“Hulyo 1–7. Mga Buhat 1–5: ‘Kamo Mao Unya ang Akong mga Saksi’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Hulyo 1–7. Mga Buhat 1–5,” Dali, Sunod Kanako—Alang sa mga Indibidwal ug mga Pamilya: 2019
Adlaw sa Pagkunsad sa Espiritu Santo, ni Sidney King
Hulyo 1–7
Mga Buhat 1–5
“Kamo Mao Unya ang Akong mga Saksi”
Samtang magtuon ka sa Mga Buhat 1–5, ang Espiritu Santo makadasig kanimo sa pagpangita sa mga kamatuoran nga importante sa imong kinabuhi. Timan-i ang mga bersikulo nga makadani kanimo, ug pangita og mga oportunidad sa pagpaambit unsay imong nakat-unan.
Irekord ang Imong mga Impresyon
Natingala ba ikaw kon unsa kaha ang gihunahuna ug gibati ni Pedro sa dihang siya, uban sa laing mga Apostoles, “nanagtutok pa sila sa langit” samtang si Jesus mikayab ngadto sa Iyang Amahan? (Mga Buhat 1:10). Ang Simbahan nga gitukod sa Anak sa Dios gigiyahan na karon ni Jesus pinaagi ni Pedro, ang propeta sa Dios. Ang buluhaton sa paggiya sa paningkamot sa “paghimo nga tinun-an sa tanang kanasuran” anaa na karon ni Pedro (Mateo 28:19). Apan kon mibati siya nga dili angay o nahadlok, dili nato makita ang ebidensya niana sa basahon sa Mga Buhat. Unsay atong makit-an mao ang mga ehemplo sa walay kahadlok nga pagpamatuod ug pagkakabig, milagroso nga mga pagpang-ayo, ug talagsaong pagtubo sa Simbahan. Karon, uban sa gasa sa Espiritu Santo, si Pedro dili na mao ang mangingisda nga walay kaalam nga nakit-an ni Jesus sa kabaybayunan sa Dagat sa Galiliea. Ni siya ang nahasol nga tawo kinsa pipila lang ka semana ang nakalabay nagbakho pag-ayo tungod kay iyang gilimud nga siya nakaila ni Jesus sa Nazaret.
Sa mga basahon sa Mga Buhat, mabasa nimo ang gamhanang deklarasyon mahitungod ni Jesukristo ug sa Iyang ebanghelyo. Makita usab nimo sa unsa nga paagi kana nga ebanghelyo makausab sa mga tawo—lakip nimo—ngadto sa pagkamaisugon nga mga disipulo nga nahibaloan sa Dios nga sila mamahimo.
Mga Ideya alang sa Personal nga Pagtuon sa Kasulatan
Mga Buhat 1:1–8, 15–26; 2:1–42; 4:1–13, 31–33
Gigiyahan ni Jesukristo ang Iyang Simbahan pinaagi sa Espiritu Santo.
Ang basahon sa Mga Buhat nagrekord sa mga paningkamot sa mga Apostoles sa pagtukod sa Simbahan ni Jesukristo human sa Pagkayab sa Manluluwas. Bisan og si Jesukristo wala na dinhi sa yuta, Iyang gigiyahan ang Simbahan pinaagi sa Espiritu Santo. Ikonsiderar sa unsa nga paagi ang Espiritu Santo migiya sa bag-ong mga lider sa Simbahan ni Kristo sa imong pagribyu sa mosunod nga mga tudling: Mga Buhat 1:1–8, 15–26; 2:1–42; 4:1–13, 31–33.
Unsa ang pipila ka mga assignment, mga calling, o mga responsibilidad nga gihatag sa Ginoo kanimo? Unsay atong makat-unan gikan sa mga kasinatian niining unang mga Apostoles mahitungod kon sa unsa nga paagi kamo makasalig sa Espiritu Santo sa paggiya kanimo?
Tan-awa usab sa Giya ngadto sa mga Kasulatan, “Espiritu Santo.”
Unsa ang katuyoan sa gasa sa mga pinulongan?
Ang gasa sa mga pinulongan usahay giisip nga pagsulti og pinulongan nga walay usa nga makasabut. Hinoon, si Propeta Joseph Smith mipasabut niini nga mga panghitabo sa Mga Buhat 2 sa pagpatin-aw nga kini nga gasa sa Espiritu “gihatag sa katuyoan sa pagsangyaw [sa ebanghelyo] niadtong kinsang mga pinulongan dili masabtan; sama sa adlaw sa Pentecostes. … Ang katapusang katuyoan sa [gasa sa] mga pinulongan mao ang pagpakigsulti sa mga langyaw” (Mga Pagtulun-an sa mga Presidente sa Simbahan: Joseph Smith [2008], 464–65). Ang Kasaulogan sa Pentecostes, usa ka importante nga holiday sa Judeo, manguli ang mga Judeo gikan sa daghang mga nasud ngadto sa Jerusalem. Ang gasa sa mga pinulongan nakapahimo niini nga mga bisita nga makasabut sa mga pulong sa mga Apostoles sa ilang lumad nga mga pinulongan.
Ang unang mga baruganan ug mga ordinansa sa ebanghelyo makatabang nako nga moduol ngadto ni Kristo.
Gibati ba nimo nga “sakitan ang [imong] kasingkasing,” sama sa mga Judeo sa adlaw sa Pentecostes? (Mga Buhat 2:37). Tingali ikaw adunay nabuhat nga imong gibasulan, o tingali gusto nimo nga usbon ang imong kinabuhi. Unsay angay nimong buhaton kon ikaw aduna niini nga mga pagbati? Ang tambag ni Pedro ngadto sa mga Judeo makita sa Mga Buhat 2:38. Timan-i nga ang unang mga baruganan ug mga ordinansa sa ebanghelyo (lakip sa pagtuo, paghinulsol, bunyag, ug gasa sa Espiritu Santo—o unsay gipasabut nga ang doktrina ni Kristo) nakaapekto niini nga mga kinabig, sumala sa narekord sa Mga Buhat 2:37–47.
Tingali nabunyagan na ikaw ug nakadawat sa gasa sa Espiritu Santo, mao nga unsaon nimo sa pagpadayon sa paggamit sa doktrina ni Kristo? Ikonsiderar kining mga pulong gikan ni Elder Dale G. Renlund: “Kita mahingpit sa padayon ug dugang nga “[pag]salig sa hingpit … mopakita og hugot nga pagtuo Kaniya, maghinulsol, moambit sa sakrament sa pagbag-o sa mga pakigsaad ug panalangin sa bunyag, ug pagdawat sa Espiritu Santo isip kanunay gayud nga kauban. Kon buhaton nato kini, mas mahisama kita kang Kristo ug makalahutay sa katapusan” (“Ang mga Santos sa Ulahing mga Adlaw Magpadayon sa Pagpaningkamot,” Liahona, Mayo 2015, 56–57).
Tan-awa usab sa 2 Nephi 31; 3 Nephi 11:31–41; 27; Brian K. Ashton, “Ang Doktrina ni Kristo,” Liahona, Nob. 2016, 106–9.
Unsa ang “panahon sa kahayahay” ug “ang panahon sa pagtuman na sa tanang gisulti”?
“Ang panahon sa kahayahay” nagpasabut sa Milenyum, sa higayon nga si Jesukristo mobalik sa yuta. Ang mga pulong nga “panahon sa pagtuman na sa tanang butang” nagpasabut sa Pagpahiuli sa ebanghelyo.
Ang mga disipulo ni Jesukristo gihatagan og gahum sa pagpahigayon og mga milagro pinaagi sa Iyang ngalan.
Ang bakul nga tawo naglaum nga makadawat og kwarta gikan niadtong kinsa mianhi sa templo. Apan ang mga sulugoon sa Ginoo mihalad kaniya og mas daghan pa. Samtang magbasa mo sa Mga Buhat 3; 4:1–31; ug 5:12–42, ikonsiderar sa unsa nga paagi nga ang milagro nga misunod miapekto sa:
Ang bakul nga tawo
Pedro ug Juan
Ang mga saksi sa templo
Ang mga labawng sacerdote ug mga tigmando
Ubang mga Santos
Tan-awa usab sa mga video nga “Peter and John Heal a Man Crippled Since Birth,” “Peter Preaches and Is Arrested” (LDS.org).
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Kanus-a kita mibati nga “sakitan sa [atong] kasingkasing” sa dihang dunay usa ka tawo nga nagtudlo sa ebanghelyo? Unsa man ang buot ipasabut niini nga pagbati? Ngano nga importante nga moingon, “Unsa may among pagabuhaton?” kon kami aduna sa maong mga pagbati?
Sa unsa nga paagi nga ang tawo sa templo napanalanginan sa lahi nga paagi kay sa iyang gipaabut? Sa unsa nga paagi nato nakita ang mga panalangin sa Langitnong Amahan nga miabut kanato sa wala damha nga mga paagi?
Sa Ania Kanako Hatagan Ko Ikaw, ni Walter Rane
Unsa ang nakapadani nimo mahitungod sa pagkamatinud-anon nila ni Pedro ug Juan? Sa unsa nga paagi kita magmaisugon sa atong pagpamatuod ni Jesukristo?
Ang imong pamilya basin ganahan mo-drama sa istorya nila ni Ananias ug Safira uban sa yanong mga kostyum ug pipila ka sensilyo. Unsa nga mga leksyon ang atong makat-unan gikan niini nga istorya? Depende sa mga panginahanglan sa imong pamilya mahimo nimong hisgutan ang pagkamatinuoron, pagpaluyo sa mga lider sa Simbahan, o pagpahinungod.
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Pilia ang usa ka hilisgutan. Papuli-puliha ang mga sakop sa pamilya sa pagpili og hilisgutan gikan sa Mga Buhat 1–5 nga maoy tun-an sa tanan.
Ang Pagkayab sa Ginoo, ni William Henry Margetson