16–22 Sepitema

2 Kolinitō 8–13

“ʻOku ʻOfa ʻa e ʻOtuá ki ha Foaki Fiefia”

ʻE ʻomi ʻe hoʻo fakakaukau kiate kinautolu lolotonga hoʻo ako ʻi he faʻa lotu ʻa e 2 Kolinitō 8–13, ʻa hoʻo ngaahi fakakaukau lelei taha ki hono akoʻi e fānau ʻi ho kalasí. ʻE lava ke maʻu ha toe ngaahi fakakaukau fakafaiako kehe ʻi he fokotuʻutuʻu ko ʻení.

Lekooti e Ngaahi Ongo ʻOkú ke Maʻú

Fakaafeʻi Ke Vahevahe

Ko e founga lelei ʻe taha ke fakaafeʻi e fānaú ke nau vahevahé, ko hono fakamanatu kiate kinautolu ha meʻa naʻá ke fakaafeʻi kinautolu ke nau fai lolotonga ha lēsoni kimuʻa. Kole ange ke nau vahevahe ʻenau ngaahi aʻusiá.

Akoʻi e Tokāteliné

Fānau Iiki Angé

2 Kolinitō 9:6–7

Te u lava ʻo foaki fiefia ki he niʻihi ʻoku faingataʻaʻiá.

ʻOku lelei maʻu pē ke tokoni ki he niʻihi kehé, ka ʻoku toe lelei ange ke tokoni fiefia. Fakakaukau ki ha meʻa te ne ueʻi fakalaumālie e fānaú kotoa ke nau hoko ko ha taha “foaki fiefia.”

Ngaahi ʻEkitivitī ʻe Ala Fakahokó

• Fakaafeʻi e fānaú ke nau toutou leaʻaki e kupuʻi lea “ʻOku ʻofa ʻa e ʻOtuá ki ha foaki fiefia” (2 Kolinitō 9:7). Ko e hā e ʻuhinga ʻo e hoko ko ha taha “foaki fiefia”? Fakaʻaliʻali ha fakatātā ʻo ha fofonga fiefia mo ha fofonga mamahi, pea fehuʻi ki he fānaú pe ko e fē e taha ʻoku ngalingali ko ha taha foaki fiefia.

• Hiva tuʻo lahi fakataha ha hiva fekauʻaki mo e ngāue tokoní, hangē ko e “ʻI heʻetau Tokoní” (Tohi Hiva ʻa e Fānaú, 108). ʻI hono ʻuluaki hivaʻí, kole ki he fānaú ke nau hivaʻi fiefia ia; pea kole ange leva ke nau hivaʻi ʻaki ha ngaahi ongo kehekehe pe ngaahi toʻonga, hangē ko e loto-mamahí, ongosiá, loto-ʻitá, pe ilifia. Fakamanatu ki he fānaú ʻoku finangalo e Tamai Hēvaní ke tau tokoni fiefia ki he niʻihi kehé. Toe hivaʻi fiefia leva ʻa e foʻi hivá.

• ʻOange ki he fānaú ha ngaahi fakatātā ʻo ha ngaahi fofonga malimali. Kole ange ke nau puke ki ʻolunga ʻenau ngaahi fakatātaá ʻi he taimi ʻoku nau fanongo ai ki he ongo foʻi lea malimali pe katakata ʻi heʻenau hivaʻi e “Malimali” (Tohi Hiva ʻa e Fānaú, 128). ʻE lava ke nau fai e meʻa tatau ʻaki e ngaahi fakatātā ʻo ha fofonga loto-mamahi mo e foʻi lea fakafulofulá. Talaange ki he fānaú, ʻoku ʻikai fiefia ha fofonga fakafulofula; ko e founga ʻe taha ke tau fiefia mo tokoniʻi e niʻihi kehé, ko ʻetau malimali mo tokoniʻi e niʻihi kehé ke nau malimali.

• Palani ha ʻekitivitī fakakalasi ke tokoniʻi ha taha, hangē ko ha taha ʻoku ʻikai kau mai ki he Palaimelí pe ko ha mēmipa ʻo e uōtí pe kaungāʻapi ʻoku faingataʻaʻia. Te ke ala palani ke ʻaʻahi ki he ʻapi ʻo e tokotahá ni, fai ha fanga kiʻi tohi ʻofa pe tā ha ngaahi fakatātā, pe ngaohi ha kiʻi kai maʻamaʻa ke vahevahe.

• Fakaafeʻi e fānau takitaha ke palani ha ngāue tokoni fakafiefia ki ha mēmipa ʻo hono fāmilí. Lolotonga e kalasi ʻi he uike kahaʻú, kole ange ke nau vahevahe e meʻa ne nau faí.

2 Kolinitō 12:7–10

ʻOku tali maʻu pē ʻe he Tamai Hēvaní ʻetau ngaahi lotú, ka ʻoku ʻikai ke Ne ʻomi maʻu pē kiate au ʻa e meʻa ʻoku ou kolé.

ʻOku akoʻi mai kiate kitautolu ʻe he aʻusia ko ia ʻa Paula ʻi heʻene lotua ke toʻo ʻa ʻene “tolounua ʻi he kakanó,” ʻoku fakahaaʻi mai ʻe he ʻOtuá he taimi ʻe niʻihi ʻa ʻEne ʻofa ʻiate kitautolú, ʻaki hono ʻikai ʻomi kiate kitautolu e meʻa ʻoku tau fie maʻú.

Ngaahi ʻEkitivitī ʻe Ala Fakahokó

• Fakaʻaliʻali ki he fānaú ha ʻakau ʻoku talatala (pe ko ha fakatātā). Tokoniʻi kinautolu ke nau fakakaukau ki he ongo te nau maʻu kapau ne ʻi ai ha tala naʻe pipiki ʻi honau kilí ʻo fuoloa. Fakamatala fakanounouʻi e 2 Kolinitō 12:7–10 ki he fānaú, ʻo fakaʻaongaʻi ha ngaahi lea ʻe mahino kiate kinautolu. Fakamatalaʻi ange ko ha faingataʻa e “tolounua ʻi he kakano” ʻa Paulá, ʻo hangē ha vaivai fakatuʻasinó. Neongo naʻe kole ʻe Paula ki he ʻOtuá ke ne toʻo ʻa e faingataʻá, ka naʻe ʻikai fai ia ʻe he ʻOtuá. Ka naʻe akoʻi ʻe he ʻOtuá kia Paula, ʻoku tokoniʻi kitautolu ʻe he ngaahi faingataʻá ke tau ako ke anga fakatōkilalo mo falala kiate Ia. ʻOku lava leva ke ngaohi kitautolu ʻe he ʻOtuá ke tau mālohi.

• Fakamoʻoniʻi ʻoku ʻafioʻi ʻe he Tamai Hēvaní ʻa e meʻa ʻoku lelei taha maʻatautolú, pea te Ne ʻomi kiate kitautolu e meʻa ʻoku tau fie maʻú, neongo kapau ʻoku kehe ia mei he meʻa ʻoku tau fakakaukau ʻoku tau fie maʻú. Te ke lava foki ʻo vahevahe ha aʻusia ʻi ha taimi naʻe tali mai ai hoʻo lotú ʻi ha founga pe ko ha taimi naʻe kehe mei he meʻa naʻá ke ʻamanaki atu ki aí. ʻE lava ke tokoni foki ʻa e talanoa “Don’t Forget to Pray for Erik” (Friend, Jan. 2017, 36–37) can also help.

• Hivaʻi fakataha mo e fānaú ha hiva fekauʻaki mo e ʻofa ʻa e Tamai Hēvaní, hangē ko e “Lotu ʻa ha Kiʻi Tamasiʻi” (Tohi Hiva ʻa e Fānaú, 6–7). Fehuʻi ki he fānaú pe ko e hā te nau leaʻaki ki ha taha ʻoku fifili pe ʻoku fanongoa mo tali nai ʻe he Tamai Hēvaní ʻa e ngaahi lotú. Toe hivaʻi ʻa e hivá, pea fakamahino ange ʻa e ngaahi laine ʻokú ne fakamatalaʻi e ongoʻi ʻa e Tamai Hēvaní ʻo kau kiate kitautolú.

Akoʻi e Tokāteliné

Fānau Lalahi Angé

2 Kolinitō 9:6–9

Te u lava ʻo foaki fiefia ki he niʻihi ʻoku faingataʻaʻiá.

Naʻe fie maʻu ʻe Paula ke ne ueʻi fakalaumālie e kau Māʻoniʻoní ke foaki ʻenau koloa lahí ke tokoniʻi e masivá. Te ke fakaʻaongaʻi fēfē ʻene ngaahi leá ke ueʻi fakalaumālie ʻaki e fānaú ke nau tokoni ki he niʻihi kehé?

Ngaahi ʻEkitivitī ʻe Ala Fakahokó

• Hiki e lea ʻo e 2 Kolinitō 9:7 ʻi he palakipoé, pea tuku fakaʻatā e ngaahi foʻi lea mahuʻingá. Fakaafeʻi e fānaú ke nau mateʻi pe ko e hā e ngaahi lea ʻoku pulí. Tuku leva ke nau lau e vēsí ʻi he folofolá ke fakafonu e ngaahi konga ʻataá. Ko e hā hono ʻuhinga ʻo e foaki “taʻeloto, pe loto ki ai”? Ko e hā e ʻuhinga ʻo e hoko ko ha taha “foaki fiefia”?

• Fakaafeʻi e fānaú ke nau tokoni atu ʻi hono kumi ha ngaahi fakatātā ʻo hono tokoniʻi ʻe he Fakamoʻuí e niʻihi kehé (ʻoku lahi ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Fehuʻi ange pe ko e hā ʻoku nau mamata ki ai ʻi he ngaahi fakatātā ko ʻení, ʻe tokoni kiate kinautolu ke ʻiloʻi naʻe tokoniʻi ʻe Sīsū e niʻihi kehé ʻi he ʻofa. Fokotuʻu ha taumuʻa ʻi he kalasí ke tali ʻio ʻi he taimi ʻoku kole mai ai ha mēmipa ʻo e fāmilí pe niʻihi kehé, ke ngāue tokoni ʻi he uike ka hokó, hangē ko e tokoni ʻi ʻapi pe tokangaʻi e niʻihi kehé.

• Tokoniʻi e fānaú ke nau teuteuʻi ha fanga kiʻi foʻi maka iiki. Fakaafeʻi kinautolu ke faʻo ʻenau “ngaahi maka ngāue tokoní” ʻi honau kató he uiké ni, ke tokoniʻi kinautolu ke nau manatuʻi ke tokoni fiefia ki he niʻihi kehé.

• Tokoniʻi e fānaú ke nau faʻu ha ngaahi veesi foʻou ki ha foʻi hiva fekauʻaki mo e ngāue tokoní, hangē ko ʻení “Fakafiefia ke Fai” (Tohi Hiva ʻa e Fānaú, 129), ʻokú ne akoʻi mai ʻoku fakafiefia ʻa e tokoni ki he niʻihi kehé, ʻi ha ngaahi founga kehekehe.

2 Kolinitō 12:7–10

ʻOku tali maʻu pē ʻe he Tamai Hēvaní ʻetau ngaahi lotú, ka ʻoku ʻikai ke Ne ʻomi maʻu pē kiate au ʻa e meʻa ʻoku ou kolé.

Naʻe kole ʻe Paula ki he ʻOtuá ke toʻo ʻa hono ngaahi vaivaí, ka naʻe ʻafioʻi ʻe he ʻOtuá ʻe ngaohi ia ʻe hono ngaahi mamahí ke loto-fakatōkilalo mo mālohi.

Ngaahi ʻEkitivitī ʻe Ala Fakahokó

• Fakaafeʻi e fānaú ke nau fakahoa ʻa e 2 Kolinitō 12:9–10 mo e ʻEta 12:27. Ko e ha ngaahi foʻi lea pe kupuʻi lea ʻoku toutou hā ai? Ko e hā ʻoku akoʻi mai ʻe he ngaahi veesi ko ʻení? (Mahalo te ke fie fakamatalaʻi ange naʻe fakatatau ʻe Paula ʻa hono ngaahi faingataʻá ki ha tolounua ʻi hono kilí.) Ko e hā naʻe akoʻi ʻe he ʻOtuá kia Paula ʻo kau ki he ngaahi faingataʻá?

• Fakaafeʻi e fānaú ke nau lisi ha ngaahi faingataʻa ʻe niʻihi ʻoku maʻu ʻe he kakaí ʻi he moʻuí. Tokoniʻi kinautolu ke nau fakakaukau ki he founga ʻe ala ako ai ha taha mei he ngaahi faingataʻa ko ʻení pea faitāpuekina ai kinautolu.

• Lau mo e fānaú e “ʻE Tali Maʻu pē Nai ʻe he Tamai Hēvaní ʻeku Ngaahi Lotú?” (Liahona, Sānuali 2017, 12–13). Kole ki he fānaú ke nau vahevahe ha ngaahi aʻusia ʻi he taimi ne nau lotu ai ki ha meʻa pea ʻikai ke nau maʻu. Kole ange ke vahevahe ha meʻa ne nau ako mei heʻenau ngaahi aʻusiá. Te ke ala vahevahe foki hoʻo ngaahi aʻusia pē ʻaʻau. Vahevahe hoʻo fakamoʻoní, ʻoku tali mai maʻu pē ʻe he Tamai Hēvaní ʻetau ngaahi lotú, ʻi he founga pea mo e taimi te ne faitāpuekina lahi ʻaupito ai kitautolu.

Poupouʻi e Ako ʻi ʻApí

Fakaafeʻi e fānaú ke nau hoko ko ha kau foaki fiefia ʻi honau ngaahi ʻapí ʻi he uiké ni pea ke nau omi mateuteu ki he kalasí ʻi he uike kahaʻú, ke lipooti e founga ne nau tokoniʻi ai ha taha naʻe fie maʻu tokoni.

Fakatupulaki ʻEtau Akoʻí

Fakaleleiʻi e ngaahi fakahohaʻasí ʻi he ʻofa. “Taimi ʻe niʻihi ʻe ʻi ai ha tōʻonga ʻa ha taha e fānaú te ne fakahohaʻasi e ako ʻa e toenga ʻo e kalasí. Kapau ʻe hoko ʻeni, faʻa kātaki, angaʻofa pea mo loto mahino ki he faingataʻa ʻoku siʻi fehangahangai mo e kiʻi tamasiʻí/taʻahiné. … Kapau ko e kiʻi tamasiʻi/taʻahine ko ia ʻokú ne fakatupu e fakahohaʻá ʻoku ʻi ai siʻane fie maʻu makehe, talanoa ki he mataotao faingataʻaʻia fakaesino ʻa e uōtí pe siteikí pe vakai ki he disabilities.lds.orgke ʻilo ai e founga ke ke feau lelei ʻaki e ngaahi fie maʻu ko iá” (Faiako ʻi he Founga ʻa e Fakamoʻuí, 26).