14–20 ni Okotova

Filipai; Kolosa

“Au sa Rawata na ka Kecega ena Vuku i Karisito o Koya sa Vakaukauwataki Au”

Wilika na Filipai kei na Kolosa, ka vakasamataki ira tiko na gone o vakavulica. Vakasaqara na veivakauqeti ena ivakarau mo vakavulica kina vei ira na ivakavuvuli ena ivola oqo.

Vola na Veika o Uqeti Kina

Sureta na Veiwasei

Tarogi ira na gone ena ka era a cakava ena macawa sa oti oqo me ra yacova kina e dua e gadreva tu na veitokani, ka veivosakitaki ena macawa sa oti.

Vakavulica na iVunau

Gone Sobu

Filipai 1:3–4; Kolosa 1:3, 9

Era lomani au ka dau masulaki au na iliuliu ni Lotu,

E vakavuqa ni dau tekivuna nona ivola o Paula ena nona tukuna nona lomani ira na lewe ni Lotu ka tukuna vei ira ni dau masulaki ira. Vakasamataka na ivakarau mo vukei ira kina na gone me ra kila ni ra lomani mai vei ira na iliuliu ni Lotu.

iTaviqaravi e Rawa ni Caka

• Wilika i cake na Filipai 1:3–4 kei na Kolosa 1:3, 9 ka kerei ira na gone me ra roqoliga ka cuva na uludra ena veigauna era rogoca kina na vosa masu, masulaki, kei na masumasu. Vakamacalataka ni dau masulaki ira na lewe ni Lotu na iApositolo o Paula, me vaka nodra dau masulaki keda ena gauna oqo na noda iliuliu ni Lotu.

• Vakaraitaka e dua na iyaloyalo kei Jisu Karisito, ka wasea na nona ivakaraitaki ni masulaka tiko e dua (raica na Luke 22:32; 3 Nifai 19:21, 23). Na cava a kerea o Jisu ena nona masulaki ira na tani?

• Vukei ira na gone me ra vakayacana eso na nodra iliuliu ni Lotu, me vaka na peresitedi ni Lalai, na bisopi, kei na Peresitedi ni Lotu. Vakamacalataka ni o ira na iliuliu oqo era kerea vei Tamada Vakalomalagi me vakalougatataki ira na gone ka vukei ira me ra buladodonu. Vakasamataka mo tukuna vei ira na gone na veika o dau tukuna ni o masulaki ira.

Filipai 4:4, 8

Au rawa ni reki vua na Turaga.

Dau vakayaloqaqataki ira na Yalododonu o Paula me ra reki—dina ga ni ra sotava tu na veivakatovolei dredre ka ni o Paula mada ga vakai koya a vesu tu. O na vukei ira vakacava na gone me ra raica ni bulataki ni kosipeli e kauta mai na reki?

iTaviqaravi e Rawa ni Caka

• Kerei ira na gone me ra vakarogoca e dua na vosa e tokaruataki ni o wilika na Filipai 4:4 Kerei ira na gone me ra vakaraitaka vei iko na ka e rawa ni ra cakava ni ra reki. Vukei ira me ra kila ni “reki tikoga vua na Turaga” e kena ibalebale me da mamarau baleta ni tu vei keda na kosipeli ka sa lomani keda o Jisu Karisito.

• Kauta mai na iyaya se iyaloyalo ka matataka na veika ena vukei iko mo “reki tikoga vua na Turaga.” O rawa ni kauta mai e dua na ibulibuli totoka ni Kalou se dua na iyaloyalo ni valetabu, na iVakabula sa tucaketale, se dua na matavuvale. Me ra veivukevuke na gone ni digitaka na iyaloyalo se iyaya, qai tukuna vei ira na vuna e vakamarautaki iko kina. Sureti ira me ra wasea na veika e dau vukei ira me ra reki vua na Turaga.

• Wilika vata na Filipai 4:8 ka vukei ira na gone me ra vakasamataka na veika e sota vata kei na ivakamacala ena tikina (raica talega Yavu ni Vakabauta 1:13). Solia vei ira na tikinipepa me ra droinitaka na iyaloyalo ni veika oqo me vukei ira me ra “vakasamataka” na veika e vakamacalataka o Paula.

Kolosa 1:23; 2:6–7

Na noqu vakabauta sa dodonu me “tauyavutaki” vei Jisu Karisito.

Kevaka e rawa ni ra tara cake na gone na nodra bula kei na nodra vakabauta vua na iVakabula, ena rawa me ra vorata na cagi kaukauwa ni bula.

iTaviqaravi e Rawa ni Caka

• Vakaraitaka na iyaloyalo ni dua na vunikau mai na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale ni o wilika na veimalanivosa bibi mai na Kolosa 1:23; 2:6–7. (Se vakaraitaka na vidio “Spiritual Whirlwinds” ena LDS.org.) Na cava ena yaco ena vunikau oqo kevaka e yaco mai e dua na cagi kaukauwa ka sega ni kaukauwa tu na wakana? Me ra tucake na gone me vaka ni ra dua na vunikau malumalumu tu na wakana ena dua na cagi kaukauwa oti me ra qai dua na vunikau kaukauwa na wakana. E rawa ni vukei keda vakacava na vakabauti ni iVakabula me da vaka e dua na vunikau kaukauwa na wakana?

• Sureta e dua na gone me droinitaka e dua na vunikau ena papa. Kerei ira na gone me ra cavuta eso na ka e rawa ni ra cakava me ra “tauyavutaki” kina vei Jisu Karisito. Ena veigauna e cavuta kina na gone e dua na ka, sureti koya me vakuria e dua na wakana ena droini.

Vakavulica na iVunau

Gone Qase Cake

Filipai 4:4–13.

Kevaka au vakabauti Jisu Karisito, e rawa niu mamarau ena veigauna dredre sara mada ga.

A sotava o Paula e vuqa na veivakatovolei, ia a marau ga baleta ni vakabauti Jisu Karisito.

iTaviqaravi e Rawa ni Caka

• Kerei ira na gone me ra raitayaloyalotaka ni ra tu e valeniveivesu, me vaka ga na iApositolo o Paula ena nona vola na ivola vei ira na kai Filipai. Wilika na Filipai 4:4–13 vata kei ira na gone ka kerei ira me ra vaqara na vosa eso oqo: reki, vakacegu, vakavinavinaka. Na cava na vuna a reki rawa kina o Paula ka vakila na vakacegu ena loma sara mada ga ni valeniveivesu? Vukei ira na gone me ra raica na vosa Turaga, Kalou, kei na Karisito ena veitikina oqo. Vukei ira me ra kila ni nona vakabauti Jisu Karisito o Paula a rawata kina na reki.

• Sureti ira na gone me ra vukei iko ni vakacavara na iyatuvosa vaqo: E rawa niu tu ena butobuto ia se rawa ga niu rai kevaka e dua noqu . E rawa niu tu e tautuba ena dua na siga katakata kau batabata toka ga kevaka e dua noqu . E rawa niu sotava tiko na gauna dredre ka reki tiko ga kevaka au . Me ra vakasamataka na gone na sala e rawa ni ra reki tiko ga kina vei Jisu Karisito ni ra sotava tiko na gauna dredre. E rawa ni ra lagata e dua na serenilotu, wilika e dua na ivolanikalou taleitaki, vukea e dua, se cavuta e dua na masu ni vakavinavinaka. Na cava e vakatura tiko na Filipai 4:4–13 ? Wasea vei ira na gone eso na serenilotu se ivolanikalou e dau vukea nomu rawata na reki ena gauna ni dredre.

Filipai 4:8

Au rawa ni vakasamataka na veika e dina, dodonu, ka savasava.

E dau todravi ira vakalevu na gone na veika ca ka sega ni savasava. O rawa ni vukei ira me ra vaqara na veika e veilaveti ka dodonu.

iTaviqaravi e Rawa ni Caka

• Kerea e dua na gone me wilika i cake na Filipai 4:8 ni ra vaqara na kena vo na vosa mai na Yavu ni Vakabauta 1:13 e tautauvata se via vakataka. Sureta e dua me vola na veivosa oqo ena papa. Vakarautaka na ivakamacala rawarawa ni veivosa oqo ka me ra qai vakasotara vata na gone na ivakamacala ki na vosa. Na cava na vuna me da “vakasamataka kina” na veika oqo? Me da “vakasaqarai” ira vakacava?

• Kerei ira na gone me ra cavuta na veika e sota vata kei na ivakamacala ena Filipai 4:8. Sureti ira me ra maroroya toka e dua na ituvatuva ena macawa oqo ni dua na ka era raica e veisotari kei na ivakamacala oqo. Vakayaloqaqataki ira me ra kauta mai nodra ituvatuva ki na Lalai ena macawa mai oqo ka wasea na veika era raica.

Kolosa 1:23; 2:6–7

Na noqu vakabauta sa dodonu me “tauyavutaki” vei Jisu Karisito.

Sa tovolea o Setani me vakamalumalumutaka nodra vakabauta na gone ena veitemaki kei na ivunau lasu. O na vakauqeti ira vakacava na gone me ra vaqaqacotaka nodra vakabauta na iVakabula me ra “sega ni vukici tani mai na inuinui ni itukutuku vinaka”?

iTaviqaravi e Rawa ni Caka

• Sureti ira na gone me ra droinitaka na iyaloyalo e matataka na dina eso era kunea ena Kolosa 1:23; 2:6–7. Me ra wasea nodra iyaloyalo vei ira na kalasi ka vakamacalataka na dina eso e matataki ena nodra iyaloyalo.

• Vakaraitaka na vidio “Spiritual Whirlwinds.” Na cava eso na veitemaki kei na ivunau lasu e vuravura ena gauna oqo e rawa ni vakamalumalumutaka noda vakabauta? Na cava eda rawa ni cakava me vaqaqacotaka noda vakabauta me da “tauyavutaki” kina vei Jisu Karisito?

Vakauqeta na Vuli e Vale

Sureti ira na gone me ra wasea ki na nodra matavuvale na ka era sa vulica me baleta na “tauyavutaki” tu vei Karisito. E rawa ni ra vakayagataka na tabana ni itaviqaravi ni macawa oqo se dua na ivolanikalou era wilika ena kalasi nikua.

Vakatorocaketaki Noda Veivakavulici

Era dau lomatarotaro ka vuli na gone mai na veika vovou ka duidui era dau sotava. Vakayagataka na itaviqaravi eso ena vukea me ra veitosoyaki, vakayagataka taucoko nodra wakilakila, vakadidike, ka tovolea na veika vovou. E rawa ni veivuke na vakatutu eso ena “Sotavi Nodra Gagadre na Gone Sobu” ena itekivu ni ivurevure oqo. (Raica talega na Veivakavulici ena iVakarau ni iVakabula, 25–26.)