Pakan-a Sila, ni Jorge Cocco

Marso 25–31

Mateo 14–15; Marcos 6–7; Juan 5–6

“Ayaw Kamo Kalisang”

Samtang mangandam ka sa pagtudlo gikan sa Mateo 14–15; Marcos 6–7; ug Juan 5–6, pangita og mga mensahe nga magamit sa kinabuhi sa mga bata nga imong gitudloan. Unsa kaha ang makatabang kanila nga makasabut niini nga mga mensahe? Kini nga outline mahimong makahatag kanimo og mga ideya.

Irekord ang Imong mga Impresyon

Awhaga ang Pagpaambit

Ipakita ang hulagway ni Jesus nga naglakaw sa tubig (tan-awa ang outline karong semanaha diha sa Dali, Sunod Kanako—Alang sa mga Indibidwal ug mga Pamilya), ug hangyoa ang mga bata sa pagpaambit sa unsay ilang nahibaloan mahitungod sa istorya.

Itudlo ang Doktrina

Mas Gagmay nga mga Bata

Juan 5:1–9

Si Jesukristo nasayud sa unsay atong gikinahanglan ug makatabang kanato.

Samtang magbasa ka mahitungod ni Jesus nga miayo sa tawo sa tuburan sa Betsata, pamalandungi unsaon nimo sa pagtabang sa mga bata nga makakita kon unsa ang gitudlo sa istorya kabahin sa kamabination, gugma, ug ubang mga hiyas ni Jesus.

Posible nga mga Kalihokan

• Gamita ang hulagway nga Kristo Nag-ayo sa Masakiton didto sa Betsata (Libro sa mga Hulagway sa Ebanghelyo, nu. 42) sa pagsugilon sa mga bata sa istorya diha sa Juan 5:1–9. Hangyoa ang mga bata sa paghanduraw nga sila ang tawo nga giayo ni Jesus. Unsa kaha ang ilang bation sa dihang giayo sila ni Jesus?

• Hangyoa ang mga bata sa pagngalan og pipila ka butang nga lisud alang kanila o nga makapaguol kanila. Sultihi sila mahitungod sa usa ka panahon sa imong kinabuhi nga nakadawat ka og tabang gikan sa Manluluwas panahon sa lisud nga pagsulay. Ipamatuod nga si Jesus nahibalo sa tanan natong mga problema ug gustong motabang kanato.

Mateo 14:13–21

Nagsunod kita sa ehemplo ni Jesus kon magmabination kita sa uban.

Usa ka paagi nga mipakita si Jesus og gugma mao ang pagpakaon sa Iyang mga sumusunod sa dihang gigutom sila. Unsaon nimo sa pagtabang sa mga bata nga makakat-on sa pagserbisyo sa uban sama sa gibuhat ni Jesus?

Posible nga mga Kalihokan

• Pakit-a ang mga bata og basket ug pipila ka pan samtang imong isaysay ang istorya sa Mateo 14:13–21. Ipasabut nga bisan tuod si Jesus miadto sa bukid aron mag-inusara, ang mga tawo gusto nga mopaduol Kaniya. Ipaambit ang sumpay sa istorya ngadto sa mga bata, ug hangyoa sila sa pagpaminaw kon unsay gibuhat ni Jesus sa pagpakita og kamabination ug gugma alang kanila.

• Hangyoa ang mga bata sa pagpaambit og mga paagi nga ang usa ka tawo nagmabination kanila. Unsa ang ilang mahimo karong semanaha aron magmabination ngadto sa uban? Alang sa matag tubag nga ilang ihatag, pagdrowing og usa ka piraso sa pan o isda diha sa pisara. Sultihi ang mga bata nga kon buhaton nila kining mga butanga, nagsunod sila sa ehemplo nga gipakita ni Jesus sa dihang mipakaon Siya sa lima ka libo ka mga tawo nga gigutom.

Mateo 14:22–33

Ang pagtuo diha ni Jesukristo makatabang kanato nga dili mahadlok.

Si Pedro mipakita og dakong pagtuo sa dihang milakaw siya sa tubig padulong ni Jesus. Unsa nga mga leksyon kaha ang anaa niini nga istorya alang sa mga bata?

Posible nga mga Kalihokan

• Ipakita ang hulagway nga Jesus Naglakaw sa Tubig (Libro sa mga Hulagway sa Ebanghelyo, nu. 43) samtang imong isaysay ang istorya sa imong kaugalingong mga pulong. Ikonsiderar ang paggamit sa pahina sa kalihokan karong semanaha aron sa pagtabang sa mga bata sa pagsaysay sa istorya balik kanimo. Mahimo ka usab nga magdala og gamay nga panaksan sa tubig ug dapita ang mga bata nga magpakaaron-ingnon nga “ilakaw” ang ilang mga tudlo sa ibabaw sa tubig.

• Dayon hangyoa sila sa pagsulti kabahin sa mga panahon nga mibati sila og kahadlok ug sa pagpaambit kon unsay nakatabang kanila. Tabangi sila nga makakita nga ang hugot nga pagtuo kang Jesukristo makatabang kanato sa pagbuntog sa kahadlok.

Itudlo ang Doktrina

Mas Dagko nga mga Bata

Juan 5:17–47

Si Jesukristo nagtudlo kanato mahitungod sa Langitnong Amahan.

Sa unsang paagi ang mga pagtulun-an ni Jesus mahitungod sa Iyang Amahan makatabang sa mga bata nga makat-on mahitungod sa Langitnong Amahan?

Posible nga mga Kalihokan

• Paghimo og duha ka hugpong sa magkapares nga mga kard nga gisulatan sa mga pulong nga gigamit ni Jesus sa pagtudlo mahitungod sa Langitnong Amahan diha sa Juan 5, sama sa gugma, kinabuhi, ug buhat (tan-awa sa Juan 5:20, 26, 36). Ikulob ang mga kard, ug hangyoa ang mga bata sa pagpangita sa mga magkapares nga kard pinaagi sa pagpahayang og duha ka mga kard matag higayon. Sa matag magkapares nga kard nga maukban, basaha ang bersikulo nga anaa ang pulong, ug pangutan-a ang mga bata kon unsa ang gitudlo sa pulong kanato mahitungod sa Langitnong Amahan.

• Hangyoa ang mga bata sa pagbasa sa Juan 5:30, ug dayon kompletuha kini nga sentence: “Wala ko man tinguhaa ang pagbuhat sa akong kaugalingong kabubut-on, kondili …” Giunsa pagbuhat ni Kristo ang kabubut-on sa Iyang Langitnong Amahan? Unsaon nato pagbuhat ang kabubut-on sa Langitnong Amahan?

Juan 6:5–14

Ang atong gagmay nga mga halad makahimo og kalainan.

Usa kadto ka gamayng bata kinsa mihatag sa pan ug isda nga gigamit ni Jesus sa pagpakaon sa lima ka libo. Unsaon nimo pagtabang ang mga bata nga imong gitudloan nga makakita kon sa unsang paagi sila makatampo sa buhat sa Ginoo?

Posible nga mga Kalihokan

• Bahina ang pipila ka crackers o piraso sa mga pan sa mga bata. Tabangi sila sa paghanduraw kon unsa ka dako nga pundok sa katawhan ang lima ka libo ka mga tawo. Sama sa unsa kaha ang pagpakaon sa ingon ka daghang mga tawo gamit ang lima ka tinapay ug duha ka isda lamang?

• Dapita ang usa ka bata sa pagsaysay sa istorya sa pagpakaon sa lima ka libo gamit ang kaugalingon niyang mga pulong. Sa unsang paagi kita mamahimong sama sa batang lalaki diha sa Juan 6:9? Dapita ang mga bata sa pagdrowing og tinapay ug isda diha sa papel ug sa pagsulat diha niini sa pipila ka mga butang nga ilang ikahatag sa Ginoo sa pagtabang sa Iyang buhat.

• Hatagi ang mga bata og gamay nga puzzle nga sulbaron. Unsa ang mahitabo kon ang usa sa mga piraso sa puzzle mawala? Ipasabut nga ang matag usa kanato sama sa usa ka piraso sa puzzle—kitang tanan adunay importanting ikatampo sa kinabuhi sa uban. Sa unsang paagi motampo ang mga bata sa ilang mga pamilya o klase?

Si Jesus milagrusong mipakaon sa 5,000 ka mga tawo gamit ang lima ka tinapay ug duha ka isda.

Mateo 14:22–33

Ang pagtuo diha ni Jesukristo makatabang kanato nga dili mahadlok.

Ang pagtuo ug kahadlok adunay importanting mga parte diha sa istorya ni Jesus ug Pedro nga naglakaw sa dagat. Unsa ang mahimong makat-unan sa mga bata gikan niini nga istorya?

Posible nga mga Kalihokan

• Ipakita ang hulagway diha sa outline niini nga semana sa Dali, Sunod Kanako—Alang sa mga Indibidwal ug mga Pamilya. Hangyoa ang mga bata sa pagpangita og usa ka bersikulo diha sa Mateo 14 nga naghulagway sa litrato.

• Hangyoa ang mga bata sa pagpangita og mga timailhan sa pagtuo ug mga timailhan sa kahadlok samtang basahon nila ang Mateo 14:22–33. Unsa man ang buot ipasabut sa pagbaton og hugot nga pagtuo diha kang Jesukristo? Unsaon nato pag-ilis sa kahadlok og pagtuo?

• Hangyoa ang mga bata sa paghanduraw nga anaa sila ug adunay camera sa dihang si Jesus ug si Pedro milakaw sa dagat. Unsa nga higayon ang pilion nga litratuhan ug ngano? Isugyot nga siksikon nila ang Mateo 14:22–33 alang sa mga ideya. Dapita sila sa pagdrowing og hulagway sa higayon nga ilang gipili, sa pagpaambit sa ilang mga hulagway, ug sa pagpasabut nganong gipili nila kadto nga higayon.

Awhaga ang Pagkat-on diha sa Panimalay

Kon nakompleto sa mga bata ang pahina sa kalihokan karong semanaha, dapita sila sa paggamit niini aron sa pagtudlo sa ilang mga pamilya sa unsay ilang nakat-unan karon.

Pagpalambo sa Atong Pagtudlo

Awhaga ang pagpaambit. Pangutan-a ang mga bata mahitungod sa ilang mga hunahuna, mga pagbati, ug mga kasinatian. Imong makita nga kasagaran aduna silay yano apan tulukibon nga mga ideya.