“30 ni Sepiteba–13 ni Okotova. Efeso: ‘Me ra Vakavinakataki kina Ko Ira sa Lotu’” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“30 ni Sepiteba–13 ni Okotova. Efeso,” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019
30 ni Sepiteba–13 ni Okotova
Efeso
“Me ra Vakavinakataki kina Ko Ira sa Lotu”
O raica beka e dua na isema mai na itukutuku ni koniferedi raraba kina iVola i Paula vei ira na kai Efeso?
Vola na Veika o Vakauqeti Kina
Ena gauna e tekivu tete kina na kosipeli mai Efeso, “e tubu vakalevu na ue” (Cakacaka 19:23) ena kedra maliwa na Efeso. O ira na tamata cakacaka ka dau masuta na kalou tani era raica me ka ena rawa ni vakatanitaka na nodra ivurevure ni bula, ka “sa ka tani sara na nodra cudru, … a sa ka levu na ue ena koro taucoko” (raica na Cakacaka 19:27–29). Raitayaloyalotaka mada e dua ka qai saumaki vou kina kosipeli ena ituvaki vakaoqori. E vuqa vei ira na kai Efeso era ciqoma ka bulataka na kosipeli e dina ga ni levu na “ue” (Cakacaka 19:40), ka qai vakadeitaka o Paula vei ira ni “sai Karisito … na vu ni noda veivinakati tale” (Efeso 2:13–14). Na veivosa oqo, ni sala vata kei na nona veisureti me “biu tani kece vei kemudou na yaloca, kei na cudrucudru, kei na daunene, kei na veiba, kei na vosavakacaca, kei na ca kecega sa vakakina” (Efeso 4:31) e sa veidonui ka veivakacegui ena gauna oqo me vaka na gauna e liu. Vei ira na Efeso, ka vakakina vei iko, na kaukauwa me sotavi kina na dredre e yaco mai ni “dou kaukauwa tiko ena Turaga, kei na kena levu ni nona kaukauwa” (Efeso 6:10–13).
Vakasama eso ni Vuli iVolanikalou Yadua
E sa “digitaki” se “lesi keda e liu” eso na Luvena me vakabulai?
E tukuni ira na Yalosavasava o Paula era sa “lesi [ira] e liu” mai vua na Kalou ka “digitaki … sa qai tauyavutaki emuri ko vuravura” ka meda Nona tamata. Me vaka ni Peresitedi Henry B. Me vaka e kaya o Peresitedi HenryB. Eyring, e vuqa na tamata era bula ka mate ka sega ni nodra na madigi me ra ciqoma na kosipeli e vakavuna me so era “rairai vakabauta ni sa navuca taumada na Kalou o cei soti na Luvena ena vakabula o Koya ka vakarautaka vei ira na kosipeli, ka ra sega saraga ni ‘digitaki’ o ira ka sega ni rogoca na kosipeli. Ia … ni tuvatuva ni Kalou e sa dau loloma ka dodonu vakalevu sara mai na kena oya. Sa vakarau tu na Tamada Vakalomalagi me vakasokomuna ka vakalougatataka taucoko na Nona matavuvale” (“Vakasoqoni Vata na Matavuvale ni Kalou,” Ensign, se Liaona, Me 2017, 20–21). O ira kece na luve ni Kalou era rawa ni ciqoma na kosipeli kei na kena cakacaka vakalotu me baleti ira na mate ena valetabu.
E dina ga ni sega ni dua e sa lesi me vakabulai se segai, na ivakatakila ni gauna oqo e vakatavulica ni so era sa “lesi taumada” ena bula taumada me cakava eso na itavi bibi ena vuravura oqo. Oqo e oka kina na itavi kece ni Yalododonu Edaidai me wasea na kosipeli ka vukei ira kece na luve ni Kalou ena yasa ruarua ni lati me ra lako mai vei Karisito. (Raica talega na “Foreordination,” ena Ulutaga Vakosipeli, topics.lds.org..)
Ena “soqona vata na ka kecega vei Karisito” na Kalou.
O sa bau vakasamataka se cava beka na “sa oti kecega na gauna sa lokuci” se cava na kena ibalebale me “soqona vata kecega vei Karisito”? Ni o vakasamataka na veitikina oqo, wilika na ivolanikalou eso oqo: Efeso 4:13; 2 Nifai 30:7–8; Vunau kei na Veiyalayalati 110:11–16; 112:30–32; 128:18–21. Ena rawa ni o vakauqeti mo vola na ivakamacala ena veimalanivosa oqo.
E tauyavutaki tu na Lotu ena iapositolo kei na parofita, ka ivatuvakadei o Jisu Karisito.
Na wiliki ni ivakavuvuli eso nei Paula me baleta na iapositolo kei na parofita ena rawa ni vukei iko mo vakarau mo rogoca na itukutuku me baleta na iapositolo kei na parofita ena gauna nikua. Me vaka e tukuni ena Efeso 2:19–22; 4:11–16, na cava era tiko kina o ira na parofita kei na iapositolo. Era sa vukei iko vakacava na nodra ivakavuvuli mo kakua ni “veitosoyaki ka veitosoyaki ena cagi kecega ni vakavuvuli”?
Raica talega na Cakacaka 4:10–12.
E kacivi ira na parofita kei na iapositolo me ra liutaka na Nona Lotu.
E rawa niu vaqaqacotaka na isema ni noqu matavuvale.
Ni o wilika na Efeso 5:21–6:4, na veivakasama e yaco mai vei iko ena kena vaqaqacotaki na isema ni nomu matavuvale?
E bibi me kilai ni vosa nei Paula ena Efeso 5:22 era volai tu me baleta na veituvaki ni bula kei na itovo ni nona gauna. Era vakatavulica nikua na parofita kei na iapositolo ni sega ni cecere na turaga vua na marama ka rau dodonu me “veivuke vakatautauvata” (raica na “Na Matavuvale: Ai Vakaro ki Vuravura Raraba,” Ensign se Liaona, Me 2017, 145). E rawa talega ni o kunea na ivakasala ena Efeso 5:23–33, vakabibi saraga kevaka o sa vakamau se vakavakarau tiko mo vakamau. Me ivakaraitaki, e vakaraitaka vakacava o Karisito na Nona loloma vei ira na Yalododonu? Na cava e tukuna tiko na veika oqo me baleta na nodra ivakarau na turaga vakawati vei ira na watidra? Na lesoni cava so o kunea e baleti iko ena tikina oqo?
Na noda tokara na “iyaragi ni Kalou” ena taqomaki au mai na meca.
Ni o wilika na Efeso 6:10–18, vakasamataka na cava na vuna e vakayacana kina vakaoya o Paula na veitiki yadua ni iyaragi ena sala oya. Na cava ena taqomaki keda mai kina na “iyaraga ni Kalou”? Na cava o rawa ni cakava mo tokara vakataucoko na veitikina yadua ena veisiga?
Raica talega na 2 Nifai 1:23; Vunau kei na Veiyalayalati 27:15–18.
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
Ena Veivakalesui mai ni gauna oqo, ena soqona vata kecega na Kalou, oka kina na veivakavuvuli kei na cakacaka vakalotu ni kosipeli. Me vakaraitaka na vakasama oqo, e rawa ni o vunitaka se vola na veimalanivosa ena loma ni nomu vale ka matataka na veika e sa vakalesui mai ena neimami gauna (me vaka na idola ni matabete, cakacaka vakalotu, ivolanikalou, kei na isolisoli vakayalo). Era rawa ni vakasaqara na lewe ni vuvale ka “soqona” vata mai. Na cava eda vakavinavinaka kina ni da bula tiko ena “itabagauna ni taucoko ni gauna sa lokuci”?
Sureti ira na lewe ni vuvale me ra wasea na veika era sotava ka ra sa vakila kina na loloma kei na loloma soliwale ni Kalou kei Jisu Karisito me vaka e vakamacalataki ena veitikina oqori.
Ena marautaka beka na nomu vuvale na kena tara cake e dua na lalaga mai na lokoloko se eso tale na iyaya e tiko vei iko mai vale ka qai vakalutuki ira sobu ki ra. Na mataqali lalaga vakacava e wasea na tamata ena gauna nikua? E sa “busuka” vakacava na “bai sa ia na veitawasei keda” mai vua na Kalou o Jisu Karisito?
E rawa ni cakava nomu vuvale na “iyaragi ni Kalou” ena iyaya ga e tiko e vale. Na vidio “The Armour of God” (LDS.org) ena rawa ni vukea vakacava nomu lewe ni vuvale me raitayaloyalotaka vakacava nai yaragi oqo, e rawa talega ni ra kunea nai vakamacala rawarawa ena “The Whole Armor of God” (Friend, June 2016, 24–25). E taqomaki keda vakacava na veitiki ni yaragi oqo? Na cava eda rawa ni cakava meda veivukei meda tokara “na iyaragi ni Kalou” (Efeso 6:11) e veisiga?
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakavinakataki ni Vuli Yadudua
Me tuberi iko na Yalotabu ena nomu vuli-ka. Mo vakananuma tiko na Yalo ena Nona sa tuberi iko ena veika o gadreva mo vulica ena veisiga, kevaka sara madaga ena liutaki iko mo vulica e dua na iulutaga o a sega ni navuca taumada.
Na tokari ni iyaragi ni Kalou ena rawa ni taqomaki keda.