soqoni ni sakaramede

26 ni Okosita–1 ni Sepiteba

1 Korinica 8–13

“Sai Kemudou na Yagaoi Karisito”

Ni o wilika na 1 Korinica 8–13, vakarogoca na veivakauqeti ni Yalo me baleta na ivakarau ni kena vakavulici na ivakavuvuli ena veiwase oqo. Nanuma ni vakasama cava ga ni itaviqaravi e rawa ni moici me sotavi ira na gone qase cake kei ira na gone sobu.

Vola na Veika o Uqeti Kina

ivakatakilakila ni veiwasei

Sureta na Veiwasei

Sureti ira na gone me ra wasea e dua na ka era cakava ena soqoni ni sakaramede nikua me ra vakasamataki Jisu.

ivakatakilakila ni veivakavulici

Vakavulica na iVunau

Gone Sobu

1 Korinica 10:13

Ena vukei au na Tamada Vakalomalagi meu digidigi dodonu.

E sega ni dau rawarawa e veigauna na digitaka na dodonu, ia ena vukei keda na Tamada Vakalomalagi me da dau digitaka na dodonu.

iTaviqaravi e Rawa ni Caka

• Wilika na 1 Korinica 10:13 vei ira na gone, ka sureti ira me ra vuki tani mai vei iko ni ra rogoca na vosa “temaki” se “veitemaki.”

• Cakava eso na ivakatakilakila ni tuvakadua vei ira na gone. Talanoataki ira vakalekaleka eso na tamata sa vakarau me ra digidigi cala. Ni ra vakarorogo na gone, sureti ira me ra taura cake na nodra ivakatakilakila ni digidigi cala na tamata e talanoataki. Na cava beka na digidigi dodonu? Vakadinadinataka ni na vukei ira na Tamada Vakalomalagi me ra digitaka na dodonu.

• Vakaraitaka e dua na iyaloyalo kei Jisu, ka lagata vata kei ira na gone e dua na sere baleti Jisu Karisito, me vaka “I’m Trying to Be like Jesus” (Children’s Songbook, 78–79). E vukei keda vakacava me da digidigi donu na noda nanumi Jisu? Vakaraitaka na iyaloyalo ni veika tale eso e dau vukei keda me da digidigi donu, me vaka na itubutubu se ivolanikalou. Tarogi ira na gone na cava e vukei ira me ra digidigi donu.

1 Korinica 12:4, 7–11

Sa vakalougatataki au na Tamada Vakalomalagi ena veisolisoli vakayalo.

Sa solia vei ira kece na luvena na Tamada Vakalomalagi na veisolisoli vakayalo. Na isolisoli vakayalo cava soti o sa raica vei ira na gone o vakavulica?

iTaviqaravi e Rawa ni Caka

• Wilika vata na 1 Korinica 12:7–11, ka raica na isolisoli vakayalo e cavuta o Paula. Vukei ira na gone me ra vakasamataka na ivukivuki e rawa ni veisotari kei na isolisoli oqo ni Yalo, ka vakayagataka na ivukivuki oya me vukea nodra nanuma tiko na gone na isolisoli.

• Kerei ira na gone me ra droinitaka na iyaloyalo ni dua na isolisoli taleitaki era sa ciqoma. Vakamacalataka ni solia vei keda na Tamada Vakalomalagi na isolisoli vakayalo me vaqaqacotaka noda vakabauta ka vukei keda me da vakalougatataki ira tale eso.

• Vola e dua na itukutuku me baleta na gone yadua, ka vakamacalataka e dua na isolisoli vakayalo o sa raica vua (se e rawa ni o sureti ira na itubutubu me ra vola na itukutuku). Ologa na itukutuku me vaka na iloloma. Solia me ra cereka na gone na nodra iloloma, ka vukei ira me ra wilika na nodra isolisoli vakayalo.

kato ni loloma

Sa solia vei ira kece na luvena na Tamada Vakalomalagi na veisolisoli vakayalo.

1 Korinica 13:1–8

Au rawa ni lomani ira tale eso.

Era vakavuvulitaka na ivolanikalou ni loloma cecere sai koya na “loloma savasava i Karisito” (Moronai 7:47). O na vukei ira vakacava na gone me ra tara cake ka vakaraitaka na loloma va-Karisito?

iTaviqaravi e Rawa ni Caka

• Wilika na 1 Korinica 13:8 kei na Moronai 7:47, ka vukei ira na gone me ra tukuna tale na malanivosa “Na loloma cecere sai koya na loloma savasava i Karisito.” Vakaraitaka na iyaloyalo kei Jisu na dauloloma ka yalovinaka, ka tarogi ira na gone se vakaraitaka vakacava o Koya na loloma vei ira na tani (raica na Gospel Art Book baleta na vakasama eso).

• Digitaka e dua na gone me tucake tu mai mata ni rumu. Taroga na gone na ivakarau ena qarava kina e dua tale na tamata ena kalasi. Vakamacalataka ni oqo e dua na sala eda rawa ni vakaraitaka kina na loloma cecere vei ira tale eso. Sureti ira eso tale na gone me ra veivukevuke ena vakaraitaki ni loloma cecere.

• Lagata e dua na sere me baleta na lomani ira na tani, me vaka na “Jesus Said Love Everyone” se “Love One Another” (Children’s Songbook, 61, 136), vata kei ira na gone. Vakaraitaka na kedra iyaloyalo eso na tamata duidui (me vaka e dua na itubutubu, qasenivuli, se itokani), ka kerei ira na gone me ra wasea na sala e rawa ni ra qarava kina na tamata oya. Sureti ira na gone me ra vakasamataka e dua e rawa ni ra vukea ka vola e dua na ivola se droinitaka e dua na iyaloyalo me soli vua na tamata oya. Kevaka era gadreva eso tale na vakasama, vakaraitaka na vidio “Pass It On” (LDS.org).

ivakatakilakila ni veivakavulici

Vakavulica na iVunau

Gone Qase Cake

1 Korinica 10:13

Ena vukei au na Tamada Vakalomalagi meu vorata na veitemaki.

Na yalayala ena tikina oqo e rawa ni vakadeitaka na yalodra na gone ni na vukei ira na Tamada Vakalomalagi ena gauna era vakatovolei kina.

iTaviqaravi e Rawa ni Caka

• Sureti ira na gone mera wilika na 1 Koronica 10:13 lele ya rua ka mera vakalekalekataka na tikina ena nodra vosa. Kerei ira na gone me ra wasea e dua na gauna a vukei ira kina na Tamada Vakalomalagi me ra levea se vorata na veitemaki. Na cava eda rawa ni cakava me da vakararavi kina vua na Tamada Vakalomalagi ni da temaki?

• Vola ena tikinipepa na veitemaki eso e rawa ni ra sotava na gone nikua. Sureti ira na gone yadua me ra digia e dua na pepa ka wasea na veika sa solia na Tamada Vakalomalagi me vukea noda levea se vorata na veitemaki eso oqo. Me baleta eso na vakasama, wilika vata na Alama 13:28–29.

1 Korinica 11:23–29

Ena gauna ni sakaramede, au rawa ni vakasamataka na ivakarau au sa muria tiko kina na iVakabula.

E tiko na vuna e bibi cake kina na sakaramede vei ira na gone sa papitaiso. Vukei ira me ra raica na cakacaka vakalotu tabu oqo me dua na madigi me ra “vakadikevi” ira ka vakavouia nodra yalayala vua na iVakabula (1 Korinica 11:28).

iTaviqaravi e Rawa ni Caka

• Kerea e dua na gone me wilika na 1 Korinica 11:28. Na cava na kena ibalebale me da “vakadikevi” keda ni se bera ni da vakayagataka na sakaramede? Kerei ira na gone me ra vakasamataki ira mada eso tale na tamata era dau vakadidike, me vakataki ira na vuniwai, ovisa vakalecaleca, se dauvakadidike vakasainitisi (kena ivakaraitaki, na vuniwai e dikeva na yagoda baleta na mavoa se mate eso e gadrevi me vakabulai). Na cava e vakavulica vei keda na nodra cakacaka baleta na ivakarau me da dikevi keda kina ni da vakayagataka na sakaramede?

• Kerei ira na gone me ra tuva na ka e rawa ni ra vakasamataka ni ra vakayagataka na sakaramede. Sureti ira me ra vakayagataka nodra ituvatuva me vakananumi ira me ra dau dikevi ira ena gauna ni sakaramede.

1 Korinica 12:4, 7–12, 31; 13:1–8

E tu vei au na isolisoli vakayalo eso.

E vakavuvulitaka o Paula ni isolisoli ni yalo e “soli vei ira na tamata kecega” (1 Korinica 12:7). Na ivakavuvuli oqo e rawa ni vukei ira na gone me ra tara cake na kedra yaga yadua vakauasivi ni ra vakayagataka nodra isolisoli me ra vakalougatataki ira kina na tani.

iTaviqaravi e Rawa ni Caka

• Kerei ira na gone me ra vola ena papa na isolisoli vakayalo eso era kunea ena 1 Korinica 12:7–11; 13:2. Sureti ira me ra vaqara na ikuri ni isolisoli e cavuti ena Moronai 10:8–18 kei na Vunau kei na Veiyalayalati 46:13–26. Wasea vata kei ira eso na ikuri ni isolisoli vakayalo e cavuta o Elder Marvin J. Ashton: “Na isolisoli ni vakatataro; na isolisoli ni vakarorogo; … na isolisoli ni goletani mai na veiqati; … na isolisoli ni vaqara na veika ni buladodonu; na isolisoli ni sega ni vakalelewa; na isolisoli ni rai vua na Kalou me dusimaki; … na isolisoli ni kauwaitaki ira na tani; … na isolisoli ni vakacabo masu; na isolisoli ni wasea na ivakadinadina qaqa” (“There Are Many Gifts,” Ensign, Nove. 1987, 20). Sureti ira na gone me ra tukuna na isolisoli vakayalo era raica vei ira vakayadua.

• Ni se bera na kalasi, taroga vei ira na itubutubu me baleta na isolisoli era raica rawa vei ira na luvedra, se vakasamataka ga o iko na nodra isolisoli. Tukuna vei ira na gone baleta na veisolisoli oqo, ka kerei ira me ra vakilakila se o cei na gone e tiko vua na isolisoli oya. Sureti ira na gone me ra vola e dua na sala era na vakayagataka kina nodra isolisoli me ra vakalougatataka e dua ena macawa oqo.

• Wasea na veigauna duidui ena rawa kina vei ira na tamata me ra vakayagataka e dua na isolisoli vakayalo mai na 1 Korinica 12:7–10. Sureti ira na gone me ra vakatakila na isolisoli vakayalo e rawa ni vakayagataki ena veituvaki yadua.

ivakatakilakila ni vuli

Vakauqeta na Vuli e Vale

Sureti ira na gone me ra wasea na nodra isolisoli vakayalo ki na nodra matavuvale ka taroga vei ira na lewe ni matavuvale se cava na nodra isolisoli.

Vakatorocaketaki Noda Veivakavulici

Dolea na veisureti e rokova na galala ni digidigi. Ni o sureti ira na gone me ra matanataka na veika era vulica tiko, vakasamataka na sala eso me rokovi kina na nodra galala. Navuca mo sureti ira mera vakasamataka nodra sala vakatakiira ni cakava na ka era sa vulica, mai na kena dolei na veisureti vakatabakidua eso.

tabana ni itaviqaravi: au rawa ni lomani ira na tani