Abril 15–21

Pasko sa Pagkabanhaw

“O Kamatayon, Hain na ang Imong Pagkamadaugon?”

Samtang magbasa ka sa mga pagpamatuod sa Pagkabanhaw sa Manluluwas niini nga outline, timan-i ang mga pagbati ug mga impresyon nga moabut kanimo gikan sa Espiritu Santo.

Irekord ang Imong mga Impresyon

Atol sa katapusang semana sa kinabuhi sa Manluluwas, daghang mga Judeo libut Kaniya miapil sa mga tradisyon sa Pagpalabay. Nag-andam sila og pagkaon, nanganta, ug nagpundok aron sa paghinumdom sa kaluwasan sa balay ni Israel gikan sa pagkaulipon ngadto sa mga Ehiptohanon. Ang mga pamilya naminaw og mga istorya sa anghel nga tiglaglag nga miagi sa mga panimalay sa ilang mga katigulangan nga gimarkahan ang ilang mga pultahan sa dugo sa nating karnero. Taliwala nining mga kasaulogan nga buhong kaayo sa simbolismo sa kaluwasan, gamay ra kaayo ang nakahibalo nga si Jesukristo, ang Kordero sa Dios, hapit na moluwas nila gikan sa pagkaulipon sa sala ug kamatayon—pinaagi sa Iyang pag-antus, sa Iyang kamatayon, ug sa Iyang Pagkabanhaw. Bisan pa, dihay nakaila ni Jesus isip ang ilang gisaad nga Mesiyas, ang ilang mahangturong Tigluwas. Gikan nianang adlawa, ang mga tinun-an ni Jesukristo misaksi ngadto sa tibuok kalibutan “nga si Kristo namatay alang sa atong mga sala … ; ug gilubong siya, ug nga siya mibangon pag-usab sa ikatulo nga adlaw” (1 Mga Taga-Corinto 15:3–4).

Mga Ideya alang sa Personal nga Pagtuon sa Kasulatan

Mateo 21–28

Si Jesukristo adunay gahum sa pagtabang nako sa pagbuntog sa sala, kamatayon, mga pagsulay, ug mga kahuyang.

Usa ka paagi sa pagtutok sa mga panalangin sa Pag-ula sa Manluluwas niining semanaha mao ang paggahin og panahon matag adlaw nga magbasa bahin sa katapusang semana sa kinabuhi ni Jesus (posible nga iskedyul nga basahunon mosunod). Unsay imong nakita niini nga mga kapitulo nga makatabang nimo nga mobati sa gugma sa Manluluwas? Unsay imong nakat-unan bahin sa Iyang gahum sa pagluwas kanimo gikan sa sala ug kamatayon? Unsay imong nakat-unan bahin sa paglahutay sa mga pagsulay ug pagbuntog sa mga kahuyang? Sa unsa nga paagi ikaw naggamit sa pagtuo sa Iyang gahum sa kaluwasan?

• Dominggo: Madaugong pagsulod ngadto sa Jerusalem (Mateo 21:6–11)

• Lunes: Paglimpyo sa templo (Mateo 21:12–16)

• Martes: Nanudlo didto sa Jerusalem (Mateo 21–23)

• Miyerkules: Nagpadayon sa pagtudlo (Mateo 24–25)

• Huwebes: Ang Pagpalabay ug ang pag-antus ni Kristo didto sa Tanaman sa Getsemani (Mateo 26)

• Biyernes: Husay, Paglansang, ug paglubong (Mateo 27:1–61)

• Sabado: Ang lawas ni Kristo gipahimutang sa lubnganan (Mateo 27:62–66) samtang ang Iyang espiritu nangalagad didto sa kalibutan sa espiritu (D&P 138)

• Dominggo: Ang pagpakita sa nabanhaw nga Kristo (Mateo 28:1–10)

Ang Katapusang Panihapon, ni Carl Heinrich Bloch

Mateo 28:1–10; Lucas 24:13–35; Juan 20:19–29; 1 Mga Taga-Corinto 15:1–8, 55

Daghang mga saksi ang nagpamatuod sa Pagkabanhaw ni Jesukristo.

Hunahunaa kon unsa kahay gibati sa mga tinun-an nga nagtan-aw ni Jesus nga gibugal-bugalan, gidagmalan, ug gilansang. Mga saksi sila sa Iyang gahum, mibati sa kamatuoran sa Iyang mga pagtulun-an, ug adunay pagtuo nga Siya mao ang Anak sa Dios. Ang pagsaksi sa Iyang kamatayon tingali usa ka pagsulay sa pagtuo alang sa pipila, apan sa wala madugay nahimo silang mga saksi sa dakong milagro sa Iyang Pagkabanhaw.

Unsay imong makat-unan gikan sa mga istorya niadtong nakasaksi sa Nabanhaw nga Manluluwas? Markahi o isulat ang kasinatian sa matag tawo sa Mateo 28:1–10; Lucas 24:13–35; Juan 20:19–29; ug 1 Mga Taga-Corinto 15:1–8, 55. (Timan-i nga ang ubang mga saksi sa nabanhaw nga Kristo makita sa 3 Nephi 11; Mormon 1:15; Ether 12:38–39; Doktrina ug mga Pakigsaad 76:19–24; 110:1–10; ug Joseph Smith—Kasaysayan 1:15–17.) Niini nga istorya, unsay nakapalig-on sa imong pagtuo sa literal nga Pagkabanhaw sa Ginoo? Human sa Pagkabanhaw sa Manluluwas, ang uban nabanhaw ug nagpakita ngadto sa kadaghanan (tan-awa sa Mateo 27:52–53; 3 Nephi 23:9). Nganong gibati nimo nga importante nga kini narekord sa Biblia ug sa Basahon ni Mormon?

1 Pedro 1:3–11

Si Jesukristo naghatag nako og paglaum ug kalipay.

Ang anak nga babaye ni Elder Paul V. Johnson nga si Alisa, kinsa nag-antus gikan sa terminal nga kanser ug miagi og daghang mga operasyon, mipakita sa “buhing paglaum” nga gihulagway ni Pedro diha sa 1 Pedro 1:3–11. Gipakigbahin ni Elder Johnson ang usa ka sulat nga gisulat ni Alisa sa panahon sa Pasko sa Pagkabanhaw, sa wala pa siya mamatay: “Ang Pasko sa Pagkabanhaw mao ang pahinumdom sa tanan nga akong gilauman sa akong kaugalingon. Nga sa umaabut ako maalim ug ako mamaayo. Sa umaabut wala nay puthaw o plastik sulod kanako. Sa umaabut ang akong kasingkasing wala nay kahadlok ug mga kabalaka. … Nalipay kaayo ko nga ako mituo gayud sa usa ka matahum nga sunod nga kinabuhi” (“Ug Wala Nay Kamatayon ,” Liahona, Mayo 2016, 121).

Unsa nga mga pulong sa 1 Pedro 1:3–11 ang naghatag og paglaum tungod ni Jesukristo? Kanus-a ninyo nabati kana nga paglaum? Sa unsa nga paagi nimo ipakigbahin ang imong paglaum pinaagi ni Jesukristo uban niadtong imong gimahal?

Tan-awa usab sa Alma 27:28; 36:1–24; 3 Nephi 9:11–17; Moroni 7:40–41.

Mga Ideya alang sa Pamilya nga Pagtuon sa Kasulatan ug Family Home Evening

Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:

Mormon.org

Ang “Holy Week” [Semana Santa] nga seksyon sa mormon.org/easter adunay time line ug deskripsyon sa unsay mahitabo sa matag adlaw sa katapusang semana sa kinabuhi sa Manluluwas. Matag adlaw sa matag semana ang imong pamilya mahimong moribyu niini nga mga deskripsyon aron makita kon unsay gibuhat sa Manluluwas nianang adlawa, o mahimo nimo nga basahon ang Iyang katapusang semana diha sa mga kasulatan isip pamilya (tan-awa sa gisugyot nga lista sa “Mga Ideya alang sa Personal nga Pagtuon sa Kasulatan” nga seksyon).

Songbook sa mga Bata

Ikonsiderar ang pagpanganta bahin sa Pag-ula ug Pagkabanhaw sa Manluluwas niining semanaha, lakip sa pipila nga dili kaayo pamilyar nimo (tan-awa sa indeks sa hilisgutan sa Songbook sa mga Bata, ubos sa mga hilisgutan sama sa “Pag-ula,” “Pasko sa Pagkabanhaw,” o “Pagkabanhaw”). Aron matabangan ang mga sakop sa pamilya nga makat-on sa mga kanta, mahimo kang mopakita og mga litrato nga adunay mga pulong.

“Ang Buhi nga Kristo: Ang Pagpamatuod sa mga Apostoles”

Isip pamilya, basaha ang “Ang Buhi nga Kristo: Ang Pagpamatuod sa mga Apostoles” ( Liahona, Abr. 2000, 2–3; tan-awa usab sa LDS.org), ug dapita ang matag sakop sa pamilya sa pagpili og mensahe sa Pasko sa Pagkabanhaw gikan niini nga pagpamatuod nga ipakigbahin sa uban. Sama pananglit, mahimo kang maghimo og mga poster nga i-display sa social media, sa imong atubangan nga pultahan, o sa imong bintana.

Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.

Pagpalambo sa Personal nga Pagtuon

Paghimo og makab-ot nga mga tumong. Ang paggahin og pipila ka minuto sa usa ka adlaw sa pagtuon sa mga kasulatan makapanalangin sa imong kinabuhi. Pasalig nga magtuon matag adlaw, pangita og paagi sa pagpahinumdom sa imong kaugalingon sa imong pasalig, ug buhata ang kutob sa imong mahimo sa pagsunod niini.

Getsemani, ni Adam Abram