“Hunyo 17–23. Mateo 27; Marcos 15; Lucas 23; Juan 19: ‘Tapus Na’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Hunyo 17–23. Mateo 27; Marcos 15; Lucas 23; Juan 19,” Dali, Sunod Kanako—Alang sa mga Indibidwal ug mga Pamilya: 2019
Ecce Homo, ni Antonio Ciseri
Hunyo 17–23
Mateo 27; Marcos 15; Lucas 23; Juan 19
“Tapus Na”
Ang Mateo 27; Marcos 15; Lucas 23; ug Juan 19 naglakip sa mga deskripsyon sa katapusang mga takna sa moral nga kinabuhi sa Manluluwas. Tinguhaa nga mobati sa Iyang gugma alang kanimo samtang magtuon ka mahitungod sa Iyang sakripisyo ug kamatayon.
Irekord ang Imong mga Impresyon
Sa matag pulong ug buhat, gipakita ni Jesukristo ang putli nga gugma—nga gitawag ni Apostol Pablo nga gugma nga putli (tan-awa sa 1 Mga Taga-Corinto 13). Walay laing panahon nga kini mas nakita kay sa panahon sa katapusang mga takna sa mortal nga kinabuhi sa Manluluwas. Ang Iyang ligdong mga pagpakahilum sa atubangan sa sayop nga mga akusasyon nagpakita nga Siya “dili masuk-anon” (1 Mga Taga-Corinto 13:5). Ang Iyang pagkaandam sa pagdawat sa paghampak, pagbiay-biay, ug paglansang—samtang nagpugong sa Iyang gahum sa paghunong sa Iyang mga kasakit—nagpakita nga Siya “mapailubon” ug “mopailub sa tanang mga butang” (1 Mga Taga-Corinto 13:4, 7). Ang Iyang kapuangod ngadto sa Iyang inahan ug ang Iyang kalooy ngadto sa Iyang mga tiglansang—bisan panahon sa Iyang kaugalingong walay ikatandi nga pag-antus—nagpadayag nga Siya “dili maakop-akopon sa [Iyang] kaugalingon” (1 Mga Taga-Corinto 13:5). Sa Iyang katapusang mga gutlo sa yuta, gihimo ni Jesus unsay Iyang nahimo sa Iyang tibuok mortal nga pangalagad—sa pagtudlo nato pinaagi sa pagpakita kanato. Sa pagkatinuod, ang gugma nga putli mao “ang tiunay nga gugma ni Kristo” (Moroni 7:47).
Mga Ideya alang sa Personal nga Pagtuon sa Kasulatan
Mateo 27; Marcos 15; Lucas 23; Juan 19
Ang pagkaandam ni Jesukristo sa pag-antus nagpakita sa Iyang gugma alang sa Amahan ug alang natong tanan.
Bisan og ang Manluluwas adunay gahum sa pagtawag sa “mga legion sa mga manolunda” (Mateo 26:53), boluntaryo Siyang mipili sa paglahutay sa dili makiangayon nga paghusay, bangis nga pagbiay-biay, ug dili mahanduraw nga pisikal nga kasakit. Nganong gihimo Niya kini? “Tungod sa iyang mahigugmaon nga pagbati” mipamatuod si Nephi, “ug sa iyang pagkamainantuson ngadto sa mga katawhan.” (1 Nephi 19:9).
Mahimo nimong sugdan ang imong pagtuon sa katapusang mga takna sa Manluluwas pinaagi sa pagbasa sa 1 Nephi 19:9. Asa sa Mateo 27; Marcos 15; Lucas 23; ug Juan 19 makitaba ninyo ang mga ehemplo sa matag butang nga gisulti ni Nephi nga antuson ni Jesus?
“[Sila] mihukom kaniya nga usa ka walay hinungdan”
“Sila mihampak kaniya”
“Sila misagpa kaniya”
“Sila miluwa kaniya”
Unsa nga mga tudling ang nakatabang nimo nga mobati sa “mahigugmaon nga pagbati” sa Langitnong Amahan ug ni Jesus nganha kanimo? Unsa nga mga hiyas ang gipakita sa Manluluwas nga nakadasig nimo nga imong palamboon pa gayud sa hingpit?
Mateo 27:27–49, 54; Marcos 15:16–32; Lucas 23:11, 35–39; Juan 19:1–5
Ang pagbiay-biay sa kamatuoran sa Dios dili makapahuyang sa akong pagtuo.
Samtang si Jesus milahutay sa pagbiay-biay sa tibuok Niyang pangalagad, mas migrabe pa kini panahon sa pagkastigo ug paglansang Kaniya. Apan kini nga pagbiay-biay dili makausab sa kamatuoran: si Jesus mao ang Anak sa Dios. Samtang magbasa ka mahitungod sa pagpakaulaw nga giantus ni Jesus, hunahunaa ang oposisyon ug pagkastigo nga giatubang karon sa Iyang buhat. Unsay imong nasabtan mahitungod sa paglahutay og oposisyon? Unsay nakapadani nimo mahitungod sa mga pulong sa kapitan sa Mateo 27:54?
Gitalikdan ba sa Langitnong Amahan si Jesus diha sa krus?
Si Jeffrey R. Holland mitanyag sa mosunod nga panabut: “Ako mopamatuod … nga ang perpekto nga Amahan wala mobiya sa Iyang Anak niana nga oras. … Bisan pa, aron ang kinadak-ang sakripisyo sa Iyang Anak tingali maingon ka hingpit kay kini boluntaryo man ug sa nag-inusara, ang Amahan sa mubong higayon mitangtang gikan kang Jesus sa kahupayan sa Iyang Espiritu, mitangtang sa Iyang personal nga presensya. … Aron mahimo ang Iyang [Manluluwas] Pag-ula nga walay katapusan ug mahangturon, kinahanglan Siyang motagamtam kon unsay bation sa pagkamatay dili lamang sa pisikal apan usab sa espirituhanong paagi, aron mabatyagan unsay bation kon ang balaang Espiritu mobiya, unsay bation kon siya gitalikdan sa hingpit, sa kapait ug kawalay paglaum nga pag-inusara” (“Walay Bisan Usa nga Nakig-uban Kaniya,” Liahona, Mayo 2009, 87–88).
Ang Manluluwas mao ang atong ehemplo sa pagpasaylo.
Unsay imong gibati sa dihang gibasa nimo ang mga pulong sa Manluluwas sa Lucas 23:34? Nagpasabut sa mga pulong sa Manluluwas, si Presidente Henry B. Eyring mitudllo: “Kinahanglan kitang mopasaylo ug dili magbaton og kayugot ngadto niadtong nakapasakit kanato. Ang Manluluwas nagpakita sa ehemplo diha sa krus. … Wala kita masayud sa mga kasingkasing niadtong nakapasakit kanato” (That We May Be One,” Ensign,Mayo 1998, 68). Sa unsang paagi nga kini nga bersikulo makatabang nimo kon ikaw naglisud sa pagpasaylo sa uban?
Unsa ang kahulugan sa “paraiso” sa pamahayag sa Manluluwas ngadto sa kawatan?
Sa mga kasulatan, ang pulong nga paraiso sa kasagaran nagpasabut nga “usa ka dapit sa kalinaw ug kalipay sa postmortal nga kalibutan sa espiritu”—usa ka dapit nga gitagana alang sa matarung. Si Propeta Joseph Smith mitudlo nga ang pulong paraiso sa Lucas 23:43 nga “usa kini ka sayop nga paghubad; ang Ginoo sa tinuod lang miingon nga ang kawatan makauban Niya didto sa kalibutan sa mga espiritu” (Matinud-anon sa Tinuhoan, 193. ). Sa kalibutan sa espiritu, ang kawatan maminaw sa ebanghelyo nga isangyaw.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Bisan og si Judas personal nga nakaila ni Jesus, “mipalayo siya gikan ni [Jesus], ug nasilo tungod sa iyang mga pulong” (Joseph Smith Translation, Mark 14:31 ). Unsa kaha ang nakaingon sa mga tawo nga ingon og adunay lig-ong mga pagpamatuod mipahilayo man gikan sa Manluluwas? Sa unsang paagi kita magpabilin nga matinud-anon ngadto ni Jesukristo?
Mateo 27:11–26; Marcos 15:1–15; Lucas 23:12–24; Juan 19:1–16
Ngano nga gitugyan ni Pilato nga ilansang si Jesus, bisan og nakahibalo siya nga inosente si Jesus? Unsa nga mga leksyon ang atong makat-unan gikan sa kasinatian ni Pilato mahitungod sa pagbarug unsay nahibaloan nato nga matarung? Tingali makatabang alang sa imong pamilya ang pag-role play sa mga talan-awon nga makatugot nila sa pagpraktis sa pagbarug unsay matarung.
“Ug Siya milakaw nga nagpas-an sa iyang kaugalingong krus paingon ngadto sa … Golgota” (Juan 19:17).
Tingali mahimo nimong i-assign ang usa o daghan pa nga mga pamahayag nga gihimo sa Manluluwas diha sa krus nga makita niini nga mga bersikulo, ngadto sa matag sakop sa pamilya ug mohangyo kanila sa pagpakigbahin unsay ilang nakat-unan mahitungod sa Manluluwas ug sa Iyang misyon.
Sa unsang paagi nga ang pagbasa sa Paglansang makapalig-on sa atong mga pagpamatuod nga si Jesus mao ang Anak sa Dios”?
Unsa ang atong makat-unan gikan niini nga mga bersikulo mahitungod kon unsaon nato sa paghigugma ug pagsuporta ang mga sakop sa pamilya?
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Sunda ang kinabuhi sa Manluluwas. “Makatabang nga tun-an ang mga pamaagi sa Manluluwas sa pagtudlo—ang mga pamaagi nga Iyang gigamit ug ang mga butang nga Iyang gisulti. Apan ang gahum sa Manluluwas sa pagtudlo ug pagbayaw sa uban naggikan … sa unsa Siya nga matang sa tawo. Kon mas makugihon ka nga naningkamot nga magpakabuhi sama ni Jesukristo, mas makahimo ka sa pagtudlosama Kaniya” (Pagtudlo sumala sa Pamaagi sa Manluluwas, 13).
Si Kristo diha sa Krus, ni Carl Heinrich Bloch