“Marso 25–31. Mateo 14–15; Marcos 6–7; Juan 5–6: “Ayaw Kamo Kalisang’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Marso 25–31. Mateo 14–15; Marcos 6–7; Juan 5–6,” Dali, Sunod Kanako—Alang sa mga Indibidwal ug mga Pamilya: 2019
Pakan-a Sila, ni Jorge Cocco
Marso 25–31
Mateo 14–15; Marcos 6–7; Juan 5–6
“Ayaw Kamo Kalisang”
Samtang magbasa ka sa Mateo 14–15; Marcos 6–7; ug Juan 5–6, pangitaa ang mga kamatuoran nga makahuluganon kanimo. Mahimong mangutana ka sa imong kaugalingon og sama sa “Sa unsa nga paagi nga ang mga istorya niini nga mga kapitulo may kalabutan kanako?” “Unsa nga mga mensahe ang akong nakita alang sa akong kinabuhi?” o “Unsa ang gusto nakong ipakigbahin sa akong pamilya o sa uban?”
Irekord ang Imong mga Impresyon
Unsa kaha ang nakadasig ni Pedro sa pagbiya sa iyang sakayan sa tunga-tunga sa Dagat sa Galilea atol sa makusog nga unos? Unsay nakapatuo niya nga kon si Jesus makalakaw sa tubig, makalakaw usab siya? Dili kita makasiguro, apan tingali nakasabut si Pedro nga ang Anak sa Dios mianhi dili lang pagbuhat og talagsaong mga butang alang sa mga tawo apan sa paghatag og gahum sa mga tawo sama ni Pedro sa pagbuhat usab og talagsaong mga butang. Ang imbitasyon ni Jesus, human sa tanan, mao ang “Dali, Sunod Kanako” (Lucas 18:22). Gidawat ni Pedro kini nga imbitasyon kausa, ug andam siya sa pagdawat niini pag-usab, bisan kon kini nagpasabut nga mag-atubang og kalisang ug pagbuhat og butang nga ingon og imposible. Tingali ang Ginoo dili mosugo nato sa pagkanaog sa usa ka sakayan sa tunga-tunga sa unos o mohatag sa atong gamay ra nga suplay sa tinapay kon liboan ang kinahanglan nga mokaon, apan mosugo Siya nato sa pagdawat og mga direksyon bisan kon wala kita hingpit nga makasabut niini. Bisan unsa ang Iyang imbitasyon nato, ingon og usahay makasurprisa o gani makahadlok. Apan ang mga milagro mahitabo kon kita, sama ni Pedro, mowagtang sa atong mga kalisang, sa atong mga pagduha-duha, ug sa atong limitado nga pagsabut ug mosunod Kaniya pinaagi sa pagtuo.
Mga Ideya alang sa Personal nga Pagtuon sa Kasulatan
Si Jesukristo mipasidungog sa Iyang Amahan.
Ang relasyon tali sa Langitnong Amahan ug sa matag usa sa Iyang mga anak usa ka sagrado nga relasyon. Niini nga mga bersikulo, si Jesukristo mihatag nato og makadasig nga modelo nga sundon sa atong relasyon uban sa Langitnong Amahan. Basaha ang Juan 5:17–47, ug markahi o timan-i ang matag higayon sa pulong nga Amahan. Sa unsa nga paagi nga ang Anak mopasidungog sa Amahan, ug unsaon nimo sa pagsunod sa Iyang ehemplo? Unsay imong nakat-unan bahin sa unsay gibati sa Amahan bahin sa Anak? Sa unsa nga paagi nga ang pagpalig-on sa imong relasyon uban sa Langitnong Amahan makapadugang sa imong pagkaandam sa pagtinguha ug pagsunod sa Iyang kabubut-on?
Tan-awa usab sa Juan 17; Jeffrey R. Holland, “Ang Kahalangdon sa Dios,” Liahona, Nob. 2003, 70–73.
Mateo 14:16–21; Marcos 6:33–44; Juan 6:5–14
Ang Manluluwas makapadako sa akong mapainubsanong mga halad sa pagtuman sa Iyang mga katuyoan.
Gibati ba nimo ang kakulangan sa pagtubag sa tanang mga panginahanglan nga imong nakita sa imong palibut—sa imong panimalay, sa imong mga relasyon, o sa katilingban? Ang mga tinun-an ni Jesus tingali mibati og kakulang sa dihang misugo Siya kanila sa pagpakaon sa sobra sa lima ka libo nga gigutom nga mga tawo (tan-awa sa Mateo 14:21) sa dihang dihay lima lang ka piraso sa pan ug duha ka isda. Sa imong pagbasa sa milagro nga sunod nga nahitabo, palandunga unsaon sa paggamit sa Dios sa imong mapainubsanon nga mga halad sa pag-alagad sa pagpanalangin niadtong anaa sa imong palibut. Unsaon Niya sa pagpalambo sa imong mga paningkamot samtang mag-alagad ka sa Simbahan? Ikonsiderar kini nga pamahayag gikan ni Presidente James E. Faust: “Daghang dili ilado nga mga tawo nga may mga gasa nga sama lamang sa lima ka tinapay ug duha ka gagmayng isda nagpalambo sa ilang mga calling [sa simbahan] ug nagserbisyo sa walay pagtagad o pahalipay, tinud-anay nga nag-amuma sa liboan” (“Five Loaves and Two Fishes,” Ensign, Mayo 1994, 5).
Mateo 14:22–33; Marcos 6:45–52; Juan 6:15–21
Midapit si Jesukristo nako nga wagtangon nako ang akong mga kalisang ug mga pagduha-duha ug magpakita og pagtuo Kaniya.
Handurawa sa imong hunahuna ang mga detalye sa talan-awon nga gihulagway sa Mateo 14:22–33; Marcos 6:45–52; ug Juan 6:15–21. Hunahunaa kon unsa kahay gibati ni Pedro ug sa ubang mga tinun-an. Unsay imong nakat-unan bahin sa pagkatinun-an gikan sa mga pulong ug aksyon sa Manluluwas niini nga mga bersikulo? Unsay imong nakat-unan gikan sa mga pulong ug mga aksyon ni Pedro? (Tan-awa usab sa 1 Nephi 3:7.) Unsa ang gidapit sa Ginoo nga imong buhaton nga susama sa pagkanaug gikan sa sakayan? Unsa ang imong nakita niini nga mga bersikulo nga nakahatag nimo og kaisug sa paggamit sa imong pagtuo kang Jesukristo?
Isip tinun-an ni Jesukristo, kinahanglang andam ko sa pagtuo ug pagdawat sa kamatuoran, bisan lisud kini buhaton.
Ang adlaw human sa milagrosong mihatag si Jesus og tinapay alang sa panon sa katawhan sa kamingawan, ang Iyang mga sumusunod nakakita Kaniya ug nangayo og dugang nga pagkaon. Hinoon, nahigawad sila ug nasilo sa dihang Siya mitanyag hinoon kanila og espirituhanong matang sa pagkaon—ang “tinapay sa kinabuhi” (Juan 6:48). Daghan ang nag-ingon nga “lisud kini nga sultiha” (Juan 6:60).
Nakasinati na ba ikaw sa dihang imong gibati nga ang butang nga gitudlo sa Manluluwas o sa Iyang mga sulugoon “lisud” dawaton nga doktrina? Hunahunaa ang mao nga kasinatian samtang basahon nimo kini nga istorya, ilabi na ang mga pulong ni Pedro sa mga bersikulo 68–69. Unsa ang pipila sa “mga pulong sa kinabuhing dayon” (Juan 6:68) nga makatabang nimo nga magpabilin nga mapasaligon sa pagsunod sa Manluluwas?
Tan-awa usab sa M. Russell Ballard, “Kang Kinsa Man Kami Moadto?” Liahona, Nob. 2016, 90–92.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Samtang magbasa ka bahin sa pagpakaon sa lima ka libo, mahimo kang mokaon og tinapay ug isda ug maghunahuna kon pila ang kinahanglanon sa pagpakaon sa lima ka libo ka mga tawo. Sa unsa nga paagi ang imong pamilya gipakaon sa espirituhanong paagi ni Kristo? Sa unsa nga paagi ikaw gigamit Niya sa pagpakaon sa uban?
Milagrosong gipakaon ni Jesus ang 5,000 ka tawo sa lima ka piraso nga tinapay ug duha ka isda.
Tingali malingaw ang imong pamilya sa pagdrama sa istorya niini nga mga bersikulo. Ngano nga ang mga tinun-an nahadlok? Ngano nga si Pedro nakahimo sa pagbuntog sa iyang kalisang ug mibiya sa sakayan? Sa unsa nga paagi nagpakita siya og pagtuo bisan nagsugod na siya sa pagkaunlod? Sa unsa nga paagi nga kita usahay sama ni Pedro?
Dapita ang mga sakop sa pamilya sa pagtimaan sa mga higayon sa mga pulong “mamaayo” niini nga mga bersikulo. Sa unsa nga mga paagi nga si Jesukristo makaayo sa mga tawo? Kanus-a ug sa unsa nga paagi Siya mihimo kanato nga mamaayo?
Hatagi ang matag sakop sa pamilya og usa ka piraso sa tinapay nga makaon, ug hisguti ang mga benepisyo nga atong madawat gikan sa tinapay ug sa ubang masustansya nga mga pagkaon. Dayon siksika kini nga mga bersikulo pagdungan, mangita nganong si Jesukristo mitawag sa Iyang Kaugalingon nga “tinapay sa kinabuhi” (Juan 6:35).
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Tinguhaa ang imong kaugalingong espirituhanong mga panabut. Sa imong personal ug pamilya nga pagtuon, ayaw limitahe ang imong kaugalingon sa mga tudling sa kasulatan nga naghisgot niini nga mga outline. Ang Ginoo tingali adunay mga mensahe alang kanimo niini nga mga kapitulo nga wala mahisguti dinhi. Sa mainampoong paagi pangitaa kini.
Batok sa Hangin, ni Liz Lemon Swindle