“Hunyo 3–9. Juan 13–17: ‘Pabilin Kamo diha sa Akong Gugma’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Hunyo 3–9. Juan 13–17,” Dali, Sunod Kanako—Alang mga Indibidwal ug sa mga Pamilya: 2019
Sa Paghandum Kanako, ni Walter Rane
Hunyo 3–9
Juan 13–17
“Pabilin Kamo diha sa Akong Gugma”
Samtang magbasa ka sa mga pagtulun-an sa Manluluwas sa Juan 13–17, ang Espiritu Santo makatabang nimo sa pag-ila sa mga mensahe alang kanimo. I-rekord ang mga impresyon nga imong nadawat.
Irekord ang Imong mga Impresyon
Karon tawagon nato kini nga ang “Katapusang Panihapon,” apan wala kita masayud kon ang mga tinun-an hingpit ba nga nakahibalo, sa dihang nagpundok sila alang sa tinuig nga kasaulogan sa Pagpalabay, nga kini mao ang ilang katapusang pagpangaon uban sa ilang Agalon sa dili pa ang Iyang kamatayon. Hinoon, si Jesus, “nahibalo nga miabut na ang takna” (Juan 13:1). Sa dili madugay atubangon na Niya ang pag-antus sa Getsemani, ang pagbudhi ug paglimud sa Iyang labing suod nga mga higala, ug ang panghingutas nga kamatayon sa krus. Apan bisan pa niining umaabut Kaniya, si Jesus nakatutok dili sa Iyang Kaugalingon apan sa pagpangalagad sa Iyang mga tinun-an. Mapainubsanong gihugasan Niya ang ilang mga tiil. Gitudloan Niya sila mahitungod sa gugma. Ug gipaniguro Niya kanila, sa usa ka pagsabut, nga dili gayud Niya biyaan sila ug dili kinahanglan nga mobiya sila Kaniya. Ang mga tinun-an kaniadto ug karon nakakita og kahupayan sa Iyang mga saad: “Dili ko kamo pagabiyaan” (Juan 14:18). “Kon tumanon ninyo ang akong sugo, magapabilin kamo sa akong gugma” (Juan 15:10).
Mga Ideya alang sa Personal nga Pagtuon sa Kasulatan
Gipakita nako ang akong gugma alang ni Jesukristo pinaagi sa pagtuman sa Iyang sugo sa paghigugma.
Nakatudlo na si Jesus nga ang duha ka dagkong mga sugo adunay kalabutan sa gugma (tan-awa sa Mateo 22:34–40). Agig paghatag og gibug-aton niini, ang gugma mao ang importanting tema sa Iyang katapusan nga mga instruksyon ngadto sa Iyang mga Apostoles. Samtang magbasa ka sa Juan 13–15, mahimo nimong timan-an o markahan ang matag gamit sa pulong nga gugma.
Tingali makamatikod ka sa pulong mga sugo nga gibalik-balik kanunay uban sa pulong nga gugma niini nga mga kapitulo. Unsay imong makat-unan mahitungod sa relasyon tali sa gugma ug mga sugo gikan sa mga pagtulun-an sa Manluluwas? Unsa ang laing mga pulong ang imong nakita nga gibalik-balik kanunay uban sa pulong nga gugma niini nga mga kapitulo? Base sa unsay imong nakat-unan, ikonsiderar ang pagsulat og mubo nga summary sa mga pagtulun-an sa Manluluwas mahitungod sa gugma.
Tan-awa usab sa D. Todd Christofferson, “Magpabilin Kamo sa Akong Gugma,” Liahona, Nob. 2016, 48–51.
Ang Espiritu Santo nakatabang nako sa pagtuman sa akong katuyoan isip tinun-an ni Jesukristo.
Nakahibalo si Jesukristo nga sa dili madugay Iyang biyaan ang Iyang mga tinun-an, ug nasayud Siya nga magkinahanglan sila og espirituhanong suporta kon wala na Siya. Aron matabangan sila nga makasabut kon unsaon nila pagdawat niini nga suporta, gitudloan Niya sila mahitungod sa Espiritu Santo. Unsay imong nakat-unan mahitungod sa mga tahas sa Espiritu Santo gikan sa mga pulong sa Manluluwas sa mosunod nga mga bersikulo?
Ngano nga ang mga tinun-an nagkinahanglan niini nga matang sa tabang gikan sa Espiritu Santo? Sa unsa nga paagi nga ang Espiritu Santo nakatuman niini nga mga tahas sa imong kinabuhi? Samtang magpadayon ka sa pagtuon sa Bag-ong Tugon, pangitaa ang mga paagi nga ang Espiritu Santo mipanalangin sa mga tinun-an ni Jesus. Sa unsa kaha nga paagi nga ang imong kinabuhi lahi kon imong gidapit ang Espiritu Santo sa pag-impluwensya pag-ayo kanimo?
Tan-awa usab sa Mosiah 3:19; 5:1–3; 3 Nephi 27:20; Moroni 8:25–26; 10:5; Doktrina ug mga Pakigsaad 11:12–14; Moises 6:61.
Samtang magpabilin ako diha ni Kristo, makapamunga ako og maayong bunga.
Unsay gipasabut sa “pabilin diha kang [Kristo]”? (Juan 15:4). Unsa nga “bunga” ang nagpakita nga ikaw nakasumpay sa parras, nga nagrepresentar ni Jesukristo?
Nangamuyo si Jesukristo alang sa Iyang mga tinun-an.
Ang mga pulong ni Jesus nga narekord sa Juan 17 nailhan nga Pangamuyo nga Pag-ampo. Niini nga pag-ampo, nag-ampo si Jesus alang sa Iyang mga Apostoles ug “alang usab sa mga mosalig [Kaniya] pinaagi sa ilang pulong” (Juan 17:20). Nagpasabut kini nga Siya nag-ampo alang kanimo. Unsa ang gihangyo ni Jesus gikan sa Iyang Amahan alang kanimo ug sa tanang mga tumutuo?
Kini nga pag-ampo nagtudlo usab og tulugkaron nga mahangturong mga kamatuoran. Unsa nga mga kamatuoran ang imong nakita samtang nagbasa ka niini?
Sa unsang paagi nga si Jesukristo ug ang Langitnong Amahan usa?
Sa Iyang pag-ampo sa Juan 17, gihatagan og gibug-aton ni Jesus ang Iyang panaghiusa sa Amahan, apan wala kini magpasabut nga Siya ug ang Iyang Amahan usa ra ka binuhat. Sa dihang ang Manluluwas nag-ampo nga ang Iyang mga tinun-an ma-usa “maingon nga kita usa”—o sa samang paagi nga—Siya ug ang Iyang Amahan usa (Juan 17:22), wala Siya magsulti nga ang mga tinun-an mahimong usa ka binuhat. Hinoon, ang Iyang tinguha alang kanila mao nga sila makatagamtam og samang panaghiusa nga Iyang naangkon uban sa Amahan—hingpit nga panaghiusa sa katuyoan, kasingkasing, ug hunahuna.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Unsay nakat-unan sa atong pamilya gikan sa ehemplo sa Manluluwas niini nga mga bersikulo? Sa unsang mga paagi nga atong masunod ang Iyang ehemplo?
Samtang hisgutan ninyo ang mga pagtulun-an sa Manluluwas mahitungod sa gugma, ikonsiderar usab kini nga mga pulong gikan ni Presidente Thomas S. Monson: “Sa kalibutan karon, dili makita kana nga lig-ong pundasyon sa gugma nga mas gikinahanglan sa panimalay. Ug dili nimo makita bisan asa sa kalibutan ang mas maayo nga ehemplo niana nga pundasyon kon dili diha sa mga panimalay sa mga Santos sa Ulahing mga Adlaw kinsa nakapahimo sa gugma nga maoy pinakasentro sa ilang kinabuhi sa pamilya. … Ang gugma mao ang kahulugan sa ebanghelyo, ang labing dungganan nga kinaiya sa kalag sa tawo” (“Maingon nga Ako Nahigugma Kaninyo,” Liahona, Peb. 2017, 4).
Tingali malingaw ang mga sakop sa pamilya nga magdrowing og mga litrato o magsulat diha sa papel nga porma og mga kasingkasing sa butang nga ilang giganahan sa usag usa. Mahimo nilang ibutang kini nga mga kasingkasing libut sa balay isip pahinumdom sa pagpakita og gugma alang sa usag usa.
Tingali makalingaw ang pagbasa niini nga mga bersikulo sa gawas tupad sa usa ka parras, usa ka kahoy, o laing tanom. Sa unsa nga paagi nga kini nga kalihokan makatabang sa mga sakop sa imong pamilya nga mas makasabut sa mga pagtulun-an sa Manluluwas?
Mitudlo si Jesus, “Ako mao ang tanum nga parras, kamo mao ang mga sanga” (Juan 15:5).
Ngano kaha nga si Jesukristo mipasidaan sa Iyang mga tinun-an sa pagpanglutos? Sa unsa nga paagi nga ang mga tinun-an ni Kristo gilutos karon? Sa unsa nga paagi nga ang tambag sa Manluluwas niini nga mga bersikulo makatabang nato kon mag-atubang kita og pagpanglutos?
Sa unsa nga paagi nabuntog ni Kristo ang kalibutan? Sa unsa nga paagi nga ang Iyang Pag-ula nakahatag nato og kalinaw ug kalipay? (tan-awa usab sa D&P 68:6).
Sa unsa nga paagi nga ang atong pamilya mas mahiusa sama nga si Jesukristo ug ang Langitnong Amahan nagkahiusa? Nganong gusto sa Manluluwas nga kita magkahiusa? (Tan-awa usab sa D&P 38:27).
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Basaha og kusog. Samtang tudloan nimo ang imong pamilya sa mga kasulatan, ang pagbasa og kusog sa mga tudling makatabang nga mobati nga tinuod ang mga istorya sa kasulatan. Nindot kaayo ni alang sa mga kapitulo Juan 13–17 tungod kay kini nga mga kapitulo adunay daghan kaayo nga mga pulong sa Manluluwas.
Agalong Sulugoon, ni Del Parson