2–8 Sepitema

1 Kolinitō 14–16

“ʻOku ʻIkai Mei He ʻOtuá ʻa e Maveuveú, ka ko e Melinó”

ʻI hoʻo lau e 1 Kolinitō 14–16, ʻe tokoniʻi koe ʻe he Laumālie Māʻoniʻoní ke ke ʻiloʻi e meʻa ke akoʻi ki he fānau ʻi ho kalasí. Toe vakaiʻi e fokotuʻutuʻu ko ʻení ki ha ngaahi fakakaukau kehe.

Lekooti e Ngaahi Ongo ʻOkú ke Maʻú

Fakaafeʻi Ke Vahevahe

Te ke lava ʻo kamataʻaki e lēsoni ʻi he uike ní ʻaki hono lau leʻo lahi e 1 Kolinitō 14:26. Fakamahinoʻi ange ko e taimi ʻoku tau fakataha mai ai ʻi he lotú, te tau lava ʻo fakamaama (pe langa hake mo tokoni) ki he niʻihi kehé ʻi he taimi ʻoku tau vahevahe aí. Ko e hā ʻe lava ʻe he fānaú ʻo vahevahe ke fakamaama ai ha taha ʻi he kalasí he ʻahó ni.

Akoʻi e Tokāteliné

Fānau Iiki Angé

1 Kolinitō 15:12–22

Te u lava ʻo nofo mo e Tamai Hēvaní hili ʻeku maté koeʻuhi naʻe toetuʻu ʻa Sīsū Kalaisi.

Te ke lava fēfē ʻo akoʻi ki he fānau ʻi ho kalasí ʻa e lava ke tau toe moʻui koeʻuhí naʻe toetuʻu ʻa Sīsū Kalaisi?

Ngaahi ʻEkitivitī ʻe Ala Fakahokó

• Toutou lau ʻa e kupuʻi lea ko ʻení fakataha mo e fānaú: “ʻE moʻui kotoa pē ʻia Kalaisi” (1 Kolinitō 15:22). Fakaʻaliʻali ha fakatātā ʻo Sīsū hili ʻene toetuʻú (vakai fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Fakamatalaʻi ange, te tau mate kotoa ha ʻaho, ka koeʻuhi naʻe toetuʻu ʻa Sīsū Kalaisi, te tau toe foki ʻo moʻui hili ʻetau maté.

• Fakaʻaongaʻi ha lesoni ʻoku fakaʻaongaʻi ai ha faʻahinga meʻa hangē ko ʻení, ke akoʻi kau ki he Toetuʻú: Fakaʻaliʻali ki he fānaú ha sāketi, ʻa ia ʻokú ne fakafofongaʻi hotau ngaahi sinó. ʻI he taimi ʻoku tau moʻui aí, ʻoku ʻi hotau ngaahi sinó ʻa hotau ngaahi laumālié, pea lava ke ngāue ʻa hotau ngaahi sinó (tui ʻa e sāketí). ʻI he taimi ʻoku tau mate aí, ʻoku mavahe leva ʻa hotau ngaahi laumālié mei hotau ngaahi sinó, pea ʻikai ke lava hotau ngaahi sinó ʻo ngaue (toʻo e sāketí pea hili ia ʻi ha tēpile pe sea ke ne fakafofongaʻi ha sino ʻoku ʻikai ai ha laumālie). ʻI he taimi ʻoku tau toetuʻu aí, ʻoku foki leva hotau ngaahi laumālié ki hotau ngaahi sinó (toe tui ʻa e sāketí), pea ʻikai ʻaupito te na toe māvahevahe. Tuku ki he fānaú ke nau taufetongi ʻi hono tui mo vete ʻo e sāketí lolotonga hono fakamatalaʻi ʻe ha taha ʻi he fānaú, ʻa e meʻa ʻe hoko ʻi he taimi te tau toetuʻu aí.

1 Kolinitō 15:29

ʻE lava ke u papitaiso maʻá e kakai kuo pekiá.

ʻE lava ke teuteu he taimí ni e fānau ʻokú ke akoʻí, ke nau ʻalu ki he temipalé pea papitaiso maʻá e kakai kuo pekiá, ʻi he hoko honau taʻu 12. Naʻe lave ʻa Paula ki he tokāteline mahuʻinga ko ʻení ʻi heʻene tohi ki he kakai Kolinitoó.

Ngaahi ʻEkitivitī ʻe Ala Fakahokó

• Tokoniʻi e fānaú ke nau fakakaukauʻi ha ngaahi meʻa ʻoku ʻikai te nau lava ʻo fai maʻanautolu (hangē ko hono hiki ha meʻa ʻoku mamafa pe feinga ki ha meʻa ʻi ha funga laupapa māʻolunga). Ko hai ʻokú ne tokoniʻi kinautolu ke nau fai e ngaahi meʻá ni? Fakaʻaliʻali ha fakatātā ʻo e taha ʻo hoʻo ngaahi kui naʻe pekia kuo teʻeki ai ke papitaisó. Talanoa ki he fānaú ʻo kau ki he tokotaha ko ʻení, pea fakamatalaʻi ange ʻe ʻikai lava ke papitaiso ʻa e tokotahá ni taʻemaʻu ha tokoni mei ha tokotaha ʻi he māmaní.

• ʻEke ki he fānaú pe ʻoku ʻi ai nai ha mēmipa honau fāmilí kuo ʻalu ki he temipalé ke fakahoko ʻa e papitaiso maʻá e kau pekiá. Fakaʻaliʻali ange ha ngaahi fakatātā ʻo ha faiʻanga papitaiso ʻi he temipalé. ʻOku ʻiloʻi nai ʻe he fānaú e meʻa ʻoku fakahoko ʻi hení? Fakamatalaʻi ange, ʻe lava ke tau papitaiso ʻi he temipalé maʻá e kakai kuo pekia ne teʻeki papitaisó. Pea ʻe lava ke fili ʻe he kakai ko iá pe te nau tali ʻa e papitaisó.

1 Kolinitō 15:40–41

ʻOku finangalo ʻe he Tamai Hēvaní ke u nofo mo Ia ʻi he puleʻanga fakasilesitialé.

Te ke lava fēfē ʻo akoʻi e fānaú kau ki he ngaahi puleʻanga fakasilesitialé, fakatelesitialé mo e fakatilesitialé? ʻE lava ke tokoni ʻa e ngaahi ʻekitivitī ko ʻení.

Ngaahi ʻEkitivitī ʻe Ala Fakahokó

• Hiki ʻi he palakipoé e silesitiale, telesitiale, mo e tilesitiale. Tokoniʻi e fānaú ke nau ako ke leaʻaki e ngaahi foʻi lea ko ʻení.

• Fakaʻaliʻali ha ngaahi fakatātā ʻo e laʻaá, māhiná, mo e ngaahi fetuʻú. Ko e fē ʻoku lahi taha ʻene uló? Lau e 1 Kolinitō 15:40–41 ki he fānaú (vakai foki Liliu ʻa Siosefa Sāmitá, 1 Kolinitō 15:40, futinoutia). Fakamatalaʻi ange ʻoku fakafofongaʻi ʻe he laʻaá, māhiná, mo e ngaahi fetuʻú ʻa e ngaahi puleʻanga te tau lava ʻo nofo ai hili ʻetau toetuʻú. ʻI he puleʻanga fakasilesitialé, te tau lava ʻo nofo ai mo ʻetau Tamai Hēvaní.

• Tā ʻa e laʻaá ʻi he palakipoé pea tuku ha fanga kiʻi laʻi pepa iiki, pe ko ha ngaahi sitepu ʻi he falikí ʻo fakatau ki he laʻaá. ʻE lava ke fakafofongaʻi ʻe he pepá ha meʻa ʻoku fie maʻu ke tau fai ke tau hū ai ki he puleʻanga fakasilesitialé (vakai T&F 76:50–53). Tuku ki he fānaú ke nau vahevahe ha ngaahi fakakaukau mo laka ʻi he ngaahi sitepú ki he puleʻanga fakasilesitialé.

Naʻe fakahoa ʻe Paula ʻa e nāunau fakasilesitialé ki he laʻaá.

Akoʻi e Tokāteliné

Fānau Lalahi Angé

1 Kolinitō 15:12–22

Koeʻuhi ko Sīsū Kalaisi mo ʻEne Toetuʻú, te u toetuʻu ai.

ʻOku mahino nai ki he fānau ʻokú ke akoʻí ʻa e mahuʻinga ʻo e Toetuʻu ʻa Sīsū Kalaisí? ʻE ala tokoni e ngaahi fakakaukau ko ʻení.

Ngaahi ʻEkitivitī ʻe Ala Fakahokó

• Fakaafeʻi e fānaú ke nau taufetongi hono lau e ngaahi veesi ʻi he 1 Kolinitō 15:12–22, ʻo fekumi ki ha ngaahi tali ki he fehuʻi “Ko e hā ne mei hoko kapau naʻe ʻikai ha Toetuʻu?”

• Fakaafeʻi e fānaú ke nau fakatātaaʻi e founga ke fakamatalaʻi ai e toetuʻú ki ha taha. Ki ha ngaahi fakakaukau, vakai ki he pōpoaki ʻa Thomas S. Monson ko e “Mrs. Patton—the Story Continues” (Ensign pe Liahona, Nōvema 2007, 21–24). Vakai foki e vitiō “Until We Meet Again” (LDS.org). Vahevahe hoʻo fakamoʻoni ki he Toetuʻu ʻa Kalaisí.

1 Kolinitō 15:12–13, 20–22, 29

Te u lava ʻo teuteu ke u hū ki he temipalé ke papitaiso maʻá e kau pekiá.

ʻI he taimi ʻoku hokosia ai e taʻu 12 e fānaú, te nau lava ʻo maʻu ha lekomeni temipale mo fakahoko ʻa e papitaiso maʻá e kau pekiá ʻi he temipalé. Te ke lava fēfē ʻo tokoniʻi kinautolu ke nau teuteú?

Ngaahi ʻEkitivitī ʻe Ala Fakahokó

• Lau e 1 Kolinitō 15:29. Ko e hā e ngaahi meʻa ne fai ʻe he Kāingalotu ʻi he kuonga ʻo Paulá ʻa ia ʻoku tau toe fai ʻi he kuongá ni?

• Fehuʻi ki he fānaú pe ko e hā e ʻuhinga ʻoku tau papitaiso ai maʻá e kau pekiá. Kapau ʻe fie maʻu, fakamatalaʻi ange ko e tokolahi ʻetau ngaahi kuí naʻe ʻikai ke nau maʻu ha faingamālie ke nau papitaiso mo hilifakinima lolotonga e moʻuí ni. ʻI he temipalé, te tau lava ʻo papitaiso mo hilifakinima maʻanautolu.

• ʻI ha ngaahi ʻaho kimuʻa ʻi he kalasí, kole ki ha mātuʻa ʻo ha taha ʻi he fānaú, ke haʻu mateuteu ke vahevahe ʻenau ʻakau fakafāmilí, pe fai ha talanoa kau ki ha taha ʻo e ngaahi kuí. Te ke lava foki ʻo vahevahe kau ki hoʻo ngaahi kui ʻaʻaú.

• Fakaafeʻi ha mēmipa ʻo e kau pīsopelikí ke vahevahe ha ngaahi meʻa ʻe lava ʻe he fānaú ʻo fai ke nau taau ai ke hū ki he temipalé. Fehuʻi ki he fānaú pe ko e hā te nau lava ʻo fai ke nau manatuʻi ai ke fai e ngaahi meʻá ni. Tohi ʻa e ngaahi fakakaukaú ʻi he palakipoé. Fakaafeʻi kinautolu ke fokotuʻu ha taumuʻa ke ʻalu ki he temipalé ha ʻaho.

1 Kolinitō 15:40–41

Hili ʻeku toetuʻú, te u lava ʻo nofo he puleʻanga fakasilesitialé.

Naʻe lave ʻa Paula ki he ngaahi nāunau ʻe tolú: selesitialé, telesitialé, mo e tilesitialé, ke akoʻi e kakai Kolinitoó kau ki he ngaahi sino te tau maʻu ʻi he Toetuʻú.

Ngaahi ʻEkitivitī ʻe Ala Fakahokó

• Lau e 1 Kolinitō 15:40–41 pea fakaafeʻi ha taha ʻi he fānaú ke ne tā ha laʻā, māhina, mo ha fetuʻu ʻi he palakipoé. Kole ki ha kau mēmipa ʻi he kalasí ke nau feinga ke ʻiloʻi ko e faʻahinga sino toetuʻu fē ʻoku fakafofongaʻi ʻe he ngaahi fakatātā takitaha.

• Hivaʻi fakataha ha hiva kau ki he ngaahi temipalé, hangē ko e “Ko Hoku Temipale Mei he ʻEikí” (Tohi Hiva ʻa e Fānaú, 73). Ko e hā ʻoku akoʻi mai ʻe he hivá ni kiate kitautolu kau ki he teuteu ke nofo ʻi he nāunau fakasilesitialé?

• Fakamatalaʻi ange naʻe mata-meʻa-hā-mai ʻa Siosefa Sāmita ʻa ia naʻe mamata ai ki ha ngaahi puleʻanga ʻe tolu ʻa ia naʻe tatau mo e faʻahinga ʻo e ngaahi sino ne fakamatalaʻi ʻe Paulá. Tokoniʻi e fānaú ke nau fekumi ki he ngaahi kupuʻi lea ʻi he Tokāteline mo e Ngaahi Fuakava 76:50–53, 70; 76:71–79; 76:81–82 ʻokú ne fakamatalaʻi e ngaahi puleʻanga ʻe tolu ko ʻení.

Poupouʻi e Ako ʻi ʻApí

Fakaafeʻi e fānaú ke nau kole ki heʻenau ngaahi mātuʻá ke nau talanoa kau ki he taha ʻo ʻenau ngaahi kuí. Te nau lava ʻo vahevahe e talanoá mo e kalasí ʻi he uike kahaʻú.

Fakatupulaki ʻEtau Akoʻí

Poupouʻi e fānaú ke nau fai ha ngaahi fehuʻi. Feinga ke ke ʻiloʻi e ngaahi fehuʻi [e fānaú] ko ha ngaahi faingamālie ia kae ʻikai ko ha fakahohaʻa pe fakatuta ki hoʻo lēsoní. … ʻOku ʻoatu ʻe he faʻahinga fehuʻi peheé ha ʻilo mahuʻinga kiate koe, ki he meʻa ʻoku fakakaukau mo tokanga ki ai e fānaú, pea mo e anga ʻenau tali e meʻa ʻoku nau akó. Tokoni ke nau ʻilo ʻe lava ke maʻu e ngaahi tali ki heʻenau ngaahi fehuʻí mei he folofolá mo e ngaahi lea ʻa e kau palōfita moʻuí” (Faiako ʻi he Founga ʻa e Fakamoʻuí, 25–26).