“Septyembre 9–15. 2 Mga Taga-Corinto 1–7: ‘Magpasig-uli Kamo ngadto sa Dios’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Septyembre 9–15. 2 Mga Taga-Corinto 1–7,” Dali, Sunod Kanako—Alang sa mga Indibidwal ug mga Pamilya: 2019
Septyembre 9–15
2 Mga Taga-Corinto 1–7
“Magpasig-uli Kamo ngadto sa Dios”
Samtang magtuon ka sa mga sulat ni Pablo ngadto sa mga taga-Corinto, isulat ang pipila sa mga baruganan sa ebanghelyo nga imong madiskobrehan ug magpalandong unsaon nimo sa paggamit niini sa imong kinabuhi.
Irekord ang Imong mga Impresyon
Usahay, ang pagkalider sa Simbahan nagpasabut nga mosulti og pipila ka lisud nga mga butang. Tinuod kini sa panahon ni Pablo sama karon. Klaro nga sa nag-unang sulat gikan ni Pablo ngadto sa mga Santos nga taga-Corinto naglakip kini og pagpanton ug dunay pagbati nga nasakitan. Sa sulat nga nahimong 2 Mga Taga-Corinto, naningkamot siya sa pagpasabut unsa ang nakaaghat niya sa iyang mahait nga mga pulong: “Kay kadto akong gisulat kaninyo gikan sa tuman nga kaguol ug kasakit sa kasingkasing , inubanan sa daghang mga luha, dili aron sa pagsakit kaninyo kon dili aron sa pagpahibalo kaninyo sa kadagaya sa akong gugma alang kaninyo” (2 Mga Taga-Corinto 2:4). Kon kamo makadawat og mga pulong sa pagkorihir gikan sa usa ka lider, makatabang gyud nga makahibalo nga kini dinasig tungod sa Kristohanon nga gugma. Ug bisan niadtong mga sitwasyon nga dili ingon niini, kon kita andam nga makita sa uban ang matang sa gugma nga gibati ni Pablo, mas sayon ang pagtubag sa angay nga paagi sa bisan unsa nga mga sayop. Sama sa gitambag ni Elder Jeffrey R. Holland, “Mao nga pagmapailubon kabahin sa tawhanon nga kahuyang—ang inyong kaugalingon ingon man usab niadtong nagserbisyo uban ninyo niini nga Simbahan gipangulohan sa mga boluntaryo, mortal nga mga lalaki ug babaye. Gawas lang sa Iyang bugtong hingpit nga Anak, ang dili hingpit nga mga tawo mao ang gikatambayayong sa Dios” (“Nagatuo Ako,” Liahona, Mayo 2013, 94).
Mga Ideya alang sa Personal nga Pagtuon sa Kasulatan
2 Mga Taga-Corinto 1:3–7; 4:6–10, 17–18; 7:4–7
Ang akong mga pagsulay mahimong usa ka panalangin.
Tungod sa kasakit nga giatubang ni Pablo sa iyang pangalagad, dili ikasurprisa nga misulat siya og daghan mahitungod sa mga katuyoan ug mga panalangin sa kasakit. Paghunahuna og mga paagi nga ang imong mga pagsulay mahimong panalangin samtang magbasa ka sa 2 Mga Taga-Corinto 1:3–7; 4:6–10, 17–18; and 7:4–7. Sama pananglit, mahimo kang mamalandong sa unsa nga paagi ang Dios “naglipay [kanimo] sa tanan [nimong] kasakit” ug sa unsa nga paagi nga ikaw, agig balus, “makahimo sa pagpalipay nga anaa sa bisan unsang kasakit” (2 Mga Taga-Corinto 1:4). O tingali makatutok ka sa kahayag ni Jesukristo nga “nagasidlak dinhi sa among kasingkasing,” bisan og ikaw “ginasakit” ug “nangalibog” (2 Mga Taga-Corinto 4:6–10).
Tan-awa usab sa Mosiah 24:13–17; Gospel Topics, “Adversity,” topics.lds.org.
Makadawat ko og mga panalangin ug mopanalangin sa uban kon ako mopasaylo.
Wala kita makaila kaayo mahitungod sa tawo nga gipasabut ni Pablo sa 2 Mga Taga-Corinto 2:5–11—nga nakalapas lamang siya (tan-awa sa mga bersikulo 5–6) ug nga si Pablo gusto nga ang mga Santos mopasaylo kaniya (tan-awa sa mga bersikulo 7–8). Ngano nga kita usahay mapakyas sa “pagpasig-uli sa [atong] gugma” ngadto sa usa ka tawo nga nakasilo kanato? (bersikulo 8). Sa unsa nga paagi nga ang pagdumili sa pagpasaylo makadaot sa uban ug sa atong kaugalingon? (tan-awa sa mga bersikulo 7, 10–11). Unsa ang kahulugan niini kanimo nga ang pagdumili sa pagpasaylo sa uban makahatag og kahigayunan ni “Satanas … nga makalupig kanato”? (bersikulo 11).
Tan-awa usab sa Doktrina ug mga Pakigsaad 64:9–11.
Pinaagi sa Pag-ula ni Jesukristo, ako mapasig-uli ngadto sa Dios.
Sama sa ubang mga tawo, si Pablo nasayud kon unsa nga mahimong “usa ka bag-o nang binuhat.” Siya nahimong usa ka tigpanggukod sa mga Kristiyano ngadto sa walay kahadok nga tigpanalipod ni Kristo. Nasayud siya sa iyang kaugalingon kon giunsa ni Jesus, kinsa “wala makasinati og sala,” makawagtang sa atong sala ug mohatag nato sa Iyang “pagkamatarung,” mopahiuli nato ngadto sa panaghiusa uban sa Dios. Samtang magbasa ka niini nga mga bersikulo, hunahunaa unsay gipasabut nga mapasig-uli ngadto sa laing tawo. Sa unsa nga paagi kini makatabang kanimo nga makasabut unsay gipasabut nga mapasig-uli ngadto sa Dios? Pamalandungi kon unsay nakabulag kanimo gikan sa Dios. Unsay imong gikinahanglan aron mas hingpit nga mapasig-uli uban Kaniya?
Tan-awa usab sa 2 Nephi 10:23–25.
Ang diosnong kasubo mosangpot ngadto sa paghinulsol.
Sa kasagaran wala kita maghunahuna sa kasubo nga usa ka maayong butang, apan si Pablo naghisgot sa “diosnon nga kasubo” isip kinahanglan nga bahin sa paghinulsol. Unsay imong makat-unan mahitungod sa diosnon nga kasubo gikan sa mosunod? 2 Mga Taga-Corinto 7:8–11; Alma 36:16–21; Mormon 2:11–15; ug Gospel Topics, “Repentance,” topics.lds.org. Kanus-a ka mibati og diosnon nga kasubo, ug unsay epekto niini sa imong kinabuhi?
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Aduna bay sakop sa imong pamilya nga mihangyo og usa ka tawo sa pagsulat og rekomendasyon alang kanila, sama sa pag-aplay og trabaho o eskwelahan? Hangyoa sila sa paghisgot niini nga kasinatian ug unsa ang gisulti sa sulat mahitungod kanila. Gitudlo ni Pablo nga ang mga kinabuhi sa mga Santos sama sa mga sulat sa rekomendasyon alang sa ebanghelyo gikan Mismo ni Kristo, “sinulat dili sa tinta, apan sa Espiritu sa Dios nga buhi.” Samtang magbasa kamo sa 2 Mga Taga-Corinto 3:1–3, hisguti kon sa unsa nga paagi nga atong mga ehemplo sama sa mga sulat sa rekomendasyon alang sa ebanghelyo nga “pagahibaloan ug pagabasahon sa tanang mga tawo.” Tingali ang matag sakop sa pamilya makasulat og sulat o “epistola” magpasabut kon sa unsa nga paagi nga ang laing sakop sa pamilya nahimong usa ka maayong ehemplo sa disipulo ni Jesukristo. Mahimong basahon nila ang ilang mga sulat ngadto sa pamilya ug ihatag kini ngadto sa sakop sa pamilya nga ilang gisulatan. Nganong importante nga masabtan nga ang atong kinabuhi mao ang “[mga] epistola ni Kristo”?
Unsay ipasabut sa “nagakinabuhi man pinaagi sa pagtuo, dili pinaagi sa atong makita”? Unsay atong gibuhat sa pagpakita nga kita nagtuo sa mga butang nga dili nato makita?
Ang imong pamilya makahunahuna ba—o makapangita—og mga ehemplo sa kinaiyahan sa mga butang nga miagi og talagsaong mga kausaban ug nahimong bag-o nga mga binuhat? (tan-awa ang mga litrato nga anaa niini nga outline). Unsa ang gitudlo niini nga mga ehemplo kanato mahitungod kon sa unsa nga paagi ang ebanghelyo ni Jesukristo makausab kanato?
Sumala niini nga mga bersikulo, unsa ang gipasabut nga mahimong “mga sulugoon sa Dios”?
Unsaon nato sa pagsunod ang tambag ni Pablo, “Panggula kamo gikan [sa pagkadili matarung], ug magpalain kamo,” samtang usab mahimong maayong mga ehemplo niadtong naglibut kaninyo?
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Ipaambit ang mga object lesson. Ang ubang mga konsepto sa ebanghelyo, sama sa Pag-ula, mahimong lisud nga masabtan. Ikonsiderar ang paggamit sa mga litrato o mga butang nga makatabang sa imong pamilya nga makasabut sa mga baruganan nga imong nadiskubrehan sa mga kasulatan.
Kon makabig kita ngadto sa ebanghelyo ni Kristo, ang atong kausaban talagsaon kaayo nga gihulagway kini ni Pablo nga nahimong “bag-o nang binuhat” (2 Mga Taga-Corinto 5:17).