Fafanga ʻEku Fanga Sipí, tā ʻa Kamille Corry

24–30 Sune

Mātiu 28; Maʻake 16; Luke 24; Sione 20–21

“Kuo Toetuʻu”

Kamata hoʻo teuteú ʻaki hano lau e Mātiu 28; Maʻake 16; Luke 24; mo e Sione 20–21. ʻE lava ke tokoni atu ʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí pea mo e lēsoni ko ʻení, ke ke fili e ngaahi tefitoʻi moʻoni ʻi he ngaahi vahe ko ʻení ʻa ia ʻe ʻuhingamālie ki he fānau ʻi hoʻo kalasí.

Lekooti e Ngaahi Ongo ʻOkú ke Maʻú

Fakaafeʻi Ke Vahevahe

ʻE lava tokoni hono mamataʻi ha fakatātā, ke manatuʻi ʻe he fānaú ha ngaahi meʻa ne nau sio ai ʻi ʻapi pe ʻi ha ngaahi feituʻu kehe. Mahalo ʻe lava ke ke fakaʻaliʻali e fakatātā ʻi he lēsoni ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí pea kole ki he fānaú ke nau vahevahe e meʻa ʻoku nau ʻilo kau ki he talanoa ʻoku ʻasi ʻi he fakatātaá.

Akoʻi e Tokāteliné

Fānau Iiki Angé

Mātiu 28; Maʻake 16; Luke 24; Sione 20:1–23

Te u toe moʻui hili ʻeku maté, ʻo hangē ko Sīsuú.

Ko e Fakalelei ʻa Sīsū Kalaisí kau ai ʻEne Toetuʻú, ko e meʻa mahuʻinga taha ia kuo hoko ʻi he hisitōliá, pea ko e fakavaʻe ia ʻo e tui faka-Kalisitiané. ʻI hoʻo lau fekauʻaki mo e Toetuʻú, fakalaulauloto ki he founga te ke tokoni ai ki he fānaú ke langaki ʻenau tuí ʻia Sīsū Kalaisi.

Ngaahi ʻEkitivitī ʻe Ala Fakahokó

• Fai e talanoa ʻo e Toetuʻu ʻa Sīsuú ʻi hoʻo lea pē ʻaʻau. Kole ki he fānaú ke nau taufetongi hono toutou fai atu e talanoá kiate koé. Te ke lava fakaʻaongaʻi e “Vahe 54: Kuo Toetuʻu ʻa Sīsū,” Ngaahi Talanoa ʻo e Fuakava Foʻoú, 139–44, pe vitiō fekauʻakí (LDS.org). Fakamatalaʻi ange, ʻi he taimi naʻe pekia ai ʻa Sīsuú, naʻe mavahe hono laumālié mei Hono sinó. ʻI Heʻene toetuʻú, naʻe toe fakataha Hono laumālié mo Hono sinó.

• Fakaafeʻi ha kau mēmipa ʻe niʻihi ʻo e uōtí ke nau fakatātaaʻi e kau sōtiá, kau ʻāngeló, Mele Makitaline, Pita, Sione, kau ākongá, mo Tōmasi pea talaange e meʻa ne nau fakamoʻoniʻi hili e Toetuʻu ʻa Sīsuú.

• Vahevahe hoʻo fakamoʻoni, ʻe toetuʻu e tokotaha kotoa ʻi ha ʻaho. Fakaafeʻi e fānaú ke vahevahe ʻenau ngaahi fakamoʻoní.

• Fakakaukau ke mou hiva fakataha e “Naʻe Toetuʻu Nai ʻa Sīsū?” mo e “ʻO Ka Ne Ka Toe Haʻú,” Tohi Hiva ʻa e Fānaú, 45, 46. Kole ki he fānaú ke nau fakakaukau ko e hā ha ongo ʻe maʻu ʻi he mamata ki he Sīsū kuo toetuʻú. Tuku ke nau vahevahe ʻenau ngaahi fakakaukaú mo e kalasí.

Sione 20:24–29

Te u lava ʻo maʻu ha tui ʻia Sīsū Kalaisi neongo ʻoku ʻikai ke u lava ʻo sio kiate Ia.

Fakakaukau ki he founga te ke lava ai ʻo tokoni ke mahino ki he fānaú ʻa e tuí pea mo e founga te nau lava ai ʻo fakaʻaongaʻi e tui ki he Fakamoʻuí.

Ngaahi ʻEkitivitī ʻe Ala Fakahokó

• Fakamatala fakanounou e talanoa fekauʻaki mo e aʻusia ʻa Tōmasí ʻi he Sione 20:24–29. Toe lau e talanoá ʻamuiange ʻi he lēsoní, ka ʻi he taimi ní, kole ki he fānaú ke nau ʻomi ha niʻihi ʻo e ngaahi fakaikiikí.

• Fakaʻaliʻali ha puha ʻoku ʻi ai ha meʻa ʻi loto ʻa ia ʻoku ʻikai lava sio ki ai e fānaú, pea fakamatalaʻi e meʻa ʻoku ʻi lotó ki he fānaú. Fehuʻi ange pe ʻoku nau tui ʻoku loto moʻoni ʻa e meʻá pea ko e hā hono ʻuhingá. Fakaʻaliʻali ange leva ʻa e meʻa ʻoku ʻi lotó, pea fakamatalaʻi ange, ko e tuí ko ʻete tui ki ha meʻa ʻoku ʻikai lava ke te sio ki ai. Ko e tui mahuʻinga taha te tau lava ʻo maʻú, ko e tui kia Sīsū Kalaisí.

Vakai ki Hoku Ongo Nimá, tā ʻa Jeff Ward

Sione 21:15–17

Te u lava ʻo fakahaaʻi ʻeku ʻofa kia Sīsuú ʻaki ʻeku tokoniʻi e niʻihi kehé.

Te ke fakalotoʻi fēfē ʻa e fānaú ke nau ʻofa mo tokoniʻi ʻa kinautolu ʻoku nau feohí?

Ngaahi ʻEkitivitī ʻe Ala Fakahokó

• Lau e Sione 21:15–17. Naʻe ʻikai fie maʻu ʻe Sīsū ke fakamoleki kotoa ʻe Pita hono taimí ʻi he toutaí. Ka, naʻá Ne fie maʻu ke vahevahe ʻe Pita ʻa e ongoongoleleí pea fakaafeʻi e tokotaha kotoa ke haʻu kiate Ia. ʻOange ki he tokotaha kotoa ha kiʻi sipi pepa, pea kole ange ke nau tohiʻi ai ha meʻa te nau lava fai ke tokoni ki hono fafanga e fanga sipi ʻa Sīsuú.

• Kole ki ha niʻihi kimuʻa ʻi he taimi kalasí, ke vahevahe ha ngaahi meʻa ʻoku nau fai ke nau ʻofa mo tokoniʻi ai e niʻihi kehé, pe ngaahi founga ki he niʻihi kehé ke tokoniʻi ai kinautolu.

• Hiki e hingoa kotoa ʻo e fānau ʻi hoʻo kalasí ʻi ha fanga kiʻi laʻipepa kuo kosi ki he fōtunga ʻo e sipi, pea fakamoveteveteʻi ʻa e fanga sipí ni ʻi he lokí. (Fakakau ai e ngaahi hingoa ʻo e fānau ʻoku ʻikai ke nau faʻa kau maí.) Fakaafeʻi e fānaú ke fakatahatahaʻi e fanga sipí ʻaki hono kumi e sipi ʻoku hiki ai honau hingoá. Ko e hā te tau lava ʻo fai ke tokoniʻi ai ha fanga sipi mole ʻoku tau ʻilo?

Akoʻi e Tokāteliné

Fānau Lalahi Angé

Mātiu 28; Maʻake 16; Luke 24; Sione 20:1–23

Koeʻuhí naʻe toetuʻu ʻa Sīsū, ʻe toetuʻu e tokotaha kotoa.

ʻOku fakanatula ki he fānaú ke nau fifili ki he meʻa ʻe hoko hili ʻetau mālōloó. Fakakaukau ki he founga te ke lava ai ʻo akoʻi fekauʻaki mo e Toetuʻú ʻi ha founga te ne hanga ʻo langaki hake ʻenau tuí.

Ngaahi ʻEkitivitī ʻe Ala Fakahokó

• Fakaafeʻi e fānaú ke kuikui honau matá pea fakakaukau ʻoku nau tangutu ʻi he veʻe fonualoto ʻo Sīsuú, lolotonga hoʻo lau e Sione 20:1–17 pe fakamatala fakanounouʻi e talanoa ʻo ʻEne Toetuʻú (vakai foki “Vahe 54: Kuo Toetuʻu ʻa Sīsū,” Ngaahi Talanoa ʻo e Fuakava Foʻoú, 139–44. Naʻe mei fēfē nai ʻa e mamata ki he Fakamoʻui kuo toetuʻú?

• Kole ki he fānau takitaha ke ako e aʻusia ʻo ha tokotaha naʻe mamata ki he Fakamoʻui kuo toetuʻú, pea vahevahe mo e toenga ʻo e kalasí, e meʻa ne nau akó.

Sione 20:24–29

Te u lava ʻo maʻu ha tui kia Sīsū Kalaisi neongo ʻoku ʻikai ke u lava ʻo sio kiate Ia.

Ko e hā ʻoku fai ʻe he fānau ʻokú ke akoʻí, ke fakamālohia ʻenau tui kia Sīsū Kalaisí? Te ke lava ʻo tokoniʻi fēfē kinautolu?

Ngaahi ʻEkitivitī ʻe Ala Fakahokó

• Fakaafeʻi ha niʻihi ʻo e fānaú ke nau taufetongi ʻi honau lau e ngaahi veesi ʻi he Sione 20:24–29.

• Hiki e foʻi lea takitaha ʻi he kupuʻi lea “ʻOku monūʻia ʻa kinautolu ʻoku ʻikai mamata, kae tuí” ʻi ha ʻū laʻipepa kehekehe. Fakaafeʻi e fānaú ke nau fakahokohoko e ngaahi foʻi leá. Fakaafeʻi kinautolu ke nau talanoa ki ha ngaahi aʻusia ʻa ia ne nau ongoʻi ai e ʻofa ʻa e Fakamoʻuí neongo kapau ne ʻikai ke nau mamata kiate Ia.

• Fakaafeʻi e fānaú ke nau tā ha ngaahi fakatātā ʻo e ngaahi meʻa te nau lava ʻo fai ke fakamālohia ai ʻenau tuí. Lolotonga ʻenau tā fakatātaá, vahevahe e meʻa kuó ke fai ke fakamālohia ai hoʻo tui kia Sīsū Kalaisí.

Sione 21:1–17

Te u lava ʻo fakahaaʻi ʻeku ʻofa kia Sīsuú ʻaki ʻeku fafanga ʻEne fanga sipí.

ʻE lava ʻe he fānaú ʻo tākiekina lahi ʻa kinautolu ʻoku nau feohí. Te ke lava fēfē ʻo poupouʻi kinautolu ke fakamālohia e niʻihi kehé ʻi he ongoongoleleí?

Ngaahi ʻEkitivitī ʻe Ala Fakahokó

• Kimuʻa ʻi hono lau fakataha e Sione 21:1–17,, fehuʻi ki he fānaú pe kuo nau ʻosi taumātaʻu kimuʻa. Ko e hā ʻenau ongoʻi ki aí? Fehuʻi ange pe kuo maʻu ʻe ha taha ha “[ika lahi]” (Sione 21:6).

• Lau e Sione 21:15–17, kae fetongi e hingoa ʻo Saimoné ʻaki e hingoa ʻo e fānaú. Ko hai e fanga sipi ʻa Sīsuú? Te tau lava fēfē ʻo fafanga ʻEne fanga sipí?

• Vahevahe mo e fānaú ha kiʻi kai maʻamaʻa. Lolotonga ʻenau kaí, fehuʻi ange pe ʻoku tatau fēfē hono vahevahe ʻo e ongoongoleleí mo hono fafanga kinautolú.

Poupouʻi e Ako ʻi ʻApí

Fakaafeʻi e fānaú ke fakaʻaongaʻi e peesi ʻekitivitī ʻo e uike ní ke akoʻi ki honau ngaahi fāmilí fekauʻaki mo e uike fakaʻosi ʻo e moʻui ʻa e Fakamoʻuí.

Fakatupulaki ʻEtau Akoʻí

Muimuiʻi e ngaahi fakaafe ke ngāué. ʻI hoʻo fakaafeʻi e fānaú ke ngau ngāueʻi e meʻa ʻoku nau akó, muimuiʻi hoʻo fakaafé lolotonga e kalasi hokó. ʻOku fakahā heni ki he fānaú, ʻokú ke tokanga ki he founga ʻoku tāpuekina ai ʻe he ongoongoleleí ʻenau moʻuí. ʻI heʻenau vahevahe ʻenau ngaahi aʻusiá, ʻe fakamālohia kinautolu pea te nau fetokoniʻaki ke moʻui ʻaki e ongoongoleleí.