“Septyembre 2–8. 1 Mga Taga-Corinto 14–16: ‘Kay ang Dios Dili Dios sa Kasamok, Kondili sa Kahusay’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Septyembre 2–8. 1 Mga Taga-Corinto 14–16,” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019
Septyembre 2–8
1 Mga Taga-Corinto 14–16
“Kay ang Dios Dili Dios sa Kasamok, Kondili sa Kahusay”
Irekord ang imong mga impresyon samtang magbasa ka sa 1 Mga Taga-Corinto 14–16. Pag-ampo mahitungod sa unsay gitudlo sa Espiritu kanimo, ug pangutan-a ang Langitnong Amahan kon aduna pa bay gusto Niya nga imong makat-unan.
Irekord ang Imong mga Impresyon
Tungod kay ang Simbahan ug ang mga ordinansa niini bag-o lang sa Corinto, masabtan ra nga ang mga Santos nga taga-Corinto nakasugat og kalibug. Gitudloan na ni Pablo sila sa sukaranang kamatuoran sa ebanghelyo: “Si Kristo namatay tungod sa atong mga sala … ug nga siya gilubong, ug nga siya nabanhaw sa ikatulo nga adlaw” (1 Mga Taga-Corinto 15:3–4). Apan ang pipila ka mga miyembro sa wala madugay nagsugod sa pagtudlo nga “walay pagkabanhaw ang nangamatay” (1 Mga Taga-Corinto 15:12). Nangamuyo si Pablo kanila sa “pagkupot pag-ayo” sa mga kamatuoran nga gitudlo kanila (1 Mga Taga-Corinto 15:2). Kon makasugat kita og nagkasumpaki nga mga opinyon mahitungod sa mga kamatuoran sa ebanghelyo, maayo nga hinumduman nga “ang Dios dili Dios sa kasamok, kondili sa kahusay” (1 Mga Taga-Corinto 14:33). Ang pagpaminaw ngadto sa gitudlo nga mga sulugoon sa Ginoo ug paghupot sa yanong mga kamatuoran nga ilang gibalik-balik sa pagtudlo makatabang nato sa pagpangita og kalinaw ug “malig-on sa inyong pagtuo” (1 Mga Taga-Corinto 16:13).
Mga Ideya alang sa Personal nga Pagtuon sa Kasulatan
Magtinguha ako sa gasa sa panagna.
Naghunahuna ba ikaw kon unsa ang gasa sa panagna? Abilidad ba kini sa pagtagna sa umaabut? Si bisan kinsa ba makadawat niini nga gasa? O ang mga propeta lamang?
Ang Presidente sa Simbahan mao lamang ang tawo kinsa makapanagna ug makadawat og pagpadayag alang sa tibuok Simbahan; hinoon, ang Giya ngadto sa mga Kasulatan mihatag og kahulogan sa panagna nga “balaan nga dinasig nga mga pulong o mga sinulat, diin ang usa ka tawo modawat pinaagi sa pagpadayag gikan sa Espiritu Santo. … Kon ang usa ka tawo managna, siya mamulong o magsulat niana diin ang Dios buot kaniya nga masayud, alang sa iyang kaayohan o kaayohan sa uban” (Giya ngadto sa mga Kasulatan, “Pagpanagna,” scriptures.lds.org; tan-awa usab sa DP 100:5–8). Pinadayag 19:10 nagpatin-aw usab sa espiritu sa panagna nga ang “pagpamatuod ni Jesus.”
Unsay imong nakat-unan niining espirituhanong gasa gikan sa 1 Mga Taga-Corinto 14:3, 31, 39–40? Unsa kaha ang gipasabut ni Pablo sa dihang midapit siya sa mga taga-Corinto nga “tinguhaa ninyo sa dakong kasibut ang paghimog propesiya”? (1 Mga Taga-Corinto 14:39). Unsaon nimo sa pagdawat kini nga imbitasyon?
Tan-awa usab sa Numeros 11:24–29; Jacob 4:6–7; Alma 17:3; Doktrina ug mga Pakigsaad 11:23–28.
Ngano nga miingon si Pablo nga ang mga babaye kinahanglang magpakahilum sa simbahan?
Ang mga pagtulun-an ni Pablo sa 1 Mga Taga-Corinto 14:34–35 ingon og makalibug, tungod kay sa sayo pa niining sama nga [sulat] misulat siya nga ang mga babaye nag-ampo ug nanagna (tan-awa sa 1 Mga Taga-Corinto 11:5). Sa Hubad ni Joseph Smith giilisan ang pulong namulong sa mga bersikulo 34 ug 35 uban sa mando. Kini nga pagpasabut nagsugyot nga si Pablo naghisgot sa mga babaye kinsa naningkamot nga moilog og awtoridad diha sa mga miting sa Simbahan. (Tan-awa usab sa 1 Timoteo 2:11–12.)
Tan-awa usab sa “Women in the Church” Gospel Topics, topics.lds.org.
1 Mga Taga-Corinto 15:1–34, 53–58
Si Jesukristo nakaangkon og kadaugan ibabaw sa kamatayon.
Ang Pagkabanhaw ni Jesukristo mao ang sukaranan kaayo sa Kristiyanismo, mahimong mosulti ang usa ka tawo nga kon wala kini walay Kristiyanismo—sa paggamit sa mga pulong ni Pablo, “nan kawang lamang ang among pagwali, ug kawang lamang usab diay ang inyong pagtuo” (1 Mga Taga-Corinto 15:14). Apan ang pipila ka mga Santos nga taga-Corinto nagtudlo nga “walay pagkabanhaw sa mga nangamatay” (1 Mga Taga-Corinto 15:12). Samtang magbasa ka sa tubag ni Pablo sa 1 Mga Taga-Corinto 15, paggahin og pipila ka gutlo sa pagpamalandong kon unsa kaha ang imong kinabuhi kon ikaw wala pa motuo sa Pagkabanhaw. Sa unsa nga paagi kini nakapanalangin kanimo? Unsa nga mga panalangin ang moabut kanimo tungod kay si Jesukristo nabanhaw? (tan-awa sa 2 Nephi 9:6–19; Alma 40:19–23; Doktrina ug mga Pakigsaad 93:33–34). Unsa ang kahulugan sa mga pulong “Kon si Kristo wala banhawa, kawang lamang usab diay ang inyong pagtuo” nganha kanimo? (bersikulo 17).
Ang nabanhaw nga mga lawas lahi gikan sa mortal nga mga lawas.
Nakahunahuna ba ikaw kon unsa mahisama ang nabanhaw nga lawas? Sumala sa 1 Mga Taga-Corinto 15:35, ang pipila ka mga taga-Corinto naghunahuna sa samang butang. Basaha ang tubag ni Pablo sa mga bersikulo 36–54, ug timan-i ang mga pulong nga naghulagway sa mga kalainan tali sa mortal nga mga lawas ug nabanhaw nga mga lawas. Sama pananglit, ang mga bersikulo 40–42 nagtudlo nga ang nabanhaw nga mga lawas mosanag sa himaya sa nagkalain-laing mga ang-ang, sama sa adlaw, bulan, ug mga bitoon nagkalahi sa kahayag (tan-awa usab sa Hubad ni Joseph Smith, 1 Mga Taga-Corinto 15:40; DP 76:50–112).
Tan-awa usab sa Alma 11:43–45; Lucas 24:39.
“Lain ang kasanag sa adlaw” (1 Mga Taga-Corinto 15:41).
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Makat-unan nato gikan sa bersikulo 29 nga ang karaang mga Santos miapil sa mga bunyag alang sa mga patay, sama sa atong gibuhat karon sa Simbahan. Unsay atong gihimo isip pamilya sa pag-andam sa mga ngalan sa atong mga katigulangan alang sa mga ordinansa sa templo? Tan-awa usab sa “Baptisms for the Dead,” Gospel Topics, topics.lds.org.
Unsa nga mga butang o mga litrato ang imong mapakita aron matabangan ang imong pamilya nga makasabut sa pipila ka termino nga gigamit ni Pablo sa paghulagway sa unsa nga paagi nga ang mortal nga mga lawas lahi gikan sa nabanhaw nga mga lawas? Pananglitan, sa pagpakita sa kalainan tali sa madunot ug dili madunot (tan-awa sa mga bersikulo 52–54) mahimong mopakita ka og metal nga gitaya (sama sa puthaw) ug metal nga dili motaya (sama sa stainless steel). O mahimo nimong itandi ang butang nga huyang uban sa butang nga lig-on (tan-awa sa bersikulo 43).
Usa ka panaghisgutan mahitungod niini nga mga bersikulo mahimong espesyal nga makahuluganon kon ang imong pamilya nakahibalo og usa ka tawo nga namatay. Ang mga sakop sa pamilya makahatag og pagpamatuod kon giunsa ni Jesukristo pagkuha “ang ikot sa kamatayon” (bersikulo 56). Ang mensahe ni Elder Paul V. Johnson “Ug Wala Nay Kamatayon” (Liahona, Mayo 2016, 121–23) maanindot nga idugang sa inyong panaghisgutan.
Aron matabangan ang mga sakop sa imong pamilya nga makasabut niini nga bersikulo, makadrowing ka og lingin diha sa yuta ug sugoa ang usa ka sakop sa pamilya nga “magbarug nga malig-on” sa sulod niini nga gitaptapan ang mga mata samtang ang uban maningkamot sa pagpagawas niya gikan sa lingin. Unsa ang kalainan niini kon ang sakop sa pamilya nga anaa sa lingin wala taptapi ug “makakita”? Unsay atong mabuhat nga “makabarug nga malig-on” sa atong kinabuhi kon kita tintalon sa paghimo og dili maayo nga mga pagpili?
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Pangita og mga sundanan. Sa mga kasulatan makita nato ang mga sundanan nga nagpakita kon sa unsa nga paagi ang Ginoo mohimo sa iyang buhat. Unsa nga mga sundanan ang imong nakita sa 1 Mga Taga-Corinto 14 nga makatabang nato nga makasabut unsaon sa pagtudlo ug paghatag og kaayohan sa usag usa? Tan-awa usab sa DP 50:13–23.
Babaye, Nganong Nagahilak Ikaw? ni Simon Dewey