Septyembre 2–8

1 Mga Taga-Corinto 14–16

“Ang Dios Dili Dios sa Kasamok, kondili sa Kahusay”

Samtang imong basahon ang 1 Mga Taga-Corinto 14–16, ang Espiritu Santo motabang kanimo nga masayud kon unsay itudlo sa mga bata sa imong klase. Ribyuha kini nga outline alang sa dugang nga mga ideya.

Irekord ang Imong mga Impresyon

Awhaga ang Pagpaambit

Mahimo nimong sugdan ang leksyon niining semanaha pinaagi sa pagbasa og kusog sa 1 Mga Taga-Corinto 14:26. Ipasabut nga kon moanhi kita sa simbahan, makapalig-on (o makaawhag ug makatabang) kita kon mopaambit kita ngadto sa uban. Unsa ang mahimong mapaambit sa mga bata aron sa paglig-on og usa ka tawo diha sa klase karon?

Itudlo ang Doktrina

Mas Gagmay nga mga Bata

1 Mga Taga-Corinto 15:12–22

Makapuyo ako uban sa Langitnong Amahan human ako mamatay tungod kay nabanhaw si Jesukristo.

Unsaon nimo pagtudlo ang mga bata sa imong klase nga tungod kay si Jesukristo nabanhaw kita mabuhi pag-usab?

Posible nga mga Kalihokan

• Balika sa pipila ka higayon uban sa mga bata ang mosunod nga mga pulong: “Diha kang Kristo ang tanan mangabuhi” (1 Mga Taga-Corinto 15:22). Pagpakita og hulagway sa nabanhaw nga Manluluwas (tan-awa ang outline niini nga semana diha sa Dali, Sunod Kanako—Alang sa mga Indibidwal ug mga Pamilya). Ipasabut nga kitang tanan mamatay sa umaabut nga adlaw, apan tungod kay si Jesus nabanhaw, mabuhi kita pag-usab human kita mamatay.

• Gamit og object lesson nga sama niini aron sa pagtudlo mahitungod sa Pagkabanhaw: Pakit-a ang mga bata og jacket, nga nagrepresentar sa atong pisikal nga lawas. Kon kita buhi pa, ang atong mga espiritu anaa sa atong mga lawas, ug ang atong mga lawas makalihok (isul-ob ang jacket). Kon mamatay kita, ang atong mga espiritu mobiya sa atong pisikal nga mga lawas, ug ang atong mga lawas dili na makalihok (kuhaa ang jacket ug ibutang kini sa lamesa o sa lingkuranan aron morepresentar og lawas nga wala ang iyang espiritu). Kon kita mabanhaw, ang atong mga espiritu mobalik ngadto sa atong mga lawas (isul-ob og balik ang jacket), ug dili na gayud kini magkabulag pag-usab. Papuli-puliha ang mga bata sa pagsul-ob sa jacket ug sa paghubo niini samtang ang laing bata mopasabut unsay mahitabo kon kita mabanhaw.

1 Mga Taga-Corinto 15:29

Mahimo akong mabunyagan alang sa mga tawo nga namatay na.

Ang mga bata nga imong gitudloan makaandam karon nga moadto sa templo ug mabunyagan alang sa mga patay kon sila mag-12 anyos na. Gihisgutan ni Pablo kining importante nga doktrina diha sa iyang sulat ngadto sa mga taga-Corinto.

Posible nga mga Kalihokan

• Tabangi ang mga bata sa paghunahuna og mga butang nga dili nila mabuhat nga sila ra (sama sa pagdala og bug-at nga butang o pagkab-ut og usa ka butang diha sa taas nga estante). Kinsa ang motabang kanila sa pagbuhat niining mga butanga? Ipakita ang hulagway sa usa sa imong mga katigulangan kinsa namatay nga wala mabunyagi. Sultihi ang mga bata kabahin niining tawhana, ug ipasabut nga kining tawhana dili mahimong mabunyagan nga walay tabang gikan sa usa ka tawo dinhi sa yuta.

• Pangutan-a ang mga bata kon duna ba silay mga sakop sa pamilya kinsa nakaadto sa templo aron sa pagpahigayon og bunyag alang sa mga patay. Pagpakita og mga litrato sa baptismal font sa templo. Nasayud ba ang mga bata kon unsay mahitabo dinhi? Ipasabut nga diha sa templo mahimo kitang bunyagan alang sa mga tawo nga namatay nga wala mabunyagi. Dayon kadtong mga tawhana mahimong mopili kon modawat ba sa bunyag.

1 Mga Taga-Corinto 15:40–41

Gusto sa Langitnong Amahan nga mopuyo ako uban Kaniya didto sa celestial nga gingharian.

Unsaon nimo pagtudlo ang mga bata mahitungod sa celestial, terrestrial, ug telestial nga mga gingharian? Makatabang kini nga mga kalihokan.

Posible nga mga Kalihokan

• Isulat diha sa pisara ang celestial, terrestrial, ug telestial. Tabangi ang mga bata nga makakat-on sa pagsulti niini nga mga termino.

• Pagpakita og mga hulagway sa adlaw, bulan, ug mga bitoon. Hain ang pinakahayag nga nagdan-ag? Basaha ang 1 Mga Taga-Corinto 15:40–41 ngadto sa mga bata (tan-awa usab ang Hubad ni Joseph Smith, 1 Mga Taga-Corinto 15:40, diha sa Giya ngadto sa mga Kasulatan). Ipasabut nga ang adlaw, bulan, ug mga bitoon nagrepresentar sa mga gingharian nga mahimo natong mapuy-an human kita mabanhaw. Sa celestial nga gingharian, makapuyo kita uban sa Langitnong Amahan.

• Idrowing ang adlaw diha sa pisara ug pagbutang og gagmay nga mga piraso sa papel, nga nagrepresentar sa mga lakang, diha sa yuta padulong ngadto sa adlaw. Ang matag papel mahimong magrepresentar og usa ka butang nga kinahanglan natong buhaton aron makasulod sa celestial nga gingharian (tan-awa sa D&P 76:50–53). Tuguti ang mga bata sa pagpaambit og mga ideya ug sa paghimo og mga lakang padulong sa celestial nga gingharian.

Gitandi ni Pablo ang celestial nga himaya ngadto sa adlaw.

Itudlo ang Doktrina

Mas Dagko nga mga Bata

1 Mga Taga-Corinto 15:12–22

Tungod ni Jesukristo ug sa Iyang Pagkabanhaw, ako mabanhaw.

Nakasabut ba ang mga bata nga imong gitudloan sa kaimportante sa Pagkabanhaw ni Jesukristo? Kini nga mga ideya tingali makatabang.

Posible nga mga Kalihokan

• Dapita ang mga bata nga magpuli-puli sa pagbasa sa mga bersikulo diha sa 1 Mga Taga-Corinto 15:12–22, nga mangita og mga tubag sa pangutana “Unsay mahitabo kon walay pagkabanhaw?”

• Dapita ang mga bata sa pag-role play kon unsaon sa pagpasabut sa pagkabanhaw ngadto sa usa ka tawo. Alang sa mga ideya, tan-awa ang mensahe ni Thomas S. Monson “Mrs. Patton—ang Istorya Nagpadayon” (Liahona, Nob. 2007, 21–24). Pagpamatuod kabahin sa Pagkabanhaw ni Kristo.

1 Mga Taga-Corinto 15:12–13, 20–22, 29

Makapangandam ko sa pag-adto sa templo aron mabunyagan alang sa mga patay.

Inig-abut og 12 anyos sa mga bata, mahimo na silang makadawat og temple recommend ug mopahigayon og mga bunyag alang sa mga patay didto sa templo. Unsaon nimo sa pagtabang kanila nga makapangandam?

Posible nga mga Kalihokan

• Basaha ang 1 Mga Taga-Corinto 15:29. Unsa man ang gibuhat sa mga Santos sa panahon ni Pablo nga gibuhat usab nato karon?

• Pangutan-a ang mga bata nganong bunyagan kita alang sa mga patay. Kon gikinahanglan, ipasabut nga daghan sa atong mga katigulangan wala makaangkon sa oportunidad nga mabunyagan ug makumpirmahan niining kinabuhia. Diha sa templo, mahimo kitang mabunyagan ug makumpirmahan alang kanila.

• Pipila ka adlaw sa dili pa magklase, hangyoa ang usa ka ginikanan sa usa sa mga bata nga mangandam sa pagpaambit sa iyang family tree, o sa pagsaysay og usa ka istorya mahitungod sa usa ka katigulangan. Mahimo usab ka nga magpaambit mahitungod sa kaugalingon nimong katigulangan.

• Dapita ang usa ka sakop sa bishopric sa pagpaambit og pipila ka butang nga mabuhat sa mga bata aron mahimong takus sa pagsulod sa templo. Pangutan-a ang mga bata kon unsa ang ilang mabuhat aron mahinumdom sa pagbuhat niining mga butanga. Isulat ang ilang mga ideya diha sa pisara. Dapita sila sa paghimo og tumong nga moadto sa templo sa umaabut.

1 Mga Taga-Corinto 15:40–41

Human ko mabanhaw, makapuyo ko sa celestial nga gingharian.

Aron sa pagtudlo sa mga taga-Corinto mahitungod sa lawas nga atong madawat sa pagkabanhaw, mihisgut si Pablo og tulo ka ang-ang sa himaya: celestial, terrestrial, ug telestial.

Posible nga mga Kalihokan

• Basaha ang 1 Mga Taga-Corinto 15:40–41 ug dapita ang usa ka bata sa pagdrowing og adlaw, bulan, ug mga bitoon diha sa pisara. Hangyoa ang mga sakop sa klase sa pag-ila kon hain nga matang sa nabanhaw nga lawas ang girepresentar sa matag drowing.

• Kantaha og dungan ang usa ka kanta mahitungod sa mga templo, sama sa “Ang Ginoo Naghatag Kanako og Templo” (Songbook sa mga Bata, 153). Unsa ang gitudlo niini nga kanta kanato mahitungod sa pagpangandam nga mopuyo diha sa celestial nga himaya?

• Ipasabut nga adunay panan-awon si Joseph Smith diin nakakita siya og tulo ka gingharian nga mitakdo sa mga matang sa lawas nga gihulagway ni Pablo. Tabangi ang mga bata nga makakita sa mga pulong gikan sa Doktrina ug mga Pakigsaad 76:50–53, 70; 76:71–79; 76:81–82 nga naghulagway niining tulo ka mga gingharian.

Awhaga ang Pagkat-on diha sa Panimalay

Dapita ang mga bata sa paghangyo sa ilang mga ginikanan nga sultihan sila og usa ka istorya mahitungod sa usa sa ilang katigulangan. Mahimo nilang ipaambit ang istorya diha sa klase sa sunod semana.

Pagpalambo sa Atong Pagtudlo

Awhaga ang mga bata sa pagpangutana. “Paningkamuti nga makita ang … mga pangutana [sa mga bata] isip mga oportunidad, dili nga makabalda o mga babag sa imong leksyon. … Ang ingon nga mga pangutana maghatag kanimo og bililhon nga mga panabut kon unsay gihunahuna sa mga bata, unsay ilang mga kabalaka, ug unsay ilang mga reaksyon sa mga butang nga ilang nakat-unan. Tabangi sila nga makakita nga ang mga tubag sa ilang mga pangutana makita diha sa mga kasulatan ug sa mga pulong sa buhing mga propeta” (Pagtudlo sumala sa Pamaagi sa Manluluwas, 25).