“19-25 ni Okosita. 1 Korinica 1–7: ‘Mo Dou Veivinakati Sara’’’ Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“19-25 ni Okosita. 1 Korinica 1–7,” Lako Mai, Mo Muri Au—Me Baleti Ira na Tamata Yadua kei na Matavuvale: 2019
Korinica, Ceva kei Kirisi, na Vale Levu ni Veivakasoqoni, droini mai vei Balage Balogh
19–25 ni Okosita
1 Korinica 1–7
“Mo Dou Veivinakati Sara”
Vola na veika o vakauqeti kina ni o wilika na 1 Korinica 1–7. Na veivakauqeti oqo e rawa ni oka kina na sasagataki ni vulici ni dua tale na vakasama, mo wasea vei ira na tani na veika o sa vulica, se mo vakayaco veisau ki na nomu bula.
Vola na Veika o Vakauqeti Kina
Ena veivula e tiko kina o Paula e Korinica, “sa lewe vuqa na kai Korinica ni ra sa rogoci [koya], era sa vakabauta, ka ra sa papitaisotaki” (Cakacaka 18:8). E ka ni rarawa beka vei Paula me rogoca, ni oti toka ga e vica na yabaki, ni sa yaco na “veisei” kei na “dauveileti” ena kedra maliwa na Yalosavasava e Koronica, ena gauna e yali tu kina o koya era sa rogoca na “vuku ni vuravura oqo” (1 Korinica 1:10–11, 20). Me kena isau, sa vola o Paula na ivola eda sa vakatoka oqo me 1 Korinica. E vuqa tu kina na ivakavuvuli bibi, ka druka sara o Paula ni ra sega tu ni vakarau na Yalosavasava me ra ciqoma na ivunau e via solia vei ira o koya. “Koi au, au sa sega ni vosa rawa vei kemudou, na veiwekani, me vaka vei ira era sa vakayalo,” e tagicaka o koya, “ni dou sa vakayago tikoga” (1 Korinica 3:1–3). Ni sa vakavakarau me wilika na vosa i Paula, ena veivuke meda vakadikeva na noda rawa ni ciqoma na dina—oka kina na noda lomasoli meda rogoca na Yalo ka sasaga meda duavata vakavuvale, vakaveiwekani Yalododonu, kei na Kalou.
Vakasama eso ni Vuli iVolanikalou Yadua
Era dau duavata na lewe ni Lotu va Karisito.
Eda sega ni kila na matailalai kece ni nodra tawaduavata na Yalododonu e Korinica, ia eda sa kila tu baleta na tawaduavata ena noda veimaliwai vakataki keda . Vakasamataka mada e dua nai sema ni veimaliwai ena nomu bula ena rawa ni vinaka cake ena duavata; ka qai vakasaqara na veika e vakatavulica o Paula ena 1 Korinica 1:10–17; 3:1–11 me baleta na lailai ni nodra duavata na Yalosavasava e Koronica. Na raititobu cava soti o rawa ni rawata ena iwalewale ni kena taraicake vakalevu sara na duavata kei ira na tani?
Raica talega na Mosaia 18:21; 4 Nifai 1:15–17; Vunau kei na Veiyalayalati 38:23–27; 105:1–5; “Unity,” Gospel Topics, topics.lds.org.
Me vakataucokotaki na cakacaka ni Kalou, au sa gadreva na vuku ni Kalou.
E dina ni vinaka—ka vakauqeti talega—meda vakasaqara na vuku ena vanua cava ga e rawa ni kune kina (raica na 2 Nifai 9:29; VV 88:118), e veivakaroti kina vakalevu o Paula me baleta na vuku vakatamata ka veivakacalai, ka vakatoka o koya me “vuku ni vuravura oqo.” Ni o wilika na 1 Korinica 1:17–25, vakasamataka vakatitobu na ibalebale ni veimalanivosa oqo. Na cava o nanuma e vakaibalebaletaka o Paula mai na “vuku ni Kalou”? Cava na vuna eda gadreva kina na vuku ni Kalou me vakataucokotaki kina na cakacaka ni Kalou?
Ena nomu sasaga mo rawata kece na nomu itavi ena vakataucokotaki ni cakacaka ni Kalou, o sa bau sotava mada na “rere, kei … na sautaninini levu” a vakila o Paula ni vakatavulici ira tiko na Yalododonu e Koronica? (1 Koronica 2:3). Na cava o kunea ena tikina 1–5 ka solia vei iko na yaloqaqa? Vakasamataka mada o na rawa vakacava ni vakaraitaka na nomu nuitaka vakalevu cake na “kaukauwa ni Kalou” mai na “vuku ni tamata.”
Raica talega na Vunau kei na Veiyalayalati 1:17–28.
Au sa gadreva na Yalo Tabu meu kila vakavinaka kina na veika ni Kalou.
Kevaka o via vulica vakalevu cake e dua na ka vaka na misini ni motoka se na droinitaki vale ni gauna makawa, o na cakava vakacava? Mai na 1 Korinica 2:9–16, e sa duidui vakacava na vulici ni “ka ni Kalou” mai na “veika ni tamata”? Cava na vuna sa dodonu me tiko kina kei keda na Yalo Tabu me rawa ni da kila vakavinaka kina na ka ni Kalou? Ni wiliki oti na veitikina oqo, na cava o nanuma sa dodonu mo cakava mo kila vakavinaka sara kina vakalevu na veika vakayalo? Ena rawa ni veivuke vakacava na vosa i Paula kivua e dua ka sotavi dredre voli ena nona ivakadinadina?
Sa ka tabu na yagoqu.
E vuqa vei ira na tamata e Korinica era nanuma ni ciqomi tu na veimoceri vakailoa, ka buli vakatabakidua na yagodra me ra marautaki. E dua tale na kena itukutukuni, sa sega ni duidui sara o Korinica mai na vuravura edaidai. Na cava e vakavulica o Paula ena 1 Korinica 6:13–20 ena rawa ni vukei iko ni vakamacalataka vei ira na tani na vuna o vinakata kina mo bulataka e dua na bula savasava?
E rawa talega ni taleitaki vakacava o Sisita Wendy W. Nelson, me vakataki Paula, vakauqeti ira na Yalododonu me ra bula savasava ena nona vosa “Na Veilomani kei na Vakawati” (Na Lotu e Vuravura Raraba ni Tabagone Qase Cake, Janu. 8, 2017, broadcasts.lds.org). E duatani vakacava na veidina e vakamacalataka o Sisita Nelson me baleta na loloma kei na veikilai titobu mai na veitukutuku kei vuravura?
Raica talega na Roma 1:24–27; “Bula Savasava,” iUlutaga Va-Kosipeli, topics.lds.org.
E vakatavuvulitaka li o Paula ni sa vinaka cake meda tawavakamau mai na vakamau?
E vica na tikina ena 1 Korinica 7 e vaka me nanumi kina ni ciqomi na vakamau, ia na nodra sega ni vakamau ka sega talega ni veiyacovi e vinaka cake. Ia, ena iVakadewa i Josefa Simici, 1 Korinica 7:29–33 (raica na Bible appendix) e vukei keda meda kila ni o Paula a vosa tiko vei ira na daukaulotu tudei, ena nona raica ni na vinaka cake na nodra qarava na Kalou ni ra sega ni vakamau ena gauna ni nodra kaulotu. E sa vakatavulica na Turaga mai vei ira na Nona talai, ka oka kina o Paula, ni vakamau e tiki ni Nona ituvatuva tawamudu ka sa gadrevi me rawati kina na bula vakacerecerei (raica na 1 Korinica 11:11; VV 131:1–4).
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
Ni ra wilika tiko na nomu lewe ni vuvale na veitikina oqo, sureti ira me ra raica na rai titobu ena rawa ni vukei ira me ra duavata vakalevu cake.
E rawa ni o wilika na veitikina oqo ni o kania tiko e dua na vakalomavinaka e caka mai na sucu kei na lewe ni manumanu, ka rawa ni o vakatauvatana ki na nodra tubu na gone me yacova na yabaki ni tabagone qase cake kei na nodra tubu tiko vakayalo.
E vakatauvatana o Paula na nona sasaga vakadaukaulotu kina teivaki ni sore ni kau. Na cava e vakatura na nona veivakatauvatani baleta na iwalewale meda wasea kina na kosipeli vei ira na tani?
Na vakatauvatani ni yagoda ki na valetabu, me vaka e vakayacora o Paula, sa rawa ni dua na sala momona me vakavulici kina na bibi ni vakatabui na yagoda. De na rawa beka ni o vakaraitaka na iyaloyalo ni valetabu eso, me vaka na kena era tiki tiko ni idusidusi oqo. Cava na vuna era ka tabu kina na valetabu? E tautauvata vakacava na yagoda kei na valetabu? Na cava eda rawa ni cakava meda qarava kina na yagoda me vaka na valetabu? (Raica talega na “Sexual Purity,” For the Strength of Youth, 35–37.) Kevaka e rawa, ni lako vata ki na valetabu se sikova na rara ni valetabu; oqo e rawa ni vaqaqacotaka na nomu veivosakitaka na bibi ni vakatabui ni valetabu ka vakakina na yagoda.
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakavinakataki ni Vuli Yadudua
Mo dau vosoti iko vakataki iko vakadede. E vakatavulica o Paula ni liu taumada na sucu ni bera na lewe ni manumanu ena gauna eda vulica tiko kina na kosipeli (raica na 1 Korinica 3:1–2). Kevaka o raica ni so na ivunau e dredre tiko me kilai ena gauna oqo, vosota toka. Mo nuitaka tikoga ni na yaco mai nai saunitaro ni o vakabauta tiko ka vuli tiko vagumatua.
E vakatauvatana o Paula na yagoda ki na bibi ni vakatabui ni valetabu. Tekivu ena imawi e cake ka cawiri vakaloko: Valetabu e Tijuana Mexico, Valetabu e Taipei Taiwan, Valetabu e Tegucigalpa Honduras, Valetabu e Houston Texas.