“29 ni Jiulai–4 ni Okosita. Cakacaka 22–28: ‘Dou na Qai Dautukuni Au’” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“29 ni Julai–4 ni Okosita. Cakacaka 22–28,” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019
29 ni Julai–4 ni Okosita
Cakacaka 22–28
“Meu Lesi Iko Me iTalatala kei na Dautukutuku”
Na veivakauqeti ni Yalo Tabu esa gauna ni vakadirorogo ka so na gauna e totolo sara. Na nomu vola na veivakauqeti ena rawa ni vakatara mo vakasamataka tale mai vakatitobu. Ni o wilika na Cakacaka 22–28, vola na veivakasama kei na veika o vakila e yaco mai vei iko ka taura na gauna mo vakasamataka vakatitobu.
Vola na Veika o Vakauqeti Kina
“Ni da sa italai ni Turaga,” Peresitedi Thomas S. A yalataka o Monson, “eda sa ganiti keda na veivuke ni Turaga” (“ki vuli, vakayacora, meda,” Ensign se Liaona, Nove. 2008, 62). Eda sega ni vakaivotavota, ena gaunisala maravu kei na veigauna tawacava ni rawa-ka. Na ivakadinadina ni veika oqo, sai koya meda kakua ni rai vakayawa, ka raici Paula ga na iApositolo. Na nona itavi mai vua na iVakabula sai koya “me kauta na yacaqu ki na matadra na veimatanitu tani, kei ira na tui eso, kei ira na luve i Isireli” (Cakacaka 9:15). Ena wase 22–28 ni Cakacaka, eda raica na nona vakayacora tiko o Paula na itavi oqo kei na veisaqasaqa levu e sotava—vesuki, valeniveivesu, vakararawataki vakayago, vakacacani nona waqa, ka laukati sara madaga ena gata. Eda raica talega ni o Jisu “sa tu voleka vua na Turaga, ka kaya, Mo vakacegu ga, Paula” (Cakacaka 23:11). Na veika e sotava o Paula e dua na veinanumi veivakauqeti ena gauna e ciqoma kina na Nona veikacivi na italai ni Turaga “o koya mo dou qai lako … ka vakalotutaki ira na lewe i vuravura kecega,” ena vakavotukanataka na Nona i yalayala vei ira: “Au sa tiko vata kei kemudou ena veisiga kecega, ka yacova nai vakataotioti kei vuravura” (Maciu 28:19–20).
Vakasama eso ni Vuli iVolanikalou Yadua
Era sa wasea vakadoudou na nodra ivakadinadina na tisaipeli i Jisu Karisito.
Ena gauna e wasea kina o Paula na ivakadinadina mana ka volai tu ena Cakacaka 22 kei na 26, e vesu tu vei ira na mataivalu i Roma. Na tamata e vosa tiko kina o koya e tu vei ira na kaukauwa me ra vakatauca na lewa me vakamatei. Ia e digitaka sara vakadoudou me vakadinadinataki Jisu Karisito kei na “raivotu vakalomalagi” (Cakacaka 26:19) ka sa ciqoma. Na cava e vakauqeti iko me baleta nona vosa? Vakasamataka mada na veigauna e rawa ni o wasea kina na nomu ivakadinadina. Me ivakaraitaki, na cava nai otioti ni gauna o tukuna ki na nomu vuvale se o ira na tani me baleta na gauna o rawata na nomu ivakadinadina ni kosipeli?
Na cava e tiko kina na duidui ena tolu na itukutuku ni raivotu i Paula me baleti Jisu Karisito?
Na ivola ni Cakacaka e tiko kina e tolu nai tukutuku ni raivotu mana i Paula ena sala ki Tamasiko (raica na Cakacaka 9:3–20; 22:1–21; 26:9–20). Na veitukutuku yadua oqo e duidui vakalailai mai na kena vo, ka so e matata cake na kena itukutuku mai na kena vo. Baleta ni a tukuni na itukutuku oqo kina vavakoso duidui ka duidui talega na kena inaki, esa na matata kina ni a digitaka o Paula me vakabibitaka na veitikina duidui eso ena veika e sotava vei ira na vavakoso yadua.
Me vaka ga, nona vola e vica vata nai tukutuku ni nona Matai ni Raivotu o Josefa Simici (raica na “Ai Matai ni Raivotu,” Ulutaga Va-Kosipeli, topics.lds.org). Na veitukutuku duidui oqo e soli ki na vavakoso duidui eso ena inaki duidui talega ka vakarautaka na rai titobu ena sega ni tiko kevaka e tiko ga e dua nai tukutuku.
Cakacaka 23:10–11; 27:13–25, 40–44
Na Turaga e tu e yasadra na saga me ra vakataki Koya.
Me vaka e vakaraitaka vakamatata na veiqaravi nei Paula, na veidredre ena noda bula e sega ni vakatakilakila ni sega ni duavata na Kalou kei na cakacaka eda vakayacora tiko. Na kena dina, ena so na gauna eda vakila saraga na kaukauwa ni Nona veitokoni ena veigauna dredre oqori. Ena rawa ni ka marautaki meda railesuva na veika o sa wilika mai ena veiqaravi nei Paula ka tuva eso na ka e sotava ka vosota o koya (raica na veitikina oqo, me kena ivakaraitaki, Cakacaka 14:19–20; 16:19–27; 21:31–34; 23:10–11; 27:13–25, 40–44). E tu vakacava e yasana na Turaga, kei na cava e vakatavulica vei iko me baleta na nomu sasaga ena veiqaravi ni Turaga?
Cakacaka 24:24–27; 26:1–3, 24–29; 27
E rawa ni’u digitaka me’u ciqoma se cakitaka na vosa ni Kalou vei ira na nona italai.
Ena gauna taucoko ni nona veiqaravi, e kaukauwa sara nona vakadinadinataki Jisu Karisito kei na Nona kosipeli o Paula. E vuqa na tamata era ciqoma na nona i vakadinadina, ia era sega ni o ira kece. Ni o wilika na Cakacaka 24:24–27 kei na Cakacaka 26:1–3, 24–29, vola na vosa kei na malanivosa e vakaraitaka na sala cava era saqata kina na dauvakatulewa mai Roma e Jutia ki na vakavuvuli i Paula:
Filikesa
Fesito
Tui o Akaripa
Ena gauna e lako tiko kina ki Roma me lewai vei Sisa, e parofisaitaka o Paula ni “na levu na ka ca” ena yaco ki na waqa kei na usana (Cakacaka 27:10) Wilika na wase 27 me laurai kina na cava na nodra nanuma na kaimua ena ivakaro nei Paula. O kunea beka eso na lesoni e baleti iko ena veika e sotavi oqo?
O sa bau vaka beka e dua vei ira na tamata oqo ena gauna o rogoca kina na nodra ivakavuvuli na liuliu ni Lotu? Na cava so e rawa ni yaco me isau ni veika o vakayacora ena sala oqo? Na cava osa vulica mai nai tukutuku eso oqo me baleta na vakamuri ni vakasala ni Turaga mai vei ira na Nona italai?
Raica talega na 2 Nifai 33:1–2; Joseph Smith—History 1:24–25; D. Todd Christofferson, “A Domo ni iVakasala,” Ensign se Liaona, Me 2017, 108–11.
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
Ni bera na nona curu ena lotu o Paula, e vuqa sara na nona cala vua na Kalou ena nona veigauna sa oti. Baleta ni a vinakata me veivutuni, sa rawa ni kaya kina, “Au sa sega ni taqaya se yalolailai kina, raica au sa kila ena vu ni yaloqu, ni’u sa sega ni cala vua na Kalou se vei ira na tamata” (raica talega na VV 135:4). Ena rawa vakacava ni da kauta tani mai vu ni yaloda na noda cala vua na Kalou kei ira na tani?
Ena veitikina oqo, na cava e kacivi Paula kina na Kalou me cakava? Na madigi cava soti e tu vei keda me da vakayacora na veika oqo?
E dua beka ena nomu vuvale e taleitaka na gata? O na via kerea na tamata oya se dua tale na lewe ni vuvale me talanoataka na italanoa oya e kune ena Cakacaka 28:1–9. Eratou na taleitaka beka na luvemu me ra droinitaka nai yaloyalo ni veitalanoa se vakatasuasuataka. Na lesoni cava soti eda rawa ni vulica mai na veitukutuku oqo? E dua e rawa ni dau vakayacora na Nona yalayala na Turaga vei ira na Nona italai. Me ivakaraitaki, e rawa ni o vakatautauvatataka na yalayala e vakayacori ena Marika 16:18 kei na kena vakavotukanataki ena veika e sotava o Paula. Ena rawa ni o kunea ena dua na vosa ena koniferedi raraba se qai vakayacori ga e dua na yalayala e cakava e dua na italai ni Turaga—de dua beka e vakaibalebale kina nomu vuvale—qai vakaliliga tu ena nomu vale. Ena rawa vakacava nida vakaraitaka na noda vakabauta ni na vakavotukana na yalayala oqori?
E taqomaki Paula na Kalou ni a kati koya e dua na gata gaga.
Me vaka na Lotu ena gauna i Paula (e vakatokai me “wasewase” ena tikina 22), e dau “vosa vakacacataki” na Lotu ena gauna oqo. Ni ra vosataka nai Vakabula kei na Nona Lotu, e cava e cakava o Paula? Na cava e rawa ni da vulica mai na ka e a sotava o Paula?
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakatorocaketaki Noda Veivakavulici
Vakanamata ki na ivakavuvuli ena vakalougatataki ira nomu vuvale. Ni o vulica nai volanikalou, tarogi iko, “Na cava au na kunea eke ena rawa ni vakaibalebale vakabibi ki na noqu vuvale?” (Raica na Veivakavulici ena iVakarau ni iVakabula 17.)
Qaqa ena Vakadinadina i Jisu Karisito, mai vei Daniel A. Lewis. E tu e matana na Tui o Akaripa