“2-8 ni Sepiteba. 1 Korinica 14-16: ‘Sa Sega ni Vu ni Veisei na Kalou, sa Vu ni Vakacegu ga’’’ Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“2-8 ni Sepiteba. 1 Korinica 14-16,” Lako Mai, Mo Muri Au—Me Baleti Ira na Tamata Yadua kei na Matavuvale: 2019
2–8 ni Sepiteba
1 Korinica 14–16
“Sa Sega ni Vu ni Veisei na Kalou, sa Vu ni Vakacegu ga”
Vola na veika o vakauqeti kina ni o wilika na 1 Korinica 14–16. Masulaka na veika e sa vakavulici iko kina na Yalotabu, ka kerea vua na Tamada Vakalomalagi kevaka e tiko tale eso na ka e vinakata o Koya mo vulica.
Vola na Veika o Vakauqeti Kina
Baleta ni se ka vou na Lotu kei na kena ivunau ena vanua o Korinica, e sega ni ka vou ni ra sotava na veilecayaki o ira na Yalosavasava e Korinica. E vakatavulica vei ira o Paula na dina bibi ni kosipeli: “ni sa mate na Karisito ena vuku ni noda ivalavala ca … ni sa bulu talega, ka ni sa tucake tale e nai katolu ni siga” (1 Korinica 15:3–4). Ia eso na lewe ni lotu era sa tekivu me vakatavulica ni “sa sega na tucake tale mai na mate” (1 Korinica 15:12). E vakamasuti ira o Paula me ra “taura tiko ga na” dina era sa vakatavulici kina (1 Korinica 15:2). Ni da sotava na veivakasama e veisaqasaqa kei na dina vakosipeli, e vinaka meda nanuma ni “sa sega ni vu ni veisei na Kalou, sa vu ni vakacegu ga” (1 Korinica 14:33). Na noda vakarogoci ira nai talai lumuti ni Turaga ka taura matua na dina era vakavulica vakawasoma ena rawa ni vukei keda meda kunea na vakacegu ka “dou tudei ena vakabauta” (1 Korinica 16:13).
Vakasama eso ni Vuli iVolanikalou Yadua
Au rawa ni vakasaqara nai solisoli ni parofisai.
O sa bau vakataroga beka se cava nai solisoli ni parofisai? Sai koya beka nai solisoli ni tukuna na veika e se bera ni yaco? Ena rawa beka ni dua e ciqoma nai solisoli oqo? Se e baleti ira ga na parofita?
Na Peresitedi ni Lotu e tamata duadua ga ena rawa ni ciqoma na parofisai kei na vakatakila me baleta na Lotu taucoko; ia, nai Dusidusi kina iVolanikalou e vakamacalataka ni parofisai sai koya na “vosa se volavola e vakauqeti vakalou, ka ciqoma e dua na tamata ena vakatakila mai na Yalo Tabu. … Ni sa parofisai e dua na tamata, e tukuna se vola o koya na veika e vinakata na Kalou me kila, me baleta na nona vakatorocaketaki se baleta na nodra vakatorocaketaki o ira na tani” (iDusidusi kina iVolanikalou, “Parofisai,” scriptures.lds.org; raica talega na VV 100:5–8). Ai Vakatakila 19:10 e vakamacalataka talega ni yalo ni parofisai, sai koya nai “tukutuku i Jisu.”
Na cava o vulica me baleta nai solisoli vakayalo mai na 1 Korinica 14:3, 31, 39–40? Na cava beka e tukuna tiko o Paula ena gauna e sureti ira kina na kai Korinica me ra “gadreva me ra dau parofisai”? (1 Koronica 14:39). Ena rawa vakacava mo ciqoma na veisureti oqo?
Raica talega Na Tiko Voli Mai na Lekutu 11:24–29; Jekope 4:6–7; Alama 17:3; Vunau kei na Veiyalayalati 11:23–28.
Na cava e tukuna kina o Paula me ra galu ga na yalewa ena lotu?
Na veivakavulici nei Paula ena 1 Korinica 14:34–35 ena rawa ni vakavureveilecayaki, baleta ena ivola vata oqo e vola kina o koya ni o ira na marama era masumasu ka parofisai (raica na 1 Korinica 11:5). Na iVakadewa i Josefa Simici e veisosomitaka kei na vosa na vosa ena tikina e 34 kei na 35 kei na vosa na veiliutaki. Na veivakamatatataki oqo e vakatura ni o Paula e rawa ni vosa tiko vei ira na marama era via taura vakaukauwa ni dodonu ni veiliutaki ena veisoqoni ni Lotu. (Raica talega na 1 Timoci 2:11–12.)
Raica talega na “Na Marama ena Lotu” iUlutaga Va-Kosipeli, topics.lds.org.
E vorata na mate o Jisu Karisito.
Na Tucake tale mai na mate i Jisu Karisito e tiki bibi ni vakabauta Va-Karisito, ena rawa beka ni tukuni ni kevaka e sega ni yaco ena sega na vakabauta Va-Karisito—me vaka na vosa nei Paula, “sa ka walega na neitou vunau, a ka wale talega na nomudou vakabauta” (1 Korinica 15:14). Ia eso na Yalosavasava mai Korinica era sa tekivu me vakatavulica ni “sa sega na tucake tale mai na mate” (1 Korinica 15:12). Me vaka ni o wilika na veika e kaya o Paula ena 1 Korinica 15, taura na gauna mo vakasamataka vakatitobu ena duatani vakacava na nomu bula kevaka o sega ni vakabauta na Tucake tale mai na mate. E sa vakalougatataki iko vakacava? Na veivakalougatataki cava ena yaco mai vei iko baleta ni sa tucaketale o Jisu Karisito? (raica na 2 Nifai 9:6 – 19; Alama 40:19 – 23; ni Vunau kei na Veiyalayalati 93: 33 – 34). Na cava nai balebale ni malanivosa na “kevaka sa sega ni vakaturi cake tale na Karisito, sa sega ni yaga na nomudou vakabauta”? (tikina 17).
Na yago sa tucake tale mai na mate e duidui mai na yago oqo.
O sa bau vakataroga beka e vakacava tu beka na yago e tucake mai na mate? Ena 1 Korinica 15:35, era vakataroga na veika oqo o ira na kai Korinica. Wilika na isaunitaro nei Paula ena tikina 36–54, ka toqa toka na vosa kei na veimalanivosa era vakamacalataka na duidui ena yago oqo kei na yago sa vakaturi mai na mate. Me vaka ena tikina 40–42 e vakatavulica ni yago e vakaturi mai na mate ena vakaiukuuku mai me vaka na duidui ni veimatanitu vakalomalagi, me vaka na matanisiga, vula, kei na kalokalo na duidui ni kena rarama (raica talega na iVakadewa i Josefa Simici, 1 Korinica 15:40; VV 76:50–112).
Raica talega na Alama11:43–45; Luke 24:39.
“Sa duatani nai ukuuku ni matanisiga” (1 Korinica 15:41).
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
Eda vulica mai na tikina 29 ni o ira na Yalosavasava ena gauna makawa era vakaitavi ena papitaisotaki ni mate, me vaka eda vakayacora ena Lotu nikua. Sa vakacava na veika eda cakava tiko vakavuvale me baleta na kena vakarautaki na yacadra o ira na noda qase e liu me baleta na cakacaka vakalotu ni valetabu? Raica talega na “Papitaisotaki ni Mate,” iUlutaga Va-Kosipeli, topics.lds.org.
Na iyaya se iyaloyalo cava eda rawa ni vakaraitaka me vukea noda matavuvale me ra kila vakavinaka eso na vosa e vakayagataka o Paula me vakamacalataka na duidui ni yago oqo mai na yago e vakaturi cake mai na mate? Me vakaoqo, me vakaraitaka na duidui e tiko ena vuca kei na sega ni vuca (raica na tikina 52–54) e rawa ni o vakaraitaka na kaukamea e sa veveka kei na kaukamea e sega ni veveka (me vaka na sitila). Se e rawa ni o vakatautauvatataka e dua na ka e malumalumu kei na dua na ka kaukauwa (raica na tikina 43).
E dua na veitalanoa me baleta na veitikina oqo ena rawa ni vakaibalebale cake kevaka e kila na nomu vuvale e dua e sa takali yani. E rawa ni ra vakadinadinataka na lewe ni vuvale na nona kauta tani o Jisu Karisito na “bati gaga ni mate” (tikina 56). Elder Paul V. Nai tukutuku nei Johnson “Ia Ena Sega Tale Na Ciba” (Ensign se Liaona, Me 2016, 121–23) e rawa ni wiliki me ikuri ni veitalanoa.
Me vukea na nomu lewe ni vuvale me ra raici ira na tikina oqo, e rawa ni o droinitaka e dua na wirini ena qele ka tukuna vua e dua na lewe ni vuvale me “tudei” e loma ni vesu tu na matana ni ra tovolea tiko na kena vo me ra tosoi koya tani mai na wirini oya. Na cava na kena duidui ni sega ni vesu tu na matana ka rawa ni “sarava”? Na cava eda rawa ni cakava meda “tudei” ena noda bula ni da sa temaki meda vakayacora na digidigi cala?
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakavinakataki ni Vuli Yadudua
Vakaraica na ivakarau. Ena ivolanikalou eda raica kina na ivakarau e vakayacora kina na Turaga na Nona cakacaka. Nai vakarau cava eso o kunea ena 1 Korinica 14 ena rawa ni vukei iko mo kila vinaka cake nai walewale me vakavulici ira ka laveti ira cake na tani? Raica talega na VV 150:13–23.
Yalewa, Na Cava o Sa Tagica? mai vei Mark R. Pugh