“Abril 22–28. Mateo 18; Lucas 10: ‘Unsa bay Maayong Buhaton Ko aron Makapanag-iya Ako og Kinabuhing Dayon?’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Abril 22–28. Mateo 18; Lucas 10,” Dali, Sunod Kanako—Alang sa mga Indibidwal ug mga Pamilya: 2019
Ang Maayong Samarianhon, ni Dan Burr
Abril 22–28
Mateo 18; Lucas 10
“Unsa bay Maayong Buhaton Ko aron Makapanag-iya Ako og Kinabuhing Dayon?”
Samtang ikaw magmainampoon ug mamalandong sa Mateo 18 ug Lucas 10, bantayi ang hilum nga mga aghat sa Espiritu Santo. Mosulti Siya nimo sa unsa nga paagi nga kini nga mga pagtulun-an ug mga istorya imong magamit. I-rekord ang mga impresyon nga imong nadawat.
Irekord ang Imong mga Impresyon
Kon imong pangutan-on ang Ginoo, tingali makadawat ka og tubag nga wala nimo paabuta. Kinsa ang akong silingan? Si bisan kinsa nga nagkinahanglan sa imong tabang ug gugma. Kinsa man ang labing dako sa gingharian sa langit? Usa ka bata. Igo na ba ang pagpasaylo sa nakasala sa makapito ka higayon? Dili, kinahanglang mopasaylo ka kapitoan ka pito. (Tan-awa sa Lucas 10:29–37; Mateo 18:4, 21–22.) Kon ikaw nagtinguha sa kabubut-on sa Ginoo, dili ang “magpakamatarung sa [imong kaugalingon]” (Lucas 10:29), apan tungod kay gusto ka makat-on gikan Kaniya, ang Ginoo motudlo nimo unsaon sa pagpuyo sa paagi nga mosangpot ngadto sa kinabuhing dayon uban Kaniya.
Mga Ideya alang sa Personal nga Pagtuon sa Kasulatan
Kinahanglan kong mopasaylo sa uban kon gusto ko nga modawat og kapasayloan gikan sa Ginoo.
Ang sugyot ni Pedro nga makapasaylo siya og tawo makapito ka higayon ingon og nindot kaayo, apan mitudlo si Jesus og mas taas nga balaod. Ang iyang tubag, “Wala ako mag-ingon kanimo nga makapito, kondili kapitoan ka pito,” wala magtudlo bahin sa mga gidaghanon apan bahin sa Kristohanong kinaiya sa pagpasaylo. Samtang magbasa ka sa sambingay sa ulipon nga dili mapinasayloon, palandunga ang mga higayon nga imong gibati ang kalooy ug kapuangod sa Dios. Aduna bay nagkinahanglan nga mobati og kalooy ug kapuangod gikan kanimo?
Si Elder David E. Sorensen sa Seventy mitudlo: “Buot nakong ipatin-aw nga ang pagpasaylo sa mga sala dili gayud ikalibog nga kini nagtugot sa dautan. … Bisan tuod kita kinahanglan mopasaylo sa usa ka silingan kinsa nakapasakit kanato, kinahanglan kita maningkamot nga makatabang nga malikayan ang maong pagpasakit nga masubli” (“Ang Pagpasaylo Makapausab sa Kaligutgot ngadto sa Gugma,” Liahona, Mayo 2003, 12).
Kinsa ang Kapitoan?
Ang pagsunod sa sumbanan nga naestablisar panahon sa Daang Tugon (tan-awa sa Exodo 24:1; Numeros 11:16), Si Jesukristo “mitudlo og ubang kapitoan,” dugang ngadto sa Iyang mga Napulog Duha ka mga Apostoles, sa pagsaksi Kaniya, sa pagsangyaw sa Iyang ebanghelyo, ug sa pagtabang Kaniya sa Iyang buhat. Kini nga sumbanan nagpadayon diha sa gipahiuli nga Simbahan. Ang mga Kapitoan gitawag aron sa pagtabang sa Napulog Duha sa ilang misyon isip espesyal nga mga saksi ni Jesukristo ngadto sa tibuok kalibutan. Ang mga Kapitoan naorganisar ngadto sa mga korum. Ang mga sakop sa unang duha ka korum gi-set apart isip mga General Authority Seventy, samtang ang mga sakop sa ubang mga korum gi-set apart isip mga Area Seventy. (Tan-awa usab sa D&P 107:25–26, 33–34, 97.)
Aron makaangkon og kinabuhing dayon, kinahanglang higugmaon nako ang Dios ug ang akong silingan sama sa akong kaugalingon.
Makatabang ang paghinumdom nga ang sambingay sa maayong Samarianhon mao ang paagi sa pagtubag ni Jesus sa usa ka pangutana: “Kinsa man ang akong silingan?” Samtang magbasa ka niini nga sambingay, ibutang sa hunahuna kana nga pangutana. Unsa nga mga tubag ang imong nakita?
Sa panahon ni Jesus, ang pagdumtanay tali sa mga Judeo ug mga Samarianhon milungtad na og gatusan ka tuig. Ang mga Samarianhon mga kaliwat sa mga Judeo nga nagpuyo sa Samaria nga nakigminyo sa mga Hentil. Gibati sa mga Judeo nga ang mga Samarianhon nahugawan tungod sa ilang pagpakiglambigit sa mga Hentil ug miapostasiya. Ang mga Judeo mobiyahe og mga kilometro tipas sa ilang agianan aron sa paglikay nga moagi sa Samaria. (Tan-awa usab sa Lucas 9:52–54; 17:11–18; Juan 4:9; 8:48.)
Ngano kaha nga ang Manluluwas mipili og usa ka Samarianhon, usa ka tawo nga gikasilagan sa mga Judeo, isip ehemplo sa kapuangod ug paghigugma sa silingan? Unsa ang gidasig niini nga sambingay kanimo aron sa pagpakita og dugang nga kalooy ngadto sa uban?
Tan-awa usab sa Mosiah 2:17.
Mopili kita sa “nianang maayong bahin” pinaagi sa paghimo og mga pagpili nga mosangpot ngadto sa kinabuhing dayon.
Si Sister Bonnie D. Parkin, kanhi Kinatibuk-ang Presidente sa Relief Society, mitudlo: “Si Maria ug Marta mao ikaw ug ako. … Kining duha nahigugma sa Ginoo ug buot mopakita niana nga gugma. Niining higayona, alang kanako si Maria mipadayag sa iyang gugma pinaagi sa pagpaminaw sa Iyang pulong, samtang si Marta mipadayag sa iyang gugma pinaagi sa pag-alagad Kaniya. … Si Jesus wala mobalewala sa kahingawa ni Marta, apan hinoon miusab sa iyang pokus pinaagi sa pagpili ‘nianang maayong bahin.’ “Ug unsa man kana? … Ang usa ka butang nga gikinahanglan mao ang pagpili sa kinabuhing dayon [tan-awa sa 2 Nephi 2:28]. Mopili kita matag adlaw” (“Pagpili sa Gugmang Putli: Nianang Maayong Bahin,” Liahona, Nob. 2003, 104). Unsaon nimo sa pag-summarize ang tambag sa Ginoo ngadto ni Marta sa imong kaugalingong mga pulong? Susiha ang imong iskedyul—aduna bay “gikinahanglan” nga nagkinahanglan og dugang sa imong atensyon?
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Unsa nga mga himno ang makanta sa imong pamilya nga may kalabutan sa mga kamatuoran nga gitudlo niini nga mga kapitulo?
Ngano nga si Jesus gusto nga kita mahimong sama sa usa ka gamay nga bata? Unsa ang pipila ka mga kinaiya sa mga bata nga makapahimo nato nga mas sama ni Kristo kon atong gamiton kini sa atong kinabuhi? (tan-awa sa Mosiah 3:19).
Si Jesus gusto nga ang Iyang mga tinun-an mahimong sama sa gagmay nga mga bata.
Unsa ang makapahimo sa sambingay sa maayong Samarianhon nga mahimong tinuod alang sa imong pamilya? Malingaw ba sila nga magsul-ob og mga sinina ug i-drama kini? Siguroha ang pagtabang sa mga sakop sa pamilya nga makakita kon unsaon nila nga mahimong sama sa maayong Samarianhon. Aduna bay tawo nga nanginahanglan diha sa eskwelahan o sa simbahan nga tingali wala nato matagad? Unsay atong mahimo alang niini nga tawo?
Lisud ba gayud kaayo ang pagpahaum sa espirituhanong mga butang sa imong iskedyul sa pamilya? Ang istorya ni Maria ug Marta mahimong makadasig og family council o family home evening kon unsaon sa pagbuhat niini. Isip usa ka pamilya, makahimo kamo og lista sa mga paagi sa pagpili “nianang maayong bahin” (tan-awa sa Lucas 10:42).
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Pag-amuma og usa ka mahigugmaong palibut. Ang paagi sa mga sakop sa pamilya nga mobati ug motagad sa usag usa dako og impluwensya sa espiritu sa imong panimalay. Tabangi ang mga sakop sa pamilya sa paghimo sa ilang bahin sa pag-establisar og mahigugmaon, matinahuron nga panimalay aron nga ang tanan mobati nga luwas nga mopakigbahin og mga kasinatian, mga pangutana, ug mga pagpamatuod. (Tan-awa sa Pagtudlo sumala sa Pamaagi sa Manluluwas, 15.)
Kristo diha sa Panimalay ni Maria ug Marta, ni Walter Rane