Ang Ikaduhang Pag-anhi, ni Harry Anderson

Mayo 27–Hunyo 2

Joseph Smith—Mateo 1; Mateo 25; Marcos 12–13; Lucas 21

“Inig Abut sa Anak sa Tawo”

Samtang magbasa ka sa Joseph Smith—Mateo 1; Mateo 25; Marcos 12–13; ug Lucas 21, tingali makapangutana ka, “Unsa nga mga mensahe ang anaa niini nga mga kapitulo alang kanako? alang sa akong pamilya? alang sa akong calling?”

Irekord ang Imong mga Impresyon

Natingala tingali ang mga tinun-an ni Jesus sa Iyang panagna: nga ang dakong templo sa Jerusalem, ang espirituhanon ug kultural nga sentro sa katawhang Judeo, malaglag sa hingpit nga “walay mahibilin dinhi, … nga usa ka bato nga nagtung-tong.” Natural lang nga ang mga tinun-an gusto nga makahibalo pa og dugang. “Kanus-a kini nga mga butang mahinabo?” nangutana sila. “Ug unsa ang mga timailhan?” (Joseph Smith—Mateo 1:2–4). Ang mga tubag sa Manluluwas nagpadayag nga ang dakong kalaglagan nga moabut sa Jerusalem—usa ka panagna nga natuman sa AD 70—gamay ra kaayo itandi sa mga timailhan sa Iyang pag-anhi sa katapusang mga adlaw. Ang mga butang nga mas lig-on pa kay sa templo makita nga temporaryo—ang adlaw, ang bulan, ang mga bitoon, ang mga nasud, ug ang kadagat. Bisan “ang mga gahum sa langit mauyog” (Joseph Smith—Mateo 1:33). Kon kita nakahibalo niini sa espirituhanong paagi, kini nga kaguliyang makatudlo nato sa pagbutang sa atong pagsalig sa butang nga tinuod nga permanente. Sama sa gisaad ni Jesus, “Ang langit ug ang yuta mahanaw, apan ang akong mga pulong dili mahanaw. … Ug kinsa kadto nga magmahal sa akong pulong, dili malingla” (Joseph Smith—Mateo 1:35, 37).

Mga Ideya alang sa Personal nga Pagtuon sa Kasulatan

Joseph Smith—Mateo

Unsa ang Joseph Smith—Mateo?

Ang Joseph Smith—Mateo, nga anaa sa Perlas nga Labing Bililhon, usa ka kinutlo gikan sa Hubad ni Joseph Smith sa Biblia. Naglakip kini sa mga rebisyon sa katapusang bersikulo sa Mateo 23 ug sa tanan nga Mateo 24 (tan-awa sa Giya ngadto sa mga Kasulaan, “Hubad ni Joseph Smith”). Ang dinasig nga bersyon ni Joseph Smith nagpahiuli sa bililhong mga kamatuoran nga nawala. Mga bersikulo 12–21 sa Joseph Smith—Mateo nagpasabut sa kalaglagan sa Jerusalem sa karaan; mga bersikulo 21–55 naglakip sa mga panagna bahin sa katapusang mga adlaw.

Joseph Smith—Mateo 1:21–37; Marcos 13:21–37; Lucas 21:25–38

Mga panagna bahin sa Ikaduhang Pag-anhi sa Manluluwas makatabang nako nga moatubang sa umaabut uban sa pagtuo.

Makapadisturbo ang paghunahuna mahitungod sa mga panghitabo nga nagpaingon ngadto sa Ikaduhang Pag-anhi ni Jesukristo. Apan sa dihang nanagna si Jesus niini nga mga panghitabo, Iyang giingnan ang Iyang mga tinun-an nga “dili masamok” (Joseph Smith—Mateo 1:23). Unsaon nga “dili masamok” kon makadungog ka sa mga linog, mga gubat, mga panglimbong, ug mga kagutom? Hunahunaa kini nga mga pangutana samtang magbasa ka niini nga mga bersikulo. Markahi o timan-i ang tambag nga imong makit-an nga naghatag og kasiguroan.

Tan-awa usab sa Doktrina ug mga Pakigsaad 29:14–21; 38:30; 45:16–52; 88:86–94; “Ikaduhang Pag-anhi ni Jesukristo,”.

Joseph Smith—Mateo 1:26–27, 38–55; Mateo 25:1–13; Lucas 21:29–36

Kinahanglang andam ko kanunay sa Ikaduhang Pag-anhi sa Manluluwas.

Ang Dios wala mopadayag “sa adlaw ni sa takna moabut ang Anak sa tawo” (Mateo 25:13). Apan dili Siya gusto nga moabut kanang adlawa kanato nga “wala dahuma” (Lucas 21:34), mao nga mihatag Siya nato og tambag kon unsaon sa pag-andam.

Samtang magbasa ka niini nga mga bersikulo, ilha ang mga sambingay ug ubang mga pagkomparar nga gigamit sa Manluluwas sa pagtudlo nato nga mangandam kanunay alang sa Iyang Ikaduhang Pag-anhi. Unsa ang imong nakat-unan gikan niini? Unsa ang nadasig nga imong buhaton?

Mateo 25:14–30

Nagpaabut ang Langitnong Amahan nako nga maalamong mogamit sa Iyang mga gasa.

Sa panahon sa Manluluwas, ang “talanton” [talento] nagpasabut og kwarta. Apan ang sambigay sa Ginoo sa mga talento makatudlo nato bahin kon unsay Iyang gusto nga atong buhaton sa paggamit sa bisan unsa nga mga panalangin nga Iyang gihatag kanato. Ang Ginoo nagpaabut nga palamboon nato unsay Iyang gihatag kanato. Samtang magbasa ka niini nga sambingay, paghimo og lista sa pipila ka mga panalangin ug mga oportunidad nga gihatag sa Langitnong Amahan kanimo. Unsay Iyang gipaabut nimo nga imong buhaton niini nga mga panalangin? Sa unsa nga paagi nimo magamit kini nga mga gasa sa maalamong mga paagi? Sa unsa nga paagi nga ang imong mga talento milambo samtang nag-alagad ka sa Ginoo?

Mateo 25:31–46

Kon ako nag-alagad sa uban, ako nag-alagad sa Dios.

Kon ikaw naghunahuna kon unsaon sa Ginoo sa paghukom sa imong kinabuhi, basaha ang sambingay sa karnero ug mga kanding. Unsa may pinakaimportante kon ikaw magbarug sa atubangan ni Kristo?

Tan-awa usab sa Mosiah 2:17.

Marcos 12:18–27

Ang mga kaminyoon ba magpadayon human sa Pagkabanhaw?

Nahibaloan nato gikan sa moderno nga pagpadayag nga ang pamahayag ni Jesus “Kon sila mobangon gikan sa patay, sila wala maminyo ni gihatag ngadto sa kaminyoon” nagpasabut niadtong wala mosulod sa pakigsaad sa celestial nga kaminyoon (tan-awa sa DP 132:15–16). Ang celestial nga kaminyoon, “kon ang tawo mangasawa … pinaagi sa bag-o ug walay katapusan nga pakigsaad,” molungtad “hangtud sa tanang kahangturan” kon ang bana ug asawa matinud-anon sa ilang mga pakigsaad (DP 132:19).

Mga Ideya alang sa Pamilya nga Pagtuon sa Kasulatan ug Family Home Evening

Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:

Joseph Smith—Mateo

Aron matabangan ang imong pamilya nga mosuhid niini nga kapitulo, dapita sila sa pagpangita sa mga pagtulun-an sa Manluluwas kon unsaon nga kita maandam sa Iyang Ikaduhang Pag-anhi (tan-awa, sama pananglit sa, mga bersikulo 22–23, 29–30, 37, 46–48). Unsay mahimo sa imong pamilya sa pagsunod niini nga tambag?

Joseph Smith—Mateo 1:22, 37

Unsay gipasabut sa pagmahal sa pulong sa Dios? Unsaon nato sa paghimo niini isip usa ka pamilya? Sa unsa nga paagi nga ang pagbuhat sa ingon makatabang nato nga makalikay nga malimbungan?

Mateo 25:1–13

Mahimo nimong gamiton ang litrato sa napulo ka mga birhen nga anaa niini nga outline sa paghisgot sa Mateo 25:1–13. Unsa nga mga detalye ang makita sa mga sakop sa pamilya sa litrato nga gihulagway niini nga mga bersikulo?

Ang mga sakop ba sa pamilya malingaw sa pagpangita sa daw mga tulo sa lana nga mga papel nga imong gitago? Mahimo nimong iuban ang mga daw tulo sa lana ngadto sa mga butang nga nagrepresentar sa mga butang nga mahimo sa mga sakop sa pamilya sa pagpalig-on sa ilang mga pagpamatuod ug makapangandam alang sa Ikaduhang Pag-anhi, sama sa mga kasulatan, mga sinina sa Simbahan, o usa ka litrato sa templo.

Marcos 12:38–44; Lucas 21:1–4

Unsay makat-unan sa mga sakop sa imong pamilya gikan sa ehemplo sa biyuda? Unsa ang gitudlo sa Manluluwas sa Iyang mga tinun-an bahin sa mga halad? Ipakita ang donation slip sa ikapulo, ug hisguti ang mga halad sa imong pamilya ngadto sa Ginoo ug sa unsa nga paagi nga kini nga mga halad makatabang sa pagtukod sa gingharian sa Dios. Aduna bay mga halad nga himoon sa imong pamilya nga dili marekord sa tithing slip?

Ang Diyot sa Biyuda, ni Sandra Rast

Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.

Pagpalambo sa Personal nga Pagtuon

Pag-andam sa imong palibut. “Ang atong palibut makaapekto kaayo sa atong abilidad sa pagkat- on ug pagbati sa kamatuoran” (Pagtudlo sumala sa Pamaagi sa Manluluwas, 15). Paningkamuti ang pagpangita og dapit sa pagtuon sa mga kasulatan nga makadapit sa impluwensya sa Espiritu Santo. Ang makabayaw nga musika ug mga litrato makadapit usab sa Espiritu.

Lima Kanila Mga Buotan, ni Walter Rane