“Septyembre 23–29. Mga Galacia: ‘Panaggawi Kamo diha sa Espiritu,” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Septyembre 23–29. Mga Taga-Galacia,” Dali, Sunod Kanako—Alang sa mga Indibidwal ug sa mga Pamilya: 2019
Septyembre 23–29
Mga Taga-Galacia
“Panaggawi Kamo diha sa Espiritu”
Samtang magbasa ka sa Mga Taga-Galacia, irekord ang mga impresyon nga imong madawat. Ang pagbuhat sa ingon makatabang nimo sa paghinumdom ug pagpamalandong niini sa umaabut.
Irekord ang Imong mga Impresyon
Ang ebanghelyo ni Jesukristo nagtanyag og kagawasan gikan sa espirituhanong pagkaulipon. Apan usahay ang mga tawo kinsa nakasinati sa kagawasan sa ebanghelyo mopahilayo gikan niini ug “buot magpaulipon kanila pag-usab” (Mga Taga-Galacia 4:9). Mao kini ang gibuhat sa pipila ka mga Santos nga taga-Galacia—mipahilayo sila gikan sa gitanyag ni Kristo kanila nga kagawasan (tan-awa sa Mga Galacia 1:6). Ang Sulat [Epistola] ni Pablo ngadto sa mga Taga-Galacia, kaniadto mao ang dinalian nga tawag sa pagbalik ngadto “sa kagawasan kita gipahigawas ni Kristo” (Mga Taga-Galacia 5:1). Kini nga tawag kinahanglan usab nga atong paminawon ug patalinghugan samtang mausab ang mga sirkumstansya, ang pakigbisog tali sa kagawasan ug pagkaulipon kanunay. Sama sa gitudlo ni Pablo, dili igo nga “gipangtawag ngadto sa kagawasan” (Mga Taga-Galacia 5:13); kinahanglan usab nga “managbarug nga malig-on” diha niini (Mga Taga-Galacia 5:1) pinaagi sa pagsalig ni Kristo.
Mga Ideya alang sa Personal nga Pagtuon sa Kasulatan
Ang balaod ni Kristo makahimo nako nga gawasnon.
Misulat si Pablo ngadto sa mga Santos nga taga-Galacia sa dihang iyang nahibaloan nga nahisalaag sila sa mga pagtulun-an nga mini. Usa niini nga mga pagtulun-an mao nga aron maluwas, ang mga Hentil nga midawat sa ebanghelyo kinahanglan nga magpasirkunsisyon ug magtuman sa ubang mga tradisyon sa balaod ni Moises. Gitawag ni Pablo kini nga mga tradisyon nga “ang yugo sa pagkaulipon” (Mga Taga-Galacia 5:1) tungod kay kini nakapugong sa mga Santos sa pagsunod sa hingpit sa balaod ni Kristo, nga nagdala og tinuod nga kagawasan. Unsa ang imong nakita sa tambag ni Pablo ngadto sa mga taga-Galacia nga makatabang nimo nga makasabut unsa ang tinuod nga kagawasan? Makapamalandong usab ikaw unsa nga mga yugo sa pagkaulipon ang anaa sa imong kinabuhi. Aduna bay butang nga nakapugong nimo sa pagsinati sa kagawasan nga gitanyag sa ebanghelyo? Sa unsa nga paagi si Kristo ug ang Iyang ebanghelyo “nakahimo [nimo] nga gawasnon”? (Mga Taga-Galacia 5:1).
Tan-awa usab sa 2 Nephi 2:27; 9:10–12.
Manununod ako sa mga panalangin nga gisaad ngadto ni Abraham.
Ang pipila sa mga Santos nga taga-Galacia nabalaka nga tungod kay sila dili literal nga mga kagikan (“kaliwat”) ni Abraham, dili sila makadawat sa mga panalangin nga gisaad ngadto ni Abraham, lakip na sa kahimayaan. Sumala sa Mga Taga-Galacia 3:7–9, 13–14, 27–29, unsa ang makakwalipay sa usa ka tawo nga mahimong “kaliwat ni Abraham”? Aron makahibalo mahitungod sa mga panalangin nga gisaad ngadto ni Abraham ug sa mga panalangin nga atong mapanunod isip iyang kaliwat, tan-awa sa Giya ngadto sa mga Kasulatan, “Abraham, pakigsaad ni,” ug “Pakigsaad Sama Kang Abrahamic,” Gospel Topics, topics.lds.org.
Aduna ba si Abraham sa ebanghelyo ni Jesukristo?
Si Propeta Joseph Smith mipasabut: “Dili kita makatuo nga ang mga kakaraanan sa tanang panahon ignorante kaayo sa sistema sa langit sumala sa pagtuo sa kadaghanan, tungod kay ang tanan nga naluwas, naluwas pinaagi sa gahum niining mahinungdanong plano sa katubsanan, ingon man usab sa wala pa ang pag-anhi ni Kristo. … Si Abraham mihalad og sakripisyo, ug bisan pa niini, ang Ebanghelyo gisangyaw ngadto kaniya” (“The Elders of the Church in Kirtland to Their Brethren Abroad,” The Evening and the Morning Star, Mar. 1834, 143, josephsmithpapers.org). Ang mosunod nga mga kasulatan nagpakita usab nga ang ebanghelyo ni Jesukristo gisangyaw sa wala pa ang mortal nga pangalagad sa Manluluwas: Helaman 8:13–20; Moises 6:50–66.
Mga Taga-Galacia 5:13–26; 6:7–10
Kon ako “managgawi sa Espiritu,” makadawat ako sa “bunga sa Espiritu.”
Ang pagtuon niini nga mga bersikulo makatabang kanimo sa pagtimbang-timbang kon unsa ka hingpit ikaw managgawi sa Espiritu. Nagsinati ba ikaw sa bunga sa Espiritu nga gihisgutan sa mga bersikulo 22–23? Unsa ang ubang bunga, o mga resulta, sa espirituhanong pagpuyo ang imong namatikdan? Palandunga unsay imong gikinahanglan nga buhaton sa pag-ugmad sa hingpit niini nga bunga. Sa unsa nga paagi nga ang pag-ugmad niini nga bunga makapalambo sa importante nga mga relasyon sa imong kinabuhi?
Kinahanglan nga magtinguha ko sa “bunga sa Espiritu” sa akong kinabuhi.
Tingali ikaw naningkamot sa panaggawi sa Espiritu, apan ingon og ang imong mga paningkamot wala mamunga sa gisaad nga bunga. Basaha ang Mga Taga-Galacia 6:7–10 (sa kasagaran gipasabut nga ang balaod sa ani). Unsa nga mensahe ang imong gibati nga giandam sa Ginoo alang nimo niini nga mga bersikulo? Unsaon nimo sa paggamit niini nga mga bersikulo sa pag-awhag og usa ka tawo kinsa naningkamot sa pagtuman sa ebanghelyo?
Tan-awa usab sa Alma 32:28, 41–43; Doktrina ug mga Pakigsaad 64:32–34.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Unsay gipasabut sa “mabuhi pinaagi sa pagtuo”? Unsa ang gibuhat sa imong pamilya sa pagpakita nga ikaw mabuhi pinaagi sa pagtuo?
Mahimo nimong ipaila ang Mga Taga-Galacia 4 pinaagi sa paghisgot sa mga kalainan tali sa mga sulugoon sa hari ug sa iyang mga anak. Unsa nga mga oportunidad o potensyal ang anaa sa anak sa hari nga wala sa usa ka sulugoon? Hunahunaa kini samtang magbasa ka sa mga bersikulo 1–7. Unsa ang gitudlo niini nga mga bersikulo mahitungod sa atong relasyon sa Langitnong Amahan?
Sa pagdugang og kalingawan sa inyong panaghisgutan sa Mga Taga-Galacia 5:22–23, ang imong pamilya mobutang og mga pulong sa lain-laing mga bunga nga gigamit ni Pablo sa paghulagway sa “bunga sa Espiritu.” Dayon ang matag sakop sa pamilya makapili og usa, mohatag og kahulugan niini, ug maghisgot mahitungod sa usa ka tawo kinsa nagpakita og maayong ehemplo niana nga bunga. Makagiya kini ngadto sa usa ka panaghisgutan mahitungod sa mga paagi nga ang imong pamilya makadapit sa Espiritu nganha sa imong pamilya ug makaugmad niini nga bunga. Human sa panaghisgutan, mahimo kamong mangaon og fruit salad.
Tingali adunay mga panahon nga usa ka tawo sa imong pamilya “mahilig ngadto sa kalapasan.” Unsa nga tambag ang imong nakita sa Mga Taga-Galacia 6:1 mahitungod sa unsay buhaton sa maong sitwasyon?
Kon ang imong pamilya adunay natanom, mahimo nimong gamiton kana nga kasinatian sa paghulagway sa baruganan “kay bisan unsay igapugas sa tawo, mao usab kana ang iyang pagaanihon” (bersikulo 7). O mahimo kang mangutana sa mga sakop sa pamilya mahitungod sa ilang paborito nga mga bunga o mga utanon ug maghisgot unsay buhaton aron motubo ang tanom nga makahatag niana nga pagkaon. (Mahimong gamiton nimo ang litrato nga anaa niini nga outline isip visual aid.) Dayon mahisgutan ninyo ang mahitungod sa mga panalangin nga gilauman sa imong pamilya nga madawat ug unsaon sa “pag-ani” niadto nga mga panalangin.
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Tabangi ang imong pamilya nga ipahisama ang mga kasulatan ngadto sa ilang kaugalingon. Si Nephi miingon, “Kay ako mipahisama sa tanan nga mga kasulatan ngari kanato, nga kini unta mahimo alang sa atong kaayohan ug sa atong pagkat-on” (1 Nephi 19:23). Aron matabangan ang imong pamilya sa pagbuhat niini, mahimong dapiton nimo sila sa pagpamalandong sa mga panahon sa dihang nakasinati sila sa bunga sa Espiritu nga gihulagway sa Mga Taga-Galacia 5:22–23. (Tan-awa sa Pagtudlo sumala sa Pamaagi sa Manluluwas, 21.)
Gitudlo ni Pablo nga kon kita managgawi sa Espiritu, makasinati kita sa bunga sa Espiritu sa atong kinabuhi.