16–22 ni Sepiteba

2 Korinica 8–13

“Ko Koya sa Solia ena Marau sa Vinakata na Kalou”

Na vakasama vinaka duadua ni nomu vakavulici ira na gone ena nomu kalasi ena yaco mai ni o vulica ena masumasu na 2 Korinica 8–13 ka vakasamataki ira tiko. E rawa ni kune ena ituvatuva oqo na ikuri ni vakasama ni veituberi.

Vola na Veika o Uqeti Kina

Sureta na Veiwasei

E dua na sala vinaka me sureti kina na veiwasei vei ira na gone mo vakananuma vei ira e dua na ka o a sureti ira me ra cakava ena dua na lesoni i liu. Kerea me ra wasea na veika era sotava.

Vakavulica na iVunau

Gone Sobu

2 Korinica 9:6–7

Au rawa ni solika ena yalomarau vei ira na vakaleqai.

E vinaka me da dau veiqaravi vei ira na tani, ia e vinaka cake sara me da veiqaravi ena yalomarau. Vakasamataka na cava ena uqeta na gone yadua me dau “solia ena marau.”

iTaviqaravi e Rawa ni Caka

• Sureti ira na gone me ra tokaruataka na malanivosa “Ko koya sa solia ena marau sa vinakata na Kalou” (2 Korinica 9:7). Na cava na kena ibalebale mo “solia ena marau”? Vakaraitaka e dua na iyaloyalo ni mata mamarau kei na mata rarawa, ka taroga vei ira na gone o cei vei rau e vaka na irairai ni solia ena marau.

• Ni lagata vata vakavica e dua na sere baleta na veiqaravi, me vaka na “When We’re Helping” (Children’s Songbook, 198). Ena imatai ni gauna, kerei ira na gone me ra lagata ena yalomarau; oti qai kerei ira me ra lagata ena ivakarau ni yalo duatani, me vaka na yalorarawa, oca, cudru, se rere. Vakananuma vei ira na gone ni vinakata na Tamada Vakalomalagi me da dau vukei ira na tani ena yalomarau. Qai lagata tale na sere ena yalomarau.

• Solia vei ira na gone na iyaloyalo ni matadredredre. Kerei ira me ra taura cake na nodra iyaloyalo ni ra rogoca na vosa dredre se matadredredre ni ra lagata “Smiles” (Children’s Songbook, 267). E rawa ni ra vakayacora talega vakakina ena iyaloyalo ni matacudrucudru kei na vosa cudru kei na matacudrucudru. Tukuna vei ira na gone ni matacudrucudru e sega ni mamarau; dua na sala me da marau ka qaravi ira kina na tani sai koya me da matadredredre ka vukei ira na tani me ra matadredredre.

• Tuva e dua na itaviqaravi vakalasi mo ni qarava e dua, me vaka e dua na gone dau sega ni lako mai ki na Lalai se dua na lewe ni tabanalevu se itokani e leqa tu. O na tuva beka mo sikova nona vale na tamata oya, vola eso na ivola vinaka se droinitaka eso na iyaloyalo, se kauta na kakana mo drau kania vata.

• Sureti ira na gone yadua me ra tuva e dua na ivalavala ni veiqaravi mamarau me baleta e dua na lewe ni nona matavuvale. Ena kalasi ni macawa ka tu mai, kerei ira me ra wasea na veika era cakava.

2 Korinica 12:7–10

E dau sauma na masu o Tamada Vakalomalagi, ia e sega ni dau solia vei au o Koya na veika kece au kerea.

Nona masulaka o Paula me kau tani na “votonikau sa vakalauti kina na [lewena]” e vakavulica vei keda ni so na gauna e dau vakaraitaka Nona loloma vei keda na Kalou ena nona sega ni solia na ka eda vinakata.

iTaviqaravi e Rawa ni Caka

• Vakaraitaka vei ira na gone e dua na kau vakavotona (se na kena iyaloyalo). Vukei ira me ra raitayaloyalotaka na veika era na vakila ni lauta tu na lewedra e dua na votonikau me dua na gauna balavu. Vakalekalekataka na 2 Korinica 12:7–10 vei ira na gone, ena vakayagataki ni vosa eso era na kila. Vakamacalataka ni “votonikau ena [lewei]” Paula, e dua na veivakatovolei, me vaka e dua na malumalumu vakayago. E dina ga ni a kerea o Paula vua na Kalou me kauta tani na veivakatovolei, a sega ni vakayacora na Kalou. Ia, a vakavulici Paula na Kalou ni rawa ni vukei keda na bolebole ni vulica me da yalomalumalumu ka nuitaki Koya. Ena qai vakaukauwataki keda na Kalou.

• Vakadinadinataka ni kila na Tamada Vakalomalagi na ka e vinaka vei keda, ka na solia vei keda o Koya na ka eda gadreva, kevaka sara mada ga e duatani mai na ka eda nanuma ni da gadreva. E rawa talega ni o wasea e dua na gauna a saumi mai kina na nomu masu ena dua na ivakarau se ena dua na gauna e duatani mai na ka o a namaka. Na italanoa “Don’t Forget to Pray for Erik” (Friend, Janu. 2017, 36–37) ena rawa talega ni veivuke.

• Lagata vata kei ira na gone e dua na sere baleta na nona loloma na Tamada Vakalomalagi me vaka na “A Child’s Prayer” (Children’s Songbook, 12–13). Taroga vei ira na gone na cava era na kaya vua e dua ka vakananuma tu se dau rogoca ka sauma na Tamada Vakalomalagi na masu. Lagata tale na sere, ka dusia na qaqana e vakamacalataka na nona nanuma na Tamada Vakalomalagi baleti keda.

Vakavulica na iVunau

Gone Qase Cake

2 Korinica 9:6–9

Au rawa ni solika ena yalomarau vei ira na vakaleqai.

A vinakata o Paula me vakauqeti ira na Yalododonu me ra solia nodra veika e vuqa me vukei ira na dravudravua. O rawa ni vakayagataka vakacava na nona vosa mo vakauqeti ira kina na gone me ra vukei ira na tani?

iTaviqaravi e Rawa ni Caka

• Vola na vosa ni 2 Korinica 9:7 ena papa, ka vakalala na vosa bibi eso. Sureti ira na vo ni gone me ra vakilakila na vosa e yali tiko. Qai laiva me ra wilika na tikina ena ivolanikalou me vakatawana na vanua lala. Na cava na kena ibalebale me da solika ena “lomalomarua, se ena gauna e ganita kina”? Na cava na kena ibalebale mo “solia ena marau”?

• Sureti ira na gone me ra vukei iko ni vakaraica na iyaloyalo eso ni iVakabula ni qaravi ira tiko na tani (e vica e tiko ena Lako Mai, Mo Muri Au—Baleta na Tamata Yadua kei na Matavuvale). Tarogi ira se cava era raica ena iyaloyalo oqo ka vukei ira me ra kila ni o Jisu e dau qaravi ira na tani ena loloma. Tuva vakalasi e dua na inakinaki me da vakaio ni ra kerei keda na lewe ni matavuvale se so tale me da veiqaravi ena macawa lako mai, me vaka na veivuke e vale se qaravi ira na tani.

• Vukei ira na gone me ukutaki eso na vatu lalai. Sureti ira me ra kauta voli ena nodra taga ena macawa oqo nodra “vatu ni veiqaravi” me vukei ira ni nanuma me ra dau qaravi ira na tani ena marau.

• Vukei ira na gone me ra kauta mai eso na qaqa ni sere vou baleta na veiqaravi me vaka na “Fun to Do” (Children’s Songbook, 253), ka vakavulica ni sa lasa na qaravi ira na tani ena sala duidui e vuqa.

2 Korinica 12:7–10

E dau sauma na masu o Tamada Vakalomalagi, ia e sega ni dau solia vei au o Koya na veika kece au kerea.

A kerea o Paula vua na Kalou me kauta tani nona malumalumu, ia e kila na Kalou ni nona malumalumu o Paula ena vakayalomalumalumutaki koya ka na kaukauwa kina.

iTaviqaravi e Rawa ni Caka

• Sureti ira na gone me ra veidutaitaka na 2 Korinica 12:9–10 kei na Ica 12:27. Na vosa kei na malanivosa cava soti e tokaruataki? Na cava era vakavuvulitaka na veitikina oqo? (O na gadreva beka mo vakamacalataka ni a vakatauvatana tiko o Paula na nona bolebole kei na votonikau e kulina.) Na cava e vakavulica na Kalou vei Paula baleta na veivakatovolei?

• Sureti ira na gone me ra vola eso na veivakatovolei era sotava tu na tamata ena nodra bula. Vukei ira me ra vakasamataka na sala e rawa ni vuli kina e dua mai na nona veivakatovolei ka vakalougatataki mai kina.

• Wilika vata kei ira na gone na “Will Heavenly Father Always Answer My Prayers?” (Friend, Janu. 2017, 12–13). Sureti ira na gone me ra wasea na veika era sa sotava ena nodra masulaka e dua na ka era qai sega ni ciqoma. Kerei ira mera wasea na veika era sa vulica mai na veika oqori. Ena tu tale beka ga eso na ka o sa sotava mo wasea talega. Wasea nomu ivakadinadina ni dau sauma na Tamada Vakalomalagi na noda masu ena ivakarau kei na gauna eda na vakalougatataki vakalevu duadua kina.

Vakauqeta na Vuli e Vale

Sureti ira na gone me ra dau solika ena marau e nodra vale ena macawa oqo ka me ra vakavakarau mai ki na kalasi ena macawa ka tarava me ra tukuna na ivakarau era a qarava kina e dua ka leqa tu.

Vakatorocaketaki Noda Veivakavulici

Sotava na vakacaca ena loloma. “Ena so na gauna na nona itovo e dua na gone e rawa ni vakacacana nodra vuli na vo ni kalasi. Ni yaco oqori, dau vosota, yalololoma, ka veiciqomi ena bolebole eso ena rairai sotava tiko na gone oya. Kevaka e vakaleqai tu nona bula na gone e vakacaca tiko, veitalanoa kei na kenadau ena iteki baleti ira na vakaleqai tu se sikova na disabilities.lds.org mo kunea na ivakarau me sotavi kina na gagadre eso oqori” (Veivakavulici ena iVakarau ni iVakabula, 26).