“Abril 29–Mayo 5. Juan 7–10: ‘Ako ang Maayong Magbalantay’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Abril 29–Mayo 5. Juan 7–10,” Dali, Sunod Kanako—Alang sa mga Indibidwal ug mga Pamilya: 2019
Siya Nga Walay Sala, ni Liz Lemon Swindle
Abril 29–Mayo 5
Juan 7–10
“Ako ang Maayong Magbalantay”
Samtang magbasa ka sa Juan 7–10, mahimo kang modawat og mga impresyon gikan sa Espiritu Santo mahitungod sa mga baruganan sa doktrina niini nga mga kapitulo. Ang pagrekord sa imong mga impresyon makatabang nimo sa paghimo og plano sa pagbuhat niini.
Irekord ang Imong mga Impresyon
Bisan og si Jesukristo mianhi aron pagdala og “kalinaw [ug] panagdait sa mga tawo” (Lucas 2:14), dihay “panagkasumpaki sa mga tawo tungod kaniya” (Juan 7:43). Ang mga tawo nga nakasaksi sa samang mga paghitabo nagkalahi ang mga panghunahuna mahitungod kon kinsa si Jesus. Ang uban miingon, “Siya maayong tawo,” samtang ang uban miingon, “Nagapasalaag Siya sa mga tawo” (Juan 7:12). Sa dihang Iyang giayo ang usa ka buta nga tawo sa Igpapahulay, ang uban miinsister, “Kadtong tawhana dili gikan sa Dios, kay wala siya magbantay sa adlaw nga igpapahulay,” samtang ang uban nangutana, “Unsaon ba sa usa ka tawong makasasala ang pagkahimog mga milagro nga sama niini?” (Juan 9:16). Apan bisan pa sa tanang kalibug, kadtong nangita sa kamatuoran nakaila sa gahum sa Iyang mga pulong, kay “wala pa gayuy tawo nga nakasulti sama niining tawhana” (Juan 7:46). Sa dihang ang mga Judeo mihangyo ni Jesus “tug-ani kami sa laktud gayud” kon siya ba si Kristo, Iyang gipadayag ang baruganan nga makatabang kanato sa pag-ila sa kamatuoran gikan sa sayop: “Ang Akong karnero nagapatalinghug sa akong tingog,” miingon Siya, “ug Ako nakaila kanila, ug sila nagasunod kanako” (Juan 10:27).
Mga Ideya alang sa Personal nga Pagtuon sa Kasulatan
Samtang nagsunod ako sa mga kamatuoran nga gitudlo ni Jesukristo, makahibalo ako nga kini tinuod.
Ang mga Judeo nahibulong nga nakahibalo og daghan si Jesus nga wala man unta Siya makaeskwela (tan-awa sa bersikulo 15)—bisan man lang, dili sa mga paagi nga pamilyar nila. Sa tubag ni Jesus, gitudlo Niya ang laing paagi sa pagkahibalo sa kamatuoran nga magamit sa tanan, bisan pa sa edukasyon o background. Sumala sa Juan 7:14–17, unsaon nimo pagkahibalo nga ang doktrina nga gitudlo ni Jesus tinuod? Sa unsa nga paagi kini nga proseso nakatabang nimo sa pagpalambo sa imong pagpamatuod sa ebanghelyo?
Ang kalooy sa Manluluwas alang sa tanan.
Kon hisgutanan ang bahin sa pakighinabi sa Manluluwas uban sa babaye nga nadakpan nga nanapaw, si Elder Dale G. Renlund miingon: “Sigurado, ang Manluluwas wala mobaliwala sa pagpanapaw. Apan wala usab Niya gipanghimaraut ang babaye. Giawhag Niya ang babaye nga usbon ang iyang kinabuhi. Nadasig siya nga mag-usab tungod sa Iyang kapuangod ug kalooy. Gipamatud-an sa Hubad ni Joseph Smith sa Biblia ang miresulta nga pagkadisipulo niya: ‘Ug ang babaye mihimaya sa Dios sukad niana nga takna, ug mituo sa iyang pangalan’ [tan-awa sa Juan 8:11, footnote c]” (“Ang Atong Maayong Magbalantay,” Liahona, Mayo 2017, 30).
Kanus-a ka mibati sama sa babaye nga nakadawat og kalooy imbis panghimaraut gikan sa Manluluwas? Kanus-a ka nga nahisama sa mga escriba ug mga Pariseo, nag-akusar o naghukom sa uban bisan og ikaw makasasala? (tan-awa sa Juan 8:7). Unsa pay imong makat-unan sa paagi sa pagtubag sa Manluluwas sa mga escriba ug mga Pariseo ug sa babaye nga nadakpan tungod sa pagpanapaw? Unsay imong makat-unan bahin sa pagpasaylo sa Manluluwas samtang nagbasa ka niini nga mga bersikulo?
Ngano nga ang mga Judeo nasilo sa dihang si Jesus miingon, “Sa wala pa si Abraham, mao na Ako”?
“Mao Ako” mao ang pulong nga gigamit ni Jehova sa pagpaila sa Iyang Kaugalingon ngadto ni Moises, sumala sa narekord sa Exodo 3:14. Sa dihang miingon si Jesus, “Mao Ako,” gipaila Niya ang Iyang Kaugalingon nga si Jehova, ang Dios sa Daang Tugon. Ang mga Judeo miisip niini nga panamastamas, ug ubos sa balaod ni Moises, ang silot mao ang kamatayon pinaagi sa pagbato.
Pinaagi sa atong mga hagit, ang Dios makapakita sa Iyang Kaugalingon sa atong mga kinabuhi.
Tungod sa negatibo nga mga sangputanan nga sa kasagaran mosunod sa sala, mahimong atong isipon ang atong dili maayong palad isip mga resulta sa sayop nga binuhatan. Hinoon, sa dihang ang mga tinun-an sa Manluluwas nagtuo nga ang usa ka tawo nga natawo nga usa ka buta tungod kay ang iyang mga ginikanan nakasala, gikorihian sila ni Jesus. Sa unsa nga paagi nga ang mga pulong sa Manluluwas sa Juan 9:3 nakapausab sa imong panglantaw mahitungod sa imong mga hagit ug sa mga hagit sa uban? Samtang magbasa ka sa Juan 9, palandunga sa unsa nga paagi nga “mga buhat sa Dios ikapadayag” (Juan 9:3). Sa unsa nga paagi kini napakita samtang ikaw nag-atubang og mga hagit?
Makapaikag usab nga hunahunaon nga ang mga pangutana sa mga tinun-an sa Juan 9:2 nagpadayag nga sila mituo sa premortal nga kinabuhi, usa ka doktrina nga nawala sa Kristiyanismo panahon sa Dakong Apostasiya apan gipahiuli pinaagi ni Propeta Joseph Smith (tan-awa sa D&P 93:29; Moises 4:1–4; Abraham 3:22–26).
Kinsa ang “ubang mga karnero” ang gipasabut sa Manluluwas sa Juan 10:16?
Sa dihang ang Manluluwas mibisita sa Americas human sa Iyang Pagkabanhaw, gipasabut Niya kinsa ang Iyang ubang mga karnero (tan-awa sa 3 Nephi 15:21–16:5).
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Sa unsa nga paagi nga ikaw makatabang sa imong pamilya nga makasabut sa pagtulun-an ni Jesus sa Juan 7:24? Usa ka paagi mao ang pag-adto sa gawas ug hugaw-hugawan ang usa ka sakop sa pamilya. Unsa kaha ang mahunahuna sa estranghero niini nga sakop sa pamilya pinaagi sa pagtan-aw sa iyang hitsura? Ilista ang pipila ka maayong mga hiyas niini nga sakop sa pamilya nga dili makita pinaagi sa lang pagtan-aw lang kaniya (tan-awa usab sa 1 Samuel 16:7).
Sa unsa nga paagi nga kita usahay mahimong ulipon sa sala? Unsa nga mga kamatuoran ang gitudlo ni Jesus ang makahimo nato nga gawasnon?
Si Jesus Nag-ayo sa Buta, ni Carl Heinrich Bloch
Unsaon nimo pagtabang ang imong pamilya sa paghanduraw sa istorya ni Jesus nga nag-ayo sa buta nga tawo sa Juan 9? Mahimo nimong i-drama ang istorya. Dapita sila sa pagtimaan sa bisan unsa nga mga leksyon nga ilang makat-unan gikan sa istorya, sama sa unsay gipasabut nga mahimong kinabig ngadto sa ebanghelyo ni Jesukristo.
Aron maapil ang mga sakop sa pamilya sa pagkat-on gikan sa sambingay sa Maayong Magbalantay, hangyoa ang matag usa nila sa pagdrowing og litrato sa usa sa mosunod: usa ka kawatan, usa ka pultahan, usa ka magbalantay, usa ka sinuholan (binayran nga trabahante), usa ka lobo, ug usa ka karnero. Dapita sila sa pagbasa sa Juan 10:1–18, 27–29, ug dayon pahisguti isip usa ka pamilya unsa ang gitudlo sa Manluluwas bahin sa mga butang nga ilang gidrowing.
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Pangita sa dinasig nga mga pulong. Samtang magbasa ka, ang Espiritu tingali mopakita nimo sa piho nga pulong nga imong hatagan og pagtagad nga makadasig ug makaaghat nimo o ingon og gisulat nga alang lang kanimo. Ikonsiderar ang pagtimaan sa bisan unsa nga mga pulong nga nakadasig nimo sa Juan 7–10.
Wala na Mawala, ni Greg K. Olsen