“14-20 ni Okotova. Filipai; Kolosa: ‘Au sa Rawata na ka Kecega ena Vuku i Karisito o Koya sa Vakaukauwataki Au’” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“14-20 ni Okotova. Filipai; Kolosa,” Lako Mai, Mo Muri Au—Me Baleti Ira na Tamata Yadua kei na Matavuvale: 2019
14–20 ni Okotova
Filipai; Kolosa
“Au sa Rawata na ka Kecega ena Vuku i Karisito o Koya sa Vakaukauwataki Au”
Na cava nai otioti ni gauna o wilika kina na veivakasama titobu vakayalo o vola tu ena nomu vulica tiko na Veiyalayalati Vou? Ena rawa ni veivuke mo taleva lesu eso na veivakauqeti o sa ciqoma tiko.
Vola na Veika o Vakauqeti Kina
E vola o Paula na nona ivola vei ira na kai Filipai kei ira na kai Kolosa ni a tiko e vale ni veivesu. Ia, na ivola eso oqo e sega ni tautau ni vola nei dua e tu e vale ni veivesu. E tukuna vakalevu o Paula me baleta na reki, kei na vakavinavinaka mai na dredre kei na veivakatovolei: “sa vunautaki na Karisito,” e kaya o koya, “ia na ka oqo ka’u na rekitaka, io, kau na rekitaka tiko ga” (Filipai 1:18). “E dina ga ka’u sa tiko tani vakayago, ia ka’u sa tiko vakayalo, ka’u sa vakayalo kei kemudou, ka reki ka raici kemudou … ni dou sa tudei ena vakabauti Karisito” (Kolosa 2:5). E dina sara, “na vakacegu ni Kalou” e vakila o Paula ena gauna dredre e sotava “e uasivia na veika kecega e kilai rawa” (Filipai 4:7), ia e vakilai vakai dina sara. Ena gauna ni noda vakatovolei, eda rawa ni vakila na vakacegu vata oqo ka meda “reki tiko ga vua na Turaga” (Filipai 4:4). Ena rawa me da, me vaka e cakava o Paula, vakararavi vakatabakidua vei Jisu Karisito, “ko koya eda sa rawata kina na bula” (Kolosa 1:14). Ena rawa ni da kaya, me vakataki Paula, “Au sa rawata na ka kecega ena vuku i Karisito o koya sa vakaukauwataki au” (Filipai 4:13; raica talega na Kolosa 1:11).
Vakasama eso ni Vuli iVolanikalou Yadua
Ena dodonu beka meda “cakacaka [eda] na bula sara kina”?
Na malanivosa na “cakacaka dou sa bula sara kina” e vakayagataki mai na so na tamata me tokona na vakasama ni da na vakabulai ena noda sasaga ga vakataki keda. Ia, na rai yalani oqori, me vaka ga ni vakaiyalayala na kilai vinaka ni vakavuvuli nei Paula—“ni sa loloma walega dou sa vakabulai kina ena vuku ni vakabauta” (Efeso 2:8)—me kena ibalebale ni sega ni dua na cakacaka e gadrevi me rawa kina na bula. Na ivolanikalou, e oka kina na volavola nei Paula, e vakavulici vakamatata kina ni gadrevi ruarua na loloma soliwale nei Jisu Karisito kei na sasaga yadua me rawa ni ciqomi na veivakabulai. Me vaka e kaya o Nifai, “Ia eda sa kila ni da sa vakabulai e na loloma soliwale, ni sa oti sara na veika kece eda rawa ni cakava” (2 Nifai 25:23). Ena noda sasaga sara mada ga ni cakacakataki noda vakabulai, “sai koya na Kalou sa cakacaka e lomamudou” (Filipai 2:13; raica talega na Filipai 1:6; Bible Dictionary, “Grace”).
Na kosipeli i Jisu Karisito ena kilikili kaya kina na solibula cava ga ena gadrevi.
E levu na ka e biuta laivi o Paula ena gauna sa saumaki mai kina ki na kosipeli i Jisu Karisito, oka kina na itutu vakairogorogo ena kena maliwa na Jiu oya na itutu vaka Farisi. Ena Filipai 3:5–14, raica na veika e rawata o Paula baleta ni a lomasoli me solibula ena vuku ni kosipeli. Na cava e vakila o koya me baleta na nona solibula?
Vakasamataka mada na nomu bula vakatisaipeli. Na cava o sa solibulataka me baleta na kosipeli i Jisu Karisito? Na cava o sa ciqoma? Eso tale tiko beka na solibula o nanuma e dodonu mo cakava mo rawa ni o tisaipeli yalodina cake kina ni iVakabula?
Raica talega na 3 Nifai 9:19 – 20; Vunau kei na Veiyalayalati 58: 2 – 5; Robert C. Gay, “Cava ena solia na tamata me isau ni yalona?” Ensign se Liaona, Nove. 2012, 34–36.
E rawa ni’u kunea na reki vei Karisito, veitalia ga na ituvaki ni bula au tu kina.
Na bula nei Paula e dua na ivakaraitaki matata ni ka dina e a vakamacalataka o Peresitedi Russell M. Ni vakanamata na noda bula vei Jisu Karisito kei na Nona kosipeli, e rawa ni da reki veitalia na cava e yaco—se sega ni yaco—ena noda bula. E yaco mai na reki baleti Koya” (Reki kei na Bulabula Vakayalo,” Ensign se Liaona, Nove. 2016, 82).
Ni o wilika na Filipai—vakabibi na wase 4—vakasaqara na itukutuku ena rawa ni vukei iko mo kunea na reki ena veituvaki cava ga ena nomu bula. Ena gauna cava o sa bau vakila kina na “vakacegu ni Kalou” ena dua na gauna dredre? (tikina 7). Ena gauna cava o sa bau kunea kina na kaukauwa “ena vukui Karisito” mo vakayacora na veika dredre? (tikina 13). Na cava na vuna o nanuma kina ni sa ka bibi me “vakavinavinakataki” na veituvaki ni bula kece sara? (tikina 11). Ena rawa vakacava ni vukei iko na vakatovotovotaki ni itovonibula ena tikina 8 ena nomu ituvaki ni bula?
Raica na Alama 33:23; Dieter F. Uchtdorf, “Vakavinavinaka ena iTuvaki Kecega,” Ensign or Liaona, Me 2014, 70–77.
E yavutaki tu noqu vakabauta vei Jisu Karisito.
Oqo e dua na iwalewale ni vuli lesoni o rawa ni vakayacora ena iwase ni volanikalou cava ga, e dina ga ni na veiraurau vinaka kei na Kolosa 1:12–23. Vakasaqara na veitikina oqori eso na ka o vulica baleti Jisu Karisito, ka qai vola na veika o kunea. Na cava o nanuma e bibi kina mo kila na veika oqo baleta na iVakabula?
Era “vakavoui” na tisaipeli i Jisu Karisito ni ra bulataka Nona kosipeli.
O kila vakacava ni sa vukei iko tiko na kosipeli i Jisu Karisito mo “tagane [se yalewa] vou”? E dua na sala mo vakasaqara kina ena Kolosa 3:1–17 ka qai vola na ivakarau ni rai, itovonibula, kei na cakacakataki ni “tamata makawa” kei na dua tale na ituvatuva ni vakarau ni rai, itovonibula kei na cakacakataki ni “tamata vou.”
Na nomu vulica tiko na veitikina oqo esa bau vakauqeta eso na vakanananu me baleta na kena sa veisautaki iko tiko na kosipeli? Vola na nomu nanuma me rawa ni o taleva lesu ena veisiga ni mataka ka qai vakasamataka vakatitobu na nomu sa veisau tiko.
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
Ena raica beka nomu vuvale ni cavuti vakawasoma na vosa na reki se rekitaki ena Filipai. Ena veigauna o raica kina e dua veirau na vosa oqo, ena rawa ni o cegu mada me veitalanoataki na veika e vakatavulica tiko o Paula me baleta na kunei ni reki.
E rawa vakacava me da “dua na rarama e vuravura”?
Ena rawa ni raica mai na nomu vuvale eso na ka me ra “vakasamataka” ka veirauti kei na ivakamacala ena tikina oqo (raica talega na Yavu ni Vakabauta 1:13). Ena rawa vakacava ni vakalougatataki nomu vuvale ena kena vakamuri nai vakasala i Paula?
Na cava eda rawa ni cakava meda torocake “ena kila na loma ni Kalou”? Na “iyau ni vuku kei na yalomatua” cava eda sa kunea ena kosipeli?
Ena rawa beka ni wilika nomu vuvale na veitikina oqo ni ra dabe wavolita tu e dua na vunikau se sarava tiko e dua na iyaloyalo ni vunikau (me vaka na kena e salavata tiko yani kei na idusidusi oqo). Na cava na kena ibalebale meda “vakataudeitaki” ka “vakaukauwataki” vei Karisito? Ena rawa ni da veivukei vakacava meda vakaukauwataka na wakada vakayalo?
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakatorocaketaki Noda Veivakavulici
Bulataka na nomu ivakadinadina. “Mo veivakavulici ga mai na nomu bula,” e vakavulica o Elder Neal A. Maxwell. A vakavulica o Maxwell. “Ena nanuma vakalevu cake na nomu ivalavala … mai na dua na dina mai na dua na lesoni” (ena Veivakavulici ena iVakarau ni Vakabula, 13).
E vakatavulica o Paula ni noda vakabauta e dodonu me “vakataudeitaki” vei Jisu Karisito (Kolosa 2:7).