“Abril 1–14. Mateo 16–17; Marcos 9; Lucas 9: ‘Ikaw Mao ang Kristo’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Abril 1–14. Mateo 16–17; Marcos 9; Lucas 9,” Dali, Sunod Kanako—Alang sa mga Indibidwal ug mga Pamilya: 2019
Ang Transpigurasyon, ni Carl Heinrich Bloch
Abril 1–14
Mateo 16–17; Marcos 9; Lucas 9
“Ikaw Mao ang Kristo”
Sa mosunod nga duha ka semana, palandunga ang pagpamatuod ni Pedro, nga makita sa Mateo 16:15–17, ug ang mga pagpamatuod sa mga propeta ug mga apostoles nga imong madungog atol sa kinatibuk-ang komperensya.
Irekord ang Imong mga Impresyon
Dili ba katingalahan nga ang mga Pariseo ug mga Saducio nagdemanda nga si Jesus mopakita kanila “og timailhan gikan sa langit”? Dili pa ba igo ang Iyang daghang nailhan nga mga milagro? Unsa ang mahitungod sa Iyang gamhanang mga pagtulun-an o ang daghang paagi nga Siya nakatuman sa karaang mga panagna? Ang ilang demanda nagagikan dili sa kakulang sa mga timailhan apan sa pagdumili sa “pag-ila nga mga timailhan” ug pagdawat niini. (Tan-awa sa Mateo 16:1–4.)
Si Pedro, sama sa mga Pariseo ug mga Saducio, nakasaksi sa mga milagro sa Manluluwas ug nakadungog sa Iyang mga pagtulun-an. Apan ang tukma nga pagpamatuod ni Pedro, “Ikaw mao ang Kristo, ang Anak sa buhi nga Dios,” wala moabut pinaagi sa iyang pisikal nga pagbati—ang iyang “pagkatawo.” Ang iyang pagpamatuod gipadayag ngadto kaniya pinaagi sa atong “Amahan nga atua sa langit.”Ang Pagpadayag mao ang bato diin gitukod sa Manluluwas ang Iyang Simbahan kaniadto ug karon—pagpadayag gikan sa langit ngadto sa Iyang mga sulugoon. Ug kini mao ang bato diin kita makatukod sa atong pagkatinun-an—pagpadayag nga si Jesus mao ang Kristo ug nga ang Iyang mga sulugoon naghupot sa “mga yawe sa gingharian.” Kon kita gitukod niini nga pundasyon, “ang gahum sa kamatayon dili gayud makabuntog [kanato].” (Mateo 16:15–19.)
Mga Ideya alang sa Personal nga Pagtuon sa Kasulatan
Usa ka pagpamatuod ni Jesukristo moabut pinaagi sa pagpadayag.
Kon si Jesukristo mangutana sa mga tawo karon, “Sumala sa sulti sa mga tawo, kinsa man kuno ang Anak sa Tawo?” ang ilang mga tubag magkalahi gikan sa mga tubag nga gihatag sa mga tawo sa Iyang panahon. Unsang moderno nga mga kinaiya ngadto ni Jesus ang imong namatikdan? Unsaon nimo sa pagtubag kon si Jesus mangutana nimo, “Unsa may inyong isulti, kinsa ako?” (Tan-awa sa Mateo 16:13–15.)
Palandunga ang imong pagpamatuod sa Manluluwas ug giunsa nimo sa pagdawat niini. Unsay imong makat-unan gikan sa Mateo 16:15–17 nga makapalig-on niini? Kon gusto ka nga makat-on pa og dugang bahin sa pagpamatuod ug personal nga pagpadayag susiha kini nga mga kasulatan: Juan 15:26; 1 Mga Taga-Corinto 12:3; 2 Nephi 31:18; Alma 5:45–48; ug Doktrina ug mga Pakigsaad 8:2–3.
Mateo 17:1–9; Marcos 9:2–10; Lucas 9:28–36
Unsa ang nahitabo didto sa Bukid sa transpigurasyon?
Sa dihang gidala ni Jesus sila si Pedro, Santiago, ug Juan ngadto sa “usa ka taas nga bukid,” nausab ang Iyang dagway (o nahimaya) sa ilang atubangan. Sila si Moises ug Elias (Elijah) nagpakita usab ug mitugyan sa mga yawe sa priesthood ngadto sa mga Apostoles. Kini nga mga yawe makapahimo nila sa paggiya sa Simbahan ni Kristo sa yuta human sa Iyang Pagkabanhaw (tan-awa sa Giya ngadto sa mga Kasulatan, “Pagkahimaya sa Panagway, Bungotd sa”). Kini nga mga yawe gipahiuli usab sa atong panahon (tan-awa sa D&P 110).
Unsa ang “mga yawe sa gingharian sa langit”?
Ang “mga yawe sa gingharian sa langit” nga gisaad sa Manluluwas nga ihatag ngadto ni Pedro mao ang mga yawe sa priesthood (Mateo 16:19). “Ang mga yawe sa priesthood mao ang awtoridad nga gihatag sa Dios ngadto sa mga lider sa priesthood aron pagmando, pagkontrolar, ug pagdumala sa paggamit sa Iyang priesthood dinhi sa yuta. Ang paggamit niini nga awtoridad sa priesthood gidumala niadtong kinsa naghupot niini (tan-awa sa D&P 65:2; 81:2; 124:123). Kadtong kinsa nga naghupot sa mga yawe sa priesthood adunay katungod sa pagdumala ug paggiya sa Simbahan sulod sa usa ka hurisdiksyon” (Handbook 2: Administering the Church [2010], 2.1.1).
Ang “mga yawe sa gingharian sa langit” mao ang mga yawe sa priesthood.
Ang mga yawe sa priesthood gihatag ngadto ni Pedro ug sa ubang mga Apostoles sa Bungtod sa Transpigurasyon nga gipahiuli sa atong panahon (tan-awa sa D&P 110:11–16). Kadtong kinsa naghupot sa mga yawe sa priesthood naglakip sa Unang Kapangulohan ug Korum sa Napulog Duha ka mga Apostoles ug ubang mga General Authority; mga presidente sa mga templo, mga misyon, mga stake ug mga distrito; ug mga bishop ug mga presidente sa branch, ug mga presidente sa korum.
Tan-awa usab sa Neil L. Andersen, “Gahum sa Priesthood,” Liahona, Nob. 2013, 92–95; Matinud-anon sa Tinuhoan, 204-07.
Mateo 17:14–21; Marcos 9:14–29
Kon magtinguha og mas dakong pagtuo, kinahanglan una kong maghupot sa pagtuo nga naangkon na nako.
Ang amahan nga gihisgutan sa Mateo 17 ug Marcos 9 adunay mga rason sa pagduha-duha nga si Jesus makaayo sa iyang anak. Iyang gihangyo ang mga tinun-an ni Jesus sa pag-ayo sa iyang anak, ug dili sila makahimo. Apan sa dihang gidapit siya sa Manluluwas nga magbaton og pagtuo, wala siya makatutok sa iyang mga pagduha-duha. “Ginoo, nagatuo ako,” miingon siya, ug dayon, sa pagdawat nga ang iyang pagtuo dili hingpit, midugang, “Tabangi ang pagtuo ko nga nakulangan.”
Unsa ang gitudlo sa Espiritu kanimo samtang nagbasa ka bahin niini nga milagro? Sa unsang paagi nga ang Langitnong Amahan mitabang nimo nga modako ang imong pagtuo? Unsay imong mahimo sa pagpalambo sa pagtuo nga anaa na nimo? Tingali makahimo ka og lista sa mga kasulatan, mga mensahe sa komperensya, o mga kasinatian nga nakapalig-on sa imong pagtuo.
Tan-awa usab sa Jeffrey R. Holland, “Ginoo, Nagatuo Ako,” Liahona, Mayo 2013, 93–95.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Aron matudloan ang mga bata bahin sa mga yawe sa priesthood mahimo nimong i-istorya ang sugilanon ni Elder Gary E. Stevenson mahitungod sa nasirad-an nilang sakyanan (tan-awa sa “Asa ang mga Yawe ug Awtoridad sa Priesthood?” Liahona, Mayo 2016, 29–32). Mahimo nimong pagamiton ang mga bata og mga yawe sa pag-abli sa balay, sa sakyanan, o sa ubang mga gikandado. Ikonsiderar ang pagpakita og litrato sa Presidente sa Simbahan ug nagpamatuod nga siya naghupot sa tanang mga yawe sa priesthood, sama ni Pedro.
Ang mga propeta nga adunay hugot nga pagtuo ni Jesukristo nakapabalhin og mga bukid (tan-awa sa Jacob 4:6; Moises 7:13). Ang mosunod nga pagpamatuod nga gikan ni Bishop Richard C. Edgley makatabang sa paghimo niini nga bersikulo nga importante sa imong pamilya: “Wala gayud ako makasaksi sa pagbalhin og usa ka tinuod nga bukid. Apan tungod sa hugot nga pagtuo ako nakakita og usa ka bukid sa pagduhaduha ug pagkawalay paglaum nga gibalhin ug gipulihan og paglaum ug pagka-positibo. Tungod sa hugot nga pagtuo personal akong nakasaksi og bukid sa sala nga gipulihan og paghinulsol ug pagpasaylo. Ug tungod sa hugot nga pagtuo personal ako nga nakasaksi og bukid sa kasakit nga gipulihan og kalinaw, paglaum, ug pagpasalamat. Oo, ako nakakita og mga bukid nga nabalhin” (““Hugot nga Pagtuo—ang Pagpili Inyo,” Liahona, Nob. 2010, 33). Unsa ang pipila ka mga bukid sa atong kinabuhi nga kinahanglan nga balhinon? Unsaon nato sa pagpakita og pagtuo sa gahum sa Dios aron matabangan kita nga mabalhin kini nga mga bukid?
Unsay buot ipasabut sa paglingi sa likod human makakupot sa daro? Ngano nga kini nga kinaiya makapahimo nato nga dili haum alang sa gingharian sa Dios?
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Pagpundok kamo kanunay. Si Presidente Henry B. Eyring mitudlo: “Dili gayud mopalabay og usa ka kahigayonan sa pagpundok sa mga anak aron pagkat-on sa doktrina ni Jesukristo. Kini nga mga higayon panagsa lamang itandi sa mga paningkamot sa kaaway” (“The Power of Teaching Doctrine,” Ensign, Mayo 1999, 74).
Magtutudlo, Gidala Nako nganha Kanimo ang Akong Anak, ni Walter Rane