26 ni Okosita–1 ni Sepiteba

1 Korinica 8–13

“Ia Koi Kemudou na Yago i Karisito”

Ni o wilika ena masumasu na 1 Korinica 8–13, ena rawa ni vosa vei iko ena domo lailai na Yalo Tabu (raica na 1 Tui 19:11–12). Na volai ni veika o vakila ena vukei iko mo vakananuma mai na veika o vakila ka vakasamataka ena gauna o vuli-ka tiko kina.

Vola na Veika o Vakauqeti Kina

Ena gauna i Paula, e dua na vanua ni veivoli vutuniyau o Korinica ka ra vakaitikotiko kina o ira mai na veiyasana kei Roma. Na levu ni mataqali tovo vakavanua kei na veimatalotu ena loma ni vanua oqo, kei na dredre voli ni kena sagai me ra vakaduavatataki na lewe ni Lotu e Korinica, sa qai vukei ira o Paula me ra kunea na duavata ena nodra vakabauti Karisito. Na duavata oqo e levu cake mai na tiko veisaututaki; e sega ni kerei ira tiko o Paula me ra vosota ga na nodra veiduidui eso. Ia, e vakatavulica o koya ni gauna eda lewena kina na Lotu i Jisu Karisito, eda sa “papitaisotaki ga kina yago e duabau,” ka sa gadrevi na veitikini yago kecega (1 Korinica 12:13). Ni yali e dua na lewena, e sa vaka ni sa yali e dua na tiki ni yago, ka sa malumalumu kina na yago. Ni sotava na mosi e dua na lewe ni lotu, e dodonu meda vakila kece ka veivuke me vakavinakataki. Ena mataqali duavata vakaoqo, e sega walega ni kilai na duidui e vakamareqeti, baleta ni kevaka e sega na tikina yadua kei na nodra isolisoli kei na taledi duidui, ena sega ni rawaka vinaka sara na yago. Kevaka o sa vakila tu ni vaka ga o tu i vale ni o lako i Lotu se raica ni o veinanuyaka kevaka e dodonu mo tiko e kea, na itukutuku nei Paula vei iko sai koya ni duavata e sega ni o koya ni da tautau vata. E gadrevi iko o ira na wekamu vakalotu, ka o gadrevi ira talega na wekamu vakalotu.

Vakasama eso ni Vuli iVolanikalou Yadua

1 Korinica 10:1–13

E dau vakarautaka na Kalou na sala meda drotani mai na veitemaki.

Na veika e vakilai vakayalo, koya sara madaga na kena e veivakurabuitaki, e sega ni vakuwai keda mai na veitemaki e “vorata rawa na tamata” (1 Korinica 10:13). E rawa ni dua na inaki oya e vola kina o Paula me baleta na dredre ni veitemaki era sotava ena gauna i Mosese o ira na Isireli, e dina ga ni ra vakadinadinataka na cakamana veivakurabuitaki eso (raica na Lako Yani 13:21; 14:13–31). Me vaka ni o wilika 1 Korinica 10:1–13, na veivakaroti cava ena veika era sotava na Isireli e rawa ni yaco vei iko? “Idrodro“ mai na veitemaki cava beka sa vakarautaka vei iko na Tamada Vakalomalagi? (raica talega n Alama 13:27–30; 3 Nifai 18:18–19).

1 Korinica 10:16–17; 11:16–30

Na sakaramede e vakaduavatataki keda ni da sa dauvakamuri Karisito.

E dina ga ni oka talega ena cakacaka vakalotu ni sakaramede na yalayala mai vua na tamata yadua kei na Turaga, e dua talega na ka eda sotava eda wasea kei ira na tani—eda dau vakaivotavota vata ena sakaramede, vakayago ni dua na Yalododonu. Wilika na veika e vakatavulica o Paula me baleta na sakaramede, ka vakasamataka ena rawa vakacava ni vukea e “lewe vuqa” na cakacaka tabu vakalotu oqo me ra “dua bau” vei Karisito (1 Korinica 10:17). Ena rawa vakacava ni o kunea na kaukauwa ni o vakaivotavota ena sakaramede kei ira na tamata vakabauta tale eso? Ena vakayarayarataka vakacava na ivakarau ni nomu vakavakarau kina sakaramede kei na nomu sasaga mo maroroya na nomu veiyalayalati ni papitaiso?

1 Korinica 11:3–15

Na cava e vola kina o Paula me baleta na ubi ni ulu kei nai kotikoti ni ulu?

E vakaibalebaletaka tiko na ivakarau vakavanua ni sulusulu kei na sasauni o Paula, me rawa ni vakavulica na isema ni tagane, yalewa kei na Turaga. E dina ga ni da sa sega ni muria na ivakarau vakaoqori nikua, e rawa ni da vulica mai na veika e cauraka o Paula ena 1 Korinica 11:11 ni sa gadrevi ruarua na yalewa kei na tagane ena ituvatuva ni Turaga, ena vakamau kei na Lotu. Me vaka ni o Elder David A. Me vaka e vakatavulica o Elder DavidA. Bednar, “Sa nakiti veirau na tagane kei na yalewa me rau dui veivakavulici, veivakaukauwataki, veivakalougatataki, ka veivakataucokotaki vakairau” ni rau toso cake vata yani ki na bula vakacerecerei (“Eda vakabauta na Tiko Savasava,” Ensign or Liaona, Me, 2013, 42; raica talega na Marika 10:6–9).

1 Korinica 12–13

Na isolisoli vakayalo e soli me yaga vei ira na luvena na Tamada Vakalomalagi.

Na ituvatuva ni solisoli vakayalo ena 1 Korinica 12–13 e sega ni takiveiyaga. Ia e vanua vinaka me tekivutaki kina na nomu kila mai ka vakasamataka vakatitobu na veisolisoli vakayalo e solia mai vei iko na Tamada Vakalomalagi. Na itukutuku me baleta na “iSolisoli Vakayalo” ena Ulutaga Va-Kosipeli (topics.lds.org) ena rawa ni vukei iko mo kila vakavinaka cake na veisolisoli oqo. Ena rawa ni o kuria ki na ituvatuva ni solisoli nei Paula na veisolisoli o sa raica vei ira na tani, vei iko, se vei ira ena ivolanikalou. Kevaka e tiko nomu veivakalougatataki vakapeteriaki, ena rawa talega ni tukuni kina eso na nomu isolisoli vakayalo. Ena vukea vakacava na tarai cake na matanitu ni Kalou na veisolisoli oqo? Vakasamataka na veika o na rawa ni cakava mo kerea “dou gadreva sara vakalevu na veisolisoli vinaka sara” (1 Korinica 12:31).

Raica talega na Moronai 10:8-21, 30; Vunau kei na Veiyalayalati 46:8–26; Yavu ni Vakabauta 1:7.

Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti

Ni o wilika nai volanikalou kei na nomu vuvale, vakasaqara na veivakauqeti me rawa ni o sotava kina na veika e gadreva nomu vuvale. E rawa ni veivuke na vakatutu eso oqo:

1 Korinica 9:24–27

Me vaka ni vakatauvatana o Paula na bulataki ni kosipeli ki na veitaucici, e rawa ni o vakayacora e dua na veitaucici me vakamatatataka na nona ivakamacala. Vakaicocovitaka e dua na salavakatui vei ira kece era vakacavara na veitaucici, ka veitalanoataka ni ra na winitaka na icocovi “sega ni ca rawarawa” o ira era sa yalodina na vakamuri Jisu Karisito (1 Korinica 9:25; raica talega na 2 Timoci 4:7–8). Na cava e dau cakava e dua na daucici qaqa me vakavakarau kina veitaucici? E vakakina, na cava eda rawa ni cakava meda vakavakarau na lesu vua na Tamada Vakalomalagi?

E vakatautauvatataka o Paula na bulataki ni kosipeli kina kena cicivi e dua na veitaucici.

1 Korinica 12:1–11

Nanuma tiko mo veisoliayaka e dua na tiki ni pepa vei ira yadua ka me volai toka e cake na yacana e dua tale na lewe ni vuvale. Kerei ira kece me ra vola na veisolisoli vakayalo era raica ni tiko vei koya na tamata oya. Ena rawa ni o veipasitaka na pepa ena dua na wirini vei ira kece me yacova ni ra sa vola kece kina na nodra isolisoli na lewe ni vuvale yadua.

1 Korinica 12:3

Na cava e gadrevi kina na Yalo Tabu me rawa ni rawati kina e dua nai vakadinadina i Jisu Karisito? Na cava eda rawa ni cakava me sureta na Yalo Tabu me vaqaqacotaka na noda ivakadinadina baleti Koya?

1 Korinica 12:12–27

Na veivakatautauvatataki nei Paula me baleta na yago ena rawa ni dua na sala guiguilecavi dredre me veitalanoataki kina na duavata vakavuvale. Me ivakaraitaki, ena rawa ni droinitaka na lewe ni vuvale e dua na yago e buli tu ga na mata kei na daliga (raica na tikina 17). Na cava e vakatura na veitikina oqo me baleta na noda ivakarau vei ira na lewe ni vuvale yadua?

1 Korinica 13:4–8

Na ivakamacala nei Paula me baleta na loloma vakalou ena rawa ni dua na iulutaga veivakauqeti ni nomu vuvale. Ena rawa ni o lesia na lewe ni vuvale yadua me vulica mai na veitikina ena tikina e 4–8 ka vakatavulica na vo ni vuvale na cava e kena ibalebale me vakayagataki na ivakamacala, ivakaraitaki, kei na veika e sotava na tamata yadua. E ivakaraitaki vakacava ni itovo vakaoqo na iVakabula? Ena rawa ni dou cakava vata na ivola kabi ni veitikina yadua oqo ka valiliga ena veivanua ena nomu vale. Dau maqosa ena cakacaka ni liga!

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Vakatorocaketaki Noda Veivakavulici

Vakaraitaka e dua na iVolanikalou. Vakaraitaka e dua na tikina e vakaibalebale vei iko, ka qai vakaraitaka ena vanua era na raica vakawasoma na leweni vuvale. Sureti ira tale eso na leweni vuvale me ra vakaitavi kece ena kena digitaki e dua na ivolanikalou me vakaraitaki tiko.

“Ai buli madrai eda sa dovia, sa sega li ni ka sa noda vata kina na yago i Karisito? Ni sa dua bauga na madrai, sa qai yagona e dua bauga koi keda e lewe vuqa” (1 Korinica 10:16–17).