2-8 ni Sepiteba

1 Koronica 14–16

“Sa Sega ni Vu mai Vua na Kalou na Veisei, ia na Vakacegu”

Ni o wilika na 1 Korinica 14–16, ena vukei iko na Yalo Tabu mo kila na ka mo vakavulica vei ira na gone ena nomu kalasi. Railesuva na ituvatuva oqo me baleta na ikuri ni vakasama.

Vola na Veika o Uqeti Kina

Sureta na Veiwasei

E rawa ni o tekivu na lesoni ni macawa qo ena nomu wilika i cake na 1 Korinica 14:26 . Dusimaka ni gauna eda soqoni vata yani kina ena lotu, e rawa ni da veivakatataki cake (se da tara cake ka vukea) eso tale ni da veiwasei. Na cava e rawa ni ra wasea na gone ena kalasi nikua me ra vakatataka cake e dua?

Vakavulica na iVunau

Gone Sobu

1  Korinica 15:12–22

E rawa niu bula vata kei Tamada Vakalomalagi niu sa mate baleta ni sa tucake tale mai na mate o Jisu Karisito.

E rawa ni o vakavulica vakacava vei ira na gone ena nomu kalasi baleta ni sa tucake tale o Jisu Karisito sa rawa ni da bula tale?

iTaviqaravi e Rawa ni Caka

• Tokaruataka vakavica na veimalanivosa oqo vata kei ira na gone: “Ena vakabulai kece talega ena vukui Karisito” (1 Korinica 15:22). Vakaraitaka na iyaloyalo ni iVakabula sa tucake tale (raica na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale). Vakamacalataka ni da na mate taucoko ena dua na siga, ia baleta ni sa tucake tale o Jisu, eda na bula tale mai ni da sa mate.

• Vakayagataka e dua na lesoni vakaraitaki vaqo mo vakavulica kina na Tucaketale: Vakaraitaka vei ira na gone e dua na jakete, ka matataka na yagoda. Ni da bula tiko, e tawana tiko na yagoda na yaloda, ka rawa ni veitosoyaki na yagoda (dara na jakete). Ni da sa mate, sa laiva na yagoda na yaloda, sa sega ni rawa ni veitosoyaki na yagoda (luvata na jakete ka biuta ena dua na teveli me vaka e dua na yago sa sega kina na yalo). Ni da sa tucaketale, sa lesu tale na yaloda ki na yagoda (dara tale na jakete), ka rau sa sega tale ni veitawasei. Me ra veivukevuke na gone me ra dara na jakete ka luvata ni vakamacalataka e dua tale na gone na ka e yaco ni da sa tucaketale.

1  Korinica 15:29

Au rawa ni papitaiso me baleti ira na tamata era mate.

E rawa vei ira na gone o vakavulica me ra vakarautaki ira ena gauna oqo me ra lako ki na valetabu ka papitaiso ena vukudra na mate ni ra sa yabaki 12. A cavuta o Paula na ivunau bibi oqo ena nona ivola vei ira mai Korinica.

iTaviqaravi e Rawa ni Caka

• Vukei ira na gone me ra vakasamataka na veika era na sega ni rawa ni cakava vakataki ira ( me vaka nodra colata e dua na ka bibi se tara e dua na ka mai na dua na vata rewaicake). O cei e vukei au meu cakava na veika vaqo? Vakaraitaka e dua na iyaloyalo ni dua na tubumu ka a mate ni se bera ni papitaiso. Tukuna vei ira na gone me baleta na tamata oqo, ka vakamacalataka ni na sega ni rawa ni papitaiso na tamata oqo kevaka e sega nona veivuke e dua e vuravura.

• Taroga vei ira na gone kevaka e dua nodra lewe ni matavuvale sa lesu mai valetabu me laki papitaiso ena vukudra na mate. Vakaraitaka na iyaloyalo ni tobu ni veipapitaisotaki ni valetabu. Era kila tiko beka na gone na ka e dau caka e ke? Vakamacalataka ena loma ni valetabu e rawa ni da papitaiso kina ena vukudra na mate era se bera ni papitaiso. Oti sa na qai vakatau vei ira na tamata oqori nodra ciqoma na papitaiso.

1  Korinica 15: 40–41.

E vinakata na Tamada Vakalomalagi meu bula vata kei Koya ena matanitu vaka silesitieli.

E rawa vakacava ni o vakavulica vei ira na gone me baleta na matanitu vaka silesitieli, teresitieli, kei na telesitieli? E rawa ni veivuke na itaviqaravi oqo.

iTaviqaravi e Rawa ni Caka

• Vola ena papa selesitieli, teresitieli, kei na telesitieli. Vukei ira na gone me ra cavuta na vosa eso oqo.

• Vakaraitaka na iyaloyalo ni matanisiga, vula, kei na kalokalo O cei e serau duadua? Wilika na 1 Korinica 15:40–41 vei ira na gone (raica talega na iVakadewa nei Josefa Simici, 1 Korinica 15:40, ivakamacala e ra a). Vakamacalataka ni matanisiga, vula kei na kalokalo eratou matataka na matanitu e rawa ni da laki bula kina ni da sa tucake tale. Ena matanitu vaka silesitieli, e rawa ni da bula vata kei Tamada Vakalomalagi.

• Droinitaka na matanisiga ena papa ka biuta na tikinipepa lalai, se ikabakaba, ena qele ka me yaco ki na matanisiga. Na pepa yadua e rawa ni matataka e dua na ka eda gadreva me rawa ni da curu kina ki na matanitu vaka silesitieli (raica na V&V 76:50–53). Solia vei ira na gone me ra wasea nodra vakasama ka kalawa yani ki na matanitu vaka silesitieli

A vakatauvatana o Paula na lagilagi vaka silesitieli ki na matanisiga.

Vakavulica na iVunau

Gone Qase Cake

1  Korinica 15:12–22

Ena vukui Jisu Karisito kei na nona Tucaketale, eda na tucake tale.

Era kila beka na gone o vakavulica na bibi ni nona Tucaketale o Jisu Karisito? E rawa ni veivuke na vakasama eso oqo.

iTaviqaravi e Rawa ni Caka

• Sureti ira na gone me ra veivukevuke ni wilika na veitikina ena 1 Korinica 15:12–22, ka vaqara na isaunitaro “Na cava ena yaco kevaka a sega na tucaketale?”

• Sureti ira na gone me ra matanataka na ivakarau me vakamacalataki kina na tucaketale vua e dua. Me baleta eso na vakasama, raica na ittukutuku nei Thomas S. Monson “Mrs. Patton—the Story Continues” (Ensign se Liaona, Nove. 2007, 21–24). Raica talega na vidio “Until We Meet Again” (LDS.org). Wasea na nomu ivakadinadina me baleta na tucaketale i Karisito.

1  Korinica 15:12–13, 20–22, 29.

E rawa niu vakavakarau meu gole ki valetabu meu papitaiso ena vukudra na mate.

Ni ra sa yabaki 12 na gone, sa rawa ni ra ciqoma e dua na ivolatara ka laki papitaiso ena vukudra na mate ena valetabu. E rawa vakacava mo vukei ira me ra vakavakarau?

iTaviqaravi e Rawa ni Caka

• Wilika na 1 Korinica 15:29. Na cava era a cakava tiko na Yalododonu ena gauna nei Paula eda sa cakava tale tikoga nikua?

• Tarogi ira na gone na vuna eda papitaiso kina ena vukudra na mate. Kevaka e ganita, vakamacalataka ni vuqa vei ira na tubuda a sega ni donumaki ira na madigi me ra papaitaiso ka vakadeitaki ena bula oqo. Ena valetabu, e rawa ni da papitaiso ka vakadeitaki ena vukudra.

• Ni vo e vica na siga me caka na kalasi, kerea nona itubutubu e dua vei ira na gone me vakarautaki koya mai me wasea nona vunikau ni matavuvale, se tukuna na italanoa baleta e dua na tubuna. E rawa talega ni o wasea baleti ira na tubumu.

• Sureta e dua ena matabisopi me wasea eso na ka e rawa ni ra cakava na gone me ra kilikili kina ni curu ki na valetabu. Tarogi ira na gone ena ka e rawa ni ra cakava me ra nanuma tiko kina me ra cakava na veika oqo. Vola na nodra vakasama ena papa ni volavola. Sureti ira me ra biuta nodra takete me ra lako ki na valetabu ena dua na siga.

1  Korinica 15: 40–41.

Oti na noqu tucake tale mai na mate, sa rawa niu laki bula ena matanitu vaka silesitieli.

Me vakavulici ira na kai Korinica me baleta na yago era na rawata ena Tucaketale, a cavuta o Paula e tolu na ivakatagedegede ni lagilagi: silesitieli, teresitieli, kei na telesitieli.

iTaviqaravi e Rawa ni Caka

• Wilika na 1 Korinica 15:40–41 ka sureta e dua na gone me droinitaka e dua na matanisiga, vula, kei na kalokalo ena papa. Tarogi ira na lewe ni kalasi me ra tukuna na mataqali yago vakaturi cake tale vakacava e matataki ena droini yadua.

• Lagata vata e dua na sere me baleta na valetabu, me vaka “The Lord Gave Me a Temple” (Children’s Songbook, 153). Na cava e vakavulica vei keda na sere oqo me baleta na vakavakarau ni laki bula ena lagilagi vaka silesitieli?

• Vakamacalataka ni a raica o Josefa Simici ena raivotu e tolu na matanitu ka tautauvata kei na mataqali yago e vakamacalataka o Paula. Vukei ira na gone me ra kunea na malanivosa mai na Vunau kei na Veiyalayalati 76:50–53, 70; 76:71–79; 76:81–82 ka vakamacalataka na matanitu e tolu oqo.

Vakauqeta na Vuli e Vale

Sureti ira na gone me ra kerei ira nodra itubutubu me ra talanoataka e dua na italanoa me baleta e dua na tubudra. E rawa ni ra wasea na italanoa ki na kalasi ena macawa ka tu mai.

Vakatorocaketaki Noda Veivakavulici

Vakayaloqaqataki ira na gone me ra taro. “Segata mo okata nodra taro [na gone] me madigi eso, ka sega ni veivagolei tani se vakalatilati ena nomu lesoni. … Na taro vaqori e dau solia na vakasama bibi baleta na veika era vakasamataka tiko na gone, na nodra kauwai, kei na ivakarau era sa raica tiko kina na veika era vulica. Vukei ira me ra raica ni isau ni nodra taro e rawa ni kunei ena ivolanikalou kei na nodra vosa na parofita bula” (Veivakavulici ena iVakarau ni iVakabula, 25–26).