mga mamumuo sa ubasan

Mayo 13–19

Mateo 19–20; Marcos 10; Lucas 18

“Unsay Pa May Akong Kulang?”

Basaha ang Mateo 19–20; Marcos 10; ug Lucas 18, nga maghunahuna sa mga bata nga imong gitudloan. Irekord ang bisan unsang pag-aghat nga imong madawat. Ang imong pagpangandam makatabang nimo sa pagtudlo sa mga bata sa unsay kinahanglan nilang masayran gikan niini nga mga kapitulo.

Irekord ang Imong mga Impresyon

pagpaambit nga icon

Awhaga ang Pagpaambit

Dapita ang mga bata sa pagsulti sa klase sa unsay ilang ganahan bahin sa ilang pamilya. Mahimo gani nimong hangyoon ang mga ginikanan sa mga bata sa paghatag og mga litrato sa ilang mga pamilya aron ikapaambit sa ilang mga bata diha sa klase.

pagtudlo nga icon

Itudlo ang Doktrina

Mas Gagmay nga mga Bata

Marcos 10:6–8

Gusto sa Langitnong Amahan nga maminyo kita sa templo ug makabaton og mahangturon nga mga pamilya.

Sa unsang paagi ang mga bata nga imong gitudloan makabenepisyo sa pagkat-on mahitungod sa doktrina sa mahangturong kaminyoon? Mahimong makatabang ang paggamit sa “Ang Pamilya: Usa ka Pamahayag ngadto sa Kalibutan” (Liahona, Nob. 2010, 129).

Posible nga mga Kalihokan

• Basaha ang Marcos 10:6–8 ngadto sa mga bata, ug pag-display og litrato sa usa ka magtiayon. Hangyoa ang mga bata nga motudlo ngadto sa lalaki ug babaye kon makadungog sila nimo nga mobasa sa mga pulong nga “lalaki” ug “babaye.” Ipasabut nga tuyo sa Langitnong Amahan nga ang lalaki ug babaye magminyo sa usag usa (tan-awa sa Genesis 1:27–28).

• Pag-display og ang mga litrato sa usa ka pamilya ug usa ka templo. Ipasabut nga gusto sa Langitnong Amahan nga ma-seal kita ngadto sa atong mga pamilya diha sa templo aron mahimo nato silang ikauban sa kahangturan. Pagmahimong sensitibo sa mga bata kansang mga ginikanan wala pa ma-seal.

• Kantaha ang “Malipayon ang Pamilya,” Songbook sa mga Bata, 104. Dapita ang mga bata nga tudloon ang ilang mga kaugalingon kon sila mokanta sa “ako,” “kanako,” “kanato,” ug “kita.” Mahimong balikon kini nga kalihokan sa pipila ka higayon. Dapita ang mga bata sa pagpaambit og makalingaw nga mga butang nga ilang nabuhat uban sa ilang mga pamilya. Nganong mapasalamaton man sila alang sa ilang mga pamilya?

• Pagkanta og awit mahitungod sa templo o mga pamilya, sama sa “Gusto Ko nga Makita ang Templo” o “Mga Pamilya Mahimong Manag-uban sa Kahangturan,” Songbook sa mga Bata, 99, 98. Pakupta ang mga bata og mga litrato sa mga templo o mga pamilya, ug dapita sila sa pagpataas sa ilang mga litrato kon mokanta sila og “templo” o “pamilya.” Nganong importante man nga magminyo sa templo?

edaran nga magtiayon sa atubangan sa templo

Ang mahangturong kaminyoon kabahin sa plano sa Dios.

Marcos 10:13–16

Gusto ni Jesus nga moduol Kaniya ang gagmayng mga bata aron makapanalangin Siya kanila.

Kini nga istorya naghatag og oportunidad sa pagtabang sa mga bata nga mobati kon unsa sila ka mahal ni Jesus.

Posible nga mga Kalihokan

• Sa imong kaugalingong mga pulong, ipaambit ang istorya diha sa Marcos 10:13–16. Kanus-a gibati sa mga bata ang gugma ni Jesus alang kanila? Ipamatuod sa mga bata nga si Jesus nahigugma kanila ug gustong mopanalangin kanila.

• I-display ang litrato nga Kristo ug ang mga Bata (Libro sa mga Hulagway sa Ebanghelyo, nu. 47). Ipasabut nga kon gusto kita nga mahimong sama sa mga bata nga naglingkod tapad ni Jesus nan mosunod kita sa Iyang mga sugo ug mohigugma Kaniya ug sa ubang mga tawo. Unsa ang mabuhat sa mga bata aron mahimong sama sa mga bata nga naglingkod tapad ni Jesus?

• Padrowinga ang mga bata og mga hulagway sa ilang kaugalingon nga gipanalanginan ni Jesus (tan-awa sa Marcos 10:16).

Marcos 10:17–22

Kon mosunod kita sa Iyang mga sugo, makadawat kita sa kinabuhing dayon.

Gitudloan ni Jesus ang adunahan nga batan-ong lalaki nga aron makaangkon og kinabuhing dayon—kinabuhi sama sa Langitnong Amahan—kinahanglan siyang mosunod sa mga sugo.

Posible nga mga Kalihokan

• Basaha ang istorya sa adunahan nga batan-ong lalaki diha sa Marcos 10:17–22 uban sa mga bata. (Tan-awa usab sa “Kapitulo 42: Ang Batan-ong Tawo nga Adunahan,” Mga Istorya sa Bag-ong Tugon, 105–6.) Hangyoa sila sa pagpaminaw kon unsay gisulti ni Jesus nga buhaton sa batan-on ug sa unsang paagi mitubag ang batan-on.

• Pagsulti og usa o daghan pa nga mga istorya mahitungod sa mga bata kinsa nangayo og tambag o direksyon gikan sa ilang mga ginikanan apan wala mosunod o motuman. Unsa ang pipila ka butang nga gipabuhat sa Langitnong Amahan kanato? Unsa ang atong bation kon motuman kita sa Iyang mga sugo?

• Pagpaambit og mga kasinatian sa dihang nakadawat ka og personal nga mga pag-aghat sa pagbuhat og butang aron mahimong mas maayo.

pagtudlo nga icon

Itudlo ang Doktrina

Mas Dagko nga mga Bata

Marcos 10:6–8

Gusto sa Langitnong Amahan nga maminyo kita sa templo ug makabaton og mahangturon nga mga pamilya.

Ang mga butang nga gitudlo ni Jesus mahitungod sa kaminyoon makatabang sa mga bata kon mag-atubang sila og nagkasumpaki nga mga mensahe sa kalibutan.

Posible nga mga Kalihokan

• Hangyoa ang usa sa mga bata sa pagbasa og kusog sa Marcos 10:6–8. Nganong importante man nga ang mga bana ug asawa mag-ipon, maghigugmaay sa usag usa, ug magtrabaho isip managpares?

• Ipaambit ang mosunod nga pamahayag gikan sa “Ang Pamilya: Usa ka Pamahayag ngadto sa Kalibutan,” ug tabangi ang mga bata nga makasabut kon unsa ang kahulugan niini: “Ang pagkalalaki ug pagkababaye usa ka mahinungdanon nga kinaiya sa tagsa-tagsa sa kinabuhi sa wala pa dinhi sa yuta, sa pagkamortal, ug sa walay katapusan nga pag-ila ug katuyoan.”

• Hangyoa ang mga bata sa pagtabang kanimo sa paghunahuna og mga tubag sa mga pangutana nga sama sa “Nganong importante man ang mga pamilya diha sa Simbahan?” o “Nganong importante man nga magminyo ka diha sa templo?” Kantaha og dungan ang “Mga Pamilya Mahimong Manag-uban sa Kahangturan,” Songbook sa mga Bata,  98. Ipaambit ang imong pagpamatuod mahitungod sa mahangturong kaminyoon ug pamilya ngadto sa mga bata. Dapita sila sa pagpaambit usab sa ilang mga pagpamatuod.

• Dapita ang matag bata sa pagbasa og kasulatan gikan niini nga lista: Marcos 10:6–8; 1 Mga Taga-Corinto 11:11; DP 42:22; 131:1–4; ug Moises 3:18, 21–24. Unsa ang gitudlo niini nga mga kasulatan mahitungod sa kaminyoon?

Marcos 10:17–22

Makatabang si Jesus kanako nga masayud kon unsay kinahanglan nakong buhaton aron mouswag.

Ang adunahan nga batan-ong lalaki nangita ni Jesus ug nakadawat og piho nga instruksyon nga gituyo alang gayud kaniya. Unsaon nimo pagdasig ang mga bata nga magtinguha og sama nga giya diha sa ilang kinabuhi?

Posible nga mga Kalihokan

• Hangyoa ang mga bata sa pagpangita og bersikulo diha sa Marcos 10:17–22 nga naglarawan sa hulagway diha sa outline niini nga semana sa Dali, Sunod Kanako—Alang sa mga Indibidwal ug mga Pamilya. Ipasabut nga personal ang tambag nga gihatag ni Jesus ngadto sa batan-ong lalaki, ug kitang tanan makadawat og personal nga direksyon gikan sa Ginoo pinaagi sa Espiritu.

• Basaha og dungan ang Marcos 10:17–22. Dapita ang mga bata sa pagsulat diha sa pisara sa mga sugo nga gisulti sa Manluluwas nga tumanon sa adunahan nga batan-ong lalaki (tan-awa sa bersikulo 19). Unsa pa man ang kinahanglan niyang buhaton? (tan-awa sa bersikulo 21). Awhaga ang mga bata sa paghunahuna sa mga butang nga tingali kinahanglan nilang sugdan sa pagbuhat o hunungon sa pagbuhat aron mas makasunod ni Jesus. Unsa ang pipila ka mga pamaagi nga atong mahibaloan kon unsa ang gusto ni Jesus nga atong buhaton?

pagkat-on nga icon

Awhaga ang Pagkat-on diha sa Panimalay

Dapita ang mga bata sa pagsulti sa ilang mga pamilya nganong mapasalamaton sila kanila, tingali pinaagi sa paghimo og mubo nga sulat nga ihatag sa ilang mga ginikanan o pinaagi sa pagpaambit sa ilang pagpamatuod mahitungod sa mga pamilya atol sa family home evening.

Pagpalambo sa Atong Pagtudlo

Obserbari ang mga bata. Unsa man ang reaksyon sa mga bata sa imong klase ngadto sa mga kalihokan sa pagkat-on? Kon daw wala kaayo sila moapil, panahon na siguro nga mosulay og laing kalihokan o mohimo og mubo, matahuron nga paglakaw. Sa laing bahin, kon nakamatikod ka nga miapil ang mga bata ug nagkat-on gikan sa usa ka bahin sa leksyon, ayaw batia nga kinahanglang mopadayon sa unahan aron lang masiguro nga nahurot nimo ang tanang materyal sa leksyon.

pahina sa kalihokan: Gusto ni Jesus nga mopanalangin sa gagmayng mga bata