Rairai vei Paula e valeniveivesu na Karisito

23–29 ni Sepiteba

Kalatia

“Dou Lako Voli ena Yalo Tabu”

Ni o wilika tiko na Kalatia, na cava e votu mai me baleta na ka era gadreva na gone ena nomu kalasi me ra vulica?

Vola na Veika o Uqeti Kina

ivakatakilakila ni veiwasei

Sureta na Veiwasei

Solia vei ira na gone e vica na miniti me ra droinitaka e dua na ka era a vulica ena dua na veitalanaoa vakosipeli mai vale se ena lotu. Soqona na droini me ra qai vakilakila na gone se cava e matataki ena droini yadua.

ivakatakilakila ni veivakavulici

Vakavulica na iVunau

Gone Sobu

Kalatia 5:22–23

Sa vukei au na Yalo Tabu meu vakila na loloma, marau kei na vakacegu.

Sa rawa ni ra vakila na gone sobu na vua ni Yalo. Oqo ena vakarautaki ira me ra dau vaqara na veivakayarayarataki ni Yalo Tabu ena nodra bula taucoko.

iTaviqaravi e Rawa ni Caka

• Tevuka se vakaraitaka na iyaloyalo ni vica na mataqali vuanikau, ka kerei ira na gone me ra vakamacalataka se vakacava tu na ikanakana ni vuanikau yadua. Vakamacalataka me vaka ni duidui na ikanakana ni vuanikau, e rawa ni da vakila na Yalo Tabu ena veisala duidui, me vaka na loloma kei na vakacegu. Kerei ira me ra vakamacalataka se ra dau vakila vakacava na Yalo Tabu.

  apolo ena vunikau

  E rawa ni ra vakila na gone ena veitabayabaki kece sara na vua ni Yalo.

• Wilika na Kalatia 5:22–23 vata kei ira na gone, ka vakamacalataka na vosa eso ena sega ni matata vei ira. Sureta na gone yadua me digitaka e dua na vua ni Yalo e cavuti ena veitikina oqo ka tukuna e dua na gauna a vakila kina na vua ni Yalo. Sureti ira na gone me ra droinitaka na iyaloyalo rawarawa eso ni veika era sotava.

Kalatia 6:2

E vinakata o Jisu Karisito meu vukei era na vakaleqai.

Na idusidusi ena Kalatia 6:2 e tautauvata kei na ivakavuvuli nei Alama ena Mosaia 18:8 vei ira na tamata era sa vakarau papitaiso tiko. Taura na madigi oqo mo vukei ira na gone me ra vakavakarau ki na veiyalayalati ni papitaiso.

iTaviqaravi e Rawa ni Caka

• Vakaraitaka na iyaloyalo ni nona papitaiso e dua na gone (me vaka Gospel Art Book, naba 104). Tarogi ira na gone se cava e cakava tiko na gone oya. Vakamacalataka ni gauna eda papitaiso kina, eda sa caka veiyalayalati, se yalayala. Wilika na Kalatia 6:2 se Mosaia 18:8 me vukea nodra vulica na gone e dua na ka eda yalataka me da cakava: me da veivuketaka na noda icolacola. Sureti ira na gone me ra droinitaka na iyaloyalo ni sala eso e rawa ni ra vukei ira kina era vakaicolacola tu.

• Wilika vei ira na gone na malanivosa oqo mai na Kalatia 6:2: “Dou veivuke ni colata na nomudou icolacola.” Me vakaraitaki na ibalebale ni vosa oqo, solia vua e dua na gone e dua na ka bibi me colata. Qai kerea e dua me bole me vukea na gone oya ni colata na iyaya. Vakamacalataka vei ira na gone ni levu na ka e rawa ni vaka na icolacola, me vaka na tauvimate se yalorarawa se galili. Na cava eda rawa ni cakava me vukea e dua ena mataqali icolacola vaqo?

Kalatia 6:7–9

Na noda ivalavala; se vinaka se ca, e tiko na kena isau.

Sa rui ka bibi me ra kila na gone ni noda digidigi e tiko na kena isau. E rawa ni o vakayagataka na Kalatia 6:7–9 mo vakaraitaka na dina oqo.

iTaviqaravi e Rawa ni Caka

• Vakaraitaka e dua na sorenikau kei na dua na kakana draudrau. Wilika na Kalatia 6:7–9 vei ira na gone. Kerei ira na gone me ra vakatayaloyalotaka ni ra tea e dua na sorenikau ni ra rogoca na vosa “kaburaka.” Kerei ira me ra vakatayaloyalotaka ni ra betia e dua na kakana draudrau mai vuna ni ra rogoca na vosa “tamusuka.”

• Vakaraitaka vei ira na gone e vica na mataqali kakana draudrau, ka vukei ira me ra vaqara kina na sorena. Biuta ena dua na bilo, me ra qai veivukevuke na gone me ra tomika e dua ka tukuna se kakana draudrau cava ena tubu ni ra tea na sorenikau oya. Vukei ira me ra raica me vaka ga ni na vakatau ena sorenikau eda tea na kakana draudrau eda na tauca, na digidigi eda cakava ena vakatautaka na isau kei na veivakalougatataki eda na qai ciqoma.

• Cakava e dua na laini ena fuloa mai na pepakabi. Biuta e dua na mata mamarau kei na mata rarawa ena mua ni laini veibasai. Sureta e dua na gone me tucake ena lomadonu ni laini, me ra qai cavuta na vo ni gone na digidigi ena vakavuna na marau se rarawa (o na gadreva beka mo vakarautaka e vica na ivakaraitaki). Me baleta na digidigi yadua, kerea na gone e lomadonu me kalawa yani ki na yasana ni marau se na yasana ni rarawa. Cakava vakavica na itaviqaravi, me ra qai veivukevuke na gone me ra tucake ena ivavakabi.

ivakatakilakila ni veivakavulici

Vakavulica na iVunau

Gone Qase Cake

Kalatia 5:1

Sa sereki keda o Jisu Karisito.

Eso na tamata era nanuma ni kosipeli i Jisu Karisito e yalana nodra galala. Vakasamataka na ivakarau mo vukei ira kina na gone me ra raica ni sa kauta dina mai na veivagalalataki mai na ivalavala ca kei na mate.

iTaviqaravi e Rawa ni Caka

• Sureti ira na gone me ra wilika na Kalatia 5:1 Ena sala cava e vagalalataki keda kina o Jisu Karisito me rawa ni da lesu vua na Tamada Vakalomalagi? Vakaraitaka na iyaloyalo kei Jisu ni vakararawataki mai Kecisemani kei na Nona Tucaketale me vukea nodra kila na gone na nona vagalalataki keda o Jisu mai na mate (raica na Gospel Art Book, naba 56, 59).

• Lagata vata ka railesuva na qaqa ni dua na sere baleta na iVakabula, me vaka na “Au sa Kila ni Bula Tu” (Sere ni Lotu, naba 136). Kerei ira na gone me ra vaqara na qaqa ni sere ka vakamacalataka na ivakarau ena vagalalataki keda kina o Jisu Karisito mai na ivesu vakayalo.

Kalatia 5:22–23

Kevaka au “lako voli ena Yalo Tabu,” Au rawa ni marautaka na “vua ni Yalo Tabu.”

O na vukei ira vakacava na gone me ra kila na gauna era vakila kina na Yalo Tabu?

iTaviqaravi e Rawa ni Caka

• Solia vei ira na gone e dua na tikini pepa buli tu vaka e dua na vuanikau, ka kerea vua me vaqara e dua na “vua ni Yalo Tabu” ka volai tu ena Kalatia 5:22–23. Sureti ira me ra vola e dua na vuana ena dua na yasa ni pepa kei na vosa e veibasai na kena ibalebale ena yasana kadua. (Vukei ira me ra kila na vosa e sega ni matata vei ira.) Sureti ira mera wasea na nodra vuana ki na kalasi.

• Sureti ira na gone me ra wilika baleta na vua ni Yalo Tabu ena Kalatia 5:22–23 ka vola se droinitaka na iyaloyalo ni dua na gauna a vukei ira kina na Yalo Tabu ni vakila e dua vei ira na vuana oya. Kerei ira me ra wasea na nodra italanoa se iyaloyalo kei na dua tale na tamata ena kalasi. Na cava na vuna e dua kina na sala vinaka na vuanikau me vukei keda ni kila na ivakarau e dau vakayarayarataki keda kina na Yalo Tabu?

Kalatia 6:7–9

Na noda ivalavala, se vinaka se ca, e tiko na kena isau.

Vukea me ra kila na gone ni isau ni noda itovo ena so na gauna dau yaco mai ena gauna vata ga ka so tale na gauna ena yaco mai “ena kena yabaki” (tikina e 9).

iTaviqaravi e Rawa ni Caka

• Wilika vata na Kalatia 6:7–9. Sureti ira na gone me ra droinitaka na iyaloyalo rawarawa ka tea kina e dua na tamata na sore ni dua na vuanikau ka tamusuka e dua na vuanikau duatani. Na cava na vuna ena sega kina ni rawa oqo? Na cava ena sega ni rawa vakakina na digidigi cala qai sotava tiko na kena isau vinaka?

• Ni cakava vata vakalasi e dua na mase me vaka e tiko ena tabana ni itaviqaravi ena macawa oqo. Sureti ira na gone me ra vakasamataka eso tale na vosa mai na kena ena mase ka matataka na yalo vinaka mai na Yalo Tabu se digidigi cala ka na rawa ni vakasevi Koya tani. Veivosakitaka na isau ni digidigi eso era vakasamataka.

• Sureti ira na gone me ra vola eso na veivakalougatataki era nuitaka me ra ciqoma mai vua na Tamada Vakalomalagi. Vukei ira me ra vakasamataka na “sorenitei” me ra na kaburaka me rawa ni ra “tamusuka” kina na veivakalougatataki oqori.

ivakatakilakila ni vuli

Vakauqeta na Vuli e Vale

Sureti ira na gone me ra vakaraica toka na isau vinaka eso, se “vuana,” e yaco mai baleta na vakatulewa vinaka era cakava ena macawa oqo. Tukuna vei ira ena macawa mai oqo e rawa ni ra mai wasea na veika era sotava.

Vakatorocaketaki Noda Veivakavulici

Moica na itaviqaravi me ganita nodra yabaki na gone. Solia vei ira na gone na madigi me ra vakaitavi, ia nanuma tiko ni na duidui na ka era rawata me vaka na nodra dui yabaki kei na yalomatua. O ira na gone sobu era na gadreva vakalevu cake beka na veituberi kei na veidusimaki. Ni ra sa matua mai, sa rawa ni ra cau vakalevu na gone ka rawa ni vinaka sara ni wasea na nodra vakasama. (Raica na Veivakavulici ena iVakarau ni iVakabula, 25–26.)

tabana ni itaviqaravi: e vukei au na Yalo Tabu meu vakila na loloma