“Mayo 13–19. Mateo 19–20; Marcos 10; Lucas 18: ‘Unsa pa may Akong Kulang?’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Mayo 13–19. Mateo 19–20; Marcos 10; Lucas 18,” Dali, Sunod Kanako—Alang sa mga Indibidwal ug mga Pamilya: 2019
Mayo 13–19
Mateo 19–20; Marcos 10; Lucas 18
“Unsay Pa may Akong Kulang?”
Basaha ug palandunga ang Mateo 19–20; Marcos 10; ug Lucas 18, magbantay sa mga pag-aghat nga imong madawat. Timan-i kadto nga mga pag-aghat, ug tinoa unsaon nimo sa pagbuhat niini.
Irekord ang Imong mga Impresyon
Kon ikaw adunay oportunidad sa pagpangutana sa Manluluwas, unsa kaha kana? Sa dihang ang datu nga batan-on nakahimamat sa Manluluwas sa unang higayon, nangutana siya, “Unsa bay maayong buhaton ko aron makapanag-iya ako sa kinabuhing dayon?” (Mateo 19:16). Ang tubag sa Manluluwas nagpakita sa pagpasalamat sa maayong mga butang nga nahimo na sa batan-on ug mahigugmaong nag-awhag sa pagbuhat og dugang pa. Kon mamalandong kita sa posibilidad sa kinabuhing dayon, sa samang paagi maghunahuna kita kon aduna pa bay angay natong buhaton. Kon kita mangutana, sa atong kaugalingong paagi, “Unsa pa may akong kulang?” (Mateo 19:20), ang Ginoo makahatag nato og tubag nga sama ka personal sa Iyang tubag ngadto sa datu nga batan-on. Bisan unsay gisugo sa Ginoo nga atong buhaton, ang pagsunod sa Iyang tubag magkinahanglan kanunay nga kita mosalig Kaniya labaw sa atong kaugalingong pagkamatarung (tan-awa sa Lucas 18:9–14) ug nga kita “nga modawat sa gingharian sa Dios maingon sa dinawatan sa gamayng bata” (Lucas 18:17; tan-awa usab sa 3 Nephi 9:22).
Mga Ideya alang sa Personal nga Pagtuon sa Kasulatan
Ang kaminyoon tali sa usa ka lalaki ug babaye gi-orden sa Dios.
Kining panagsultihanay tali sa Manluluwas ug sa mga Pariseo mao ang usa sa pipila ka narekord nga mga higayon diin ang Manluluwas nagtudlo sa piho bahin sa kaminyoon. Human mabasa ang Mateo 19:1–9 ug Marcos 10:1–12, paghimo og lista sa pipila ka mga pamahayag nga sa imong pagbati nag-summarize sa panan-aw sa Ginoo sa kaminyoon. Sa unsa nga paagi nga ang imong kahibalo sa plano sa Amahan sa kaluwasan makatabang nimo nga makasabut ngano nga ang kaminyoon tali sa usa ka lalaki ug babaye gi-orden sa Dios?
Ang mahangturong kaminyoon kabahin sa plano sa Dios.
Tingali nakaila ka og mga tawo nga wala mouyon o supak sa mga sumbahan sa Ginoo kabahin sa kaminyoon.
Nagtudlo ba si Jesus nga ang deborsyo dili gayud madawat o nga ang nagdiborsyo nga mga tawo kinahanglan nga dili gayud magminyo pag-usab?
Sa usa ka pakigpulong bahin sa deborsyo, si Elder Dallin H. Oaks mitudlo nga tuyo sa Langitnong Amahan nga ang relasyon sa kaminyoon mahimong mahangturon. Hinoon, nakasabut usab ang Dios nga “tungod sa kasagutsoton sa [atong] mga kasingkasing” (Mateo 19:8), lakip na sa dili maayo nga mga pagpili ug kahakog sa usa o duha ka mga kapikas, gikinahanglan usahay ang deborsyo.
Si Elder Oaks mipasabut nga ang Ginoo “mitugot sa deborsyado nga tawo sa pagminyo pag-usab nga walay mansa sa pagkamakasasala nga gihisgutan sa kinatas-an nga balaod. Gawas kon ang usa ka deborsyado nga miyembro nakabuhat og seryoso nga mga kalapasan, malalaki o mababaye mahimong takus alang sa usa ka rekomend sa templo ubos sa mao gihapong sumbanan sa katakos nga magamit sa ubang mga miyembro” (“Deborsyo,” Liahona, Mayo 2007, 70).
Mateo 19:16–22; Marcos 10:17–22; Lucas 18:18–23
Kon mangutana ko sa Ginoo, Iya akong tudloan unsay angay nakong buhaton aron mapanunod ang kinabuhing dayon.
Ang istorya sa datu nga batan-on mahimong ikabalaka bisan sa matinud-anon, dugay na nga tinun-an. Samtang nagbasa ka sa Marcos 10:17–22, unsa nga ebidensya ang imong nakita sa pagkamatinud-anon ug pagkasinsero sa batan-on?
Sama sa datu nga batan-on, kitang tanan dili hingpit ug dili kompleto, mao nga isip mga tinun-an kinahanglan nga kita mangutana, “Unsa pa may akong kulang?”—ug kinahanglan nga ipangutana nato kana sa atong tibuok kinabuhi. Hibaloi nga ang tubag gihatag tungod sa gugma gikan sa Usa nga nagtan-aw nato kon kinsa gayud kita (tan-awa sa Marcos 10:21). Unsay imong mabuhat sa pagpangandam sa pagpangutana sa Ginoo unsay imong kulang—ug sa pagdawat sa Iyang tubag?
Tan-awa usab sa Larry R. Lawrence, “Unsa Pa may Akong Kulang?” Liahona, Nob. 2015, 33–35; S. Mark Palmer, “Ug si Jesus, sa Nagsud-ong Siya Kaniya, Nahigugma Kaniya,”Liahona, Mayo 2017, 114–16.
Ang tanan makadawat sa panalangin sa kinabuhing dayon, bisan kanus-a sila modawat sa ebanghelyo.
Makaistorya ba ikaw sa kasinatian ni bisan kinsa nga mga mamumuo sa parrasan? Unsa nga mga leksyon ang imong nakita alang sa imong kaugalingon niini nga tudling? Ang mensahe ni Elder Jeffrey R. Holland sa “Mga Mamumuo sa Ubasan” (Liahona, Mayo 2012, 31–33) tingali makatabang nimo nga makakita og bag-ong mga paagi sa paggamit niini nga sambingay. Unsa nga dugang nga mga pag-aghat ang gihatag sa Espiritu kanimo?
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Makaayo ba sa imong pamilya ang paghisgot sa mga pagtulun-an sa Dios mahitungod sa kaminyoon ug pamilya? Kon mao, mahimo nimo basahon “Ang Pamilya: Usa ka Pamahayag ngadto sa Kalibutan” (Liahona, Nob. 2010, 129). Sa unsa nga paagi nga ang mga pagtulun-an sa pamahayag makatabang sa pagklaro sa kalibug ug mga sayop sa mga mensahe sa kalibutan kabahin sa kaminyoon ug mga pamilya?
Unsa ang kalainan tali sa pagbaton og mga katigayunan ug pagsalig sa mga katigayunan? (tan-awa sa Marcos 10:23–24). Samtang magbasa ka sa bersikulo 27, mahimo nimong itudlo nga ang Hubad ni Joseph Smith: “Sa mga tawo nga misalig sa katigayunan, dili gayud kini mahimo; apan mahimo sa mga tawo nga misalig sa Dios ug gitugyan kanako ang tanan, kay sa Dios kining mga butanga mahimo”.
Sa paghulagway sa mga baruganan sa Mateo 20:1–16, mahimo kang maghimo og kompetisyon, sama sa mubo nga lumba, ug mosaad nga ang mananaug makakuha og premyo. Human makakompleto ang tanan sa kompetisyon, gantihi ang tanan sa sama nga premyo, sugod sa tawo nga katapusan nga nakahuman ug humanon sa tawo nga nakahuman og una. Unsa ang gitudlo niini bahin kon kinsa ang makadawat sa mga panalangin sa kinabuhing dayon sa plano sa Langitnong Amahan?
Unsa ang kahulugan sa mga pulong “bisan kinsay gustong maghawod kaninyo, kinahanglan mainyo siyang ulipon”? (Mateo 20:27). Sa unsa nga paagi gihulagway ni Jesukristo kini nga baruganan? Unsaon nato pagsunod sa Iyang ehemplo diha sa atong pamilya. Sa atong ward o branch, ug sa atong kasilinganan?
Unsay atong nakat-unan bahin sa pag-ampo gikan sa duha ka mga sambingay niini nga mga bersikulo?
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Pangita og oras nga makalugar ka. Kasagaran sayon ra kaayo nga makat-on kon ikaw magtuon sa mga kasulatan nga dili mabalda. Pangita og oras nga makalugar ka, ug buhata ang imong labing maayo nga magtuon kanunay nianang oras sa matag adlaw.
Si Kristo ug ang Dato nga Batan-ong Magmamando, ni Heinrich Hofmann