“Mayo 6–12. Lucas 12–17; Juan 11: ‘Pangalipay Kamo uban Kanako, kay Hingkaplagan Ko ang Akong Karnero nga Nawala’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Mayo 6–12. Lucas 12–17; Juan 11,” Dali, Sunod Kanako—Alang sa mga Indibidwal ug mga Pamilya: 2019
Ang Nawala nga Anak, ni Liz Lemon Swindle
Mayo 6–12
Lucas 12–17; Juan 11
“Pangalipay Kamo uban Kanako, kay Hingkaplagan Ko ang Akong Karnero nga Nawala”
Samtang magbasa ka sa Lucas 12–17 ug Juan 11, tinguhaa sa mainampoon nga paagi unsay gusto sa Langitnong Amahan nga imong mahibaloan ug buhaton. Ang imong pagtuon niini nga mga kapitulo makaabli sa imong kasingkasing ngadto sa mga mensahe nga alang lang kanimo.
Irekord ang Imong mga Impresyon
Sa kasagaran sa mga sitwasyon, ang 99 sa 100 isipon nga maayo kaayo—apan dili kini mao kon ang maong gidaghanon nagrepresentar sa minahal nga mga anak sa Dios (tan-awa sa D&P 18:10). Niana nga sitwasyon, bisan usa ka kalag angay sa detalyado, mabalak-on nga pagpangita “hangtud nga makit-an [nato] siya” (Lucas 15:4), sama sa gitudlo sa Manluluwas sa sambingay sa karnero nga nawala. Dayon ang pagkalipay magsugod, kay “may labi pang kalipay unya didto sa langit tungod sa usa ka makasasala nga magahinulsol kay sa tungod sa kasiyaman ug siyam ka mga tawong wala magkinahanglan sa paghinulsol” (Lucas 15:7). Kon kana mora og dili makiangayon, makatabang nga hinumduman nga, sa tinuod, walay usa nga “wala magkinahanglan og paghinulsol.” Kitang tanan kinahanglan nga luwason. Ug kitang tanan makaapil sa pagluwas, maglipay sa matag kalag nga naluwas (tan-awa sa D&P 18:15–16).
Mga Ideya alang sa Personal nga Pagtuon sa Kasulatan
Kinahanglan nga akong itumong ang akong kasingkasing sa mahangturong mga butang kay sa mga butang sa kalibutan.
Ngano nga ang Dios moingon “Oy boang” ngadto sa mapaningkamuton, malampusong tawo kinsa nagtukod og dagkong mga balay ug mipuno niini sa mga bunga sa iyang mga paghago? (tan-awa sa Lucas 12:16–21). Niini nga mga kapitulo sa Lucas, ang Manluluwas nagtudlo og daghang mga sambingay nga makatabang nato sa pagtutok lapas sa kalibutanon ngadto sa mahangturon. Ang pipila niini nga mga sambingay gilista dinhi. Unsaon nimo pag-summarize sa mensahe sa matag usa? Unsa kaha ang gisulti sa Ginoo kanimo?
-
Ang dato nga boangboang (Lucas 12:13–21)
-
Ang dakong kombira (Lucas 14:12–24)
-
Ang anak nga nawala (Lucas 15:11–32)
-
Ang piniyalan nga malimbungon (Lucas 16:1–12)
-
Ang dato ug si Lazaro (Lucas 16:19–31)
Tan-awa usab sa Mateo 6:19–34; 2 Nephi 9:30; Doktrina ug mga Pakigsaad 25:10.
Malipay ang Langitnong Amahan kon kadtong nawala makit-an.
Naghunahuna ba ikaw unsay gibati sa Langitnong Amahan mahitungod niadtong nakasala o “nawala”? Ang mga Pariseo ug mga escriba nanaway ni Jesus sa pagpakigsandurot sa maong mga tawo. Agig tubag, miistorya si Jesus og tulo ka sambingay, nga makita sa Lucas 15—ang mga sambingay sa karnero nga nawala, sa drakma [sensilyo] nga nawala, ug sa anak nga nawala.
Samtang magbasa ka niini nga mga sambingay, ikonsiderar ang paghimo og lista sa mga kapareha ug mga kalainan tali niini. Sama pananglit, mahimo nimong pangitaon unsay nawala ug ngano, sa unsa nga paagi kini nakit-an, ug unsay reaksyon sa mga tawo sa dihang nakit-an kini. Unsa nga mga mensahe ang gihatag ni Jesus alang niadtong “nawala”—lakip na niadtong wala maghunahuna nga sila nawala? Unsa nga mga mensahe ang Iyang gihatag niadtong mga tawo nga nangita sa nawala?
Dayag lang, nga mas maayo nga dili mawala. Kabahin sa Lucas 15:7, si Elder James E. Talmage misulat, “Wala nay ikapangatarungan sa pagbana-bana nga ang naghinulsol nga makasasala pagahatagan og prayoridad labaw sa usa ka matarung nga kalag kinsa nakigbatok sa sala.” (Jesus the Christ [1916], 461). Hinoon, kitang tanan makasala ug kinahanglang luwason, ug ang makahupay nga mensahe sa mga sambingay sa Manluluwas mao nga ang matag usa kanato makahinulsol ug makabalik ngadto sa pagkamatarung, kay ang Dios nagtinguha nga walay usa ka kalag ang malaglag.
Tan-awa usab sa Doktrina ug mga Pakigsaad 18:10–16.
Ang Drakma nga Nawala, ni James Tissot
Unsa ang pagtulun-an ni Kristo sa sambingay sa piniyalan nga malimbungon?
Si Elder James E. Talmage mipasabut og usa ka leksyon nga atong makat-unan gikan sa sambingay: “Pagmakugihon; kay ang adlaw nga magamit nimo ang imong yutan-ong katigayunan molabay sa dili madugay. Pagkat-on bisan gikan sa malimbungon ug dautan; kon sila mabinantayon kaayo sa pagsangkap alang sa bugtong umaabut nga ilang mahunahuna, unsa pa kaha kamo, kinsa nagtuo sa mahangturong umaabut, kinahanglang mangandam alang niana nga umaabut! Kon wala ka makat-on og kaalam ug mabinantayon sa paggamit sa ‘malimbungon nga bahandi,’ sa unsa nga paagi ikaw masaligan sa mas mahangturong mga katigayunan?” (Jesus the Christ, 464).
Ang pagpasalamat sa akong mga panalangin makapaduol nako ngadto sa Dios.
Kon ikaw usa pa sa napulo ka sanlahon, mobalik kaha ka aron sa pagpasalamat sa Manluluwas? Unsa nga dugang nga panalangin ang nadawat sa mapasalamaton nga sanlahon tungod kay nagpasalamat siya? Sa unsa nga paagi nga ang pagpasalamat makaapekto sa imong pagkaespirituhanon? Tingali makaayo kanimo ang pagsugod sa pagsulat unsay imong gipasalamatan sa usa ka journal, sama sa gihulagway ni Presidente Henry B. Eyring sa iyang mensahe “O Hinumdumi, Hinumdumi” ( Liahona, Nob. 2007, 66–69).
Si Jesukristo mao ang Pagkabanhaw ug ang Kinabuhi.
Ang milagro sa pagbanhaw ni Lazaro gikan sa patay usa ka gamhanan ug dili malalis nga pagpamatuod nga si Jesus mao ang tinuod nga Anak sa Dios ug ang gisaad nga Mesiyas. Unsa nga mga pulong, o mga detalye sa Juan 11:1–46 ang nakapalig-on sa imong pagtuon nga si Jesukristo mao “ang pagkabanhaw, ug ang kinabuhi”? Sa unsa nga paagi nga kini nga kahibalo makaimpluwensya sa imong kinabuhi ug sa imong pagpili?
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Nakasabut ba ang mga sakop sa imong pamilya unsay bation nga mawad-an og butang—o mawala? Ang pagpakigsulti bahin niini nga mga kasinatian makasugod og panaghisgutan bahin sa mga sambingay sa karnero nga nawala ug drakma nga nawala. O makadula kamo diin ang usa ka tawo motago ug ang ubang mga sakop sa pamilya mosulay sa pagpangita kaniya. Sa unsa nga paagi kini nga kalihokan makatabang kanato nga makasabut niini nga mga sambingay?
Sa unsa nga paagi nga kita sama sa amahan niini nga istorya kon kita dunay mga minahal nga nawala? Unsay atong makat-unan sa kasinatian sa mas magulang nga anak nga makatabang nato nga mas mahimong sama ni Kristo? Sa unsa nga paagi nga ang amahan niini nga sambingay sama sa atong Langitnong Amahan?
Aron matabangan ang mga sakop sa pamilya nga gamiton ang istorya sa napulo ka sanlahon, mahimong dapiton nimo sila sa pagsulat og sekreto nga mga sulat sa pagpasalamat ug ibutang kini sa tibuok balay. Mahimo usab nga manganta kamong tanan “Ipha ang Inyong mga Panalangin,” Mga Himno ug mga Awit sa mga Bata, nu. 8, ug hisguti ang mga panalangin nga nadawat sa imong pamilya.
Ang mga sakop sa pamilya mahimong mopakigbahin sa ilang mga pagpamatuod ni Jesukristo.
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Paggamit og mga istorya ug mga ehemplo sa pagtudlo sa mga baruganan sa ebanghelyo. Ang Manluluwas sa kasagaran nagtudlo bahin sa mga baruganan sa ebanghelyo pinaagi sa paggamit sa mga istorya ug mga sambingay. Hunahunaa ang mga ehemplo ug mga istorya gikan sa imong kaugalingong kinabuhi nga makapahimo sa baruganan sa ebanghelyo nga makapainteresado alang sa imong pamilya (tan-awa sa Pagtudlo sumala sa Pamaagi sa Manluluwas, 22).
Hain ang Siyam, ni Liz Lemon Swindle