Si Zaqueo sa Kahoy nga Sycamore, ni James Tissot

Mayo 20–26

Mateo 21–23; Marcos 11; Lucas 19–20; Juan 12

“Tan-awa, ang Imong Hari Nagaanhi”

Samtang imong basahon ang Mateo 21–23; Marcos 11; Lucas 19–20; ug Juan 12, hatagig pagtagad ang mga impresyon nga imong madawat gikan sa Espiritu Santo. Tan-awa ang “Pagtubag sa mga Panginahanglan sa Mas Gagmay nga mga Bata” sa sinugdanan niini nga manwal alang sa mga butang nga hinumduman samtang imong itudlo kini nga mga baruganan.

Irekord ang Imong mga Impresyon

Awhaga ang Pagpaambit

Ipakita ang hulagway gikan sa outline niini nga semana diha sa Dali, Sunod Kanako—Alang sa mga Indibidwal ug mga Pamilya, ug dapita ang mga bata sa pagpaambit sa unsay ilang nahibaloan mahitungod sa unsay nahitabo diha sa hulagway.

Itudlo ang Doktrina

Mas Gagmay nga mga Bata

Lucas 19:1–10

Ang Langitnong Amahan ug si Jesus nakaila sa akong ngalan.

Samtang nagbasa ka mahitungod sa inter-aksyon sa Manluluwas kang Zaqueo, unsa nga mga mensahe ang imong nakita nga mahimong mopanalangin sa mga bata nga imong gitudloan?

Posible nga mga Kalihokan

• Ipakita ang hulagway nga Si Zaqueo sa Kahoy nga Sycamore (LDS.org). Tabangi ang mga bata sa pag-ila ni Zaqueo ug pagsulti sa iyang ngalan. Paghimo og mga aksyon nga buhaton sa mga bata samtang imong isaysay ang istorya ni Zaqueo ug ni Jesus—sama pananglit, mokinto aron makakita ibabaw sa pundok sa mga tawo o magpakaaron-ingnon nga nagkatkat sa kahoy. Ipasabut nga ang Manluluwas nakakita ni Zaqueo ug mitawag kaniya sa iyang ngalan. Ipamatuod nga ang Manluluwas nakaila usab sa matag bata ug sa ilang mga ngalan.

• Pagdala og walay sulod nga picture frame sa klase, o paghimo og picture frame gamit ang papel. Dapita ang matag bata nga magpuli-puli sa paggunit sa frame nga ipasentro ang iyang nawong niini samtang ang mga kauban sa klase moingon, “Ang Langitnong Amahan ug si Jesus nakaila ni [ngalan sa bata].”

• Dapita ang mga bata nga magpuli-puli sa pagpakaaron-ingnon nga nagkatkat sa kahoy, sama sa gibuhat ni Zaqueo. Pasultiha ang mga kauban sa klase og, “Ang Langitnong Amahan ug si Jesus nakaila ni [ngalan sa bata].”

• Kantaha og dungan ang “Ako Anak sa Dios,” Songbook sa mga Bata, 2–3, ug tabangi ang mga bata sa pagpaminaw sa mga butang nga makatabang kanila nga mahibalo nga ang Langitnong Amahan nagmahal kanila.

Mateo 21:12–14

Ang templo usa ka sagrado nga dapit.

Ang imong pagpamatuod sa templo makatabang sa mga bata nga imong gitudloan nga makasabut nga ang templo usa ka sagrado nga dapit.

Posible nga mga Kalihokan

• Ipakita ang hulagway nga Jesus Naghinlo sa Templo (Libro sa mga Hulagway sa Ebanghelyo, nu. 51), ug isaysay ang istorya sumala sa narekord diha sa Mateo 21:12–14. Tabangi ang mga bata sa pagpangita og mga imahe sa kwarta ug mga hayop diha sa hulagway. Dayon hisguti nganong gusto sa Manluluwas nga mopahawa sa templo ang mga tigpangilis og kwarta ug ang mga tawo nga namaligya og mga hayop.

• Pagpakita og mga hulagway sa templo (sama pananglit, tan-awa sa Libro sa mga Hulagway sa Ebanghelyo,117–21), ug hangyoa ang mga bata sa pagpaambit kon unsay ilang bation kon makakita sila og templo. Sultihi ang mga bata nga kadto nga mga pagbati mao ang Espiritu Santo nga nagsulti kanato nga ang templo usa ka espesyal nga dapit. Hangyoa ang mga bata sa paglihok nga sama nga anaa sila sulod sa templo. Sama pananglit, mohunghong sila kon mag-istorya ug molingkod nga may balaang pagtahud. Kantaha og dungan ang “Gusto Ko nga Makita ang Templo,” Songbook sa mga Bata, 95, ug dapita ang mga bata sa paghimo og tumong nga mosulod sa templo ugma damlag.

Ang templo mao ang balay sa Ginoo.

Mateo 21:28–32

Makahimo ko nga magmasulundon.

Ang Langitnong Amahan gusto nga magmasulundon kita. Ang sambingay sa duha ka anak usa ka oportunidad sa pagtudlo kabahin sa kaimportante sa pagkamasulundon.

Posible nga mga Kalihokan

• Pagdrowing og hulagway sa duha ka mga anak nga lalaki diha sa pisara, ug gamita ang mga drowing samtang imong isaysay ang sambingay sa Mateo 21:28–32. Hain nga anak ang mibuhat sa eksaktong butang sa katapusan? Hangyoa ang mga bata sa pagngalan og mga butang nga ilang mabuhat aron magmasulundon diha sa panimalay. Ipadrowing nila ang ilang mga kaugalingon nga nagbuhat sa usa niining mga butanga.

• Dapita ang mga bata sa pagpaambit og mga kasinatian nga nagmasulundon sila sa ilang mga ginikanan o sa laing tigbantay o lider. Sa unsang paagi sila napanalanginan tungod sa pagkamasulundon? Unsaon nila nga mahimong mas masulundon sa umaabut?

Itudlo ang Doktrina

Mas Dagko nga mga Bata

Lucas 19:1–10

Kon mangita ko sa Manluluwas, makakaplag ko Kaniya.

Mahimo nimong gamiton ang istorya ni Zaqueo sa pagtabang sa mga bata nga maghunahuna og mga butang nga ilang mahimo aron mas maduol sa Manluluwas.

Posible nga mga Kalihokan

• Basaha ang Lucas 19:1–10, nga mohunong matag pipila ka mga bersikulo aron sa paghisgot kon unsa ang atong nakat-unan mahitungod ni Zaqueo. Unsa ang gibuhat ni Zaqueo aron makakita siya ni Jesus? Unsa ang iyang gibuhat sa dihang gipakanaog siya ni Jesus gikan sa kahoy? Hangyoa ang matag bata sa pagpaambit og usa ka rason nganong gusto nila nga makakita kang Jesus. Kon ang Manluluwas moanhi sa inyong siyudad, unsay inyong buhaton aron makapangandam?

• Dapita ang mga bata sa paghunahuna og mga tawo nga ilang kaila kinsa, sama ni Zaqueo, tingali nangita sa Manluluwas. Pangutan-a ang mga bata unsay ilang mabuhat aron sa pagtabang sa usa ka tawo nga makakat-on mahitungod sa Manluluwas.

• Dapita ang mga bata sa pagpaambit og mga kasinatian sa dihang gibati nila nga ang Langitnong Amahan ug si Jesukristo nahibalo kanila ug nahigugma kanila.

Mateo 21:12–14

Ang templo usa ka sagrado nga dapit nga kinahanglan nakong respetuhan.

Sa unsang paagi ang istorya bahin sa Manluluwas nga naglimpyo sa templo makatabang nimo sa pagtudlo sa mga bata mahitungod sa kasagrado sa mga templo?

Posible nga mga Kalihokan

• Dapita ang mga bata sa pagbasa sa Mateo 21:12–14. Ipakita ang hulagway nga Jesus Naghinlo sa Templo (Libro sa mga Hulagway sa Ebanghelyo, nu. 51), ug pangutan-a sila hain nga bersikulo ang gipakita sa hulagway. Hangyoa sila sa pagdrowing og mga hulagway kon sama sa unsa tan-awon ang templo sa wala pa ug sa pagkahuman na og limpyo ni Jesus niini.

• Dapita ang mga bata sa pagpaambit sa ilang gibati sa dihang misulod sila sa templo, mibisita sa nataran sa templo, o mitan-aw og mga litrato sa mga templo. Unsa ang nakatabang kanila nga masayud nga ang templo usa ka sagrado nga dapit?

• Dapita ang usa o daghan pa nga mga batan-on sa pagtambong sa klase ug paghisgot kon giunsa nila sa pagpangandam sa pagsulod sa templo. Kon nakasulod na sila sa templo, hangyoa sila sa paghisgot kon unsa ang ilang gibati samtang didto sila.

• Paggunting og litrato sa templo aron mahimong mga piraso sa puzzle, ug hatagi ang matag bata og usa ka piraso. Hangyoa ang mga bata sa pagsulat diha sa luyo sa ilang piraso sa puzzle sa usa ka butang nga ilang mahimo aron mangandam sa pagsulod sa templo. Samtang ang matag bata mopaambit og ideya, idugang ang iyang piraso ngadto sa puzzle.

Mateo 23:25–28

Kinahanglan nga matarung ko sa akong mga lihok ug sa akong mga tinguha.

Si Jesus mitudlo sa mga escriba ug mga Pariseo mahitungod sa kaimportante sa tinud-anay nga pagsunod sa ebanghelyo—dili lamang sa pagpakaaron-ingnon nga matarung. Unsa ang makatabang sa mga bata nga makakat-on niini nga kamatuoran?

Posible nga mga Kalihokan

• Samtang imong basahon ang Mateo 23:25–28 ngadto sa mga bata, ikonsiderar ang pagpaambit niini nga kahulugan sa maut [hipokrito] gikan sa Bible Dictionary [Diksyonaryo sa Biblia]: “Usa ka tawo nga nagpakaaron-ingnon nga relihiyuso bisan dili.” Nganong dili man maayo nga mahimong hipokrito?

• Pakit-a ang mga bata og tasa nga limpyo sa gawas apan hugaw sa sulod aron makatabang sa paghulagway sa pasumbingay diha sa Mateo 23:25. Unsaon man nato sa pagsiguro nga limpyo ug putli kita sa sulod?

Awhaga ang Pagkat-on diha sa Panimalay

Tabangi ang mga bata sa pagpili og usa ka baruganan o kalihokan gikan sa klase nga mapaambit sa ilang mga pamilya diha sa panimalay.

Pagpalambo sa Atong Pagtudlo

Suportahi ang mga ginikanan sa mga bata. “Ang mga ginikanan maoy labing importanting mga magtutudlo sa ebanghelyo alang sa ilang mga anak—anaa kanila ang labing dako nga responsibilidad ug ang labing dako nga gahum sa pag-impluwensya sa ilang mga anak (tan-awa sa Deuteronomio 6:6–7). Samtang magtudlo ka sa mga bata sa simbahan, pagmainampuon nga motinguha og mga paagi sa pagsuporta sa ilang mga ginikanan sa ilang mahinungdanong tahas” (Pagtudlo sumala sa Pamaagi sa Manluluwas, 25).