Sa Paghandum Kanako, ni Walter Rane

Hunyo 3–9

Juan 13–17

“Pabilin Kamo diha sa Akong Gugma”

Pag-ampo aron masayud sa mga panginahanglan sa mga bata nga imong gitudloan samtang mobasa ka sa Juan 13–17. Ang Dali, Sunod Kanako—Alang sa mga Indibidwal ug mga Pamilya ug kini nga outline makatabang kanimo nga makasabut sa doktrina ug makahatag kanimo og mga ideya sa pagtudlo sa mga bata sa imong klase.

Irekord ang Imong mga Impresyon

Awhaga ang Pagpaambit

Aron sa pagtabang sa mga bata sa pagpaambit sa unsay ilang nakat-unan sa panimalay, pagpalibut og usa ka kasingkasing nga papel ug dapita ang matag bata sa pagpaambit og usa ka butang nga iyang gihimo aron sa pagpakita og gugma alang sa uban kon turno na niya nga mohupot sa kasingkasing.

Itudlo ang Doktrina

Mas Gagmay nga mga Bata

Juan 13:1–17

Gusto ni Jesus nga moserbisyo ko sa uban.

Ang istorya ni Jesus nga naghugas sa tiil sa Iyang mga Apostoles mao ang usa ka ehemplo sa mapainubsanong pagserbisyo. Unsaon nimo pagdasig ang mga bata nga mosunod sa ehemplo ni Jesus?

Posible nga mga Kalihokan

• Gamita ang hulagway sa outline niini nga semana sa Dali, Sunod Kanako—Alang sa mga Indibidwal ug mga Pamilya aron makatabang sa pagsaysay sa istorya diha sa Juan 13:1–17. Dapita ang mga bata nga itudlo ang mga detalye gikan sa istorya nga anaa sa mga hulagway.

• Pagpakita og mga hulagway ni Jesus nga nagserbisyo sa uban (tan-awa sa Libro sa mga Hulagway sa Ebanghelyo o sa mga magasin sa Simbahan alang sa mga ideya). Papuli-puliha ang mga bata sa paggunit sa mga hulagway samtang imong isaysay ang mga istorya nga gipakita (patabanga sila sa pagsaysay sa istorya kon makahimo sila).

• Pangutan-a ang mga bata kon unsa ang ilang gibati sa dihang gitabangan sila sa usa ka tawo. Padrowinga ang mga bata og mga hulagway kon sa unsang paagi sila makasunod sa ehemplo ni Jesus pinaagi sa pagserbisyo og usa ka tawo.

Juan 13:34–35; 14:15

Akong mapakita ang akong gugma kang Jesukristo pinaagi sa pagsunod sa Iyang mga sugo.

Unsaon nimo pagtabang ang mga bata nga makasabut nga ang ilang pagkamasulundon usa ka timailhan nga gihigugma nila si Jesukristo?

Posible nga mga Kalihokan

• Hatagi ang matag bata og kasingkasing nga papel aron adornohan. Dapita sila sa pagpataas sa ilang mga kasingkasing matag higayon nga ilang kantahon ang pulong nga “gugma” diha sa “Si Jesus Miingon Higugmaa ang Tanan” ug “Maghigugmaay,” Songbook sa mga Bata, 39, 74.

• Tabangi ang mga bata sa pagsag-ulo sa Juan 14:15 pinaagi sa pagpataas sa ilang mga kasingkasing nga papel samtang moingon sila, “Kon nahigugma kamo kanako”, ug usa ka hulagway sa mga papan nga bato samtang moingon sila, “Inyong pagatumanon ang akong mga sugo.”

• Dapita ang mga bata nga magpulipuli sa pag-aksyon og usa ka mabination nga buhat nga ilang mahimo alang sa usa ka tawo aron sa pagpakita sa ilang gugma alang kang Jesus. Ipatag-an sa ubang mga bata kon unsa ang ilang gibuhat.

• Kompletuha ang pahina sa kalihokan karong semanaha uban sa mga bata.

Juan 14:26–27; 15:26; 16:13–14

Ang Espiritu Santo nagtabang kanako nga mobati nga mas duol ni Jesus.

Bisan tuod ang mga bata nga imong gitudloan wala pa makadawat sa gasa sa Espiritu Santo, mahimo silang makat-on karon kon sa unsang paagi ang gahum sa Espiritu Santo makaimpluwensya sa ilang kinabuhi.

Posible nga mga Kalihokan

• Ipakita ang litrato nga Ang Katapusang Panihapon (Libro sa mga Hulagway sa Ebanghelyo nu. 54). Ipasabut sa mga bata nga diha sa Katapusang Panihapon, si Jesus mitudlo sa Iyang mga disipulo mahitungod sa Espiritu Santo.

• Dapita ang mga bata sa pagbutang sa ilang mga kamot diha sa ilang mga kasingkasing ug sa ilang mga ulo. Ablihi ang mga kasulatan sa Doktrina ug mga Pakigsaad 8:2, ug ipasabut nga ang Espiritu Santo mamulong kanato “sa [atong] hunahuna ug sa [atong] kasingkasing,” o pinaagi sa atong mga hunahuna ug mga pagbati.

• Palunga ang mga suga ug pagpataas og hulagway. Dayon padan-agi og flashlight ang hulagway. Pangutan-a ang mga bata kon sa unsang paagi ang flashlight sama sa Espiritu Santo.

• Uban sa mga bata, kantaha ang “Ang Espiritu Santo,” Songbook sa mga Bata, 56, sa “hinay nga hinagawhaw nga tingog.” Dapita sila sa pagpaminaw sa mga butang nga buhaton sa Espiritu Santo.

Itudlo ang Doktrina

Mas Dagko nga mga Bata

Juan 13:34–35; 14:15; 15:10–14

Akong mapakita ang akong gugma kang Jesukristo pinaagi sa pagsunod sa Iyang mga sugo.

Samtang imong basahon kini nga mga tudling sa imong personal nga pagtuon, hunahunaa ang mga bata nga imong gitudloan. Sa unsang paagi sila mapanalanginan kon makasabut sila nga ang ilang pagkamasulundon usa ka timaan sa ilang gugma sa Manluluwas?

Posible nga mga Kalihokan

• Tabangi ang mga bata nga makasag-ulo sa Juan 13:34–35. Usa ka paagi sa pagbuhat niini mao ang pagkanta sa “Maghigugmaay,” Songbook sa mga Bata, 74, ug tabangi ang mga bata sa pagkat-on og mga aksyon nga mobagay niini.

• Dapita ang mga bata sa pagsulat diha sa pisara sa mga paagi nga mipakita si Jesus nga Iya kitang gihigugma. Mahimo kang mopakita og mga hulagway gikan sa kinabuhi sa Manluluwas sa pagtabang kanila (alang sa mga ideya, tan-awa sa Libro sa mga Hulagway sa Ebanghelyo). Sa unsang paagi kita nakapakita og gugma alang sa uban sama sa Iyang gibuhat? Dapita ang matag bata sa pagbarug ug sa pagpaambit og usa ka paagi nga siya “maghigugmaay … ang usa sa usa” (Juan 13:34).

• Dapita ang usa ka bata sa pagbasa sa Juan 14:15. Papuli-puliha ang mga bata sa pagdrowing og mga hulagway nga nagrepresentar og tawo nga nagsunod sa usa ka sugo, samtang ang ubang mga bata motag-an kon unsa ang iyang gidrowing. Alang sa mga ehemplo sa mga sugo, tan-awa sa Alang sa Kalig-on sa mga Kabatan-onan. Sa unsang paagi ang pagsunod niini nga mga sugo nagpakita sa Manluluwas nga ato Siyang gihigugma?

Juan 14:26; 15:26; 16:13

Ang Espiritu Santo mogiya, mohupay, ug mopamatuod sa kamatuoran.

Karon nga daghan sa mga bata nakadawat na sa gasa sa Espiritu Santo, unsaon nimo sila pagtabang nga mas makasabut sa mga tahas sa Espiritu Santo?

Posible nga mga Kalihokan

• Hatagi ang mga bata sa mosunod nga mga bersikulo aron basahon nga magpares: Juan 14:26; 15:26; ug 16:13. Hangyoa sila sa pagpangita og mga pulong nga nagtudlo kanila unsa ang ginabuhat sa Espiritu Santo. Isulat ang mga pulong diha sa pisara.

• Pagpaambit og kasinatian nga ang Espiritu Santo migiya kanimo, mihupay kanimo, mipasidaan kanimo, o mipamatuod kabahin sa kamatuoran diha kanimo. Dapita ang mga bata sa pagpaambit og bisan unsa nila nga mga kasinatian sa Espiritu Santo. Giunsa nila pag-ila sa impluwensya sa Espiritu Santo?

• Dapita ang matag bata sa pagdrowing sa iyang nawong sa usa ka bulsita. Pasigai og flashlight, nga nagrepresentar sa Espiritu Santo, pasulod sa mga bulsita. Dayon sudli ang mga bulsita og mga butang nga makababag sa kahayag, sama sa gamayng bandana o mga tisyu, aron sa pagtudlo nga ang atong sayop nga mga pagpili maka-limit sa impluwensya sa Espiritu Santo sa atong kinabuhi. Ipakuha sa mga bata ang bandana o mga tisyu gikan sa ilang bulsita aron sa pagrepresentar sa paghinulsol.

Juan 15:1–8; 17:3

Gusto sa Langitnong Amahan ug ni Jesus nga makaila ako Kanila.

Mapanalangin nimo sa kahangturan ang kinabuhi sa mga bata pinaagi sa pagtabang nila nga makaila sa Langitnong Amahan ug ni Jesukristo.

Posible nga mga Kalihokan

• Pag-display og usa ka tanom samtang ang mga bata magpuli-puli sa pagbasa sa mga bersikulo diha sa Juan 15:1–8. Sa unsang paagi nga si Jesus sama sa usa ka tanum nga paras? Sa unsang paagi kita sama sa mga sanga? Unsa ang atong mahimo aron magpabiling duol sa Manluluwas?

• Basaha og kusog ang Juan 17:3. Pangutan-a ang mga bata kon unsay ilang gibuhat aron makaila sa Langitnong Amahan ug ni Jesukristo. Ipaambit kon sa unsang paagi nga nag-anam ka pagkaila Kanila.

Mitudlo si Kristo, “Pabilin kamo kanako” (Juan 15:4).

Awhaga ang Pagkat-on diha sa Panimalay

Awhaga ang mga bata sa pagpangutana og usa ka sakop sa pamilya kon unsay ilang mahimo sa pagserbisyo kaniya. Panahon sa klase sa sunod semana, hatagi ang mga bata og panahon sa pagpaambit sa unsay ilang nabuhat.

Pagpalambo sa Atong Pagtudlo

Ipahiangay ang mga kalihokan. Kon nagtudlo ka og mas gagmayng mga bata, makakita ka og dugang nga mga ideya nga mahimo nimong ipahiangay sa imong klase diha sa seksyon alang sa dagko nga mga bata niini nga outline. Sa samang paagi, ang mga kalihokan alang sa mas gagmayng mga bata mahimong ipahiangay sa pagtudlo og mas dagkong mga bata.