“16-22 ni Sepiteba. 2 Korinica 8-13: ‘Ko Koya sa Solia ena Marau sa Vinakata na Kalou’’’ Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“16-22 ni Sepiteba. 2 Korinica 8-13,” Lako Mai, Mo Muri Au—Me Baleti Ira na Tamata Yadua kei na Matavuvale: 2019
16–22 ni Sepiteba
2 Korinica 8–13
“Ko Koya sa Solia ena Marau sa Vinakata na Kalou”
Na volai ni veivakauqeti vakayalo ena rawa ni vukei iko mo nanuma na veika o vulica ena gauna ni vuli volanikalou. Ena rawa ni o vola ena ivola ni vuli ni veisiga, volavola ena vanua lala ena yasana imawi ni ivolanikalou, vakuria eso tale na itukutuku ena nomu Gospel Library app, se cakava e dua na katokatoni ni nomu vakasama.
Vola na Veika o Vakauqeti Kina
Na cava o na cakava kevaka o rogoca ni dua na ivavakoso Yalododonu era sotava tiko na dredre ni dravudravua ena nodra yasana? Oqo na ituvaki e vakamacalataka o Paula vei ira na Yalosavasava mai Korinica ena 2 Korinica 8–9. A nuitaka o koya ni na rawa ni vakamasuti ira na Yalosavasava e Korinica me ra wasea na veika sa levu tu vei ira kivei ira na Yalosavasava era gadreva na nodra veivuke. Ia ena taudaku ni kere cau, e lewe ni vosa i Paula eso na dina titobu me baleta na soli ka: “Me ra dui solia me vaka na ka sa vinakata ko koya yadua ena yalona; me kakua ena voraki, se ni sa vakasaurarataki: ia ko koya sa solia ena marau sa vinakata na Kalou” (2 Korinica 9:7). Ena noda gauna, e tiko ga o ira na Yalododonu e veiyasai vuravura era gadreva tu na veivuke. Ena so na gauna na ka ga eda rawa ni cakava oya meda lolo ka solia nai solisoli ni lolo. Ena so tale na gauna, ena rawa saraga ni da solia vakadodonu vua na tamata yadua. Se cava ga na ituvaki ni noda soli bula, e vinaka meda na vakadikeva na inaki ni noda soli-ka. Sa ivakaraitaki beka ni loloma na noda solibula? E dina sara, ni loloma sa vakavuna na soli-ka ena marau.
Vakasama eso ni Vuli iVolanikalou Yadua
2 Korinica 8:1-15; 9:5-15, 17–18
E rawa ni’u wasea ena marau na veika e tiko vei au me vakalougatataki ira na dravudravua kei na vakaleqai.
Sa dua na ka na levu ni tamata era sotava tu na dredre e veiyasai vuravura. Ena rawa vakacava ni da vakayacora na veisau? Elder Jeffrey R. E soli vakasala o Holland: “Vutuniya se dravudravua, ke da vutuniyau se dravudravua, meda sa “cakava na ka eda rawata” vei ira sa vakaleqai [raica na Marika 14:6, 8]. … Na [Kalou] ena dusimaki iko ena cakacaka ni loloma vakatisaipeli ke o sa dau gagadre tu ga ka masu ka vakaraica na sala mo muria e dua na ivunau sa dau solia mai o Koya vakaveitarataravi” (“Eda sa Sega Li ni Dravudravua Kecega?” Ensign se Liaona, Nove. 2014, 41).
Wilika na 2 Korinica 8:1–15; 9:6–15, vola eso nai tukutuku ni vakavuvuli e vakatavulica o Paula me baleta na nodra kauwaitaki na dravudravua. Na cava e vakauqeti iko baleta nai vakasala nei Paula? Ena rawa ni o masulaka na veidusimaki me baleta na veika o rawa ni cakava me vakalougatataka e dua e vakaleqai tu. Mo nanuma tiko mo vola na veivakauqeti o ciqoma ka cakacakataka sara.
Raica talega na Mosaia 4:16 – 27; Alama 34: 27 – 29; Henry B. Eyring, “Sa Sega Li ni Vaka Oqo na Lolo Kau sa Vinakata??” Ensign se Liaona, Me 2015, 22–25; Linda K Burton, “Au a Vulagi,” Ensign se Liaona, Me 2016, 13–15.
Era dau veivakacalai na parofita vakailasu.
Ena rawa ni vukei iko mo kila vinaka na wase oqo ni o ira “sai apositolo vakailasu” ka sa tubu mai ena kedra maliwa na Yalosavasava ni Koronica (2 Korinica 11:13). Na cava o vulica rawa mai na tikina 13-15 me baleta na nodra ivakavuvuli o ira na vakavulica nai vunau lasulasu? Na cava o vulica me baleta na parofita dina ni o wilika na veika e sotava o Paula ni dua e qaravi Karisito? (raica na tikina 23–33).
E dodonu meu “dikeva” noqu yalodina ena kosipeli i Jisu Karisito.
Ena siga nikua e lewe vuqa era vakasaqara me ra muataki keda tani mai na “dina kei na savasava vei Karisito” (2 Korinica 11:3), o na ciqoma beka na veisureti nei Paula me “dikevi [iko], se dou tu ena vakabauta se segai” (2 Korinica 13:5). Me ivakaraitaki, ena rawa ni o vakasamataka vakatitobu na veika e rawa ni kau tani mai na nomu bula ena vukei iko mo vakanamata vei Karisito, se o na rawa ni vakacavara na “iTaviqaravi ni Qamosa ni Vakarau” ena Vunautaka Noqu Kosipeli, tabana e 126.
Na cava “nai katolu ni lomalagi,” ocei na tamata e “sa kau cake mada”?
Ena veitikina oqo, e tukuni koya tikoga o Paula, ia e sega ga ni cavuti koya mai—me kakua beka ni dokadokataka kina na nona raivotu vakasakiti. Na malanivosa nai “katolu ni lomalagi” e vakatokai tiko ki na matanitu vakasilesitieli (raica na VV 76:96–98).
E sa veiganiti na loloma soliwale ni Vakabula me vukei au meu vaqaqacotaki ena noqu malumalumu.
Eda sega ni kila se cava sara beka “na voto ni kau e lewe[na]”, ia, eda kila na levu ni nona gagadre me biuta laivi mai. Eda sa raica na veibolebole kei na leqa e sega ni se raica na Turaga me kautani mai ena noda bula. Vakasamataka sara na nomu bolebole eso ni o wilika na 2 Korinica 12:5–10. Na cava e vakatavulica o Paula me baleta na malumalumu? Na cava e kena ibalebale vei iko ni sa veirauti vei iko na loloma soliwale ni Kalou? O sa vakila vakacava na nona veivakaukauwataki mana na Kalou?
Raica talega na Mosaia 23:21–24; 24:10–15; Ica 12:27; Moronai 10:32–33.
Na cava e vakaibalebaletaka tiko o Paula ni tukuna “ena gusu ni vakadinadina e lewe rua, se lewe tolu”?
Ena gauna ni Veiyalayalati Makawa, e gadrevi e rua se tolu nai vakadinadina me beitaka kina e dua (raica na Nai Vakarua 19:15). E tukuna na ivakarau oqo o Paula ena ikatolu ni nona lako ki Koronica. Na ivakaraitaki ni gauna oqo ni vakavuvuli ni lewe levu na ivakadinadina e oka kina na Tolu na iVakadinadina ena iVola i Momani, nai vakadinadina i Jisu Karisito e vakarautaki tu ena i Vola Tabu kei nai Vola i Momani, kei na nodra dau vakadinadinataka tiko vakaveisa na daukaulotu, dauniveiqaravi vakavuvale, kei na dausiko vuvale.
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
Na cava o kunea ena veitikina oqo ka vakauqeta na nomu vuvale me dolele yani vei ira na dravudravua kei na vakaleqai? E gauna vinaka oqo me tuvai e dua na cakacaka ni veiqaravi vakavuvale kivua e dua e gadreva tu.
E kila tiko beka na nomu vuvale e dua ena rawa ni vakatokai me dua e “sa solia ena marau”? Ena rawa vakacava ni da vakayacora na noda veiqaravi vei ira na tani me ka marautaki?
Ena rawa vakacava ni o vakavulica kina nomu vuvale me baleta na “valu” me vorati nai valavala ca? Ena rawa ni marautaka nomu vuvale na tarai ni lalaga se tataqomaki ena idabedabe se tutuvi? E rawa ni vakavuna mai na veitalanoataki na veika me baleta e rawa ni vakauti keda tani mai vua na Kalou ka “vakamalumalumutaka na nanuma kecega me talairawarawa vei Karisito.” Na cava eso nai “yaragi” vakayalo e vakayagataki me tarova noda vakanananu? (raica na Efeso 6:11–18).
Na cava e rawa ni cakava na nomu vuvale me vakanamata vakalevu cake ena “dina kei na kena savasava vei Karisito”?
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakavinakataki ni Vuli Yadudua
Vola na veivakauqeti vakayalo. Elder Richard G. E tukuna o Elder RichardG. Scott: “Na ka e kilai ka volai vakamatau sa ikoya na ka ena kilai vakarawarawa ena gauna e gadrevi kina. … [Volai ni veidusimaki vakayalo] e vakalevutaka na nomu rawa ni ciqoma na rarama levu cake” (“Acquiring Spiritual Knowledge,” Ensign, Nove. 1993, 88; raica talega na iVakarau ni Veivakavulic ni Vakabula, 12, 30).
“Me ra dui solia me vaka na ka sa vinakata ko koya yadua ena yalona; me kakua ena voraki, se ni sa vakasaurarataki: ia ko koya sa solia ena marau sa vinakata na Kalou” (2 Korinica 9:7).