“Marso 4–10. Mateo 8–9; Marcos 2–5: ‘Ang Imong Pagsalig Nakapaayo Kanimo’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Marso 4–10. Mateo 8–9; Marcos 2–5,” Dali, Sunod Kanako—Alang sa mga Indibidwal ug mga Pamilya: 2019
Kaluwasan sa Iyang mga Pako, ni Jon McNaughton
Marso 4–10
Mateo 8–9; Marcos 2–5
“Ang Imong Pagsalig Nakapaayo Kanimo”
Samtang magbasa ka sa Mateo 8–9 ug Marcos 2–5, pagbantay sa mga impresyon nga imong madawat gikan sa Espiritu Santo. Ikonsiderar ang pagsulat sa mga pag-aghat nga imong nadawat ug sa mga butang nga imong mabuhat sa pagsunod niadto nga mga pag-aghat.
Irekord ang Imong mga Impresyon
Lisud ang pagbasa sa Bag-ong Tugon nga dili madani sa daghang mga istorya sa pagpang-ayo sa Manluluwas sa masakiton ug nag-antus—ang tanan gikan sa babaye nga dunay hilanat ngadto sa batang baaye nga giingong patay na. Unsa nga mga mensahe ang anaa alang nato niini nga mga milagro sa pisikal nga pagpang-ayo? Dayag lang nga ang usa ka klaro nga mensahe mao nga si Jesukristo mao ang Anak sa Dios, uban sa gahum sa tanang mga butang, lakip sa atong pisikal nga mga kasakit ug pagkadili hingpit. Apan ang laing kahulugan makita sa Iyang mga pulong ngadto sa maduhaduhaon nga mga escriba: “Aron mahibalo kamo nga ang Anak sa Tawo may kagahum diay dinhi sa yuta sa pagpasaylog mga sala” (Marcos 2:10). Mao nga kon makabasa ka bahin sa buta nga tawo o usa ka sanlahon nga naayo, tingali maghunahuna ka sa pagpang-ayo—sa espirituhanon ug pisikal—nga imong madawat gikan sa Manluluwas ug makadungog Kaniya nga moingon kanimo, “Ang imong pagsalig nakapaayo kanimo” (Marcos 5:34).
Mga Ideya alang sa Personal nga Pagtuon sa Kasulatan
Ang Manluluwas makaayo sa mga balatian ug mga sakit.
Kining pipila ka mga kapitulo nagrekord sa daghang mga higayon sa milagroso nga pagpang-ayo nga gihimo sa Manluluwas. Samtang imong tun-an kining mga pagpang-ayo, pangitaa ang posible nga mga mensahe alang kanimo. Mahimo kang mangutana sa imong kaugalingon: Unsa ang gitudlo sa istorya bahin sa pagtuo? Unsa ang gitudlo sa istorya bahin sa Manluluwas? Unsay gusto sa Ginoo nga akong makat-unan gikan niini nga milagro?
-
Usa ka sanlahon (Mateo 8:1–4)
-
Usa ka binatonan sa kapitan (Mateo 8:5–13)
-
Babayeng ugangan ni Pedro (Mateo 8:14–15)
-
Duha ka tawo nga buta (Mateo 9:27–31)
-
Usa ka tawo nga paralitiko (Marcos 2:1–12)
-
Usa ka tawo nga giyawaan (Marcos 5:1–20)
-
Babayeng anak ni Jairo (Marcos 5:22–23, 35–43)
-
Usa ka babaye nga gitalinug-an (Marcos 5:24–34)
Tan-awa usab sa Dallin H. Oaks, “Pag-ayo sa Masakiton,” Liahona, Mayo 2010, 47–50.
Si Jesus Nag-ayo sa Masakiton, ni Joseph Brickey, human Heinrich Hofmann
Makapangayo ko og tabang sa Dios bisan kon gibati nako nga dili angayan.
Ang kapitan, usa ka Hentil, mibati nga dili takus nga moadto ang Manluluwas sa iyang balay. Ang babaye nga gitalinug-an giisip nga dili limpyo ug gisalikway gikan sa katilingbang Judeo. Apan ang Manluluwas mipanalangin nilang duha. Unsay imong nakat-unan gikan niining duha ka mga istorya bahin sa pagpangayo og tabang gikan sa Ginoo?
Ang pagkatinun-an ni Jesukristo nagpasabut nga akong ibutang Siya pag-una sa akong kinabuhi.
Niini nga mga bersikulo, si Jesus mitudlo nga kon kita Iyang tinun-an kinahanglan nga unahon nato Siya sa atong kinabuhi, bisan kon kana usahay nagpasabut nga kinahanglan kitang mosakripisyo sa ubang mga butang nga atong gihatagan og bili. Samtang magtuon ka niini nga mga tudling, palandunga ang imong kaugalingong pagkatinun-an. Ngano nga ang mga tinun-an kinahanglang andam sa pag-una sa Manluluwas? Unsa kaha ang imong biyaan aron unahon si Jesus? (Tan-awa usab sa Lucas 9:57–62.)
Si Jesukristo adunay gahum sa paghatag og kalinaw taliwala sa mga problema sa kinabuhi.
Gibati ba nimo ang nabati sa mga tinun-an ni Jesus atol sa unos sa dagat—nagtan-aw sa mga balud sa tubig nga mipuno sa sakayan ug nangutana, “Magtutudlo, wala ka ba lang magkabana nga mangalumos kita?”
Sa Marcos 4:35–41, makita nimo ang upat ka pangutana. Ilista ang matag usa, ug palandunga unsay gitudlo niini kanimo bahin sa mga hagit sa kinabuhi uban sa pagtuo kang Jesukristo. Sa unsa nga paagi ang Manluluwas nakahatag og kalinaw sa mga unos sa imong kinabuhi?
Makapanalipod ko sa akong pagtuo pinaagi sa pagtudlo sa tinuod nga baruganan.
Usahay lisud nga makahibalo unsaon sa pagtubag kon manaway ang mga tawo sa atong relihiyoso nga mga gituohan ug mga praktises. Samtang magbasa ka sa Mateo 9:1–13 ug Marcos 2:15–17, pangitaa ang mga panaway sa mga tig-akusar ug ang mga tubag sa Manluluwas. Ikonsiderar ang pagmarka sa mga pagpanaway ug mga tubag sa lain-laing mga kolor o pagsulat niini. Unsay imong namatikdan bahin sa paagi sa pagtudlo sa Manluluwas? Sa unsa nga paagi nga ang pagsunod sa Iyang ehemplo makatabang nimo kon ikaw manalipod og baruganan sa ebanghelyo o praktis sa Simbahan?
Tungod sa paghinulsol, mahimo akong magmalipayon.
Sa dihang ang paralitiko gidala ngadto sa Manluluwas, klaro ngadto sa mga tawo nga kinahanglan siya mamaayo sa pisikal. Apan giuna ni Jesus ang labing gikinahanglan sa tawo—kapasayloan sa iyang mga sala. Bisan kon ang tawo wala mamaayo sa pisikal, makasunod unta gihapon siya sa tambag ni Jesus “salig” (Mateo 9:2). Kanus-a ka mibati og kalipay tungod kay ikaw napasaylo? (Tan-awa usab sa Alma 36:18–24.)
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Ikonsiderar ang paghimo og lista sa mga milagro nga gihulagway niini nga mga kapitulo ug pagpangita og mga litrato sa pipila niini (tan-awa sa Libro sa Hulagway sa Ebanghelyo o LDS.org). Mahimo nimong hangyoon ang matag sakop sa pamilya sa pagsulti bahin sa usa sa mga milagro (gamit ang usa ka litrato kon anaa) ug ipakigbahin unsay ilang nakat-unan gikan niini. Mahimo kang mopakigbahin sa pipila ka mga kasinatian sa mga milagro nga imong nasaksihan o nabasa bahin sa moderno nga kasaysayan sa Simbahan.
Unsay atong makat-unan sa paagi sa pagtagad sa Manluluwas sa mga maniningil og buhis ug mga makasasala, kinsa gisalikway sa uban? Unsaon nato nga makasunod sa Iyang ehemplo samtang makigsandurot sa ubang mga tawo?
Unsaon nimo pagtabang ang imong pamilya nga makasabut sa pangamuyo sa Manluluwas alang sa dugang nga mga mamumuo aron makatabang sa pagpakigbahin sa ebanghelyo? Makahimo ka og butang nga yano sama sa pagtabang sa usa ka buluhaton nga dugay mahuman sa usa ka tawo, sama sa paglimpyo sa kusina human sa panihapon. Unsay atong mabuhat sa pagpakigbahin sa mensahe sa ebanghelyo?
Kini ba nga istorya makatabang sa mga sakop sa pamilya kon gibati nila ang kahadlok? Tingali mabasa nila ang bersikulo 39 ug makigbahin og mga kasinatian sa dihang ang Manluluwas mitabang nila nga mobati og kalinaw panahon sa kaguliyang o kahadlok.
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Pagmahimong anaa ug dali nga maduol. Ang pipila sa labing maayo nga mga higayon sa pagtudlo magsugod sa mga pangutana o kabalaka diha sa kasingkasing sa usa ka sakop sa pamilya. Pahibaloa ang mga sakop sa pamilya pinaagi sa imong mga pulong ug mga lihok nga matinguhaon ka sa pagpamati kanila (tan-awa sa Pagtudlo sumala sa Pamaagi sa Manluluwas, 16).
Si Kristo ug ang Tawong Paralitiko, ni J. Kirk Richards