo kamong magpraktis nga magdungan sa pag-ampo.
Unsay gipasabut sa “unaha … pagpangita ang gingharian sa Dios”? Unsay atong gibuhat niini isip pamilya?
Mahimo kang mogamit og gamay ug dako nga piraso sa kahoy sa pagrepresentar sa puling ug troso samtang hisgutan nimo ang mga pagtulun-an sa Manluluwas bahin sa paghukom sa uban. Ikonsiderar ang pagbasa sa entry “Paghukom sa Uban” sa Matinud-anon sa Tinuhoan, 134–35, isip kabahin niini nga panaghisgutan.
Aron matabangan ang imong pamilya nga mas makasabut sa sambingay sa Manluluwas sa tawong buotan ug tawong boangboang, mahimo nimong silang pabu-buon og tubig diha sa balas ug dayon sa bato. Unsaon nato pagtukod ang atong espirituhanon nga mga pundasyon sa usa ka bato?
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Pakigbahin og mga panabut. Ang paghisgot og mga baruganan nga imong nakat-unan gikan sa imong personal nga pagtuon dili lamang maayong paagi sa pagtudlo sa uban; makatabang usab kini sa pagpalig-on sa imong kaugalingong pagsabut. Sulayi ang pagpakigbahin og baruganan nga imong nakat-unan gikan sa gibasa niining semanaha uban sa usa ka sakop sa pamilya o sa imong mga klase sa Simbahan.
Nag-ampo Ako alang Kanimo, ni Del Parson