Abril 15–21

Pasko sa Pagkabanhaw

“O Kamatayon, Hain Na ang Imong Pagkamadaugon?”

Gamita ang imong panahon uban sa mga bata sa pagtabang nila nga makakita sa Pasko sa Pagkabanhaw isip panahon sa pagmaya diha sa Manluluwas ug mapalawman ang ilang pasalamat alang sa Iyang sakripisyo. Ang mga ideya niini nga outline mahimong mapahiangay aron sa pagtabang kanimo sa pagtudlo sa mga bata sa bisan unsang edad.

Irekord ang Imong mga Impresyon

Awhaga ang Pagpaambit

Aron matabangan ang mga bata sa pagpaambit sa unsay ilang nahibaloan mahitungod ni Jesukristo ug sa Iyang Pag-ula, mahimo ka nga mopakita og mga hulagway sa Manluluwas diha sa Getsemani, diha sa krus, ug human sa Iyang Pagkabanhaw (tan-awa ang hulagway sa outline niini nga semana sa Dali, Sunod Kanako—Alang sa mga Indibidwal ug mga Pamilya ug sa Libro sa mga Hulagway sa Ebanghelyo, nu.  56, 57, 58, 59, ug 60).

Itudlo ang Doktrina

Mas Gagmay nga mga Bata

Si Jesukristo mao ang akong Manluluwas.

Samtang magbasa ka mahitungod sa Pag-ula ni Jesukristo, pamalandungi kon unsaon nimo pagtabang ang mga bata nga mobati sa ka dako sa paghigugma ni Jesus kanila.

Posible nga mga Kalihokan

• Tudloi ang mga bata nga tungod kay kitang tanan makasala, dili kita makabalik sa Dios nga walay usa ka Manluluwas nga nag-antus sa atong mga sala. Si Jesukristo makaluwas kanato gikan sa atong mga sala kon maghinulsol kita. Pagkupot og salamin, ug papuli-puliha ang mga bata sa pagpanalamin. Samtang buhaton kini sa matag bata, isulti, “Si Jesus nahigugma ni [ngalan sa bata], ug makaluwas Siya ni [ngalan sa bata].”

• Ipakita ang hulagway nga Jesus Nag-ampo sa Getsemani (Libro sa mga Hulagway sa Ebanghelyo, nu. 56) samtang imong isaysay ang istorya ni Jesus nga nag-antus sa Getsemani alang sa mga sala sa kalibutan (tan-awa sa Mateo 26:36–46; Lucas 22:39–44). Ipasabut nga tungod sa Iyang pag-antus, mahimo kitang mapasaylo kon makahimo kita og sayop nga pagpili. Mahimo usab nimong gamiton ang “Kapitulo 51: [Si] Jesus Nag-antus sa Tanaman sa Getsemani,” Mga Istorya sa Bag-ong Tugon, 129–32.

• Kantaha og dungan ang “Gibati Ko ang Gugma sa Akong Manluluwas,” Songbook sa mga Bata, 42–43. Unsa nga mga pulong diha sa kanta ang naghulagway sa gugma sa Manluluwas? Pangutan-a ang mga bata kon unsaon nila sa pagtabang sa uban nga mobati sa gugma sa Manluluwas.

Tungod kay nabanhaw si Jesus, mabuhi ako pag-usab.

Unsaon nimo pagtabang ang mga bata nga makasabut nga tungod ni Jesukristo, kita ug ang atong mga minahal mabanhaw sa umaabut?

Posible nga mga Kalihokan

• Tudloi ang mga bata sa istorya sa Pasko sa Pagkabanhaw gamit ang mga hulagway ni Kristo sa Getsemani, diha sa krus, ug human sa Iyang Pagkabanhaw, nga makita diha sa Libro sa mga Hulagway sa Ebanghelyo (nu. 56, 57, 58, 59, ug 60), ug ang tibuok pahina nga hulagway diha sa outline niini nga semana sa Dali, Sunod Kanako—Alang sa mga Indibidwal ug mg Pamilya. Paguniti sa pipila ka mga bata ang mga hulagway samtang imong isaysay ang istorya. Sultihi ang mga bata kabahin sa pipila sa mga tawo nga nakakita ni Jesus human Siya nabanhaw, sama ni Maria (tan-awa sa Juan 20:1–18) o Tomas (tan-awa sa Juan 20:24–29).

• Sutaa kon ang mga bata nahibalo ba nganong mosaulog kita sa Pasko sa Pagkabanhaw. Ipasabut nga sa Pasko sa Pagkabanhaw atong gisaulog ang labing importante nga adlaw sa kasaysayan—ang adlaw sa pagkabanhaw ni Jesukristo. Pangutana kon duna bay bata nga gustong mopaambit kon unsa ang buhaton sa ilang pamilya sa paghinumdom sa Pagkabanhaw ni Jesukristo.

• Ipasabut nga ang mabanhaw nagkahulugan nga mabuhi pag-usab human kita mamatay. Pagpamatuod nga tungod ni Jesukristo, mabanhaw kita—mabuhi kita pag-usab human kita mamatay, ug dili na gayud kita mamatay pag-usab.

• Gamita ang usa ka gwantis sa pagtudlo sa mga bata nga kitang tanan adunay lawas (girepresentaran sa gwantis) ug usa ka espiritu (girepresentaran sa kamot). Kon mamatay kita, ang atong mga espiritu padayon nga mabuhi, apan dili ang atong lawas. Kon mabanhaw kita, ang atong mga espiritu ug mga lawas mahiusa pag-usab. Papuli-puliha ang mga bata sa pagsul-ob sa gwantis ug sa paghubo niini.

• Kantaha og dungan ang usa ka kanta sa Pasko sa Pagkabanhaw, sama sa “Nabuhi ba Gayud Pag-usab si Jesus?” o “Si Jesus Nabanhaw,” Songbook sa mga Bata, 45, 44, ug ipakita sa mga bata ang mga hulagway ni Jesus human Siya nabanhaw (Libro sa mga Hulagway sa Ebanghelyo, nu. 59, 60, 61).

• I-display ang usa ka litrato sa tawo nga imong kaila nga namatay. Ipaambit ang imong pagpamatuod nga siya mabanhaw tungod sa Pag-ula ug Pagkabanhaw ni Jesukristo.

Siya Nabanhaw ni Greg Olsen

Itudlo ang Doktrina

Mas Dagko nga mga Bata

Si Jesus nag-antus alang kanako sa Getsemani ug didto sa krus.

Samtang imong tun-an ang Pag-ula sa Manluluwas, pamalandungi unsaon nimo sa pagtabang sa mga bata nga makakat-on ug mahinumdom nga si Kristo nag-antus sa Getsemani ug didto sa krus alang sa ilang mga sala, mga sakit, ug kasub-anan.

Posible nga mga Kalihokan

• Basaha uban sa mga bata ang Lucas 22:39–44 ug pinili nga mga bersikulo gikan sa Mateo 27:29–50. Dapita sila sa pagpangita sa mga pulong nga makatabang kanila nga makasabut unsay nasinati sa Manluluwas sa Getsemani ug didto sa krus.

• Tabangi ang mga bata nga makasag-ulo sa ikatulo nga artikulo sa hugot nga pagtuo. Pagpamatuod nga si Jesukristo adunay gahum sa pagluwas kanato gikan sa sala ug gikan sa kamatayon.

• Tabangi ang mga bata sa pag-andam og mubo nga mga pakigpulong mahitungod sa Pag-ula ni Jesukristo nga mahimo nilang mapaambit sa uban. Awhaga sila sa paglakip og kasulatan ug sa ilang pagpamatuod diha sa ilang mga pakigpulong. Kon magkinahanglan sila og dugang nga tabang, mahimo nilang basahon ang “Pag-ula ni Jesukristo” sa Matinud-anon sa Tinuhoan (178–86).

Tungod kay si Jesus namatay ug nabanhaw, ako mabuhi pag-usab.

Ang mga bata nga imong gitudloan makasinati sa umaabut nga adlaw sa kamatayon sa usa ka minahal kon wala pa man gani. Tabangi sila nga masayud nga tungod kay si Jesukristo nabanhaw kitang tanan mabanhaw usab.

Posible nga mga Kalihokan

• I-display ang Libro sa mga Hulagway sa Ebanghelyo, nu. 57, 58, ug 59, ug hangyoa ang mga bata sa pagtugma sa mga hulagway ngadto sa mosunod nga mga tudling: Mateo 27:29–38, 59–60; Juan 20:10–18.

• Dapita ang mga bata nga magtinagsa sa pagbasa sa “Pagkabanhaw” diha sa Giya ngadto sa mga Kasulatan ug sa pagsulat og mga pangutana nga mahimo nilang ipangutana mahitungod sa unsay ilang gibasa. Hatagi ang mga bata og panahon nga ipangutana sa usag usa ang ilang mga pangutana ug dungan nga mangita sa mga tubag.

• Tabangi ang mga bata nga motan-aw diha sa indeks sa mga hilisgutan sa Songbook sa mga Bata aron mangita og usa ka awit nga gusto nilang makat-unan mahitungod ni Jesukristo o sa Pagkabanhaw. Kantaha og dungan ang awit sa pipila ka higayon. Pangutan-a ang mga bata kon unsay ilang nakat-unan gikan niini nga awit.

• Sa dili pa magklase, dapita ang pipila ka mga bata nga motungha nga andam sa pagpaambit sa ilang mga pagpamatuod mahitungod sa Pag-ula ug Pagkabanhaw sa Manluluwas. Dapita ang mga bata sa pagsulat sa ilang mga pagpamatuod aron ipaambit sa panimalay.

Awhaga ang Pagkat-on diha sa Panimalay

Aron matabangan ang mga bata sa pagpaambit sa unsay ilang nakat-unan ngadto sa ilang mga pamilya, awhaga sila sa pagkanta og awit mahitungod ni Jesukristo diha sa panimalay niining semanaha.

Pagpalambo sa Atong Pagtudlo

Ang mga bata makabenepisyo sa pagbalik-balik. Ayaw kahadlok nga ibalik-balik ang mga kalihokan sa makadaghang higayon, ilabi na sa gagmayng mga bata. Ang pagbalik-balik makatabang sa mga bata nga mahinumdom sa unsay imong gitudlo.