“Hunyo 24–30. Mateo 28; Marcos 16; Lucas 24; Juan 20–21: ‘Siya Nabanhaw’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Hunyo 24–30. Mateo 28; Marcos 16; Lucas 24; Juan 20–21,” Dali, Sunod Kanako—Alang sa mga Indibidwal ug mga Pamilya: 2019
Pakan-a ang Akong Karnero, ni Kamille Corry
Hunyo 24–30
Mateo 28; Marcos 16; Lucas 24; Juan 20–21
“Siya Nabanhaw”
Basaha sa mainampoon nga paagi ang Mateo 28; Marcos 16; Lucas 24; ug Juan 20–21, mamalandong sa kalipay nga imong gibati tungod sa Pagkabanhaw ni Kristo. Palandunga kon sa unsang paagi nimo ipakigbahin ang imong pagpamatuod niini nga hitabo ngadto sa uban.
Irekord ang Imong mga Impresyon
Alang sa daghang tig-obserbar, ang kamatayon ni Jesus sa Nazaret ingon og bali nga katapusan ngadto sa usa ka talagsaon nga kinabuhi. Dili ba kini ang tawo nga mibanhaw ni Lazaro gikan sa patay? Wala ba Siya makigbatok sa mga hulga sa pagpatay gikan sa mga Pariseo matag karon ug unya? Nagpakita Siya og gahum nga ayuhon ang pagkabuta, sanla, ug paralisis. Gani ang hangin ug dagat misunod Kaniya. Ug gani ania Siya, nagbitay sa krus, nagdeklarar, “Tapus na” (Juan 19:30). Gani dihay pipila ka sinsero nga surprisa sa pagbiay-biay “Kana Siya nagluwas sa uban, apan sa Iyang kaugalingon dili na hinoon makaluwas” (Mateo 27:42). Apan nasayud kita nga ang kamatayon ni Jesus dili mao ang katapusan sa istorya. Nasayud kita nga ang kahilum sa lubnganan temporaryo ug nga ang makaluwas nga buhat ni Kristo mao lang ang sinugdanan. Nakita Siya karon nga wala “diha sa mga patay” apan sa mga buhi (Lucas 24:5). Ang Iyang mga pagtulun-an dili mapahilum, kay ang Iyang maunungon nga mga tinun-an mosangyaw sa ebanghelyo sa “tanang kanasuran,” mosalig sa Iyang saad nga Siya “magauban [kanila] kanunay, hangtud sa katapusan sa kapanahunan” (Mateo 28:19–20).
Mga Ideya alang sa Personal nga Pagtuon sa Kasulatan
Mateo 28; Marcos 16; Lucas 24; Juan 20
Tungod kay si Jesus nabanhaw, ako usab mabanhaw.
Niini nga mga tudling, mabasa nimo ang usa sa labing importante nga mga panghitabo sa kasaysayan sa tawo: ang Pagkabanhaw ni Jesukristo. Samtang magbasa ka, ibutang ang imong kaugalingon sa dapit sa mga tawo kinsa nakasaksi sa mga panghitabo nga naglibut sa Pagkabanhaw. Unsa kaha ang gibati niini nga mga saksi? Unsay imong gibati samtang nagbasa ka mahitungod sa Pagkabanhaw sa Manluluwas? Ikonsiderar kon sa unsa nga paagi kini nakaapekto kanimo—sa imong panglantaw sa kinabuhi, sa imong relasyon sa uban, sa imong pagtuo sa ubang mga kamatuoran sa ebanghelyo.
Tan-awa usab sa Giya ngadto sa mga Kasulatan, “Pagkabanhaw”.
Makadapit kita sa Manluluwas nga “magpabilin uban kanato.”
Ang kasinatian sa duha nga nagpanaw nga mga tinun-an nga nakasugat sa nabanhaw nga Manluluwas adunay kapareha sa imong dalan sa pagkatinun-an. Unsa nga mga koneksyon ang imong nakita tali niini nga istorya ug sa imong mga kasinatian isip sumusunod ni Kristo? Sa unsa nga paagi ikaw makalakaw uban Kaniya karon ug modapit Kaniya nga “magpabilin” pa og taud-taod? (Lucas 24:29). Unsaon nimo pag-ila ang Iyang presensya sa imong kinabuhi? Sa unsa nga mga paagi ang Espiritu Santo mipamatuod sa pagkabalaan ni Jesukristo?
Aduna bay lawas si Jesukristo?
Pinaagi sa mga istorya sa nabanhaw nga Ginoo nga nagpakita ngadto ni Maria Magdalena ug sa Iyang mga pakighinabi uban sa Iyang mga tinun-an, makat-unan nato nga ang Pagkabanhaw ni Jesus literal ug pisikal. Uban sa Iyang nabanhaw, nahimaya nga lawas, Siya milakaw, misulti, ug mikaon uban sa Iyang mga sumusunod. Ang ubang mga kasulatan nagpamatuod usab nga si Jesukristo adunay lawas sa unod ug bukog: Mga Taga-Filipos 3:20–21; 3 Nephi 11:13–15; Doktrina ug mga Pakigsaad 110:2–3; 130:1, 22.
“Dalaygon kadtong wala managpakakita, ngani nanagpanoo.”
Mahimong malisud ang pagtuo nga ang usa ka butang tinuod nga wala makakita og pisikal nga ebidensya. May panahon nga tingali ikaw mobati sama ni Tomas, nga miingon, “Gawas kon makakita ko … dili gayud ako motuo” (Juan 20:25). Agig tubag, ang Manluluwas miingon ngadto ni Tomas, “Dalaygon kadtong wala managpakakita, ngani nanagpanoo” (Juan 20:29). Sa unsa nga paagi ikaw napanalanginan sa pagtuon sa espirituhanong mga butang nga dili nimo makita? Unsa ang makatabang nimo aron makabaton og pagtuo sa Manluluwas bisan kon dili ka makakita Kaniya? Unsa ang ubang mga kamatuoran ang imong gituohan bisan og walay pisikal nga ebidensya? Unsaon nimo sa pagpadayon sa pagpalig-on sa imong pagtuo sa “mga butang nga dili makita, diin mga tinuod”? (Alma 32:21; tan-awa usab sa Ether 12:6). Ikonsiderar ang pagsulat sa mga kasinatian diha sa journal nga nakatabang nimo sa pagtuo ni Jesukristo, o pagpakigbahin niini sa usa ka tawo nga imong nailhan.
Ang Manluluwas nagdapit nako sa pagpakaon sa Iyang karnero.
Tingali makapaikag ang pagkomparar sa pakighinabi sa Manluluwas uban sa Iyang mga Apostoles sa Juan 21 ngadto sa unang higayon nga misugo Siya kanila sa pagtaktak sa ilang mga pukot, nga narekord sa Lucas 5:1–11. Unsa ang mga susama ug mga kalainan ang imong nakita? Unsay imong nasabtan mahitungod sa pagkatinun-an?
Ikonsiderar kon sa unsa nga paagi nga ang gisulti sa Manluluwas ngadto ni Pedro sa Juan 21:15–17 imong magamit. Aduna bay butang nga nakapugong nimo sa pagpangalagad sa mga karnero sa Ginoo? Unsay imong tubag kon ang Ginoo mangutana nimo, “Gihigugma mo ba ako?” Palandunga unsaon nimo sa pagpakita sa imong gugma alang sa Ginoo.
Tan-awa usab sa Jeffrey R. Holland, “Ang Unang Dakong Sugo,” Liahona, Nob. 2012, 83–85.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Ngano nga ang mga pulong “Wala Siya dinhi: kay siya nabanhaw” mao ang pipila ka labing malaumon ug importante nga mga pulong nga gikasulti sukad?
Samtang ang imong pamilya mobasa niini nga mga kapitulo, bantayi ang mga tawo nga nakigsulti ni Jesus sa matag istorya. Sama pananglit, mahimong tutukan nimo ang mga tawo nga mibisita sa lubnganan sa Manluluwas. Sa laing bahin, mahimo nimong tun-an pag-ayo ang mga aksyon sa mga Apostoles o sa mga tinun-an sa dalan sa Emaus.
Ang Dalan Paingon sa Emaus, ni Jon McNaughton
Isip usa ka pamilya, hisguti ang buhat nga gisugo ni Kristo nga buhaton sa Iyang mga Apostoles. Unsaon nato pagtabang nga matuman kini nga buhat? Mahimo bang mopakigbahin ka og panahon nga imong gibati nga “ang Ginoo nagbuhat uban [kanimo]” sa pagtabang nga matuman ang Iyang mga katuyoan? (Marcos 16:20).
Ikonsiderar ang pagbasa niini nga mga bersikulo samtang mangaon og dungan. Makadugang kini og kahulugan ngadto sa mga pulong sa Manluluwas “pakan-a ang akong mga karnero.” Base sa unsay gitudlo mahitungod sa karnero sa Bag-ong Tugon (tan-awa, sama pananglit sa, Mateo 9:35–36; 10:5–6; 25:31–46; Lucas 15:4–7; Juan 10:1–16), ngano nga ang pagpakaon sa karnero usa ka nindot nga simbolo sa pag-amuma ug pag-atiman sa mga anak sa Dios? Unsa ang gitudlo sa simbolo mahitungod kon unsay gibati sa Langitnong Amahan ug ni Jesukristo mahitungod kanato?
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Paggamit og musika aron sa pagdapit sa Espiritu ug magkat-on sa doktrina. Ang pagpaminaw o pagkanta og mga himno mahitungod sa Manluluwas makadapit sa Espiritu ug makatabang nimo nga makat-on mahitungod Kaniya.
Babaye, Nganong Nagahilak Ikaw? ni Simon Dewey