9–15 ni Sepiteba

2 Korinica 1–7

“Mo Dou Veiyaloni kei na Kalou”

Tekivuna nomu vakavakarau ena wiliki ni 2 Korinica 1–7. Na Lako Mai, Mo Muri Au—Baleta na Tamata Yadua kei na Matavuvale sa rawa ni vukei iko mo kila na veiwase oqo, ka rawa ni solia vei iko na ituvatuva oqo eso na vakasama ni veivakavulici.

Vola na Veika o Uqeti Kina

Sureta na Veiwasei

Eso beka na gone ena nomu kalasi sa vola na ivola eso ena macawa oqo baleta na sala e sa ivakaraitaki vinaka kina ni tisaipeli i Jisu Karisito.e dua na lewe ni matavuvale. Ke sa vakakina, kerei ira ni se bera na kalasi me ra wasea e dua na ivola. Se kerei ira na gone me ra wasea e dua tale na ka era sa vulica.

Vakavulica na iVunau

Gone Sobu

2 Korinica 1:3–4

Na Tamada Vakalomalagi e dau vakacegui au, ka rawa niu vakacegui ira tale eso.

O na vakataudeitaki ira vakacava na gone ni na vakacegui ira na Tamada Vakalomalagi? O na vakauqeti ira vakacava me ra dau veivakacegui vei ira tale eso?

iTaviqaravi e Rawa ni Caka

• Kauta mai ki na kalasi eso na iyaya dau veivakacegui, me vaka na itutuvi se ivadreti. Tarogi ira na gone se cava e dau vakacegui ira ni ra rarawa se rere se so tale na leqa. Wilika na 2 Korinica 1:3–4 vata kei ira na gone, ka vakamacalataka ni “veika dredre” e sa dua tale na icavuti ni leqa bibi. Wasea eso na sala sa vakacegui iko kina na Tamada Vakalomalagi, ka vakadinadinataka ni na vakacegui ira tale ga vakakina na gone.

• Vakaraitaka na iyaloyalo ni tamata era papitaiso (raica na Gospel Art Book, naba 103 kei na 104) ni o wilika na 2 Korinica 1:4 kei na Mosaia 18:8–9 vei ira na gone. Vakamacalataka ena gauna ni papitaiso eda sa yalataka ni vakacegui ira na tani. Eda na muria vakacava na ivakasala nei Paula “me keitou vakacegui ira rawa era sa rarawa ena dua na ka”?

• Sureti ira na gone me ra droinitaka e dua na kedra iyaloyaloni ni vukea tiko e dua ka vakaleqai tu. Me ra qai vakamacalataka na sala e rawa ni vakacegui ira kina na tani na caka ni veika oqo.

2 Korinica 2:7–8, 10

Au rawa ni vosoti ira na tani.

Digidigi mai na itaviqaravi eso oqo—se bulia ga na nomu—me vukea na vaqaqacotaki ni nodra gagadre na gone ni vosoti ira na tani.

iTaviqaravi e Rawa ni Caka

• Vakamacalataka vei ira na gone ni a vinakata o Paula vei ira na Yalododonu mai Korinica me ra vosota e dua na tamata ivalavala ca. Wilika na 2 Korinica 2:7–8, 10, ka sureti ira na gone me ra biuta na ligadra e utodra ena veigauna era rogoca kina na vosa vosota kei na sa vosoti.

• Sureti ira na gone me ra dramataka na ka me ra cakava ena gauna e cakava kina e dua na ivalavala kaukauwa. Me ra veivukevuke ni kaya “Vosoti au” kei na “Au sa vosoti iko.” Eda na vukei ira vakacava na tamata me ra kila ni da sa vosoti ira? Vakamacalataka ni dua na sala beka oya mo “vakadinadinataka nomudou loloma,” se vakaraitaka vei ira na loloma (2 Korinica 2:8).

2 Korinica 4:1–2

Au vakabauta ni sa kilikili meu dau dina tikoga.

E vakavuvulitaka o Paula ni o ira na italai i Karisito era sega ni dau lasu vei ira tale eso—era sa “biuta na veika vuni e veivakamaduataki.” Vakananuma titobu na ivakarau eso o rawa ni vaqaqacotaka kina nodra gagadre na gone me ra dau dina ena ka kecega.

iTaviqaravi e Rawa ni Caka

• Vukei ira na gone ni cavuqaqataka na malanivosa “Keimami vakabauta ni sa kilikili me da dau dina tikoga” (Yavu ni Vakabauta 1:13). Vola na malanivosa oqo ena itaube pepa me ra ukutaka na gone ka dara ki vale. Vakamacalataka na dau dina tikoga sai koya na tukuni ni ka dina.

• Kerei ira na gone me ra laveta na ligadra ni o tukuna e dua na ka dina ka biuta sobu ni o tukuna e dua na ka e sega ni dina. Cavuta na iyatuvosa rawarawa ka matata tu, me vaka “Nikua na Sigatabu” se “E tolu tu na ucuqu.” Cakava vakavica na itaviqaravi, ni ra veivukevuke na gone me ra dua ka dau vakavuna na itukutuku dina kei na kena e lasutaki. Na cava na vuna e vinaka kina meda dau dina tikoga?

Vakavulica na iVunau

Gone Qase Cake

2 Korinica 1:3–4

Na Tamada Vakalomalagi e dau vakacegui au, ka rawa niu vakacegui ira tale eso.

Na nanumi ni veivakacegui ni Kalou kivei ira sa rawa ni vakauqeti ira na gone me ra soli veivakacegui vei ira na tani.

iTaviqaravi e Rawa ni Caka

• Ni o wilika na 2 Korinica 1:3–4, kerei ira na gone me ra rogoca e dua na isau ni taro “Na cava e cakava na Kalou ena vukuda?” Vukei ira na gone me ra vola na sala eso e dau vakacegui keda kina na Kalou. Sureti ira na gone me ra wasea na gauna eso era a rarawa se lomaleqa se rere kina ka qai vakacegui ira na Kalou.

• Sureti ira na gone me ra wasea na sala eso eda rawa ni vakacegui ira kina na tani. Solia vei ira na gauna me ra vakasamataka e dua era kila e gadreva na vakacegu ka tuvatuvaka me ra dolele yani vua.

2 Korinica 2:5–11

Au rawa ni vosoti ira na tani.

E rawa ni dredre noda vosoti ira na tani ni ra dau caka ca vei keda. Ia era na vakila na gone o vakavulica na loloma, na vakacegu, kei na marau ni ra vulica me ra veivosoti.

iTaviqaravi e Rawa ni Caka

• Tukuna vei ira na gone ni dua mai Korinica sa ivalavala ca ka “ia na veivakararawataki” vei ira na Yalododonu (raica na 2 Korinica 2:5). Kerei ira na gone me ra vaqaqara ena 2 Korinica 2:7–8 me ra raica na ka e vinakata o Paula me ra cakava na Yalododonu.

• Wasea e dua na gauna o a vosota kina e dua—se vosoti iko e dua—kei na ka o a qai vakila e muri.

2 Koronica 5:6–7

Au sa “lako voli ena vakabauta, ka sega ga ena raica.”

Vakasamataka na ivakarau o na vakayaloqaqataki ira kina na gone mera muria na ivunau ni Kalou ni ra se bera tiko mada ga ni raica na veivakalougatataki era gadreva tu oqo.

iTaviqaravi e Rawa ni Caka

• Wilika na 2 Korinica 5:6–7 kei na Alama 32:21 vata kei ira na gone, ka kerei ira me ra vakaraica na vosa kei na malanivosa e vukea me vakamacalataka na vakabauta. Kerei ira me ra vola na nodra ivakamacala, wilika i cake, ka biuta ena papa.

• Vesuka na mata ni dua na gone, ka kerei ira na vo ni gone me ra dusimaki koya me vukea nona vakaotia na cakacaka me vaka na tara ni dua na vale cecere ena buloko, vakasotara vata na tiki ni dua na ibulibuli, se taubale kosova na rumu. Ena vukei keda vakacava na itaviqaravi oqo me da kila na ibalebale ni “lako ena vakabauta” na Kalou?

• Vakaraitaka na vidio “Pure and Simple Faith” (LDS.org), ka tarogi ira na gone se ra a lako vakacava ena vakabauta na goneyalewa. Wasea e dua na gauna o a gadreva kina mo vakabauta na Kalou. Kerei ira na gone me ra wasea e dua ga na ka era sa sotava me baleta na lako ena vakabauta.

2 Korinica 7:8–11

Na rarawa sa vaka na loma ni Kalou sa vakavuna meu veivutuni.

Sa matau tu me ra dau madua se veilecayaki na gone ni ra tobo ni cakava voli e dua na cala. Vukei ira ni veidutaitaka na yalo oqori mai na rarawa sa vaka na loma ni Kalou, ka dau vakavuna na veivutuni dina.

iTaviqaravi e Rawa ni Caka

• Vakamacalataka ena 2 Korinica 7:8–11, a tukuna kina o Paula e dua na ivola a vola taumada vei ira na Yalododonu, ka vakaroti ira kina vakadoudou ena vuku ni nodra ivalavala ca. Wilika vata na veitikina oqo. Na cava na vuna a marau kina o Paula ni ra sa rarawa na Yalododonu? Dusimaka ni mataqali rarawa vakaoqori sa vakatokai na rarawa me vaka na loma ni Kalou.

• Kerei ira na gone me ra bobo ka vakasamataka e dua na gauna era a caka cala kina ka vakararawataka na lomadra. Sureti ira me ra tarogi ira vakataki ira, “Na cava e rarawa kina na lomaqu?” Vola ena papa eso na vuna era dau rarawa kina eso ni ra sa caka cala oti, me vaka “au a rere deu na totogitaki” se “au a madualaka na ka era na nanuma na tamata baleti au” se “au kila ni sega ni marautaki au na Tamada Vakalomalagi.” Na isaunitaro cava ena papa e vaka na “rarawa e vaka na loma ni Kalou”? Na cava na vuna e vinaka cake kina na rarawa e vaka na loma ni Kalou mai na veimataqali rarawa tale eso eda rawa ni vakila ni da sa caka cala oti?

Vakauqeta na Vuli e Vale

Tukuna vei ira na gone ni rawa ni ra wasea ki na nodra matavuvale e dua na itaviqaravi ena kalasi nikua, ena gauna beka ni lotu vakamatavuvale.

Vakatorocaketaki Noda Veivakavulici

Vakaraitaka e dua na ivolanikalou. Digitaka e dua na tiki ni ivolanikalou e vakaibalebale vei iko ka vakaraitaka ena nomu valenivuli me ra dau raica wasoma kina na gone. E rawa ni ra veivukevuke na gone ni digitaka e dua na ivolanikalou me vakaraitaki.