Ang Nawala nga Anak, ni Liz Lemon Swindle

Mayo 6–12

Lucas 12–17; Juan 11

“Pangalipay Kamo uban Kanako; kay Hingkaplagan Ko ang Akong Karnero Nga Nawala”

Basaha sa mainampuong paagi ang Lucas 12–17 ug Juan 11, magtinguha kon unsaon nimo sa pagtabang ang mga bata nga imong gitudloan nga makasabut sa mga kamatuoran niini nga mga kapitulo ug mobati sa gugma sa Langitnong Amahan.

Irekord ang Imong mga Impresyon

Awhaga ang Pagpaambit

Pahinumdumi ang mga bata sa pipila ka mga sambingay ug mga istorya nga makita sa Lucas 12–17 ug Juan 11, ug dapita sila sa pagpili og usa ug sa pagdrowing og hulagway niini.

Itudlo ang Doktrina

Mas Gagmay nga mga Bata

Lucas 15

Gusto sa Langitnong Amahan nga ang tanan Niyang mga anak makabalik ngadto Kaniya.

Tingali adunay pipila ka mga bata sa imong klase nga dili kanunay motambong sa Primary. Unsaon nimo pagdasig ang mga bata nga imong gitudloan sa pagtabang kanila uban sa gugma?

Posible nga mga Kalihokan

• Hatagi ang usa ka bata og usa ka sinsilyo, ang laing bata og hulagway sa usa ka karnero, ug ang laing bata sa hulagway sa nawala nga anak (LDS.org). Isaysay ang tulo ka sambingay nga makita diha sa Lucas 15 ug dapita ang mga bata sa pagpataas sa ilang sinsilyo o hulagway kon imo kining mahisgutan. Mahimo nimong dapiton ang mga bata sa pagsaysay sa mga sambingay ngadto sa usag usa sa ilang kaugalingong mga pulong.

• Hangyoa ang mga bata sa pagpaambit og higayon nga nawad-an sila og usa ka butang. Ipasabut nga ang mga tawo mahimong mawala sa espiritwal nga paagi kon dili nila mabati ang gugma sa Dios o kon mopahilayo sila Kaniya. Pagpamatuod nga kini nga mga sambingay nagtudlo nga gusto sa Dios nga atong tabangan ang mga tawo nga nawala nga mobalik ngadto Kaniya.

• Dapita ang mga bata sa paghunahuna sa ubang mga bata nga dili motambong sa Primary. Tabangi sila sa paghimo og mugbo nga mga sulat nga nagdapit niini nga mga bata sa pagtambong sa Primary o sa usa ka kalihokan sa Primary. Sa unsa pa nga mga paagi nga atong matabangan kini nga mga bata nga mobati sa gugma sa Langitnong Amahan alang kanila?

Lucas 17:11–19

Mapakita nako ang akong gugma alang sa Langitnong Amahan pinaagi sa pagkamapasalamaton alang sa akong mga panalangin.

Sa unsang paagi ang istorya sa napulo ka mga sanlahon makaawhag sa mga bata nga magmapasalamaton?

Posible nga mga Kalihokan

• Isaysay ang istorya sa napulo ka mga sanlahon nga giayo ni Jesus. Ipakita ang hulagway diha sa outline niini nga semana sa Dali, Sunod Kanako—Alang sa mga Indibidwal ug mga Pamilya ug dapita ang mga bata sa pag-ihap hangtud sa napulo gamit ang ilang mga tudlo. Dayon hangyoa sila sa paghipos sa siyam ka mga tudlo aron mapakita ang usa ka sanlahon kinsa mipasalamat kang Jesus. Kanus-a man ang mga bata nakapahayag og pasalamat ngadto sa usa ka higala o minahal?

• Dapita ang pipila ka mga bata sa pag-aksyon sa mga panalangin nga mapasalamaton sila. Ipatag-an sa nahabilin nga mga bata kon unsa ang mga panalangin. Hangyoa ang mga bata sa pagpaambit og mga paagi nga atong mapakita sa Langitnong Amahan nga mapasalamaton kita alang sa atong mga panalangin.

Juan 11:1–46

Nagtuo kita nga si Jesus mao ang Anak sa Dios.

Si Marta, kinsa igsoon ni Lazaro, miingon ni Jesus: “Ako nagatuo nga ikaw mao ang Kristo, ang Anak sa Dios” (Juan 11:27). Ang istorya ni Maria, Marta, ug Lazaro makapalig-on sa mga pagpamatuod sa mga bata kabahin ni Jesukristo.

Posible nga mga Kalihokan

• I-summarize ang istorya ni Jesus nga nagbuhi ni Lazaro gikan sa mga patay (tan-awa usab sa “Kapitulo 43: Gibuhi og Balik ni Jesus si Lazaro,” Mga Istorya sa Bag-ong Tugon, 107–9, ug pagpakita og patay nga sanga ug buhi nga tanom. Ihatag ang imong pagpamatuod nga tungod sa gahum ni Jesukristo, ang mga tawo nga patay mabanhaw ug mabuhi pag-usab.

• Tabangi ang mga bata sa pagsag-ulo sa mga pulong nga gisulti ni Jesus kang Marta: “Ako mao ang pagkabanhaw, ug ang kinabuhi” (Juan 11:25). Ipasabut nga tungod sa Pagkabanhaw sa Manluluwas, atong makita pag-usab ang atong mga minahal nga namatay na.

Itudlo ang Doktrina

Mas Dagko nga mga Bata

Lucas 15

Makatabang ko ni Jesus sa pagpangita sa Iyang nawala nga karnero.

Tingali wala makahibalo ang mga bata nga adunay uban sa klase nga dili magtambungan sa Primary. Unsaon nimo sa pagdasig kanila nga motabang niining mga bataa?

Posible nga mga Kalihokan

• I-assign ang matag bata sa pagbasa og hilum sa bisan hain sa sambingay sa nawala nga karnero o ang sambingay sa nawala nga sinsilyo, nga makita diha sa Lucas 15:1–10, ug sa pagpaambit sa unsay ilang nakat-unan.

• Isulat kini nga mga ngalan diha sa pisara: amahan, magulang nga anak, ug manghud nga anak. Basaha og dungan ang sambingay sa nawala nga anak. Dapita ang mga bata sa pagsulat diha sa pisara sa pipila sa mga pagbati sa mga tawo nga nalista.

• Hangyoa ang usa ka bata sa pagbiya sa kwarto samtang ang ubang mga bata motago og usa ka sinsilyo o papel nga karnero. Pabalika ang bata ug papangitaa sa sinsilyo o karnero. Pahinumdumi ang mga bata nga ang mga tawo mahimong mawala sa mga panalangin sa ebanghelyo. Dapita sila sa pagsugyot og mga paagi nga makatabang sila sa ingon nga mga tawo.  Pagpamatuod sa kalipay nga moabut kon ang mga tawo mobalik sa Dios.

• Ipasabut nga si Jesus migamit sa nawala nga karnero, nawala nga sinsilyo, ug nawala nga anak sa pagrepresentar sa mga tawo nga “nawala” tungod kay wala sila makaangkon sa mga panalangin sa ebanghelyo. Dapita ang mga bata sa paghunahuna og mga tawo nga ilang kaila nga dili motambong sa simbahan. Unsa ang ilang mabuhat aron sa pagtabang niining mga tawhana nga mobati sa gugma sa Langitnong Amahan alang kanila?

Nawala nga Karnero, ni Liz Lemon Swindle

Lucas 17:11–19

Mapakita nako ang akong gugma alang sa Langitnong Amahan pinaagi sa pagkamapasalamaton alang sa akong mga panalangin.

Ang istorya sa napulo ka mga sanlahon maayo nga paagi sa pagdasig sa mga bata sa pagpahayag og pasalamat sa Langitnong Amahan alang sa ilang mga panalangin.

Posible nga mga Kalihokan

• Basaha og dungan ang istorya sa napulo ka mga sanlahon. Sa unsang paagi ang sanlahon nga nagpasalamat napanalangin sa iyang kamapasalamaton? Nganong importante man nga magpasalamat sa Dios alang sa atong mga panalangin?

• Dapita ang mga bata sa paglista sa mga butang nga mapasalamaton sila nga magsugod sa matag titik sa ilang ngalan.

• Hangyoa ang mga bata sa pagsulat og mugbo nga mga sulat pasalamat ngadto sa Langitnong Amahan alang sa mga panalangin nga Iyang gihatag kanila. Mahimo nilang ibitay ang mugbo nga mga sulat dapit sa ilang higdaanan aron sa pagpahinumdom kanila nga mopahayag og pasalamat kon sila mag-ampo.

Juan 11:1–46

Nagtuo kita nga si Jesus mao ang Anak sa Dios.

Unsaon nimo paggamit ang istorya ni Maria, Marta, ug Lazaro sa pagtabang sa mga bata nga masayud, sama kang Marta, nga si Jesus mao “ang Kristo, ang Anak sa Dios”? (Juan 11:27).

Posible nga mga Kalihokan

• Isulat diha sa pisara ang pipila sa mga pamahayag nga gipamulong sa mga tawo diha sa Juan 11. Dapita ang mga bata sa pagtag-an kon kinsa ang misulti sa matag pamahayag, ug hangyoa sila sa pagsiksik sa Juan 11 aron masuta kon sakto ba ang ilang mga tag-an. Unsa kaha ang ilang bation kon sila mao si Jesus, si Marta, si Maria, o si Lazaro? Sa unsang paagi ang pagtuo kang Jesus makatabang kanato kon kita naguol o nahadlok?

• Basaha ang pagpamatuod ni Marta, nga makita diha sa Juan 11:20–27. Hangyoa ang mga bata sa pagpangita sa mga pulong nga nagpakita nga adunay hugot nga pagtuo si Marta. Unsa ang atong buhaton aron makabaton og pagtuo kon ang pagbuhat niini lisud?

• Tabangi ang mga bata nga makasag-ulo sa Juan 11:25. Ipasabut nga ang tanan mabanhaw, apan ang matarung lamang ang makadawat og kinabuhing dayon ug makapuyo og balik uban sa Langitnong Amahan ug ni Jesukristo.

Awhaga ang Pagkat-on diha sa Panimalay

Hatagi ang mga bata og papel o gamayng notebook nga magamit nila sa pagsulat o pagdrowing sa mga butang nga mapasalamaton sila sa tibuok semana.

Pagpalambo sa Atong Pagtudlo

Ang pagbalik-balik usa ka yawe sa pagkat-on. Ang mga bata makabenepisyo sa pagpaminaw sa baruganan sa ebanghelyo o sa paghimo sa kalihokan og sobra sa kausa. Sulayi ang pagbalik-balik sa mga kalihokan sa lain-laing mga paagi.