“23-29 ni Sepiteba. Kalatia: ‘Tou Lako Voli ena Yalo’” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“23-29 ni Sepiteba. Kalatia,” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019
23–29 ni Sepiteba.
Kalatia
“Tou Lako Voli ena Yalo”
Ni o wilika na Kalatia vola na veivakauqeti vakayalo o ciqoma. Nomu vakayacora oqo ena rawa ni vukei iko ena nomu nanuma ka vakasamataka vakatitobu ena veisiga ni mataka.
Vola na Veika o Vakauqeti Kina
Na kosipeli i Jisu Karisito e rawa ni veisereki mai na ivesu vakayalo. Ia, ena so na gauna o ira era sa vakila oti na veisereki ni kosipeli era vuki tani mai kina ka “dou sa vinakata mo dou qarava tale” (Kalatia 4:9). Oqo eso na veika era a cakava tiko eso na Yalosavasava mai Kalatia—era vuki tani tiko mai na galala e solia vei ira o Karisito (raica na Kalatia 1:6). Na iVola i Paula vei ira na kai Kalatia, oya, sai koya na kaci bibi me lesu mai kina “ka mo dou qai tudei ena lalaga sa vakalalagataki keda kina na Karisito” (Kalatia 5:1). Oqo e dua na kaci eda gadreva meda rogoca ka vakatudaliga kina, e dina ga ni na rawa ni veisau na draki ni bula, na veidre ni tu galala kei na vesuki tudei tu. Me vaka e vakatavulica o Paula, e sega ni rauta “ni dou sa kacivi na veiwekani mo dou lalaga” (Kalatia 5:13); e dodonu talega meda “tudei tu” kina (Kalatia 5:1) ni da vakararavi vei Karisito.
Vakasama eso ni Vuli iVolanikalou Yadua
Na lawa i Karisito e vagalalataki au.
E volavola o Paula vei ira na Yalosavasava e Kalatia ena gauna e kila mai kina ni ra sa vakasewasewani ena ivakavuvuli lasu. E dua vei ira na ivakavuvuli oqo sai koya, kevaka era vinakati me ra vakabulai na kai Matanitu tani era ciqoma na kosipeli e dodonu me ra cilivi ka vakamuria na itovo tale eso ni lawa i Mosese. E vakatoka o Paula na itovo eso oqo me “vua mo dou bobula kina” (Kalatia 5:1) baleta ni ra tarova tiko na Yalosavasava ena nodra bulataka vakataucoko na lawa i Karisito, ka kauta mai na galala dina. Na cava o kunea ena ivakasala nei Paula vei ira mai Kalatia ka na rawa ni vukei iko mo kila vinaka na cava sara mada na galala dina? Ena rawa talega ni o vakasamataka vakatitobu se ivau ni bobula cava e tiko ena nomu bula. E tiko beka e dua na ka e tarovi iko tiko mai na nomu vakila na galala e solia tu na kosipeli? E solia vakacava vei “[iko] na galala” o Karisito kei na nona kosipeli? (Kalatia 5:1).
Raica talega na 2 Nifai 2:27; 9:10–12.
Au rawa ni taukena talega na veivakalougatataki e yalataki vei Eparama.
Eso vei ira na Yalosavasava mai Kalatia era leqataka baleta ni ra sega ni kawa vakadra mai vei Eparama, era na sega ni ciqoma na veivakalougatataki e yalataki vei Eparama, ka oka kina na bula vakacerecerei. Ena Kalatia 3:7–9, 13–14, 27–29, na cava me tiko vua e dua me rawa ni vakatokai me “kawa i Eparama”? Meda vulica na veivakalougatataki e yalataki vei Eparama kei na veivakalougatataki eda rawa ni taukena ni da sa nona kawa, raica na Bible Dictionary, “Abraham, covenant of,” kei na “Veiyalayalati Vaka-Eparama,” iUlutaga Vakosipeli, topics.lds.org.
E tu beka vei Eparama na kosipeli i Jisu Karisito?
E vakamacalataka na Parofita o Josefa Simici ni: “E sega ni rawa ni da vakabauta, ni o ira na qase ni gauna e liu era sega tu ni kila na veiwalewale vakalomalagi me vaka era nanuma e vuqa, me vaka ni a vakabulai, era vakabulai ena kaukauwa ni tuvatuva cecere oqo ni veivakabulai, ena gauna e liu ni se bera na lako mai nei Karisito. … E dau vakacabo isoro o Eparama, ka sega ni vakalaiva oqo, e vunautaki vua na Kosipeli” (“O Ira na Qase ni Lotu mai Kirtland vei ira na Veitacini e Veivanua tani,” The Evening and the Morning Star, Mar. 1834, 143, josephsmithpapers.org). Na ivolanikalou eso oqo e vakaraitaka ni kosipeli Jisu Karisito e vunautaki ni se bera na veiqaravi vakayago ni Vakabula: Ilamani 8:13–20; Mosese 6:50–66.
Kevaka me’u “lako voli ena Yalo Tabu,” au na ciqoma na “vua ni Yalo Tabu.”
Na vulici ni veitikina oqo ena rawa ni vukei iko mo vakadikeva na ivakatagedegede ni nomu lako voli kei na Yalo Tabu. Osa vakila tiko beka na vua ni Yalo Tabu e tukuni tiko ena tikina 22–23? Na cava tale eso na vuana, se macala ni bula vakayalo osa bau raica? Vakasamataka vakatitobu na veika e gadrevi mo cakava me rawa ni teivaki vakavinaka na vuana oqo. Ena rawa ni vakavinakataka vakacava na veiwekani bibi eso ena nomu bula na kena teivaki na vuana oqo.
E dodonu me’u vakasaqara na “vua ni Yalo Tabu” ena noqu bula.
Ena rawa beka ni o lako voli ena Yalo Tabu, ia e sega ni vaka e vuataka tiko mai na vua e yalataki. Wilika na Kalatia 6:7–10 (e dau vakatokai tu vakawaosma me lawa ni tatamusuki). Na itukutuku cava o vakila e vinakata na Turaga me nomu ena veitikina oqo? Ena rawa ni o vakayagataka vakacava na veitikina oqo mo vakayaloqaqataka e dua e saga dredre tiko me bulataka na kosipeli?
Raica talega na Alama 32:28, 41–43; Vunau kei na Veiyalayalati 64:32–34.
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
Cava na ibalebale me “bula ena vakabauta”? Na cava esa cakava tiko na nomu vuvale me vakaraitaka ni osa bula tiko ena vakabauta?
Ena rawa ni o vakamacalataka vaka eliu na Kalatia 4 ena nomu vakamacalataka na duidui mai vua na nona italai e dua na tui kei ira na luvena. Na madigi se na veika e rawa ni rawata e dua na luve ni Tui,e sega ni rawata e dua na italai? Vakasamataka na veika oqo ni dou wilika vata tikina 1–7. Na cava era vakatavulica na veitikina oqo me baleta na noda veiwekani kei na Tamada Vakalomalagi?
Me rawa ni marautaki na veitalanoataki ni Kalatia 5:22–23, e rawa ni vakayacana na veimataqali vuata kece na nomu matavuvale ena vosa e vakayagataka o Paula me vakamacalataka na “vua ni Yalo Tabu.” E rawa ni qai digitaka e dua na lewe ni matavuvale, vakamacalataka na kena ibalebale, ka qai veitalanoataka e dua e ivakaraitaki ni vuata oqo. Ena rawa ni vakavuna na veivosakitaki ni veisala eso e rawa ni sureta kina na Yalo na nomu matavuvale kina nomudou itikotiko ka teivaka na vuana. Ni oti na veitalanoa, e rawa ni dou marautaka vata e dua na kakana era veiwaki vata kece kina na vuata.
Ena tiko na gauna e rawa ni dua ena nomu vuvale e “vakidacalataki e dua me ivalavala ca.” Na ivakasala cava o kunea ena Kalatia 6:1 me baleta na veika me caka ena veigauna vakaoqori?
Kevaka esa teivaka vata na nomu vuvale e dua na ka, e rawa ni o vakayagataka na veika e yaco ena gauna oya mo vakaraitaka kina na ivakavuvuli ni “ka ga e kaburaka na tamata, ena tamusuka talega ko koya” (tikina 7). Se e rawa ni o tarogi ira nomu lewe ni vuvale me baleta na nodra vuata se kakana draudrau taleitaki ka veitalanoataka na veika me vakayacori me rawa ni tei kina e dua na itei me rawa mai kina na kakana. (E rawa ni o vakayagataka na iyaloyalo e salavata mai na ivurevure oqo me dua na kena itaba vakaraitaki.) E rawa ni dou qai veitalanoataka vakavuvale na veivakalougatataki o dou nuitaka mo dou ciqoma me baleta na “tamusuki” ni veivakalougatataki vakaoqori.
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakatorocaketaki Noda Veivakavulici
Vukei ira na nomu vuvale me ra vakatauvatana na ivolanikalou vei ira. E kaya ko Nifai, “au sa vakamacalataka na ivakavuvuli ni vola tabu me kila ka taurivaka ena bula” (1 Nifai 19:23). Me vukea nomu vuvale ena kena vakayacori oqo, e rawa ni o sureti ira me ra vakasamataka vakatitobu na veigauna era sa vakila kina na vua ni Yalo Tabu me vaka e vakamacalataki ena Kalatia 5:22–23. (Raica na Veivakavulici ena iVakarau ni iVakabula 21.)
E vakatavulica o Paula, ena gauna eda lako voli ena Yalo Tabu, eda na sotava na vua ni Yalo Tabu ena noda bula.