“Marso 18–24. Mateo 13; Lucas 8; 13: ‘Ang may mga Dalunggan nga Makadungog, Kinahanglan Siya Magpatalinghug’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Marso 18–24. Mateo 13; Lucas 8; 13,” Dali, Sunod Kanako—Alang sa mga Indibidwal ug mga Pamilya: 2019
Marso 18–24
Mateo 13; Lucas 8; 13
“Ang may mga Dalunggan nga Makadungog, Kinahanglan Siya Magpatalinghug”
Samtang magbasa ka sa Mateo 13 ug Lucas 8; 13, hunahunaa unsaon nimo sa pag-andam ang imong kaugalingon sa “pagpatalinghug” ug magpasalamat sa mga pagtulun-an sa Manluluwas niini nga mga sambingay. Unsay imong buhaton sa paggamit niini nga mga pagtulun-an sa imong kinabuhi?
Irekord ang Imong mga Impresyon
Pipila sa labing halandumon nga mga pagtulun-an sa Manluluwas mao ang pinaagi sa yanong mga istorya nga gitawag og mga sambingay. Mas labaw pa kini sa mga istorya lamang bahin sa ordinaryo nga mga butang o mga panghitabo. Kini adunay talagsaong mga kamatuoran bahin sa gingharian sa Dios alang niadtong andam sa espirituhanong paagi. Usa sa unang mga sambingay nga narekord sa Bag-ong Tugon—ang sambingay sa magpupugas (tan-awa sa Mateo 13:3–23)—nagdapit nato sa pagsusi sa atong pagkaandam sa pagdawat sa pulong sa Dios. “Kay siya nga adunay iya,” mipahayag si Jesus, “pagahatagan og labaw pa, ug makabaton siya sa kadagaya; apan siya nga walay iya pagakuhaan sa bisan unsa nga anaa kaniya” (Joseph Smith Translation, Matthew 13:10 ). Mao nga sa atong pagpangandam sa pagtuon sa mga sambingay sa Manluluwas—o sa bisan hain sa Iyang mga pagtulun-an—usa ka maayong paagi sa pagsugod mao ang pagsusi sa atong mga kasingkasing ug pagtino kon gihatagan ba nato ang pulong sa Dios og “maayong yuta” diin kini motubo, mamulak, molabong, ug mamunga nga mopanalangin kanato ug sa atong mga pamilya sa kabuhong (Mateo 13:8).
Mga Ideya alang sa Personal nga Pagtuon sa Kasulatan
Unsa ang gipasabut ni Kristo nga “gingharian sa langit” sa Mateo 13?
Niini nga kapitulo, “ang gingharian sa langit” nagpasabut sa tinuod nga Simbahan ni Kristo, nga mao ang gingharian sa langit dinhi sa yuta. Alang sa dugang nga impormasyon, tan-awa sa Giya ngadto sa mga Kasulatan, “Gingharian sa langit o gingharian sa Dios.”
Ang akong kasingkasing kinahanglang andam nga modawat sa pulong sa Dios.
Ngano nga ang ubang mga kasingkasing bukas sa kamatuoran samtang ang uban ingon og mobatok niini? Ang pagbasa sa sambingay sa magpupugas makahatag og maayong oportunidad sa paghunahuna bahin kon unsaon nimo sa pagdawat sa kamatuoran gikan sa Ginoo. Tingali makatabang ang pagpahaum pag-una sa mga bersikulo 3–8 sa Mateo 13 sa gihatag nga mga paghubad sa mga bersikulo 18–23. Unsay imong mahimo sa pag-ugmad og “maayong yuta” sa imong kaugalingon? Unsa kaha ang pipila ka “mga tunok” nga makapugong nimo sa pagpatalinghug ug pagsunod sa pulong sa Dios?
Tan-awa usab sa Lucas 13:34; Mosiah 2:9; 3:19; Alma 12:10–11; 32:28–43; Dallin H. Oaks, “Ang Sambingay sa Magpupugas,” Liahona, Mayo 2015, 32–35.
Ang mga sambingay ni Jesus makatabang nako nga makasabut sa pagtubo ug kapalaran sa Iyang Simbahan.
Si Propeta Joseph Smith mitudlo nga ang Mateo 13 naghulagway sa pagtubo ug kapalaran sa Simbahan sa ulahing mga adlaw (tan-awa sa Mga Pagtulun-an sa mga Presidente sa Simbahan: Joseph Smith [2007], 355–369). Samtang magbasa ka niini nga mga sambingay, isulat unsay gitudlo niini kanimo bahin sa Simbahan sa Ginoo (mahimo kang mogamit sa unsay gitudlo ni Propeta Joseph bahin sa pipila niini nga mga sambingay):
-
Ang trigo ug ang bunglayon (13:24–30, 36–43): Ang dautan ug ang matarung magdungan pagtubo hangtud sa katapusan sa kalibutan.
-
Ang liso sa mustasa (13:31–32):
-
Ang igpatutubo sa tinapay (13:33):
-
Ang nalubong nga bahandi ug ang mutya nga bililhon kaayo (13:44–46):
-
Ang pukot (13:47–50):
-
Ang pangulo sa panimalay (13:52):
Human mamalandong niini nga mga sambingay, unsay imong gibati nga nadasig nga buhaton aron sa pag-apil nga mas hingpit sa buhat sa ulahing adlaw nga Simbahan ni Kristo? Unsa nga mga pangutana ang moabut sa hunahuna nga makatabang nimo sa paggamit niini nga mga sambingay? Pananglit, “Unsay andam nakong isakripisyo alang sa Simbahan?”
Ang ebanghelyo ni Jesukristo mao ang “mutya nga bililhon kaayo” (Mateo 13:46).
Ang matarung kinahanglang motubo taliwala sa dautan hangtud sa katapusan sa kalibutan.
Usa ka paagi sa pag-analisar niini nga sambingay mao ang pagdrowing og litrato niini ug butangan kini sa hubad sa Mateo 13:36–43 ug Doktrina ug mga Pakigsaad 86:1–7. Ang bunglayon mao ang usa ka “makahilo nga sagbut, nga, hangtud nga kini moabut sa dunggan, susama kini sa dagway sa trigo” (Giya ngadto sa mga Kasulatan, “Sagbut, mga” [Bunglayon]). Unsa nga mga kamatuoran niini nga sambingay ang nakadasig nimo nga magpabilin nga matinud-anon bisan pa sa pagkadautan sa kalibutan?
Sa unsa nga mga paagi nga ang “pipila ka mga babaye” nanag-alagad sa Manluluwas?
“Daghan pang mga babaye nga mga disipulo mibiyahi uban ni Jesus ug sa Napulog Duha, nagkat-on gikan kaniya sa espirituhanon ug nagserbisyo Kaniya sa temporal. … Dugang sa pagdawat sa pangalagad ni Jesus—sa maayong balita sa Iyang ebanghelyo ug sa mga panalangin sa Iyang makaayo nga gahum—kini nga mga babaye nangalagad Kaniya, mipaambit sa ilang kabtangan ug debosyon” (Anak nga mga Babaye sa Akong Gingharian [2011], 4, 6). Ang mga babaye nga misunod sa Manluluwas mihatag og gamhanang pagpamatuod Kaniya (tan-awa sa Linda K. Burton, “Masaligon nga Babaye,” Liahona, Mayo 2017, 12–15).
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Samtang magbasa ang imong pamilya sa mga sambingay sa Manluluwas, tingali malingaw sila nga maghunahuna sa ilang kaugalingong mga sambingay nga nagtudlo sa samang mga kamatuoran bahin sa gingharian sa langit (ang Simbahan), gamit ang mga butang o mga sitwasyon nga pamilyar nila.
Unsay atong mahimo isip pamilya sa pag-ugmad og “maayong yuta” diha sa atong mga kasingkasing ug sa atong panimalay? (Mateo 13:23). Kon duna kay gagmayng mga bata sa imong pamilya, makalingaw ang pagdapit sa mga sakop sa pamilya sa pagdrama sa lain-laing mga paagi sa pag-andam sa atong mga kasingkasing sa pagpatalinghug sa pulong sa Dios samtang ang ubang mga sakop sa pamilya motag-an unsay ilang gibuhat.
Unsaon nimo sa pagtabang ang mga sakop sa imong pamilya nga makasabut sa kaimportante sa pagkaandam modawat sa pulong ni Kristo? Sama pananglit, mahimo nimong tabunan ang dunggan sa usa ka sakop sa pamilya samtang hilom nimong basahon ang Mateo 13:13–16. Unsay nasabtan sa sakop sa pamilya gikan niini nga mga bersikulo? Unsay mabuhat sa atong mga mata, mga dunggan, ug mga kasingkasing sa pagdawat sa pulong sa Dios? Sa unsang paagi nga gitabunan nato ang atong mga mata, mga dunggan, ug mga kasingkasing ngadto sa pulong sa Dios?
Unsa ang komon niining duha ka mga lalaki niini nga mga sambingay? Aduna bay laing mga butang nga kinahanglan nga atong buhaton isip mga indibidwal ug isip pamilya sa pag-una sa gingharian sa Dios sa atong kinabuhi?
Unsaon nato pagsunod ang ehemplo sa Manluluwas ug luwason ang mga tawo gikan sa pagkaulipon?
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Pagmemorya og kasulatan. Pagpili og tudling sa kasulatan nga mas makahuluganon sa imong pamilya, ug dapita ang mga sakop sa pamilya sa pagmemorya niini. Si Elder Richard G. Scott mitudlo, “Ang namemorya nga kasulatan mao ang higalang molahutay nga dili magkahuyang sa paglabay sa panahon” (“Ang Gahum sa Kasulatan,” Liahona, Nob. 2011, 6).
Sambingay sa Magpupugas, ni George Soper