Agosto 26–Septyembre 1

1 Mga Taga-Corinto 8–13

“Kamo Mao ang Lawas ni Kristo”

Samtang imong basahon ang 1 Mga Taga-Corinto 8–13, paminaw og mga pag-aghat gikan sa Espiritu kon unsaon sa pagtudlo sa mga baruganan niini nga mga kapitulo. Hinumdumi nga bisan unsa sa mga ideya sa kalihokan mahimong mapahiangay alang sa dagko ug gagmay nga mga bata.

Irekord ang Imong mga Impresyon

Awhaga ang Pagpaambit

Dapita ang mga bata sa pagpaambit og usa ka butang nga ilang gibuhat atol sa sakrament miting karong adlawa aron sa paghunahuna mahitungod ni Jesus.

Itudlo ang Doktrina

Mas Gagmay nga mga Bata

1 Mga Taga-Corinto 10:13

Ang Langitnong Amahan motabang kanako sa paghimo og matarung nga mga pagpili.

Dili kanunay sayon ang pagpili sa matarung, apan ang Langitnong Amahan motabang kanato sa paghimo og matarung nga mga pagpili.

Posible nga mga Kalihokan

• Basaha ang 1 Mga Taga-Corinto 10:13 ngadto sa mga bata, nga dapiton sila sa pagpalayo kanimo kon madungog nila ang mga pulong nga “pagapanulayon” o “pagpanulay.”

• Paghimo og gagmay nga mga karatula sa pagpahunong [stop sign] alang sa mga bata. Pagsaysay og mugbo nga mga istorya sa mga tawo kinsa hapit na mohimo og sayop nga pagpili. Samtang maminaw ang mga bata, dapita sila sa pagpataas sa ilang mga karatula kon ang tawo diha sa istorya naghimo og sayop nga pagpili. Unsa man ang matarung nga pagpili? Pagpamatuod nga ang Langitnong Amahan motabang kanila sa pagpili sa matarung.

• Pagpakita og hulagway ni Jesus, ug kantaha uban sa mga bata ang usa ka kanta mahitungod ni Jesukristo, sama sa “Maninguha Kong Mahimong Mahisama Kang Jesus” (Songbook sa mga Bata, 40–41). Sa unsang paagi ang paghinumdom kang Jesus makatabang kanato sa paghimo og matarung nga mga pagpili? Pagpakita og mga litrato sa ubang mga butang nga makatabang kanato sa paghimo og matarung nga mga pagpili, sama sa mga ginikanan o mga kasulatan. Pangutan-a ang mga bata unsa ang makatabang nila sa paghimo og maayo nga mga pagpili.

1 Mga Taga-Corinto 12:4, 7–11

Ang Langitnong Amahan mipanalangin kanako og espiritwal nga mga gasa.

Gihatagan sa Langitnong Amahan ang tanan Niyang mga anak og espiritwal nga mga gasa. Unsa nga espiritwal nga mga gasa ang imong makita diha sa mga bata nga imong gitudloan?

Posible nga mga Kalihokan

• Basaha og dungan ang 1 Mga Taga-Corinto 12:7–11, ug ilha ang espiritwal nga mga gasa nga ginganlan ni Pablo. Tabangi ang mga bata sa paghunahuna og mga aksyon nga mobagay niini nga mga gasa sa Espiritu, ug gamita kini nga mga aksyon sa pagtabang sa mga bata sa paghinumdom sa mga gasa.

• Hangyoa ang mga bata sa pagdrowing og hulagway sa paborito nga gasa nga ilang nadawat. Ipasabut nga ang Langitnong Amahan mihatag kanato og espiritwal nga mga gasa sa paglig-on sa atong pagtuo ug sa pagtabang kanato sa pagpanalangin sa uban.

• Pagsulat og mubo nga sulat alang sa matag bata, nga naghulagway sa usa ka espiritwal nga gasa nga imong nakita diha kaniya (o mahimo nimong dapiton ang mga ginikanan sa pagsulat niini nga mga mugbong sulat). Pusta ang mugbo nga mga sulat nga daw mga gasa. Paablihi sa mga bata ang ilang mga gasa, ug tabangi sila sa pagbasa mahitungod sa ilang espiritwal nga mga gasa.

Gihatagan sa Langitnong Amahan ang tanan Niyang mga anak og espiritwal nga mga gasa.

1 Mga Taga-Corinto 13:1–8

Makahimo ako sa paghigugma sa uban.

Nagtudlo ang mga kasulatan nga ang gugma nga putli mao ang “tiunay nga gugma ni Kristo” (Moroni 7:47). Unsaon nimo pagtabang ang mga bata nga makapalambo ug makapahayag og Kristohanong gugma?

Posible nga mga Kalihokan

• Basaha ang 1 Mga Taga-Corinto 13:8 ug Moroni 7:47, ug tabangi ang mga bata sa pagsulti sa mga pulong nga “Ang gugma nga putli mao ang tiunay nga gugma ni Kristo.” Pagpakita og mga hulagway ni Jesus nga nagmahigugmaon ug mabination, ug pangutan-a ang mga bata kon giunsa Niya sa pagpakita og gugma ngadto sa uban (tan-awa ang Libro sa mga Hulagway sa Ebanghelyo alang sa mga ideya).

• Pagpili og usa ka bata nga mobarug sa atubangan sa kwarto. Pangutan-a ang bata kon unsaon niya sa pagserbisyo og laing tawo diha sa klase. Ipasabut nga usa kini ka paagi nga makapakita kita og gugma nga putli ngadto sa uban. Dapita ang ubang mga bata nga magpuli-puli sa pagpakita og gugma nga putli.

• Pagkanta og usa ka awit mahitungod sa paghigugma sa uban, sama sa “Si Jesus Miingon Higugmaa ang Tanan” o “Maghigugmaay” (Songbook sa mga Bata, 39, 74), uban sa mga bata. Pagpakita og mga litrato sa lain-laing mga tawo (sama sa usa ka ginikanan, magtutudlo, o higala), ug hangyoa ang mga bata sa pagpaambit kon unsaon nila sa pagserbisyo nianang tawhana. Dapita ang mga bata sa paghunahuna og usa ka tawo nga ilang maserbisyuhan ug sa paghimo og mubo nga sulat o sa pagdrowing og litrato nga ikahatag nianang tawhana.

Itudlo ang Doktrina

Mas Dagko nga mga Bata

1 Mga Taga-Corinto 10:13

Ang Langitnong Amahan motabang kanako sa pagpakigbatok sa tintasyon.

Ang mga saad niini nga bersikulo makahatag sa mga bata og pagsalig nga ang Langitnong Amahan motabang kanila kon sila tintalon.

Posible nga mga Kalihokan

• Dapita ang mga bata sa pagbasa sa 1 Mga Taga-Corinto 10:13 nga magpares ug i-summarize ang bersikulo sa ilang kaugalingong mga pulong. Hangyoa ang mga bata sa pagpaambit og kasinatian diin ang Langitnong Amahan mitabang kanila sa paglikay o pagpakigbatok sa tintasyon. Unsa ang atong mabuhat aron mosalig sa Langitnong Amahan kon kita tintalon?

• Isulat diha sa mga piraso nga papel ang mga tintasyon nga mahimong atubangon sa mga bata karon. Dapita ang matag usa sa mga bata nga mopili og usa ka papel ug mopaambit kon unsay gihatag kanato sa Langitnong Amahan aron sa pagtabang kanato sa paglikay o pagpakigbatok niini nga mga tintasyon. Alang sa pipila ka mga ideya, basaha og dungan ang Alma 13:28–29.

1 Mga Taga-Corinto 11:23–29

Panahon sa sakrament, mahimo ko nga maghunahuna kon sa unsang paagi nagsunod ko sa Manluluwas.

Ang sakrament adunay dugang nga kahulugan alang sa mga bata nga nabunyagan na. Tabangi sila nga makakita niining sagrado nga ordinansa isip oportunidad sa “[pag]susi” sa ilang kaugalingon ug sa pagbag-o sa ilang pasalig ngadto sa Manluluwas (1 Mga Taga-Corinto 11:28).

Posible nga mga Kalihokan

• Hangyoa ang usa ka bata sa pagbasa sa 1 Mga Taga-Corinto 11:28. Unsa ang gipasabut sa “[pag]susi” sa atong mga kaugalingon sa dili pa moambit sa sakrament? Hangyoa ang mga bata sa paghunahuna og uban nga mga tawo kinsa mosusi og mga butang, sama sa doktor, mga detektib, o mga scientist (sama pananglit, ang mga doktor mosusi sa atong mga lawas alang sa mga samad o mga sakit nga kinahanglang ayuhon). Unsa ang matudlo sa ilang buhat kanato kon unsaon nato sa pagsusi sa atong kaugalingon kon moambit kita sa sakrament?

• Hangyoa ang mga bata sa paghimo og lista sa mga butang nga mahimo nilang hunahunaon kon moambit sila sa sakrament. Dapita sila sa paggamit sa ilang lista isip pahinumdom sa pagsusi sa ilang mga kaugalingon sa panahon sa sakrament.

1 Mga Taga-Corinto 12:4, 7–12, 31; 13:1–8

Aduna akoy espiritwal nga mga gasa.

Mitudlo si Pablo nga ang mga gasa sa espiritu “ngadto sa matag usa gikahatag” (1 Mga Taga-Corinto 12:7). Kini nga baruganan makatabang sa mga bata sa paglig-on sa ilang pagbati sa bili sa kaugalingon, ilabi na kon ilang gamiton ang ilang mga gasa sa pagpanalangin sa uban.

Posible nga mga Kalihokan

• Hangyoa ang mga bata sa pagsulat diha sa pisara sa espiritwal nga mga gasa nga ilang nakit-an diha sa 1 Mga Taga-Corinto 12:7–11; 13:2. Dapita sila sa pagpangita og dugang nga mga gasa nga gihisgutan diha sa Moroni 10:8–18 ug Doktrina ug mga Pakigsaad 46:13–26. Ipaambit kanila ang pipila sa dugang nga espiritwal nga mga gasa nga gihisgutan ni Elder Marvin J. Ashton: “Ang gasa sa pagpangutana; ang gasa sa pagpaminaw; … ang gasa sa paglikay sa panaglalis; … ang gasa sa pagtinguha niana nga matarung; ang gasa nga dili dayon mohukom; ang gasa sa pagdangup ngadto sa Dios alang sa giya; … ang gasa sa pag-amuma sa uban; … ang gasa sa paghalad og pag-ampo; ang gasa sa paghatag og makapatandog nga pagpamatuod” (“There Are Many Gifts,” Ensign, Nob. 1987, 20). Dapita ang mga bata sa paghisgut sa espiritwal nga mga gasa nga ilang nakita diha sa usag usa.

• Sa dili pa magklase, pangutan-a ang mga ginikanan mahitungod sa mga gasa nga ilang nakita diha sa ilang mga anak, o hunahunaa ang ilang mga gasa sa imong kaugalingon. Sultihi ang mga bata mahitungod niini nga mga gasa, ug hangyoa sila sa pagtag-an kon kinsa nga bata ang aduna niana nga gasa. Dapita ang mga bata sa pagsulat og usa ka paagi nga gamiton nila ang ilang mga gasa sa pagpanalangin sa uban niining semanaha.

• Pagpaambit og lain-laing mga sitwasyon diin ang mga tawo makagamit og espiritwal nga gasa gikan sa 1 Mga Taga-Corinto 12:7–10. Dapita ang mga bata sa pag-ila sa espiritwal nga mga gasa nga magamit sa matag sitwasyon.

Awhaga ang Pagkat-on diha sa Panimalay

Dapita ang mga bata sa pagpaambit sa ilang espiritwal nga mga gasa diha sa ilang mga pamilya ug sa pagpangutana sa mga sakop sa ilang pamilya kon unsa ang ilang mga gasa.

Pagpalambo sa Atong Pagtudlo

Ipaabut ang mga pagdapit nga nagtahud sa kabubut-on. Samtang imong dapiton ang mga bata sa pagsunod sa unsay ilang nakat-unan, paghunahuna og mga paagi sa pagtahud sa ilang kabubut-on. Imbis nga mohatag og piho nga mga pagdapit, ikonsiderar ang pagdapit kanila sa paghunahuna og ilang kaugalingong mga paagi nga magamit ang unsay ilang nakat-unan.