“Septyembre 16–22. 2 Mga Taga-Corinto 8–13: ‘Ang Dios Nagahigugma sa Malipayong Maghahatag’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Septyembre 16–22. 2 Mga Taga-Corinto 8–13,” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019
Septyembre 16–22
2 Mga Taga-Corinto 8–13
“Ang Dios Nagahigugma sa Malipayong Maghahatag”
Ang pag-rekord og espirituhanong mga impresyon makatabang nimo nga makahinumdom unsay imong nakat-unan panahon sa pagtuon sa kasulatan. Mahimo nimong isulat sa usa ka study journal, maghimo og mga mubo nga sulat sa daplin sa imong mga kasulatan, modugang og mubo nga mga sulat sa imong Gospel Library app, o maghimo og audio recording sa imong mga hunahuna.
Irekord ang Imong mga Impresyon
Unsay imong buhaton kon ikaw nakadungog nga ang kongregasyon sa mga Santos sa laing dapit naglisud sa kakabus? Mao kini ang sitwasyon nga gihulagway ni Pablo ngadto sa mga Santos nga taga-Corinto sa 2 Mga Taga-Corinto 8–9. Naglaum siya sa pag-awhag sa mga Santos nga taga-Corinto sa pagdonar sa pipila sa ilang kabuhong ngadto sa mga Santos nga nanginahanglan. Apan labaw sa hangyo nga mga donasyon, ang mga pulong ni Pablo naglakip usab og talagsaong mga kamatuoran mahitungod sa paghatag: “Ang matag usa magahatag sumala sa pagbuot sa iyang kasingkasing, dili nga nagpanuko ni ingon pinugos, kay ang Dios nagahigugma sa malipayong maghahatag” (2 Mga Taga-Corinto 9:7). Sa atong panahon, may mga Santos pa gihapon sa tibuok kalibutan kinsa nagkinahanglan og tabang. Usahay ang labing maayo natong mahimo alang kanila mao ang pagpuasa ug modonar sa mga halad sa puasa. Sa ubang mga sitwasyon, ang atong paghatag mahimong direkta ug personal. Bisan unsa nga matang sa atong mga sakripisyo, mas maayo nga atong susihon ang atong mga tumong sa paghatag. Ang ato bang mga sakripisyo mga ekspresyon sa gugma? Human sa tanan, ang gugma mao ang makahimo sa tighatag nga malipayon.
Mga Ideya alang sa Personal nga Pagtuon sa Kasulatan
2 Mga Taga-Corinto 8:1–15; 9:5–15
Malipayon akong mopaambit unsay anaa nako sa pagpanalangin sa kabus ug timawa.
Adunay daghang mga tawo nga nagkinahanglan sa tibuok kalibutan. Sa unsa nga paagi kita posibling makahimo og kalainan? Si Elder Jeffrey R. Holland mitanyag niini nga tambag: “Datu o kabus, kita kinahanglang mohimo ‘kutob sa atong mahimo’ kon ang uban nanginahanglan [tan-awa sa Marcos14:6, 8]. … “[Ang Dios] motabang ug mogiya kaninyo sa inyong manggiloy-ong mga buhat sa pagkadisipulo kon mahunahunaon ug mainampoon ug mangita kamo og paagi sa pagsunod sa sugo nga balik-balik Niyang gihatag kanato” (“Dili Ba Kitang Tanan Makalilimos?” Liahona, Nob. 2014, 41).
Basaha ang 2 Mga Taga-Corinto 8:1–15; 9:6–15, magtimaan sa mga baruganan nga gitudlo ni Pablo mahitungod sa pag-atiman sa kabus ug sa timawa. Unsa ang nakadasig nimo mahitungod sa tambag ni Pablo? Mahimo kang mag-ampo sa giya mahitungod sa unsay imong mahimo sa pagpanalangin sa usa ka tawo nga nanginahanglan. Siguroha ang pag-rekord sa bisan unsa nga mga impresyon nga imong madawat ug buhata kini.
Tan-awa usab sa Mosiah 4:16–27; Alma 34:27–29; Henry B. Eyring, “Dili Ba Mao Kini ang Pagpuasa nga Akong Napili?” Liahona, Mayo 2015, 22–25; Linda K. Burton, “Nadumuluong Ako,” Liahona, Mayo 2016, 13–15.
Mga propeta nga mini nagtinguha sa paglimbong.
Tingali makatabang kanimo nga makasabut niini nga kapitulo nga makahibalo nga ang “mga apostoles nga mini” mitungha diha sa mga Santos nga taga-Corinto (2 Mga Taga-Corinto 11:13). Unsay inyong nakat-unan gikan sa mga bersikulo 13–15 mahitungod niadtong kinsa nagtudlo og mga doktrina nga mini? Unsay imong makat-unan mahitungod sa tinuod nga mga propeta samtang mobasa ka mahitungod sa mga kasinatian ni Pablo isip usa ka tigpangalagad ni Kristo? (tan-awa sa mga bersikulo 23–33).
2 Mga Taga-Corinto 11:3; 13:5–8
Kinahanglan nga akong “susihon” ang akong pagkamatinud-anon sa ebanghelyo ni Jesukristo.
Tungod kay karon adunay daghan kinsa nagtinguha sa paghisalaag nato “gikan sa pagkamahinalaron kang Kristo” (2 Mga Taga-Corinto 11:3), mahimo nimong dawaton ang pagdapit ni Pablo sa “pagsusi sa imong [kaugalingon], kon kamo nagapadayon ba sa pagtuo” (2 Mga Taga-Corinto 13:5). Pananglitan, mahimong mamalandong ka unsay imong wagtangon gikan sa imong kinabuhi nga makatabang nimo nga makatutok ni Kristo, o mahimo nimong kompletuhon ang “Kalihokan Kabahin sa Hiyas” sa Isangyaw ang Akong Ebanghelyo, pahina 152.
Unsa “ang ikatulong langit,” ug kinsa ang tawo nga “gisakgaw dala ngadto” niini?
Niini nga mga bersikulo, nagsulti si Pablo mahitungod sa iyang kaugalingon, nga walay direktang paghisgot sa iyang kaugalingon—tingali aron malikayan ang pagpanghambog sa iyang talagsaong panan-awon. Ang mga pulong “ang ikatulong langit” nagpasabut sa celestial nga gingharian (tan-awa sa DP 76:96–98).
Ang grasya sa Manluluwas igo na sa pagtabang nako nga makaangkon og kalig-on sa akong mga kahuyang.
Wala kita masayud kon unsa ang “tunok dinha sa lawas” ni Pablo, apan sayon nga masabtan ang tinguha nga makuha kini. Kitang tanan adunay mga hagit ug mga problema nga wala makita sa Ginoo nga angayan nga kuhaon gikan sa atong kinabuhi. Hunahunaa ang imong kaugalingong mga hagit samtang basahon nimo ang 2 Mga Taga-Corinto 12:5–10. Unsay gitudlo ni Pablo mahitungod sa kahuyang? Unsa ang gipasabut niini kanimo nga ang grasya sa Dios igo alang kanimo? Sa unsa nga paagi nimo nasinati ang makalig-on nga gahum sa Dios?
Tan-awa usab sa Mosiah 23:21–24; 24:10–15; Ether 12:27; Moroni 10:32–33.
Unsay gipasabut ni Pablo sa dihang namulong siya bahin sa “duha o tulo ka mga saksi”?
Sa mga panahon sa Daang Tugon, duha o tulo ka mga saksi ang gikinahanglan aron madala ang akusasyon batok sa usa ka tawo (tan-awa sa Deuteronomio 19:15). Gihisgutan ni Pablo kini sa dihang gipasabut niya ang iyang ikatulo nga pagbisita sa Corinto. Moderno nga mga ehemplo niini nga baruganan sa daghang mga saksi maglakip sa Tulo ka mga Saksi sa Basahon ni Mormon, sa mga pagpamatuod ni Jesukristo nga gihatag sa Biblia ug sa Basahon ni Mormon, ug sa gibuhat sa mga misyonaryo nga nagpamatuod pinaagi sa panagkuyog.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Unsa ang imong nakita niini nga mga kapitulo nga nakapadasig sa imong pamilya sa pagtabang sa kabus ug timawa? Tingali mao kini ang maayong panahon sa pagplano og buhat sa pagserbisyo isip pamilya alang sa usa ka tawo nga nanginahanglan.
Ang imo bang pamilya nakaila og usa ka tawo nga mahulagway nga “usa ka malipayong maghahatag”? Unsaon nato sa paghimo sa atong pagserbisyo ngadto sa uban nga mas malipayon?
Unsaon nimo sa pagtudlo ang imong pamilya mahitungod sa “pakiggubat” batok sa pagkadautan? Ang imo bang pamilya ganahan nga magtukod og paril o kota gamit ang mga lingkuranan ug mga habol? Mosangpot kini ngadto sa panaghisgutan mahitungod unsaon sa pagsalikway sa mga butang nga mopahilayo nato gikan sa Dios ug “[pagdala] nga ginabihag namo ang tanang panghunahuna aron kini magmasinugtanon kang Kristo.” Unsa ang espirituhanong “mga hinagiban” nga atong magamit sa pagkontrol sa atong mga hunahuna? (tan-awa sa Mga Taga-Efeso 6:11–18).
Unsay mahimo sa imong pamilya sa pagtutok pa “sa pagkamahinalaron ni Kristo”?
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Irekord ang mga impresyon. Elder Richard G. Scott mitudlo, ‘Ang kahibalo nga mainampingon nga girekord maoy usa ka kahibalo nga magamit sa panahon sa panginahanglan. … Ang [pagrekord sa espirituhanong direksyon] nagpalambo sa kalagmitan sa inyong pagdawat og dugang nga kahayag” (“Acquiring Spiritual Knowledge,” Ensign, Nob. 1993, 88; tan-awa usab sa Pagtudlo sumala sa Pamaagi sa Manluluwas, 12, 30).
“Ang matag usa magahatag sumala sa pagbuot sa iyang kasingkasing, dili nga magapanuko ni ingon nga pinugos, kay ang Dios nagahigugma sa malipayong maghahatag” (2 Mga Taga-Corinto 9:7).